Mathiơ 16:27 - Sơ̆p Hlabơar Nơ̆r 'Bok Kei-Dei

²⁷ Ning-mônh Inh Kon Bơngai gô jur dơ̆ng tơ teh âu hơdai păng linh jang 'lơ̆ng. Năr 'noh kơnh 'Bă Inh ăn kơ Inh mơsêh mơyang tih-tin rŏ sor tơpă. Inh gô sek tơlang kơ rim 'nu bơngai kiơ̆ thoi sư pơm tơ teh âu sơ̆.

Mathiơ 16:27 Iomraidhean Croise

Jop 34:11

Kră Yang apah kon bơngai kiơ̆ kơ tơdrong jang lu sư pơm, Pơm kơ rim 'nu bơngai kiơ̆ kơ lu sư oei arih sa.

Horiso 62:12

Ơ Kră Yang tơdrong 'mêm mơnat lăm Ih; Yua kơ Kră Yang apah kơ rim 'nu kiơ̆ thoi đêl lu sư jang.

Tơdrông Pơđơk 24:12

Tơdah ih khan, “'Nâu, nhôn ưh kơ băt ôh tơdrong noh” Hăm trŏ đei tơ'ngla 'bôh boih tơdrong noh? Hăm trŏ đei tơ'ngla wei-lăng bơhngol ih sư 'bôh tơdrong noh? Sư gô pơm tơwih kơ rim 'nu kiơ̆ thoi đêl sư pơm

Bôk Bơthô 3:17

Na inh khan: Kră Yang 'Bok Kei-Dei gô sek tơlang kơ lu bơngai pơm 'lơ̆ng păng lu bơngai pơm kơnê̆, yua kơ Sư đei hơgăt ăn boih jơ 'năr kơ tôm tơdrong kiơ kiơ.

Je 17:10

Inh boih Kră Yang, Inh lăng 'bôh lăm jơhngơ̆m, pơlong lăng jơhngơ̆m đon tơchĕng, wă pơm tơwih kơ rim 'nu kiơ̆ thoi trong lu sư arih, kiơ̆ 'blep thoi đêl tơdrong lu sư pơm.

Je 32:19

Ih đei tơdă tih, mơsêh mơyang gơh pơm tôm tơdrong. Măt Ih lăng 'bôh đĭ-đăng kơ trong kon bơngai. Ih phak apah kơ rim 'nu kiơ̆ tơdrong arih sa sư păng kiơ̆ đêl tơdrong jang lu sư pơm.

Êsêkiên 18:20

Bơngai bu pơm yoch bơngai noh kơdih sư gô lôch, kon sư ưh kơ đei pŭ tơdrong yoch 'bă sư păng 'bă sư kư̆m ưh kơ đei pŭ tơdrong yoch kơnê̆ kon sư. Tơdrong tơpăt lu bơngai 'lơ̆ng tơpăt gô 'măn kơ lu bơngai tơpăt, tơdrong kơnê̆ lu bơngai pơm kơnê̆ gô tơpŭ tơ lu bơngai pơm kơnê̆ noh.

Êsêkiên 7:27

Pơtao gô nhơ̆m hmoi. Lu kon pơtao gô pŭ iŏk tơdrong răm, pă hơmĕng tơpang ti lu kon pơlei pơla gô hli tơtey. Inh gô pơm kơ lu sư kiơ̆ kơ trong lu sư, oei arih sa thoi yơ Inh gô sek tơlang thoi noh. Lu sư gô băt Inh boih Kră Yang.”

Da 7:10

Đơ̆ng 'bơ̆t anăp sư, đei glung ŭnh ro tơ jơ̆p-jang; rơbâu hơngan linh jang awih awăn kơ sư păng rơbâu hơngan kon bơngai dơ̆ng 'bơ̆t anăp sư. Tơdrong sek tơlang hơmet lê̆ boih păng đe kư̆m pơih lu sơ̆p hla bơar.

Sa 14:5

Lu iĕm gô kơdâu ôn tơ lăm sơlŭng trôm kông, yua kơ sơlŭng noh să truh tơ Atsan, lu iĕm gô kơdâu ôn thoi đe kơdâu đơ̆ng teh tơdrŏ chăl Ôsia, pơtao đe Juđa. Dang ei Kră Yang 'Bok Kei-Dei inh gô truh, đĭ-đăng lu bơngai 'lơ̆ng rơgoh gô truh hơdai ih.

Mathiơ 13:49

Na mưh truh năr tôch ning-mônh kư̆m thoi noh mơ̆n. Lu linh jang kơ Inh năm rơih iŏk dôm lu bơngai kơnê̆ đơ̆ng lu bơngai 'lơ̆ng,

Mathiơ 24:30

Kơplah noh đĭ-đăng kon bơngai ala teh âu nhơ̆m hmoi yua kơ lu sư 'bôh Inh Kon Bơngai 'lơ̆ng rŏ mơsêh mơyang tih-tin jur hăm hơmơ̆l.

Mathiơ 25:31

“Năr ei kơnh Inh Kon Bơngai mơsêh tih-tin 'lơ̆ng rŏ jur tơ teh âu hơdai păng lu linh jang 'lơ̆ng, Inh gô oei kơpal tang-dŏ pơtao 'lơ̆ng rŏ.

Mathiơ 26:64

Yêsu tơl: “Trŏ boih. Inh khan kơ iĕm tơpă, ning-mônh iĕm gô 'bôh Inh Kon Bơngai oei gah 'ma kơ Kră Yang 'Bok Kei-Dei mơsêh tih-tin na đơ̆ng noh jur đơ̆ng plĕnh hăm hơmơ̆l.”

Mathiơ 8:20

Yêsu khan kơ sư: “Mơja đei anih tep, sem păr kư̆m đei tơpu. Inh Kon Bơngai ră mă-lei ưh kơ đei anih tep ôh.”

Markôs 14:62

Yêsu tơl: “Inh boih Krist. Ning-mônh iĕm gô 'bôh Inh Kon Bơngai oei gah 'ma kơ Kră Yang 'Bok Kei-Dei mơsêh tih-tin, na đơ̆ng noh jur đơ̆ng plĕnh hăm hơmơ̆l.”

Markôs 8:38

Ning-mônh Inh Kon Bơngai gô jur tơ ala teh âu hơdai păng lu linh jang 'lơ̆ng. Năr 'noh kơnh 'Bă Inh gô ăn kơ Inh mơsêh mơyang 'lơ̆ng rŏ tơpă. Na bơngai bu kiơ̆ Inh boih, mă-lei sư kơdơ̆ mơlâu kơ lu bơngai kơnê̆ tam lui na sư kuă kơ bơtho lu sư tơdrong Inh, năr 'noh kơnh Inh kư̆m kuă kơ sư mơ̆n.”

Luka 21:27

Kơplah noh đe gô 'bôh Inh Kon Bơngai 'lơ̆ng rŏ mơsêh mơyang tih-tin jur hăm hơmơ̆l.

Luka 22:69

Đơ̆ng âu truh tơ ning-mônh Inh Kon Bơngai gô oei gah 'ma kơ 'Bok Kei-Dei mă mơsêh mơyang tơpă na pơgơ̆r.”

Luka 9:26

Ning-mônh Inh Kon Bơngai gô jur tơ ala teh âu dơ̆ng, hơdai păng lu linh jang 'lơ̆ng. Năr 'noh kơnh 'Bă Inh gô ăn kơ Inh mơsêh mơyang 'lơ̆ng rŏ tơpă. Na bơngai bu khan sư kiơ̆ Inh boih, mă-lei sư kơdơ̆ mơlâu kơ đe na kuă kơ bơtho kơ đe tơdrong Inh, năr 'noh kơnh Inh kư̆m kuă kơ sư mơ̆n.

Yo 21:22

Yêsu khan kơ sư: “Dah Inh wă kơ sư arih sot truh Inh jur dơ̆ng ning-mônh ngê̆ kiơ kơ ih jet? Ih kư̆ lui kơ Inh đĕch.”

Yo 21:23

Yêsu pơma thoi noh ră, na lu 'nhŏng oh bơngai lui đei nơ̆r kơtơ̆ng ang khan: Minh 'nu bơngai pơhrăm păng Yêsu ei ưh kơ layơ lôch. Mă-lei Yêsu ưh kơ đei pơma khan sư ưh kơ đei lôch ôh. Sư khan: “Dah Inh wă kơ sư arih sot truh Inh jur dơ̆ng ning-mônh ngê̆ kiơ kơ ih jet?” Sư pơma thoi noh đĕch.

Jang 1:11

“Ơ bơngai Galilê, iĕm lăng 'bloh chă kiơ tơ plĕnh? Ning-mônh Sư gô jur dơ̆ng kư̆m thoi Sư tŏk mơ̆n.”

Rom 14:12

'Bok Kei-Dei khan thoi noh boih, na ning-mônh đĭ-đăng kon bơngai bơ̆n gô roi tơdrong arih bơ̆n 'bơ̆t anăp Sư.

Rom 2:6

Sư gô sek tơlang 'blep dôm tơdrong đêl bơ̆n pơm.

I Kor 15:23

Rim 'nu kơ bơ̆n athei gô lăp kơ khei 'năr. Yêsu Krist Sư thoi lĕ kơ 'ba hrôih, Sư iung arih hơdrol kơ bơ̆n. Mưh lăp kơ khei 'năr Sư wă jur tơ ala teh âu, đĭ-đăng bơngai lui iung arih kiơ̆ Sư.

I Kor 3:13

Na mưh truh năr sek tơlang ning-mônh, 'Bok Kei-Dei wă pơlong lăng hnam mă bơ̆n pơm noh hăm kơjăp dah ưh. Tơdrong pơlong noh thoi lĕ kơ ŭnh sa, na sư wă pơlong lăng tơdrong bơ̆n jang kơ Sư hăm yua ưh.

I Kor 8:8

Dôm tơmam sa ưh kơ đei tơgŭm bơ̆n lui kơ 'Bok Kei-Dei kơjăp ôh. Păng mă tơmam đe sơmah dah đe pơm kiơ kiơ, dah bơ̆n kơ̆m kơ sa, sư kư̆m ưh kơ pơm kơ bơ̆n lui rơdu ôh. Mă bơ̆n pơm kư̆ kă sa tôm tĕch tơmam đe sơmah dah đe 'buh sa pơm kiơ kiơ, sư kư̆m ưh kơ gơh pơm kơ bơ̆n lui rai kơjăp hloh mơ̆n.

II Kor 5:10

yua kơ đĭ-đăng bơ̆n ning-mônh gô dơ̆ng 'bơ̆t anăp Yêsu Krist sek tơlang kiơ̆ kơ akâu bơ̆n pơm 'lơ̆ng dah pơm kơnê̆, Sư apah kiơ̆ thoi noh.

Êphêsô 6:8

Yua kơ Yŏng bơ̆n Yêsu Krist wă apah bơngai bu mă jang 'lơ̆ng jang tơpăt, mă khan sư bơngai đĭch đe, mă bơngai rơngei.

Kôlôsê 3:25

Bơngai bu ưh kơ chu, sư wă pơm kơnê̆, 'Bok Kei-Dei kư̆m pơm tơwih kơ sư mơ̆n, yua kơ 'Bok Kei-Dei lăng kon bơngai lei-lăi đĕch.

I Tes 1:10

Păng iĕm chang gô Kon Sư jur đơ̆ng plĕnh pă minh 'măng dơ̆ng. Yêsu boih Kon Sư; 'Bok Kei-Dei tơiung arih Sư đơ̆ng lôch. Yêsu boih dŏng pơklaih bơ̆n đơ̆ng tơdrong phak ning-mônh.

I Tes 4:16

Năr ei kơnh 'bok yŏng lu linh jang 'lơ̆ng gô pơma krao pơret đơ̆ng plĕnh ti păng đei linh jang 'lơ̆ng hlôm keng 'Bok Kei-Dei. Na Kră Yang Yêsu Krist jur hloi đơ̆ng plĕnh, na lu bơngai lôch mă lui kơ Yêsu boih sư iung arih 'mơ̆i.

Ya 5:7

Ơ 'nhŏng oh, iĕm băt kơ thoi noh boih, na mă đe pơm kơnê̆ kơ iĕm, iĕm thĕng đĕch hŏ, truh tơ năr Kră Yang jur dơ̆ng. Pơtih gia thoi lu bơngai jang mir 'ba, lu sư băt tơpă gô đei 'ba na lu sư adrin jang truh kơ bơyan 'ba đum.

I Pet 1:17

Bơ̆n krao khan kơ Sư yua kơ Sư 'Bă bơ̆n, bơ̆n athei chu kơ Sư yua kơ Sư wă sek tơlang mă tơpăt đĭ-đăng kon bơngai kiơ̆ tơdrong lu sư đêl pơm. Thoi noh na bơ̆n athei kơchăng hli kơ pơm yoch kơplah bơ̆n oei arih tơ ala teh âu. Bơ̆n oei arih tơ ala teh âu thoi bơngai tơmoi đĕch, ưh kơ sĭ teh đak bơ̆n kơdih ôh.

I Yo 2:28

Iĕm adrin lui kơ Sư khŏm khŏm hŏ, na Sư jur tơ ala teh âu ning-mônh iĕm huay kơ hli. Năr noh kơnh iĕm ưh kơ kăl kơ jăk ôn akâu iĕm tơ yơ yơ ôh yua kơ iĕm huay kơ mơlâu kơ Sư.

Ju 1:14

Ênŏk sư kon sâu jơhnơr mă tơpơh, jô̆ đơ̆ng jơhnơr Ađam. Sư đei pơma khan lê̆ hơdrol gah lu bơngai noh sơ̆ thoi âu: “Kră Yang wă jur hăm dôm rơbâu rơngan 'nu lu linh jang 'lơ̆ng Sư,

Tơdrông Tơ'bôh 1:7

Ning-mônh Sư wă jur tơ bơ̆n hăm hơmơ̆l. Đĭ-đăng kon bơngai gô 'bôh Sư. Lu bơngai mă pơ̆ng pơlôch Sư tơ 'long pơglang sơ̆ kư̆m 'bôh Sư mơ̆n. 'Bơ̆t noh kơnh đĭ-đăng khŭl kon bơngai jơ̆p kơ teh đak nhơ̆m hmoi 'bơ̆t anăp Sư; tơpă, trŏ kơ nhơ̆m hmoi tơpă mơ̆n. A-men.

Tơdrông Tơ'bôh 2:23

Păng lu bơngai mă pơm jơ̆ng 'bang sư mă lăng dang kon sư kơdih noh, Inh kư̆m pơlôch mơ̆n. Tơdrong noh wă tơbăt kơ đĭ-đăng lu bơngai lui wă lu bơngai lui băt kơ Inh sek tơlang lăm jơhngơ̆m đon lu sư tơpăt noh na inh gô apah lu sư kiơ̆ thoi lu sư đêl pơm.

Tơdrông Tơ'bôh 20:12

Păng inh 'bôh lơlang lơlap kon bơngai đêl lôch iung arih; bơngai pơm tih, bơngai iĕ, đĭ lu sư dơ̆ng 'bơ̆t anăp 'Bok mă oei kơpal tang-dŏ tih krưp ei. Na 'Bok ei tak lăng lu sơ̆p hla bơar tơdrong lu bơngai lôch đêl pơm kơplah sư oei arih sơ̆. Sư kư̆m tak lăng minh sơ̆p hla bơar nai, sơ̆p hla bơar ei đe chih anăn dôm lu bơngai mă wă oei hơdai hăm 'Bok Kei-Dei ling-lang. 'Bok Kei-Dei sek tơlang lu bơngai đơ̆ng lôch, kiơ̆ kơ tơdrong lu sư đêl pơm tơ ala teh, kiơ̆ kơ đe chih 'măn lê̆ dôm tơdrong lu sư đêl pơm noh tơ lăm lu sơ̆p hla bơar ei sơ̆.