Luka 6:13 - Sơ̆p Hlabơar Nơ̆r 'Bok Kei-Dei

¹³ Lăp 'năr boih na Yêsu krao lu bơngai pơhrăm păng Sư năm tơ Sư na Sư rơih iŏk mơjĭt-'bar 'nu. Sư anăn lu mơjĭt-'bar 'nu noh jơ̆ng 'bang Sư.

Luka 6:13 Iomraidhean Croise

Mathiơ 10:2

Na âu jô̆ tôm lu anăn mơjĭt-'bar 'nu lu sư: Simôn mă Yêsu anăn Pêtrôs, sư pơm tih 'biơ̆ kơ bôl sư; oh sư Andrê; Yakơ hăm oh sư Yôhan. 'Bă bre sư Sêbêđê.

Mathiơ 19:28

Yêsu khan: “Inh khan kơ iĕm tơpă, ning-mônh lăp 'Bok Kei-Dei pơjing plĕnh teh 'nao dơ̆ng, Inh Kon Bơngai gô oei kơpal tang-dŏ pơtao 'lơ̆ng rŏ tơpă, na lu iĕm mơjĭt-'bar 'nu kiơ̆ Inh âu, lu iĕm kư̆m gô oei kơpal tang-dŏ pơtao mơ̆n, gô sek tơlang mơjĭt-'bar khŭl bơngai Isơrael.

Mathiơ 9:36

Yêsu 'bôh lu bơngai tơpôl noh Sư mơnat dêh, lu sư oei hli sơ'ngon đon ưh kơ băt pơm thoi yơ, dang lĕ kơ triu ưh kơ đei tơ'ngla wei-lăng.

Markôs 6:30

Lu bơngai mă Yêsu wơh năm chă bơtho đe ki, lu sư brŏk akŭm tơ Sư boih, na roi kơ Sư dôm tơdrong lu sư pơm păng bơtho.

Markôs 6:7

Yêsu krao mơjĭt-'bar 'nu bơngai pơhrăm păng Sư năm tơ Sư; Sư athei năm chă bơtho đe 'bơ'bar 'nu. Sư ăn kơ lu sư gơh pơpuh tơlĕch yang kơnê̆ đơ̆ng akâu bơngai.

Luka 11:49

Thoi noh na 'Bok Kei-Dei mă hơgei tôm tơdrong khan thoi âu: ‘Inh gô wơh lu bơngai pơtruh nơ̆r Inh păng lu bơngai jơ̆ng 'bang Inh năm bơtho lu sư, na 'blep kơ lu sư areh pơm kơnê̆ kơ lu sư phŏ kư̆m pơlôch.’

Luka 22:30

Iĕm gô sŏng sa hơdai păng Inh kơplah Inh pơgơ̆r ning-mônh păng iĕm kư̆m pơm pơtao sek tơlang kơ mơjĭt-'bar khŭl bơngai Isơrael.

Luka 6:14

Na âu jô̆ tôm lu anăn mơjĭt-'bar 'nu lu sư: Simôn, mă Yêsu anăn Pêtrôs; oh sư Andrê; Yakơ, Yôhan, Philip, 'Barthôlêmi,

Yo 4:33

Na lu bơngai pơhrăm păng Sư pơma dih băl: “Đe ăn kơ Sư tơmam sa tơpă dah kiơ?”

Jang 1:13

Lăp lu sư truh tơ Pơlei Jêrusalem boih na lu sư tŏk tơ hnam anih gah kơpal. Na anăn lu sư oei tơ ei: Pêtrôs, Yôhan, Yakơ, Andrê, Philip, Thôm, 'Barthôlêmi, Mathiơ, Yakơ kon Alphê, Simôn mă kiơ̆ khŭl đe Sêlôt sơ̆, Juđa kon Yakơ bơngai nai.

Êphêsô 2:20

Bơ̆n thoi đe pơtăm keh minh pôm hnam. Lu jơ̆ng 'bang Yêsu hăm lu bơngai pơtruh nơ̆r 'Bok Kei-Dei lu sư thoi lu jrăng pơtăm tŏk-bŏk, na Yêsu Sư thoi jrăng mum.

Êphêsô 4:11

Na jô̆ gah tơdrong Sư asong kơ lu bơngai mă Sư 'mêm, Sư asong ăn tơdrong jang Sư, mơ'nah pơm jơ̆ng 'bang Sư, mơ'nah chă pơtruh nơ̆r Sư, mơ'nah pơm 'bok bơtho năm chă bơtho đe, mơ'nah pơm 'bok bơtho wei-lăng lu bơngai lui kơtă pơlei.

Hêbrơ 3:1

Ơ lu 'nhŏng oh, iĕm jing bơngai 'lơ̆ng tơpăt boih păng iĕm đei anăn 'Bok Kei-Dei wă krao tơmơ̆t tơ Pơlei 'Lơ̆ng Sư ning-mônh. Na inh wă kơ iĕm tơchĕng 'biơ̆ gah tơdrong Yêsu mă tơpă, yua kơ 'Bok Kei-Dei pôk Sư pơm jơ̆ng 'bang wă tơbăt ăn kơ bơ̆n tơdrong 'Bok Kei-Dei. Păng 'Bok Kei-Dei kư̆m pôk Sư pơm 'bok soi tơm jang tơdrong 'Bok Kei-Dei gah tơdrong lui bơ̆n.

II Pet 3:2

Inh wă kơ iĕm 'blŏk hơdơ̆r kơ dôm tơdrong lu bơngai pơtruh nơ̆r 'Bok Kei-Dei lu sư khan lê̆ hơdrol sơ̆. Păng inh wă kơ iĕm 'blŏk hơdơ̆r kơ tơdrong Yêsu Krist pơkă kơ lu jơ̆ng 'bang Sư na lu sư bơtho tơbăt kơ iĕm dơ̆ng, yua kơ Yêsu Krist boih Kră Yang bơ̆n kư̆m 'Bok Dŏng Pơklaih bơ̆n mơ̆n.

Tơdrông Tơ'bôh 12:1

Klaih kơ noh đei tơdrong tơ plĕnh ti hlĭch tơpă, đei minh 'nu bơngai drŏ-kăn hrŭk ao hơdah dang măt 'năr, tơ jơ̆ng sư đei măt khei. Tơ kơ̆l sư yơ̆l môk đei mơjĭt-'bar tŏ sơnglŏng.

Tơdrông Tơ'bôh 18:20

Đơ̆ng noh inh kơtơ̆ng 'bơ̆r nai dơ̆ng khan thoi âu: “Ơ lu đe mă oei tơ plĕnh, ơ lu kon 'Bok Kei-Dei, lu jơ̆ng 'bang Yêsu, lu bơngai pơtruh nơ̆r 'Bok Kei-Dei, hiôk bĕ lu iĕm yua kơ 'Bok Kei-Dei phak pơrăm boih pơlei noh mă pơm kơnê̆ kơ iĕm.”

Tơdrông Tơ'bôh 21:14

Đe trơn tơmo pơm pơlei ei, đei mơjĭt-'bar tăl tơmo. Mơjĭt-'bar tăl tơmo ei đe chih anăn mơjĭt-'bar 'nu jơ̆ng 'bang Kon Triu.