Mathiơ 17:9 - Sơ̆p Hlabơar Nơ̆r 'Bok Kei-Dei

⁹ Klaih kơ noh na lu sư jur đơ̆ng kông noh na Yêsu khă lu sư thoi âu: “Iĕm 'nĕ chă roi kơ đe hŏ dôm tơdrong iĕm 'bôh hei đơ̆ng dang ei truh Inh Kon Bơngai iung arih đơ̆ng lôch ning-mônh.”

Mathiơ 17:9 Iomraidhean Croise

Mathiơ 12:16

Sư khă lu đe noh 'nĕ roi tơbăt anăn Sư kơ đe.

Mathiơ 17:12

Inh khan kơ iĕm tơpă, Êli truh boih, mă-lei đe ưh kơ kơnăl kơ sư, đe pơm kơnê̆ kơ sư kiơ̆ gô mơ̆ng kơ đe wă. Na đơ̆ng âu tơ dơning dơmônh đe kư̆m pơm kơnê̆ kơ Inh Kon Bơngai thoi noh mơ̆n.”

Mathiơ 17:20

Yêsu khan: “'Noh yua kơ tơdrong lui iĕm oei rơdu iĕ. Inh khan kơ iĕm tơpă, mă khan tơdrong lui iĕm rơdu iĕ tŏ găr sơ'bei dah sư rai wơ̆ thoi găr sơ'bei chăt kơjung lei iĕm gơh pơm tôm tơdrong nai hai. Pơtih gia iĕm sơkat kơ kông âu khan thoi âu: Ơ kông, hiŏng jăk kơdih tơ nai, na sư hiŏng hloi kơdih tơ nai.”

Mathiơ 17:22

Kơplah lu sư brŏk akŭm tơ dêh Galilê Yêsu roi dơ̆ng tơdrong Sư wă lôch: “Đe gô rôp pơjao Inh Kon Bơngai tơ ti kon bơngai tơ ala teh âu.

Mathiơ 17:23

Lu đe ei boih pơlôch Inh, mă-lei kơtĕch pêng năr đơ̆ng rŏng Inh iung arih dơ̆ng.” Lu bơngai pơhrăm păng Sư kơtơ̆ng Sư khan thoi noh, lu sư sơ'ngon dêh.

Mathiơ 17:8

Lu đe noh ngoi lăng jua ưh pă 'bôh bu dơ̆ng hơdai hăm Sư dơ̆ng, pă minh 'nu Sư đĕch oei 'bơ̆t noh.

Mathiơ 8:20

Yêsu khan kơ sư: “Mơja đei anih tep, sem păr kư̆m đei tơpu. Inh Kon Bơngai ră mă-lei ưh kơ đei anih tep ôh.”

Mathiơ 8:4

Yêsu khan: “Ih 'nĕ chă roi kơ đe. Dang ei ih klaih boih na ih năm tơ'bôh akâu ih kơ 'bok soi păng ih soi sơmah kơ 'Bok Kei-Dei kiơ̆ thoi Môis pơkă sơ̆ wă kơ đe băt tơdrong jĭ ih klaih tơpă boih.”

Markôs 8:30

Na Yêsu khă lu bơngai pơhrăm păng Sư kuă ăn chă roi kơ đe khan Sư 'Bok Krist.

Luka 8:56

Mĕ 'bă sư sơleng kơ đon. Na Yêsu khă bre sư khan: “Biĕm 'nĕ kơ chă roi kơ đe hŏ.”

Luka 9:36

Lăp 'Bok Kei-Dei pơma thoi noh đang boih, hơloh kơ jua kơ bre Môis păng Êli, pă minh 'nu Yêsu đĕch oei 'bơ̆t ei. Kơplah ei sơ̆ lu sư ưh kơ roi ôh kơ đe tơdrong noh.