Rom 3:4 - Sơ̆p Hlabơar Nơ̆r 'Bok Kei-Dei

⁴ Đêl Sư pơkă lê̆ hơdrol Sư gô pơm 'blep thoi Sư pơkă tơpă. Mă kon bơngai bơ̆n juăt kơ hơlĕnh kơ Sư, kuă kơ kiơ̆ 'bơ̆r đon Sư mă-lei Sư oei pơm 'blep kơ nơ̆r Sư pơkă đĕch, Sư ưh kơ hơlĕnh thoi bơ̆n ôh. Na tơdrong noh 'blep thoi tơdrong đe chih roi lê̆ sơ̆ tơpă, sư khan thoi âu: “Ơ Kră Yang, Ih pơma 'lơ̆ng, pơma tơpăt ling-lang. Na kon bơngai wă sek tơlang tơdrong Ih, mă-lei lu sư ưh kơ gơh sek tơlang thoi yơ, yua kơ Ih pơm tơpăt kiơ̆ kơ nơ̆r Ih pơkă ngăl.”

Rom 3:4 Iomraidhean Croise

Jop 36:3

Inh chă pơpôi tơdrong gơh hơgei đơ̆ng lơ anih. Wă tơ'bôh Tơ'ngla pơjing inh 'lơ̆ng tơpăt.

Jop 40:8

Ih hăm pơ̆n sơngah hŭt lê̆ tơdrong Inh sek tơlang? Khan jô̆ Inh yoch wă pôk kơdih ih khan tơpăt hă?

Horiso 100:5

Yua kơ Kră Yang 'lơ̆ng, tơdrong 'mêm Sư oei oei ling-lang. Păng tơdrong 'lơ̆ng tơpăt Sư dĭng truh tơ ning-mônh.

Horiso 116:11

Lăm năr inh hli tơtăm inh khan: “Rim 'nu bơngai tă kơ pơma hơlĕnh ngăl.”

Horiso 119:160

Đĭ dôm nơ̆r Ih pơma jơ̆ sĭt tơpă. Dôm nơ̆r tơtă 'lơ̆ng tơpăt Ih oei oei ling-lang,

Horiso 138:2

Inh gô drap kơkuh 'bơ̆t anih rơgoh Ih. Bơnê kơ anăn Ih yua kơ tơdrong 'mêm păng tơdrong sĭt tơpăt Ih. Yua kơ Ih đei pơm ăn kơ anăn păng nơ̆r Ih đei pơyom tih hloh kơ đĭ-đăng,

Horiso 51:4

Inh pơm yoch boih hăm Ih. Lăp minh 'nu Ih đĕch, păng pơm kơnê̆ boih 'bơ̆t anăp Ih. Ih tơpăt, mưh Ih sek tơdrong păng trŏ 'lơ̆ng dah Ih sek tơlang.

Horiso 62:9

Sĭt tơpă, bơngai đe ưh kơ gĭt thoi kial dui jơhngơ̆m. Bơngai đe gĭt 'biơ̆ kư̆m tơdrong kơ đei. Atŏk tơ kơpal kĭ lu sư phiơl. Đĭ lu sư hơiơch hloh kơ hơyuh kial dui jơhngơ̆m.

Mi 7:20

Ih gô pơm 'long tơpăt tơ'bôh kơ Jakôp păng 'mêm mơnat kơ Abraham, noh boih mă tơdrong Ih đei pơkăm pơkă hăm lu 'bok yă lu nhôn đơ̆ng năr sơ̆ ki sơ̆ kach.

Mathiơ 11:19

Na gah Inh Kon Bơngai jur tơ teh âu, sŏng sa mơh 'nhot hơdai kon bơngai, na đe jô̆ kơ Inh khan bơngai sa bơlŭk, et dư, tơbôl hăm bơngai iŏk jên thuê̆, lu bơngai yoch mơ̆n. Mă-lei dah bơ̆n 'bôh đe jang 'lơ̆ng, bơ̆n băt kơ đe jang trŏ jang hơgei.”

Luka 20:16

Sư gô năm pơlôch pơđĭ lu bơngai noh, na sư pơjao ăn kơ lu bơngai nai jang dơ̆ng.” Lăp lu bơngai mơ̆ng Yêsu bơtho kơtơ̆ng thoi noh, na lu sư khan: “Apinh 'Bok Kei-Dei 'nĕ ăn tơdrong noh truh tơ nhôn.”

Yo 3:33

Bơngai bu lui kơ nơ̆r Sư bơtho, bơngai 'noh sư lui kơ 'Bok Kei-Dei pơma sĭt tơpă,

Rom 11:1

Thoi noh ră, mă-lei 'Bok Kei-Dei hăm hŭt lê̆ đe Isơrael? Ưh ôh, Sư oei 'mêm tơpă. Na inh âu boih bơngai Isơrael kư̆m kon sâu Abraham; inh đơ̆ng adrĕch adrung 'bok Bênjamin.

Rom 11:11

Lu bơngai Isơrael mă khan bơngai yoch dang noh, 'Bok Kei-Dei ưh kơ achăng lê̆ lu sư hlŏng hloi ôh. Yua kơ lu bơngai Isơrael yoch, na 'Bok Kei-Dei pơklaih lu bơngai nai hơdrol, wă kơ lu bơngai Isơrael 'nhĕng na lui kiơ̆ thoi lu bơngai nai noh.

Rom 3:31

Thoi noh boih, mă-lei bơ̆n hăm wă hŭt lê̆ tơdrong juăt 'Bok Kei-Dei pơkă sơ̆? Ưh ôh, bơ̆n kư̆m oei kiơ̆ mơ̆n, bơ̆n lui kơ Yêsu 'mơ̆i na bơ̆n kĕ kiơ̆ tơdrong juăt Sư pơkă noh.

Rom 6:15

Dah bơ̆n ưh pă gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă, lei bơ̆n hơđơ̆ng tơpă, bơ̆n gô mơ̆ng kơ 'Bok Kei-Dei tơgŭm bơ̆n. Mă-lei bơ̆n 'nĕ tơchĕng khan dah bơ̆n ưh pă gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă, khan bơ̆n gơh pơm yoch. Ưh ôh.

Rom 6:2

Yua kơ bơ̆n bơngai dang lĕ kơ lôch boih, liơ gơh pơm yoch dơ̆ng?

Rom 7:13

Na ưh kơ sĭ tơdrong juăt 'Bok Kei-Dei pơkă mă 'lơ̆ng noh pơm kơ inh trŏ kơ wă lôch răm ôh. Tơdrong juăt 'Bok Kei-Dei tơbăt kơ inh bơngai yoch, mă inh yoch noh yua kơ tơdrong kơnê̆ oei lăm jơhngơ̆m inh, sư pơm kơ inh yoch kơ tơdrong juăt 'Bok Kei-Dei pơkă na trŏ kơ lôch răm. Thoi noh bơ̆n băt boih tơdrong kơnê̆ oei lăm jơhngơ̆m bơ̆n kơnê̆ tơpă.

Rom 7:7

Mă-lei iĕm 'nĕ tơchĕng khan inh jô̆ kơ tơdrong juăt 'Bok Kei-Dei pơkă ưh kơ 'lơ̆ng, ưh ôh hŏ. Tơdrong juăt 'Bok Kei-Dei pơkă 'lơ̆ng tơpă. Sư tơbăt ăn kơ bơ̆n đei tơdrong yoch. Tơ̆ng bơ̆n ưh kơ đei tơdrong juăt 'Bok Kei-Dei pơkă, lei bơ̆n ưh kơ băt bơ̆n đei tơdrong yoch ôh. Pơtih gia kơ akâu inh kơdih thoi âu: Sơ̆ inh ưh kơ băt kơ tơdrong juăt 'Bok Kei-Dei khă kuă ăn bơ̆n 'nhĕng mŭk tơmam đe, mưh 'nhĕng jing yoch tơpă; na inh ưh kơ băt kơ tơdrong 'nhĕng noh yoch.

Rom 9:14

Bơ̆n 'bôh 'Bok Kei-Dei ưh kơ 'mêm kơ bre noh dang ăi, mă-lei bơ̆n 'nĕ tơchĕng khan 'Bok Kei-Dei ưh kơ tơpăt.

I Kor 6:15

Iĕm ưh kơ băt ôh hă rim 'nu kơ bơ̆n gơh pơgơ̆p minh chăl lăm akâu Yêsu Krist? Na iĕm wă kơ bơ̆n pơgơ̆p dơ̆ng minh chăl tơ akâu drŏ-kăn đi dơ̆ng hă? Ưh ôh.

II Kor 1:18

Ưh ôh. 'Bok Kei-Dei ling-lang pơm trŏ thoi Sư pơkă, na nhôn kư̆m lei-lăi. Dôm tơdrong nhôn pơkă nhôn athei pơm hloi; ưh kơ sĭ nhôn pơkă phŏ 'blep phŏ ưh. Ưh kơ thoi noh ôh.

Galati 2:17

Dang ei nhôn lui kơ Yêsu Krist wă kơ 'Bok Kei-Dei jô̆ nhôn bơngai 'lơ̆ng tơpăt hăm Sư, na nhôn huay pă kăl kiơ̆ tôm tơdrong juăt Môis kư̆m lei-lăi thoi bơngai ưh kơ sĭ khŭl Juđê sư ưh kơ kiơ̆ tơdrong juăt Môis ôh. Na iĕm tơchĕng thoi yơ dang ei? Iĕm tơchĕng dôm tơdrong juăt 'Bok Kei-Dei, Yêsu Krist kuă ăn bơ̆n lui hă? Ưh ôh.

Galati 2:21

Dah 'Bok Kei-Dei jô̆ bơ̆n bơngai 'lơ̆ng tơpăt hăm Sư yua kơ bơ̆n lui kiơ̆ tơdrong juăt Môis đĕch, lei Yêsu Krist lôch tang bơ̆n tơ 'long pơglang noh ưh kơ yua kiơ ôh kơ bơ̆n. Gah inh, inh băt tơpă 'Bok Kei-Dei jô̆ inh bơngai 'lơ̆ng tơpăt hăm Sư yua kơ Kon Sư lôch tang yua kơ tơdrong yoch inh.

Galati 6:14

Gah inh ưh kơ đei pơang akâu inh kơdih ôh, inh wă pơang đe gah 'long pơglang Yêsu đĕch. Yua kơ Kră Yang Yêsu Krist lôch tang inh tơ 'long pơglang tơpă na inh lê̆ đĭ-đăng tơdrong ala teh âu, dang lĕ inh pơ̆ng lê̆ dôm tơdrong ala teh âu tơ 'long pơglang, kư̆m dang inh lôch tơ 'long pơglang ưh pă kiơ̆ dôm tơdrong ala teh âu.

Both 32:4

Kră Yang thoi Tơmo Tih 'lơ̆ng tôm; lu tơdrong Sư jang keh dang 'lơ̆ng tôm, trong Kră Yang tơpăt hơnơ̆ng. Sư boih Kră Yang 'Bok Kei-Dei sĭt, 'lơ̆ng tơpăt ưh kơ đei hơlĕnh. Sư tơpăt ling-lang 'lơ̆ng hơnơ̆ng.

I Tim 3:16

Tơdrong lui bơ̆n tih hloh tơpă: Kră Yang jur jing bơngai, Yang Bơhngol 'Lơ̆ng tơbăt kơ đe Sư bơngai 'lơ̆ng tơpăt. Lu linh jang 'lơ̆ng kư̆m 'bôh Sư mơ̆n. Na lu bơngai lui kơ Sư bơtho tơdrong Sư tơ teh đak đe. Đei lơ bơngai lui kơ Sư tơ ala teh âu, klaih kơ noh 'Bok Kei-Dei atŏk Sư tơ Pơlei 'Lơ̆ng Sư.

Hêbrơ 6:18

'Bok Kei-Dei pơkă wă tơgŭm bơ̆n tơdrong noh, Sư pao anăn Sư kơdih hloi, na bơ̆n băt kơ tơdrong Sư pơkă noh Sư ưh kơ gơh lê̆ ôh, yua kơ Sư ưh kơ lah hơlĕnh. Thoi noh na lu bơ̆n mă kơdâu kơ'nơp tơ akâu Sư, bơ̆n băt kơ Sư wă tơgŭm bơ̆n tơpă.

I Yo 5:10

Bơngai bu lui kơ Kon 'Bok Kei-Dei, bơngai 'noh lăm to sư, sư băt tơpă gah tơdrong 'Bok Kei-Dei tơbăt gah Kon Sư. Bơngai bu ưh kơ lui kơ nơ̆r 'Bok Kei-Dei pơma, bơngai 'noh sư khan 'Bok Kei-Dei hơlĕnh kơlih kơ sư ưh kơ lui kơ nơ̆r 'Bok Kei-Dei pơma gah Kon Sư.

I Yo 5:20

Bơ̆n băt Kon pôm 'Bok Kei-Dei jur tơ bơ̆n boih. Sư roi tơbăt ăn kơ bơ̆n tôm tơdrong 'Bok Kei-Dei Kră Yang tơm tơpă. Bơ̆n pôm đon păng Kră Yang 'Bok Kei-Dei păng pôm đon păng Kon Sư Yêsu Krist mơ̆n. Yêsu Krist Sư kư̆m Kră Yang tơpă mơ̆n na Sư ăn kơ bơ̆n arih ling-lang.

Tơdrông Tơ'bôh 3:7

“Dang ei ih chih kơthơ pơtruh kơ kră wei-lăng hnam akŭm 'Bok Kei-Dei tơ Pơlei Philadêphi thoi âu: “Âu boih 'Bok mă 'lơ̆ng tơpăt, Sư chĕp khuă 'bok pơtao Đawit, Sư gơh pơih 'măng ăn kơ iĕm mơ̆t, ưh kơ đei bu gơh tang chơkăl dơ̆ng, Sư tang 'măng ưh kơ đei bu gơh pơih dơ̆ng, na dang ei Sư wă pơma kơ iĕm thoi âu: