Markôs 14:49 - Sơ̆p Hlabơar Nơ̆r 'Bok Kei-Dei

⁴⁹ Bĭ rim năr Inh oei tơ tŏk-bŏk lu iĕm, bơtho iĕm tơ lăm hnam akŭm tơm, iĕm kuă kơ kiơ kơ rôp Inh tơ noh lĕ? Mă-lei tơdrong noh 'Bok Kei-Dei ăn wă kơ 'blep kơ tơdrong đe chih roi lê̆ hơdrol lăm sơ̆p hla bơar Sư sơ̆.”

Markôs 14:49 Iomraidhean Croise

Mathiơ 1:22

Dôm tơdrong 'noh 'blep trŏ thoi 'Bok Kei-Dei ăn kơ minh 'nu bơngai khan lê̆ hơdrol sơ̆ thoi âu:

Mathiơ 26:54

Mă-lei sơ̆p hla bơar 'Bok Kei-Dei khan Inh gô lôch tang kon bơngai, na thoi yơ Inh gơh apinh 'Bă Inh dŏng bơ̆n thoi noh?”

Mathiơ 26:55

Kơplah noh mơ̆n, Yêsu khan kơ lu bơngai mă năm rôp Sư: “Lơliơ iĕm năm tơ âu chĕp tak đao 'long tơnôn dang lĕ đe rôp bơngai tơtông klĕ? Bĭ rim năr Inh bơtho iĕm tơ lăm hnam akŭm tơm iĕm kuă kơ kiơ kơ rôp Inh tơ noh lĕ?

Mathiơ 26:56

Mă-lei dôm tơdrong noh 'Bok Kei-Dei ăn wă kơ 'blep kơ tơdrong lu bơngai pơtruh nơ̆r Sư chih roi lê̆ hơdrol tơ sơ̆p hla bơar Sư sơ̆.” Đang Sư pơma thoi noh bru đĭ-đăng lu bơngai pơhrăm păng Sư achăng lê̆ Sư kơdâu jăk tơ nai.

Markôs 10:1

Yêsu năm đơ̆ng Pơlei Kapernum ei mơ̆t brih lăm dêh Juđê păng hơloh năm hloi tơ dêh pah to krong Jôrđăn. Tơ ei đei lơ bơngai năm akŭm tơ Sư dơ̆ng, na Sư bơtho đe kư̆m thoi krô hmă.

Markôs 11:27

Lăp lu sư truh tơ Pơlei Jêrusalem, Yêsu chă nơnăm lăm hnam akŭm tơm, na lu 'bok soi tih, lu thây bơtho tơdrong juăt đe Juđê, hăm lu kră sek tơlang năm tơ Sư.

Markôs 12:35

Kơplah Yêsu oei bơtho lăm hnam akŭm 'Bok Kei-Dei tơm Sư khan: “Liơ lu 'bok thây bơtho tơdrong juăt đe Juđê khan 'Bok Krist mă 'Bok Kei-Dei wơh pơm Pơtao, Sư kon sâu pơtao Đawit đĕch?

Markôs 14:48

Yêsu khan kơ lu bơngai mă rôp sư: “Lơliơ iĕm năm tơ âu chĕp tak đao 'long tơnôn dang lĕ đe rôp bơngai tơtông klĕ?

Markôs 14:50

Đang Sư pơma thoi noh bru đĭ-đăng lu bơngai pơhrăm păng Sư achăng Sư kơdâu jăk tơ nai.

Luka 19:47

Yêsu bơtho rim năr tơ lăm hnam akŭm 'Bok Kei-Dei tơm. Na lu 'bok soi tih, lu thây bơtho tơdrong juăt păng lu đe kră pơlei wă rôp pơlôch Sư ră.

Luka 22:37

Sơ̆p hla bơar 'Bok Kei-Dei khan sơ̆ thoi âu: Đe jô̆ kơ Inh bơngai yoch trŏ kơ pơlôch. Na bơ̆n gô 'bôh đe jô̆ kơ Inh thoi noh tơpă. Na dôm tơdrong đe chih lê̆ hơdrol sơ̆ gah Inh bơ̆n gô 'bôh tôm tơpă.”

Yo 10:23

Hơtai ei bơyan puih tơngiĕt. Na Yêsu nơnăm lăm pra Sôlômôn, lăm hnam akŭm 'Bok Kei-Dei tơm.

Yo 18:20

Na Yêsu khan: “Inh ling-lang bơtho tơ bơngai tơpôl, tơ rim hnam akŭm. Inh bơtho tơ hnam akŭm 'Bok Kei-Dei tơm. Tơ yơ yơ lu Juđê akŭm, Inh bơtho kơ lu sư mơ̆n. Inh ưh kơ đei bơtho ôn ôh.

Yo 7:37

Tơpă wă tôch Năr Giĕng Bơsŭn ei, năr noh năr đe akŭm giĕng tih tơpă, na Yêsu iung dang dơ̆ng bơtho 'bơ̆r re khan: “Bơngai bu rơhing 'maih nhă đak, năm tơ Inh bĕ.

Yo 8:12

Yêsu bơtho dơ̆ng thoi âu: “Inh pơchrang hơdah kơ kon bơngai jơ̆p-jang kơ teh đak wă kơ sư băt tơdrong 'Bok Kei-Dei. Bơngai bu kiơ̆ Inh sư huay năm lăm măng mu kiơ̆ tơdrong yoch, sư gô đei Inh pơchrang hơdah kơ sư păng ăn sư arih ling-lang.”

Yo 8:2

Na pơgê hrôih dơning Yêsu hơloh năm tơ hnam akŭm 'Bok Kei-Dei tơm tơ Pơlei Jêrusalem. Na đĭ-đăng bơngai tơ ei năm mơ̆ng Sư bơtho, na Sư tơoei bơtho lu đe ei.