Mathiơ 3:11 - Sơ̆p Hlabơar Nơ̆r 'Bok Kei-Dei

¹¹ Inh pơm kơ iĕm 'batem păng đak, wă kơ đe băt kơ iĕm tơbral kơdih tơdrong yoch boih. Mă-lei đei minh 'nu 'Bok wă truh đơ̆ng rŏng kơ inh, Sư 'Bok tih tơpă. Dah Sư athei inh chĕp ăn pôm chơkhŏ Sư đĕch, inh kư̆m ưh kơ hơnhŏ 'mơ̆i, ưh kơ pơ̆n ngơk lăng Sư ôh. Sư ei gô pơm kơ iĕm 'batem thoi âu: Sư gô ăn kơ iĕm Yang Bơhngol 'Lơ̆ng pơm kơ iĕm tŭk lê̆ dôm tơdrong kơnê̆ kư̆m thoi ŭnh soh lê̆ hla đuih đăm.

Mathiơ 3:11 Iomraidhean Croise

Êsai 4:4

Kră Yang gô ôp hơrao tơdrong pơm 'mê̆-'mach lu bơngai lăm Siôn, sek tơlang chhut rơgoh đĭ pham lăm pơlei Jêrusalem hăm Tơdrong Mơsêh Sư.

Êsai 44:3

Inh gô tuh ăn đak tơ tơring char rơhing. Ăn đak glung ro tơ anih hrĕng kro, Inh gô tuh Yang Bơhngol Inh tơ adrĕch adrung lu iĕm, Inh gô ăn pŭn hiôk kơ lu kon sâu iĕm.

Sa 13:9

Inh gô tah minh puăt lăm pêng noh tơ lăm ŭnh Inh, 'buh lu sư thoi đe 'buh hu, pơlong lăng lu sư thoi đe 'buh maih; lu sư gô ôr krao anăn Inh păng Inh gô tơl tơwih nơ̆r sư; Inh gô khan thoi âu: ‘Noh boih kon pơlei Inh âu.’ Lu sư gô khan: ‘Kră Yang noh Kră Yang 'Bok Kei-Dei inh.’ ”

Mathiơ 3:6

Lu sư roi tơdrong yoch lu sư kơ 'Bok Kei-Dei, na Yôhan pơm kơ lu sư 'batem tơ krong Jôrđăn.

Markôs 1:4

Tơdrong 'noh 'blep tơpă: Yôhan năm pơm 'batem kơ đe tơ char glă chơngue, sư bơtho athei đe tơbral kơdih tơdrong yoch, na iŏk 'batem wă kơ 'Bok Kei-Dei pơklaih yoch sư.

Luka 1:17

Kră Yang bơ̆n wă jê̆ jur na kon ih ei gô năm hơdrol kơ Kră Yang. Sư đei Yang Bơhngol 'Lơ̆ng ăn kơ sư jing pran kơtang tơpă kư̆m thoi Êli sơ̆. Sư gô tơgŭm kon pơlei Isơrael 'mêm mơnat kơ lu kon sư. Sư gô tơgŭm lu bơngai ưh kơ lui tơbral kơdih tơdrong yoch na wă kơ đei đon 'lơ̆ng. Yua kơ thoi noh na sư hơmet ming kon bơngai adrol kơ Kră Yang truh.”

Luka 3:16

Mă-lei Yôhan khan kơ lu sư thoi âu: “Inh pơm kơ iĕm 'batem păng đak đĕch, mă-lei đei minh 'nu Sư gô truh đơ̆ng rŏng kơ inh noh Sư 'Bok tih tơpă, dah Sư athei inh iŏk ăn pôm chơkhŏ Sư, inh chu iŏk đĕch, ưh kơ pơ̆n ngơk lăng Sư ôh. Sư ei gô pơm kơ iĕm 'batem thoi âu: Sư gô ăn kơ iĕm Yang Bơhngol 'Lơ̆ng pơm kơ iĕm tŭk lê̆ dôm tơdrong kơnê̆ kư̆m thoi ŭnh soh lê̆ hla đuih đăm.

Luka 3:3

Na Yôhan năm jơ̆p kơ tơring kiơ̆ krong Jôrđăn. Na sư bơtho athei đe tơbral kơdih tơdrong yoch na iŏk 'batem wă kơ 'Bok Kei-Dei pơklaih yoch sư.

Yo 1:15

Hơtai ei sơ̆, Yôhan bơtho tơdrong Yêsu Krist 'bơ̆t anăp đe tơpôl lơ. Sư pơma re bơtho đe thoi âu: “Gah 'Bok âu boih inh bơtho iĕm sơ̆, 'Bok mă inh khan gô truh đơ̆ng rŏng inh, Sư tih hloh kơ inh tơpă. Inh tơpŭ sơ̆, Sư đei hơdrol loi kơ inh boih.”

Yo 1:30

'Bok 'noh boih inh krô nŏng roi kơ iĕm: ‘'Bok mă truh đơ̆ng rŏng kơ inh Sư tih hloh kơ inh tơpă; inh tơpŭ sơ̆, Sư đei hơdrol loi kơ inh boih.’

Jang 1:5

Yôhan pơm kơ iĕm 'batem păng đak, mă-lei pă đunh boih 'Bă Inh gô pơm kơ iĕm 'batem phara, Sư gô ăn kơ iĕm Yang Bơhngol 'Lơ̆ng Sư.”

Jang 19:4

Pôl khan gah tơdrong Yôhan sơ̆ thoi âu: “Yôhan pơm 'batem kơ lu bơngai tơbral kơdih tơdrong yoch păng sư bơtho lu bơngai Isơrael athei lu sư lui kơ minh 'nu 'Bok gô truh đơ̆ng rŏng kơ sư, wă khan Yêsu.”

Jang 8:36

Kơplah bre sư oei yak rok trong ei, bre sư 'bôh đak. Na bơngai ei khan kơ Philip: “Ih lăng 'bơ̆t âu đei đak glung. Ih hăm gơh pơm kơ inh 'batem dang ei dah ưh?”

Jang 8:38

'Bok tih ei khan kơ bơngai wơ̆r gre sư athei dơ̆ng, na gre aseh ei dơ̆ng. Bre sư jur tơ đak, Philip pơm hloi kơ sư 'batem.

I Kor 12:13

Na đĭ rim khŭl bơngai, bơngai Juđê, bơngai khŭl nai, mă bơngai đĭch đe, mă bơngai rơngei, dah bơ̆n lui kơ Yêsu Krist, Yang Bơhngol 'Lơ̆ng pơm 'batem kơ bơ̆n pơgơ̆p bơ̆n jing minh jơhngơ̆m minh đon dih băl. Sư minh 'nu đĕch, mă-lei đĭ-đăng kơ bơ̆n iŏk Sư.

Êphêsô 3:8

Inh âu bơngai iĕ hloh kơ đĭ-đăng lu kon 'Bok Kei-Dei nai. Mă-lei Sư pơjao kơ inh tơdrong bơtho, wă kơ inh năm bơtho lu bơngai khŭl nai mă ưh kơ trŏ kơ bơngai khŭl Juđê, wă kơ lu sư băt kơnăl kơ tơdrong hiôk jơnap Yêsu Krist ăn kơ bơ̆n thoi yơ. Tơdrong hiôk jơnap noh hiôk tơpă ưh pă băt dang yơ.

Tit 3:5

Na dang ei Sư pơklaih bơ̆n đơ̆ng tơdrong yoch tơpă. Sư pơklaih bơ̆n, ưh kơ sĭ bơ̆n pơm tơdrong 'lơ̆ng 'mơ̆i na Sư pơklaih. Sư pơklaih bơ̆n bơngai yoch yua kơ Sư 'mêm mơnat kơ bơ̆n tơpă. Yang Bơhngol 'Lơ̆ng 'nhao rơgoh jơhngơ̆m bơ̆n đơ̆ng tơdrong yoch. Sư ăn kơ bơ̆n hŭt đĭ dôm tơdrong so păng ăn kơ bơ̆n jing bơngai 'nao.

I Pet 5:5

Lu đe adruh tơdăm oei hơmuh hơmŏng, iĕm kư̆m lei-lăi athei chu yom kơ lu đe kră; păng đĭ-đăng kơ iĕm hăm lu đe kră athei iŏk jơhngơ̆m đon dim wă kơ chu yom dih băl; yua kơ 'Bok Kei-Dei ưh kơ wă ôh kơ lu bơngai pơang akâu, Sư tơgŭm lu bơngai dim, lu bơngai băt kơ chu yom kơ đe.