Mathiơ 5:22 - Sơ̆p Hlabơar Nơ̆r 'Bok Kei-Dei

²² Na Inh bơtho iĕm dang ei thoi âu: Bơngai bu hil areh kơ 'nhŏng oh sư, bơngai 'noh trŏ kơ đe kư̆m rôp sek tơlang sư mơ̆n; bơngai bu pơjăm pơjuă 'nhŏng oh sư, bơngai 'noh trŏ kơ đe rôp sư tŏk sek tơlang tơ lu 'bok tih; bơngai bu pơjăm pơjuă 'nhŏng oh sư kơtul kơhlôh kơwao, lu bơngai thoi noh trŏ kơ 'Bok Kei-Dei wă phak sư lăm dơnâu ŭnh ning-mônh.

Mathiơ 5:22 Iomraidhean Croise

Bl 37:4

Lu 'nhŏng sư 'bôh 'bă sư 'mêm kơ Jôsep hloh kơ lu sư, na lu sư đei jơhngơ̆m klai monh kơ Jôsep, đơ̆ng noh ưh pă gơh pơma pơ'lơ̆ng hăm sư dơ̆ng.

Bl 37:8

Na lu 'nhŏng sư tơl: Lei e gô pơm yŏng lu bơ̆n hă? Lu 'nhŏng sư rai blĕk dêh yua kơ đơ̆ng sư apo noh.

II Sam 16:7

Simêi hiap Đawit khan: “Ơ bơngai pơlôch đe. Bơngai kư̆ kă! Weh bĕ, năm tơ nai bĕ!

II Sam 6:20

Đawit kư̆m dai brŏk wă sơkat pŭn hiôk kơ hnam dơnŏ sư kơdih; mă-lei Mikal kon adruh Sôl, năm sơng Đawit, na khan: “Năr 'nâu pơtao đe Isơrael pơm kơdih akâu wă kơ đei ư-ang, mah suang akâu hoh 'bơ̆t anăp lu đam drŏ-kăn sư, pơm thoi bơngai ưh kơ rơ-a kiơ!”

I Pot 21:4

Ahap mơ̆t tơ lăm hnam jơhngơ̆m ưh kơ hiôk păng sơ'ngon dêh yua kơ nơ̆r Nabôt, bơngai Jêsreel; đei khan kơ pơtao: “Inh ưh kơ gơh ăn kơ ih ôh tơmam đơ̆ng lu 'bok kơdră inh. Ahap mơ̆t 'bĭch tơ giơng tep om ơh sơ'ngon ưh kơ sŏng sa.

II Ho 16:10

Asa sư hil kơ bơngai khan lê̆ adrol noh dêh na rôp phak. Kơplah noh Asa kư̆m pơm kơnê̆ kơ lu kon pơlei hai.

II Ho 19:5

Sư pôk lu 'bok sek tơlang lăm rim pơlei kơjăp lăm dêh char Juđa.

Ne 5:8

Khan thoi âu: “Kiơ̆ kơ lu bơ̆n gơh đei huai boih 'nhŏng oh lu bơ̆n, bơngai Juđa mă đe tĕch tơ lu adrĕch nai, na dang ei iĕm wă 'maih tĕch lu 'nhŏng oh bơ̆n dơ̆ng hă? Na lu sư wă tĕch tơ lu bơ̆n dơ̆ng hă?” Lu sư ngăn hreh ưh pă gơh wă pơma kiơ dơ̆ng.

Horiso 109:3

Lu sư pơma hăm nơ̆r hil areh wang tăp kơ inh. Blah inh hăm tơdrong ưh kơ đei.

Horiso 14:1

Lu bơngai kơtul khan lăm jơhngơ̆m; “Ưh kơ đei Kră Yang 'Bok Kei-Dei.”* Lu sư ôm răm, pơm dôm tơdrong kơnê̆.

Horiso 25:3

Tơpă, dôm lu bơngai gơnang kơ Ih. Ưh kơ đei mơlâu, Ăn bĕ kơ lu bơngai ưh kơ chu lui gô mơlâu.

Horiso 35:19

'Nĕ ăn kơ lu bơngai pơm kơnê̆ kơ inh tơdrong kơ đei chơt hiôk. Kŭm 'nĕ kơ lê̆ lu areh kơ inh, kơ'mreh măt tơdrong kơ đei yua kơ Ih.

Horiso 37:8

Ĕnh bĕ kơ hil păng lê̆ pă blĕk; Lê̆ kơ hiơ̆k tơdrong noh gô truh kơ tơdrong kơnê̆.

Horiso 49:10

Yua kơ sư 'bôh bơngai hơgei lôch, lu bơngai wơnh păng lu kơtul kơwao kư̆m lôch lei-lăi mơ̆n. Mŭk tơmam sư kơ đe nai.

Horiso 69:4

Lu bơngai areh kơ inh tơdrong kơđei, lơ hloh kơ sŏk kơpal kơ̆l inh; Lu pơm ayăt kơ inh tơdrong kơ đei, lu bơngai wă pơrăm inh kơtang tơpă. Inh athei 'mong dôm tơmam mă inh ưh kơ tơtông iŏk ră.

Horiso 7:4

Dah inh tơtông iŏk đơ̆ng bơngai mă oei hiôk-hian hăm inh, păng pơm kơnê̆ boih, bu pơm kơnê̆ kơ inh tơdrong ưh kơ đei.

Horiso 92:6

Lu bơngai kơwao ưh kơ gơh băt, lu bơngai kơtul kư̆m ưh kơ gơh hlôh,

Tơdrông Pơđơk 14:16

Bơngai hơgei đei đon hli păng weh ataih đơ̆ng tơdrong yoch. Mă-lei bơngai kơwao rai pơang kang ưh kơchăng.

Tơdrông Pơđơk 18:6

'Bơ̆r lu bơngai kơwao ba tơdrong pơjah; 'Bơ̆r pơma pơgreh chă đe teh sư kơdih.

Je 17:11

Bơngai mă mơdrŏng đơ̆ng ưh kơ tơpăt, lu sư thoi sem trăk-tra 'nơ̆m kơtăp sem nai, đei cheh kon ưh kơ trŏ kon sư, ưh kơ đunh tơdrong mơdrŏng sư gô hiong đĭ, na tuch-luch đe jô̆ sư kơtul bơlŭk.

Nhom 3:52

Lu bơngai pơm kơ inh tơdrong ưh kơ đei, Druh prah inh thoi druh prah sem.

Da 3:13

Thoi noh pơtao Nebukatnessar 'brik blĕk hil, athei đe chông Sadrak, Mêsak, Abetnigo năm tơ sư, na đe năm ba lu đe ei truh 'bơ̆t anăp pơtao.

Da 3:19

Đơ̆ng noh pơtao Nebukatnessar rai blĕk muh măt sư đum rak hil kơ Sadrak, Mêsak, Abetnigo păng krao đe rŭk ŭnh mă dêh tŏ hloh dang tơpơh wơ̆t kơ adrol hei.

Ob 1:10

Noh yua kơ đơ̆ng tơdrong kơnê̆ ih pơm kơ oh ih Jakôp, mă ih gô pŭ iŏk mơlâu păng lôch hiong ling-lang hlong hloi!

Ob 1:12

ô! Rŏ kơ ih lê̆ kơ lăng ră năr pơmat-tat truh kơ 'nhŏng oh ih, ih 'nĕ kơ chơt hiôk lăm năr đe pơlôch lu kon sâu Juđa; kư̆m 'nĕ pơma pơang lăm năr lu sư pơmat-tat.

Mathiơ 10:17

Iĕm athei kơchăng, yua kơ đe gô rôp iĕm jao kơ lu kră sek tơlang păng tôn teh iĕm tơ hnam akŭm đe Juđê.

Mathiơ 10:28

Iĕm 'nĕ hli kơ đe pơlôch akâu iĕm, mă-lei bơhngol iĕm sư ưh kơ gơh pơlôch ôh. Iĕm athei hli kơ 'Bok Kei-Dei đĕch, Sư gơh pơrăm akâu iĕm hăm bơhngol iĕm tơ dơnâu ŭnh.

Mathiơ 12:24

Lu bơngai Pharisi kơtơ̆ng thoi noh, lu sư khan: “'Noh đơ̆ng yang Belsêbul yŏng yang kơnê̆ tơgŭm Sư na Sư gơh pơpuh lu yang kơnê̆ noh.”

Mathiơ 17:5

Kơplah Pêtrôs oei pơma thoi noh 'bôh glĭp kơ hơmơ̆l kok rang hơdah jur gom lu sư. Păng đei nơ̆r 'Bok Kei-Dei pơma đơ̆ng lăm hơmơ̆l noh khan: “Sư âu Kon Inh mă 'mêm kơeng tơpă, Inh lăp đon kơ Sư dêh. Na iĕm ling-lang athei chu yom kơ Sư.”

Mathiơ 18:21

Pêtrôs năm jet Yêsu: “Ơ 'Bok, dah inh đei 'nhŏng oh bơngai lui, sư pơm kơnê̆ hil kơ inh, truh dôm 'măng sư hil inh huay kơ jô̆ yo? Hăm trŏ hloh kơ tơpơh 'măng na inh jô̆ yo?”

Mathiơ 18:35

Tơdrong 'noh thoi noh boih, na 'Bă bơ̆n tơ plĕnh ti gô pơm kơ iĕm thoi noh mơ̆n, dah iĕm ưh kơ mơnat kơ tơdrong yoch 'nhŏng oh iĕm hăm đĭ jơhngơ̆m.”

Mathiơ 23:15

“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm kư̆ kơ năm bơtho jơ̆p-jang kơ teh đak, tơ minh 'nu bơngai kư̆m năm bơtho, mă tơdrong bơtho, iĕm ưh kơ bơtho sư pơm 'lơ̆ng ôh, rai pơm kơnê̆ hloh kơ iĕm dơ̆ng.

Mathiơ 23:33

Iĕm pơm thoi lĕ kơ klăn tih 'bih tur makkang, ning-mônh 'Bok Kei-Dei phak iĕm lăm dơnâu ŭnh tơpă.

Mathiơ 25:41

“Klaih kơ noh Inh pơma kơ lu bơngai mă oei gah 'ngiĕo kơ Inh dơ̆ng thoi âu: ‘Dang ei 'Bok Kei-Dei wă phak iĕm boih, iĕm jah weh đơ̆ng âu kơdâu năm tơ dơnâu ŭnh to bĕ. Ŭnh noh ưh kơ layơ păt, ŭnh noh 'Bok Kei-Dei hơmet ăn kơ yang Satan păng đĭ-đăng kơ lu linh jang kơ sư năm oei tơ lăm dơnâu ŭnh noh.

Mathiơ 26:59

Lu 'bok soi tih păng đĭ-đăng lu kră sek tơlang, lu sư chă bơngai mă gơh hơlĕnh, khan sư 'bôh Yêsu pơm yoch, wă kơ lu sư gơh pơlôch Yêsu.

Mathiơ 3:17

Păng kư̆m đei nơ̆r pơma đơ̆ng plĕnh khan: “Âu boih Kon Inh mă 'mêm kơeng tơpă, Inh lăp đon kơ Sư tôm tơdrong.”

Mathiơ 5:34

Na Inh bơtho iĕm dang ei thoi âu: Dôm tơdrong iĕm pơkă wă kơ đe băt kơ iĕm gô pơm, iĕm 'nĕ pă hiap akâu kơdih kơ 'Bok Kei-Dei dah hiap akâu kơ tơdrong kiơ nai. Thoi noh na iĕm 'nĕ pă pơkă pao anăn plĕnh, yua kơ plĕnh dang tang-dŏ 'Bok Kei-Dei tơoei, noh dang iĕm pơkă pao anăn 'Bok Kei-Dei mơ̆n.

Mathiơ 5:44

Mă-lei gah Inh bơtho iĕm thoi âu: Iĕm athei 'mêm mơnat kơ lu bơngai mă pơm kơnê̆ kơ iĕm, krao khan apinh 'Bok Kei-Dei tơgŭm sư,

Markôs 14:55

Lu 'bok soi tih păng đĭ-đăng lu kră sek tơlang, lu sư chă bơngai mă 'bôh Yêsu pơm tơdrong kơnê̆ wă kơ lu sư gơh pơlôch Yêsu. Mă-lei sư chă ưh kơ đei bu.

Markôs 15:1

Lăp 'brưch hơdah til pơgê na lu 'bok soi tih, lu đe kră, lu đe 'bok thây bơtho tơdrong juăt đe Juđê păng dôm lu 'bok sek tơlang, lu sư pơđâu dih băl. Đơ̆ng noh lu sư chô̆ Yêsu năm jao ăn kơ Pilat bơngai Rôm mă pơgơ̆r dêh Juđê.

Luka 12:5

Iĕm athei hli kơ 'Bok Kei-Dei mă gơh pơlôch akâu iĕm păng gơh hơtat iĕm tơ dơnâu ŭnh. Minh 'nu 'Bok Kei-Dei đĕch iĕm athei hli yom.

Luka 22:66

Lăp 'brưch hơdah til pơgê 'nei, lu 'bok soi tih păng lu 'bok thây bơtho tơdrong juăt đe Juđê, hăm đĭ-đăng lu kră nai mă pơgơ̆r bơngai Juđê akŭm dih băl. Na đe anhăk ba Yêsu tơ anăp lu sư. Na lu sư khan kơ Yêsu thoi âu:

Yo 11:47

Na lu bơngai Pharisi păng lu 'bok soi tih krao akŭm lu kră sek tơlang. Akŭm boih lu sư khan: “Bơ̆n wă pơm thoi yơ kơ Yêsu, yua kơ Sư gơh pơm lơ tơdrong mơsêh mơyang.

Yo 15:25

Đe chih khan lê̆ hơdrol lăm sơ̆p hla bơar tơdrong juăt lu sư sơ̆ khan: ‘Lu sư hil areh kơ Inh ưh kơ đei tơdrong kiơ.’ Yua kơ chih thoi noh na dang ei bơ̆n 'bôh 'blep trŏ thoi noh tơpă.

Yo 7:20

Lu kon pơlei pơla kơtơ̆ng sư pơma thoi noh na khan kơ sư: “'Noh Ih wơnh boih, bu đei chă wă pơlôch Ih? Ưh kơ đei bu ôh.”

Yo 8:48

Lu bơngai Juđê khan kơ Sư: “Trŏ boih nhôn khan Ih bơngai Samari yang mơ̆t.”

Jang 17:18

Đei lu 'bok thây bơtho tơdrong Êpikur păng lu 'bok thây bơtho tơdrong Sơtôk kư̆m pơjah păng Pôl mơ̆n. Đei bơngai mơ'nah khan kơ Pôl: “Bơngai 'bơ̆r đon kư̆ kă đĕch âu. Sư wă pơma tơdrong kiơ ră âu? Bơ̆n ưh kơ hlôh ôh iih?” Đei mơ'nah khan dơ̆ng: “Rŏ lăng sư bơtho tơdrong lu yang đe nai đĕch âu.” Lu sư pơma khan kơ Pôl thoi noh yua kơ Pôl bơtho sư gah tơdrong Yêsu lôch iung arih dơ̆ng.

Jang 22:30

'Bok tih linh wă kơ băt kơnăl tơpă tơdrong kiơ lu bơngai Juđê jâu areh kơ Pôl, na năr dơning dơ̆ng sư krao akŭm lu 'bok soi tih păng đĭ-đăng lu kră sek tơlang. Sư athei lu linh yaih tơlei glang mam đêl chô̆ sư na anhăk sư dơ̆ng 'bơ̆t anăp lu kră sek tơlang.

Jang 23:1

Pôl hue lăng lu kră sek tơlang na khan: “Ơ lu 'nhŏng oh, đơ̆ng sơ̆ khơ̆ dang ei inh pơm tơpăt, na jơhngơ̆m inh ưh kơ hli 'bơ̆t anăp 'Bok Kei-Dei.”

Jang 24:20

Dang ei ih ăn lu kră sek tơlang tơ âu đĕch roi kơ ih sư sek tơlang inh ki tơ Pơlei Jêrusalem inh đei tơdrong kơnê̆ kiơ hăm lu sư.

Jang 4:15

Na lu sư athei đe tơlĕch bre Pêtrôs păng Yôhan tơ 'ngoaih tŏ sĕt đĕch yua kơ lu sư wă pơđâu tơdrong noh kơdrô̆ lu sư.

Jang 5:21

Lu sư kơtơ̆ng thoi noh na 'năr lĕch pơgê dơning sư năm bơtho tơ hnam akŭm 'Bok Kei-Dei tơm thoi đêl. 'Bok soi tơm păng lu bôl sư năm truh tơ hnam sư akŭm. Sư krao lu kră sek tơlang păng khŭl lu kră dêh Juđê. Đơ̆ng noh lu sư wơh linh năm ba lu bơngai phak tơ lu kră sek tơlang ră.

Jang 5:27

Lu linh ei anhăk ba lu jơ̆ng 'bang Yêsu truh 'bơ̆t anăp lu kră sek tơlang. 'Bok soi tơm khan kơ lu jơ̆ng 'bang Yêsu:

Jang 6:12

Thoi noh lu sư pơchŭt lu kon pơlei pơla, đe kră sek tơlang păng lu kră bơtho tơdrong juăt Juđê. Đơ̆ng noh na đe năm rôp Êtien anhăk ba sư tơ anăp đe kră sek tơlang.

Jang 6:15

Đĭ-đăng bơngai oei tơ hnam sek tơlang 'bloh pơchơ̆k kơ Êtien, 'bôh muh măt sư nhen lĕ muh măt linh jang 'lơ̆ng 'Bok Kei-Dei mơ̆n.

Jang 7:37

Môis kư̆m khan kơ đe Isơrael thoi âu: ‘'Bok Kei-Dei gô ăn kơ iĕm minh 'nu bơngai đơ̆ng khŭl bơ̆n wă pơtruh nơ̆r Sư kư̆m thoi inh mơ̆n.’

Rom 12:10

Bơ̆n 'mêm kơ bôl, athei dang bơ̆n 'mêm kơ 'nhŏng oh bơ̆n kơdih. Bơ̆n 'nĕ bơnê kơ akâu bơ̆n kơdih, bơ̆n ling-lang athei bơnê kơ đe, pơm hiôk kơ jơhngơ̆m đe.

I Kor 6:10

lu bơngai tơtông, lu bơngai 'nhĕng kơ mŭk tơmam đe, lu bơngai et sik suai, lu bơngai oei hiĕk achơ̆ kơ đe, iĕm 'nĕ ngêh lu sư gơh tŏk oei tơ dêh char 'Bok Kei-Dei ôh.

I Kor 6:6

na iĕm ling-lang mă nŏng kơ chă lu kră ưh kơ lui sek ăn tơdrong iĕm?

Both 15:11

Yua kơ gô đei ling-lang lu bơngai dơnuh hin oei lăm dêh char, thoi noh, na inh hơpơi khan kơ iĕm; athei bơlang ti hơmrah asong kơ lu 'nhŏng oh bơngai dơnuh pơmat-tat mă oei hơdai lăm dêh char iĕm.

Both 16:18

Athei pôk ăn lu 'bok sek tơlang păng yŏng pơgơ̆r lăm lu adrĕch tơ lăm lu pơlei mă Kră Yang 'Bok Kei-Dei ăn kơ iĕm; wă gô sek tơlang kon pơlei hăm tơdrong tơpăt.

I Tes 4:6

Sư wă kơ bơ̆n gơ̆t tơdrong pơ'brơh kơ klo đe, dah akăn đe. Hơtai ki nhôn bơtho iĕm boih tơdrong 'noh khan 'Bok Kei-Dei wă phak dôm lu bơngai mă pơm kư̆ kă thoi noh.

Tit 3:2

Khan kơ lu sư 'nĕ bâu roi pơjăm đe, 'nĕ kơ hơwĕng kơ đe, bơ̆n pơm jơhngơ̆m dim păng đe.

Hêbrơ 12:25

Iĕm athei kơchăng, 'nĕ kơ sơngah kơ nơ̆r 'Bok Kei-Dei bơtho pơkă kơ iĕm. Tơ̆ng iĕm sơngah kuă kơ chu nơ̆r Sư pơma kơ iĕm, lei iĕm gô pŭ tơdrong phak thoi lu bơngai noh sơ̆ ưh kơ chu kơ nơ̆r Sư pơma kơ lu sư tơ ala teh âu, na 'Bok Kei-Dei phak lu sư. Na dang ei Sư pơma kơ bơ̆n đơ̆ng plĕnh, tơ̆ng bơ̆n sơngah kuă kơ chu kơ nơ̆r Sư, Sư wă phak lu bơ̆n tơpă.

Hêbrơ 5:9

Sư pơm dôm tơdrong tơnen 'blep thoi 'Bok Kei-Dei, na 'Bok Kei-Dei ăn kơ Sư pơm tơm gah tơdrong dŏng pơklaih dôm lu bơngai mă băt chu kơ Kon Sư, đơ̆ng tơdrong phak ăn arih ling-lang,

Ya 2:20

Ơ lu bơngai kơhlôh, iĕm ưh tam băt 'mơ̆i hă, tơdrong bơngai mă khan sư lui boih mă sư ưh kơ pơm kiơ̆, na iĕm wă kơ inh tơ'bôh kơ iĕm tơdrong bơngai mă lui ưh kơ yua noh hă?

Ya 3:6

'Bơ̆r kon bơngai bơ̆n kư̆m thoi ŭnh, pơma kơ đe mrĕp, gơh pơma tôm tơdrong kơnê̆; pơm kơ akâu bơ̆n kơdih kư̆m jing răm kơnê̆ 'mê̆-'mach; pơrăm akâu akar, pơrăm tơdrong arih jing hiong hiach. Ŭnh 'noh apoh iŏk đơ̆ng ŭnh khŭl sơmăt.

I Pet 2:23

Đe pơma kơnê̆ kơ Sư, Sư ưh kơ pơma kơnê̆ kơ đe; đe pơm pơmat Sư, mă-lei Sư ưh kơ pơma tơwih kơ đe. Sư gô mơ̆ng kơ 'Bok Kei-Dei đĕch, yua kơ Sư băt kơ 'Bok Kei-Dei sek tơlang tơpăt.

I Pet 3:9

Mă đe pơm kơnê̆ kơ bơ̆n, bơ̆n 'nĕ pơm tơwih kơ đe; mă đe pơma kơnê̆ kơ bơ̆n, bơ̆n 'nĕ pơma tơwih kơ đe, bơ̆n rai krao khan apinh 'Bok Kei-Dei mơnat kơ sư dơ̆ng. Bĭ 'Bok Kei-Dei kư̆m mơnat kơ bơ̆n na Sư krao iŏk bơ̆n jing kon Sư.

I Yo 2:9

Tơdrong pơkă 'noh thoi âu: Bơngai bu khan sư oei lăm tơdrong hơdah, sơmă oei hil areh kơ 'nhŏng oh sư ling-lang, bơngai 'noh oei lăm măng mu khơ̆ dang ei đĕch.

I Yo 3:10

Bơ̆n gơh kơnăl tơduă bơngai bơ̆n, bơngai bu kon 'Bok Kei-Dei, bơngai bu kon yang Satan sư phara thoi âu: Bơngai bu ưh kơ pơm 'lơ̆ng tơpăt păng ưh kơ 'mêm kơ 'nhŏng oh sư, bơngai 'noh ưh kơ sĭ kon 'Bok Kei-Dei ôh.

I Yo 5:16

Dah iĕm 'bôh 'nhŏng oh bơ̆n bơngai lui sư pơm yoch iĕm athei krao khan kơ 'Bok Kei-Dei kơ sư, na 'Bok Kei-Dei gô ăn kơ sư arih ling-lang. Sơmă đei 'bar khŭl tơdrong yoch. Minh khŭl noh bơ̆n 'bôh 'nhŏng oh bơ̆n pơm yoch, athei krao khan kơ 'Bok Kei-Dei tơgŭm sư. Minh khŭl dơ̆ng bơ̆n 'bôh 'nhŏng oh bơ̆n pơm yoch khŏm khŏm, inh ưh kơ đei athei iĕm krao khan tơgŭm sư dơ̆ng ôh. Bơngai bu pơm yoch thoi noh sư gô răm tơpă.

Ju 1:9

'Bok Mikael, 'bok mă pơgơ̆r tơduă lu sư linh jang 'lơ̆ng, kơplah yŏng yang kơnê̆ wă pơjei iŏk atâu Môis, 'bok Mikael ưh kơ pơ̆n pơma jâu kơnê̆ kơ yang ei ôh. Sư pôm pơma thoi âu đĕch: “Inh gô mơ̆ng kơ 'Bok Kei-Dei đĕch khă e.”

Tơdrông Tơ'bôh 20:14

Đơ̆ng noh dêh atâu păng yŏng pơgơ̆r tơdrong lôch kư̆m trŏ kơ tơlơ̆ sư tơ dơnâu ŭnh mơ̆n. 'Noh tơdrong lôch mă 'bar.