Markôs 1:14 - Sơ̆p Hlabơar Nơ̆r 'Bok Kei-Dei

¹⁴ Lăp đơ̆ng rŏng kơ đe phak Yôhan, Yêsu năm tơ dêh Galilê chă bơtho đe tơdrong 'nao 'lơ̆ng 'Bok Kei-Dei.

Markôs 1:14 Iomraidhean Croise

Mathiơ 11:2

Yôhan mă pơm kơ đe 'batem, đe tah sư lăm hnam phak. Sư kơtơ̆ng ang tơdrong mơsêh mơyang 'Bok Krist pơm, na sư wơh lu bơngai pơhrăm păng sư năm jet Yêsu thoi âu:

Mathiơ 14:2

Sư khan kơ lu jơ̆ng 'bang sư: “'Noh Yôhan bơngai mă pơm 'batem kơ đe, sư lôch boih na dang ei sư iung arih dơ̆ng. Thoi noh na sư gơh pơm tôm tơdrong mơsêh mơyang.”

Mathiơ 4:12

Yêsu kơtơ̆ng ang đe tah Yôhan lăm hnam phak boih, na Sư năm tơ dêh Galilê.

Mathiơ 4:17

Đơ̆ng năr noh boih Yêsu pơtơm jang tơdrong Sư, Sư bơtho đe thoi âu: “Iĕm athei tơbral kơdih tôm tơdrong yoch, yua kơ 'Bok Kei-Dei wă pơgơ̆r iĕm boih.”

Mathiơ 4:23

Yêsu năm jơ̆p-jang kơ dêh Galilê bơtho đe tơ lăm hnam akŭm đe Juđê gah tơdrong 'nao 'lơ̆ng 'Bok Kei-Dei wă pơgơ̆r bơ̆n păng Sư pơklaih rah dôm tơdrong jĭ jăn kon pơlei pơla pơmat-tat.

Mathiơ 9:35

Yêsu năm chă bơtho tơ rim pơlei tih iĕ, tơ lăm hnam akŭm, bơtho gah tơdrong 'nao 'lơ̆ng 'Bok Kei-Dei wă pơgơ̆r bơ̆n. Păng Sư pơklaih rah dôm tơdrong jĭ jăn kon pơlei pơla pơmat-tat.

Luka 3:20

Na Hêrôt kư̆m pơm kơnê̆ kơ Yôhan tah hloi sư lăm hnam phak.

Luka 8:1

Đunh 'biơ̆ đơ̆ng noh Yêsu năm tơ lơ pơlei chă bơtho đe tơdrong 'Bok Kei-Dei wă pơgơ̆r kon bơngai. Lu mơjĭt-'bar 'nu bơngai pơhrăm păng Sư kư̆m năm kiơ̆ Sư mơ̆n.

Jang 20:25

“Sơ̆ inh năm tơ rim lu iĕm, bơtho ăn kơ đĭ-đăng iĕm tơdrong 'Bok Kei-Dei wă pơgơ̆r iĕm thoi yơ. Na dang ei inh băt kơ iĕm ưh kơ đei layơ wă 'bôh akâu inh tơ ala teh âu dơ̆ng.

Jang 28:23

Na Pôl hăm lu sư pơkă năr wă akŭm dơ̆ng. Truh năr ei boih lu sư lơ tơpă năm akŭm tơ hnam Pôl. Đơ̆ng pơgê truh kơsơ̆ Pôl bơtho lu sư gah tơdrong 'Bok Kei-Dei wă pơgơ̆r bơ̆n thoi yơ. Sư đŏk lăng đơ̆ng sơ̆p hla bơar tơdrong juăt Môis păng sơ̆p hla bơar lu bơngai pơtruh nơ̆r 'Bok Kei-Dei wă tơbăt kơ lu sư Yêsu boih 'Bok Dŏng Pơklaih tơpă.

Rom 1:1

Inh Pôl chih hơpong kơ iĕm bơngai Rôm. Inh bơngai đĭch đam Yêsu Krist. 'Bok Kei-Dei krao inh pơm jơ̆ng 'bang Sư, wă kơ inh năm chă bơtho kơ đe tơdrong 'nao 'lơ̆ng Sư.

Êphêsô 2:17

Yêsu Krist jur bơtho tơdrong hiôk-hian kơ lu iĕm bơngai nai mă ataih kơ Sư sơ̆; lu bơngai Juđê mă ưh kơ ataih kơ Sư, Sư kư̆m bơtho mơ̆n.