Mathiơ 13:52 - Sơ̆p Hlabơar Nơ̆r 'Bok Kei-Dei

⁵² Yêsu khan: “Thoi noh na lu iĕm bơngai mă pơhrăm păng Inh, iĕm gô jing thây bơtho đe tơdrong 'Bok Kei-Dei pơgơ̆r kon bơngai, na iĕm bơtho đe tơdrong 'nao tơdrong so kư̆m thoi 'bok tơ'ngla hnam chă asong kơ đe tơmam 'nao păng tơmam so sư, gô mơ̆ng kơ sư wă.”

Mathiơ 13:52 Iomraidhean Croise

Esơra 7:10

Esơra đei ling-lang lăng hŏk iŏk khôi juăt Kră Yang, wei răk pơm kiơ̆ păng bơtho ăn kơ kon pơlei Isơrael băt kơ dôm khôi juăt păng dôm tơdrong đei tơtă.

Esơra 7:21

Thoi noh, inh boih pơtao Artaserses đei chih roi ăn kơ lu 'bok kuan wei hnam mong tơmam gah bơmơ̆t kơ đak krong khan mă tơmam kiơ Esơra, 'bok soi bơngai bơtho hơgei kơ hla bơar, hlôh băt dôm khôi juăt Kră Yang 'Bok Kei-Dei tơ kơpal plĕnh, gô apinh đơ̆ng lu iĕm, lu iĕm athei ăn hloi.

Esơra 7:6

Esơra âu sư wih brŏk đơ̆ng Babilôn. Sư jơ̆ minh 'nu bơngai bơtho hơgei hlôh kloh klĕch khôi juăt Môis, mă Kră Yang Kră Yang 'Bok Kei-Dei đe Isơrael đei chih roi. Yua kơ ti Kră Yang tơgŭm sư, thoi noh pơtao asong ăn dôm tơdrong sư apinh.

Tơdrông Pơđơk 11:30

Bơngai 'lơ̆ng tơpăt gô đei nhen thoi tơnơm 'long arih, Bơngai gơh hơgei đei dŏng bơhngol đe.

Tơdrông Pơđơk 15:7

Nơ̆r 'bơ̆r bơngai hơgei rei tơdrong hlôh wao; Mă-lei jơhngơ̆m lu kơwao ưh kơ thoi noh.

Tơdrông Pơđơk 18:4

Nơ̆r pơma đơ̆ng minh 'nu bơngai thoi đak jrŭ; Tu tơdrong gơh hơgei, thoi đak glung oei ro.

Hơri Hiôk 7:13

'Bum mandrakea 'bâu phu sư păr đông, Tơ 'măng bơ̆n đei tôm plei 'lơ̆ng. Plei 'nao hăm plei so hai. Plei noh inh 'măn bơih kơ ih, ơ bơngai inh hơyuh.

Mathiơ 12:35

Bơngai 'lơ̆ng, sư đei jơhngơ̆m 'lơ̆ng, sư pơma kiơ̆ 'lơ̆ng. Bơngai kơnê̆, sư đei jơhngơ̆m kơnê̆, sư pơma kiơ̆ kơnê̆.

Mathiơ 13:51

Yêsu jet lu bơngai pơhrăm păng Sư: “Dôm tơdrong pơtih gia noh hei iĕm tam hlôh?” Lu sư khan: “Nhôn hlôh boih.”

Mathiơ 13:53

Yêsu bơtho dôm tơdrong pơtih gia noh đang boih, na Sư brŏk tơ pơlei Sư kơdih. Sư bơtho đe tơ hnam akŭm 'Bok Kei-Dei. Lu sư mơ̆ng hlĭch kơ đon păng khan: “Lơliơ Sư băt dôm tơdrong noh? Păng Sư gơh pơm tơdrong mơsêh tăm.

Mathiơ 23:34

Inh gô wơh lu bơngai pơtruh nơ̆r 'Bok Kei-Dei, lu bơngai hơgei, lu bơngai pơm 'bok bơtho năm bơtho iĕm, na 'blep kơ lu iĕm rôp pơlôch, mơ'nah iĕm pơ̆ng tơ 'long pơglang, mơ'nah iĕm teh tach lu sư păng sơnguĕt lăm hnam akŭm iĕm. Păng iĕm kư̆m pơpuh lu sư jăk đơ̆ng pơlei âu pơlei to.

Mathiơ 28:19

Thoi noh năm bĕ lu iĕm, bơtho kơ đĭ-đăng lu khŭl bơngai jơ̆p kơ teh đak, athei lu sư lui kiơ̆ kơ Inh, pơm 'batem kơ lu sư krao anăn Yang 'Bă, Yang Kon, hăm Yang Bơhngol 'Lơ̆ng wă kơ đe nai băt kơ lu sư lui boih.

Luka 11:49

Thoi noh na 'Bok Kei-Dei mă hơgei tôm tơdrong khan thoi âu: ‘Inh gô wơh lu bơngai pơtruh nơ̆r Inh păng lu bơngai jơ̆ng 'bang Inh năm bơtho lu sư, na 'blep kơ lu sư areh pơm kơnê̆ kơ lu sư phŏ kư̆m pơlôch.’

Yo 13:34

Na dang ei Inh wă pơkă ăn kơ iĕm tơdrong 'nao âu: Inh wă kơ iĕm băt 'mêm mơnat dih băl. Iĕm athei băt 'mêm mơnat dih băl kư̆m thoi Inh 'mêm mơnat kơ iĕm.

II Kor 6:10

Đe lăng nhôn đei tơdrong sơ'ngon, mă-lei nhôn hiôk chơt ling-lang; đe lăng nhôn bơngai dơnuh, mă-lei đei lơ bơngai mơdrŏng yua kơ nhôn; đe lăng nhôn hoh-hoy kơbĭ đei kiơ, mă-lei nhôn đei tôm tơdrong tơmam.

Êphêsô 3:4

Iĕm đŏk lăng boih na iĕm băt hloi kơ inh hlôh tôm tơdrong Yêsu Krist.

Êphêsô 3:8

Inh âu bơngai iĕ hloh kơ đĭ-đăng lu kon 'Bok Kei-Dei nai. Mă-lei Sư pơjao kơ inh tơdrong bơtho, wă kơ inh năm bơtho lu bơngai khŭl nai mă ưh kơ trŏ kơ bơngai khŭl Juđê, wă kơ lu sư băt kơnăl kơ tơdrong hiôk jơnap Yêsu Krist ăn kơ bơ̆n thoi yơ. Tơdrong hiôk jơnap noh hiôk tơpă ưh pă băt dang yơ.

Kôlôsê 1:7

Iĕm kơtơ̆ng tơdrong noh đơ̆ng Êpapra bơtho iĕm sơ̆, tơdrong sư bơtho trŏ tơpă. Sư bơngai jang tơdrong Yêsu Krist hăm nhôn, nhôn 'mêm kơ sư tơpă; sư jang tang inh oei hơdai hăm iĕm tơ noh.

Kôlôsê 3:16

Bơ̆n athei pơm kiơ̆ dôm nơ̆r Yêsu Krist ling-lang wă kơ bơ̆n bơtho dih băl hơgei 'blep trŏ thoi Sư wă. Mă tơdrong hơri kư̆m lei-lăi wă kơ bơtho dih băl tơdrong Sư, wă kơ bơ̆n hơri bơnê kơ 'Bok Kei-Dei, mă hơri tơdrong kră sơ̆, mă hơri tơdrong lu bơngai dang ei, mă hơri kiơ̆ kơ đon bơ̆n tơchĕng, mă tôm kơ tơdrong hơri nai wă kơ bơ̆n hơri bơnê kơ 'Bok Kei-Dei ngăl.

I Tim 3:6

Bơngai bu 'nao lui sư ưh kơ gơh wei-lăng bơngai lui ôh, hli kơ sư pơang akâu kơdih, na 'Bok Kei-Dei phak sư kư̆m thoi phak yang Satan sơ̆ mơ̆n.

Tit 1:9

sư bơtho tơdrong 'Bok Kei-Dei 'blep trŏ nơ̆r 'Bok Kei-Dei tơpă. Thoi noh đe anăn sư gơh bơtho trŏ tơdrong 'Bok Kei-Dei păng sư gơh pơjah pơjăng păng lu bơngai mă ưh kơ lui ayăt tơdrong sư bơtho.