Kôlôsê 3:11 - Sơ̆p Hlabơar Nơ̆r 'Bok Kei-Dei

¹¹ Đĭ-đăng kơ bơ̆n dang minh khŭl bơngai đĕch; mă bơngai Grĕk, mă bơngai Juđê, mă bơngai kăt tơdra akar, mă bơngai ưh, mă bơngai tơmoi, mă bơngai pơlei kơtă, mă bơngai đĭch đe, mă bơngai rơngei, Yêsu Krist pơgơ̆r đĭ-đăng, hăm oei hơdai đĭ rim khŭl bơngai 'noh.

Kôlôsê 3:11 Iomraidhean Croise

Horiso 117:2

Yua kơ tơdrong Sư 'mêm kơ lu bơ̆n tih dêh. Tơdrong 'lơ̆ng tơpăt Kră Yang oei oei ling-lang, Halêluya!

Êsai 49:6

Kră Yang kư̆m đei khan: “Ih đĭch đam Inh. Wă krao dơ̆ng lu adrĕch Jakôp păng wă ba lu bơngai Isơrael mă oei arih brŏk dơ̆ng, mă tơdrong jang âu iĕ đĕch inh gô ăn kơ ih tơdrong jang tih ba tơdrong hơdah pơchrang ăn kơ lu dêh char tơmoi. Ba tơdrong dŏng pơklaih Inh truh tơ tôch jơ̆p-jang teh đak.

Êsai 52:10

Kră Yang tơ'bôh ăn bơih tơdrong jang ti rơgoh Sư 'bơ̆t anăp măt rim kơ teh đak; đĭ-đăng teh đak gô 'bôh tơdrong dŏng pơklaih Kră Yang 'Bok Kei-Dei lu bơ̆n!

Je 16:19

Ơ Kră Yang, Ih boih ăn kơ inh jơhngơ̆m pran kơtang, kơđông kơjăp inh. Anih mă inh kơ'nơp lăm năr pơmat-tat. Lu kon bơngai đơ̆ng tôch kơ teh đak gô năm kơkuh kơ Ih păng khan: “'Bok yă lu nhôn kơkuh kơ yang chă pơm, ưh kơ đei yua kiơ, ưh kơ đei tơgŭm kiơ.

Êsêkiên 47:22

Lu iĕm athei hlang lăng klah asong teh âu wă jang sa, ăn kơ lu iĕm păng ăn kơ lu bơngai tơmoi mă oei hơdai lu iĕm păng pơjing lu kon sâu tơ lăm lu iĕm. Lu iĕm kư̆m lăng lu sư thoi adrĕch kon sâu Isơrael. Lu sư kư̆m dai gơh đei asong teh jang sa thoi lu iĕm mă oei hơdai lăm adrĕch bơngai Isơrael.

Hôsia 2:23

Inh gô rei pơtăm lu sư ăn kơ Inh lăm teh đak păng Inh gô 'mêm mơnat kơ lu bơngai âu mă Inh khan: “Lu sư bơngai mă Inh ưh kơ 'mêm mơnat.” Păng kơ lu bơngai mă Inh đei khan: Iĕm ưh kơ sĭ kon pơlei Inh. Inh gô khan: “Iĕm kon pơlei Inh.” Na lu sư gô tơl: “Ih boih Kră Yang 'Bok Kei-Dei nhôn.”

Am 9:12

Ăn kơ kon pơlei Inh blah iŏk lu kon pơlei Eđôm mă oei oei. Păng đĭ-đăng kon pơlei jơ̆p kơ dêh char gô ư-ang anăn Inh”

Mi 4:2

păng gô đei đơ̆ng lơ teh đak năm tơ noh păng khan: Năm bĕ lu bơ̆n năm truh tơ kông Kră Yang, anih hnam 'Bok Kei-Dei Jakôp! Sư gô bơtho tơ'bôh kơ lu bơ̆n trong Sư păng lu bơ̆n gô yak kiơ̆ trong Sư, yua kơ khôi juăt gô lĕch đơ̆ng Siôn, nơ̆r Kră Yang gô lĕch đơ̆ng Jêrusalem.

Sa 2:11

Lăm năr noh, đei lơ teh đak gô chu drap kơkuh kơ Kră Yang păng gô jing kon pơlei Inh, Inh gô oei hơdai lu iĕm, lu iĕm gô băt Kră Yang Tih Hloh đei wơh inh truh tơ iĕm.

Malachi 1:11

Iŏk đơ̆ng măt 'năr lĕch truh tơ măt 'năr mơ̆t, yua kơ anăn Inh jing tih tơpă tơ lăm adrĕch adrung kon bơngai. Tơ lăm jơ̆p-jang anih, đe gô pơyơ̆r 'long 'bâu phu păng tơmam soi 'lơ̆ng rơgoh kơ anăn Inh; yua kơ anăn Inh gô jing tih tơpă tơ lăm adrĕch adrung nai.” Kră Yang Tih Hloh khan thoi noh.

Yo 14:23

Yêsu khan kơ sư: “Bơngai bu 'mêm kơ Inh, bơngai 'noh sư gô lui yom kơ tơdrong Inh bơtho. 'Bă Inh 'mêm kơ sư, na nhi 'Bă Inh jur oei hăm sư.

Yo 15:5

“Thoi noh na Inh wă roi kơ iĕm mă nhên dơ̆ng: Inh thoi lĕ kơ tơm 'long, iĕm thoi lĕ kơ dơng, tơ'bla, sơdrai. Bơngai bu oei kơjăp lăm Inh, Inh oei lăm sư mơ̆n, bơngai 'noh sư gô đei plei trem. Dah ưh kơ đei Inh, iĕm ưh kơ gơh pơm kiơ ôh.

Yo 17:23

Inh pôm đon hăm lu sư păng ba pôm đon dih băl, wă kơ lu sư pôm đon tơduă lu sư mơ̆n; na lu bơngai ala teh âu băt kơ Ih wơh Inh tơpă păng lu bơngai ala teh gô băt kơ Ih 'mêm kơ lu bơngai pơhrăm păng Inh, noh kư̆m thoi Ih 'mêm kơ Inh mơ̆n.

Jang 15:17

wă kơ đĭ-đăng bơngai jơ̆p kơ teh đak lui kơ Inh, wă khan đĭ-đăng lu bơngai tơmoi mă ưh kơ khŭl lu Juđê, Inh wă kơ lu sư mơ̆n.

Jang 28:2

Lu bơngai nai oei tơ bŏl đak ei mơnat kơ nhôn na tơgŭm nhôn, yua kơ tơ ei bơyan 'mi păng tơngiĕt. Na lu bơngai ei rŭk ŭnh, na pơtơm nhôn nhur ŭnh sư ei.

Jang 28:4

Lu bơngai nai oei tơ bŏl đak ei 'bôh 'bih kăp pơđom ti Pôl, na lu sư pơma dih băl: “Rŏ lăng bơngai âu chă pơlôch đe rŏ lăng; mă-lei sư huay kơ lôch tơ đak dơsĭ iih, na dang ei yang Đêke kuă kơ lăng sư yua kơ sư pơm kơnê̆ kơ đe dêh, na sư wă lôch kơ 'bih choh.”

Rom 1:14

Inh oei hre kơ rim khŭl bơngai mă inh ưh tam năm chă bơtho tơdrong 'nao 'lơ̆ng Yêsu Krist, mă bơngai Grĕk, mă bơngai nai, mă bơngai kơtul, mă bơngai hơgei, inh oei tă hre kơ sư ngăl.

Rom 10:12

Kră Yang Yêsu Krist Sư lăng rim khŭl bơngai lei-lăi đĕch, ưh kơ phara ôh. Sư lăng bơngai Isơrael kư̆m dang bơngai nai. Sư wei-lăng tơgŭm tơpă rim khŭl bơngai mă băt kơ krao khan apinh Sư.

Rom 3:22

'Bok Kei-Dei jô̆ đĭ-đăng kon bơngai jing 'lơ̆ng yua kơ sư lui kơ Yêsu Krist. Yua kơ thoi noh na dang ei bơ̆n băt boih đĭ-đăng bơngai dang ăi đĕch;

Rom 3:29

Bĭ iĕm tơchĕng thoi yơ, 'Bok Kei-Dei Sư Kră Yang lu bơngai Juđê đĕch dah lu bơngai nai hai? Sư Kră Yang lu bơngai nai hai mơ̆n.

I Kor 12:13

Na đĭ rim khŭl bơngai, bơngai Juđê, bơngai khŭl nai, mă bơngai đĭch đe, mă bơngai rơngei, dah bơ̆n lui kơ Yêsu Krist, Yang Bơhngol 'Lơ̆ng pơm 'batem kơ bơ̆n pơgơ̆p bơ̆n jing minh jơhngơ̆m minh đon dih băl. Sư minh 'nu đĕch, mă-lei đĭ-đăng kơ bơ̆n iŏk Sư.

I Kor 14:11

Mă-lei dah bơ̆n tơ'bơ̆p bơngai tơmoi pơma nơ̆r pha kơ bơ̆n, bơ̆n ưh kơ hlôh nơ̆r sư pơma, bơ̆n lăng sư bơngai tơmoi đĕch păng sư lăng bơ̆n kư̆m lei-lăi.

I Kor 7:19

Tơdrong kăt akar dah ưh kơ kăt akar ưh kơ kăl kiơ ôh, pôm tơdrong pơm kiơ̆ thoi 'Bok Kei-Dei pơkă 'noh đĕch kăl.

Galati 2:20

Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

Galati 5:6

Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng 'mêm mơnat kơ đe, noh kăl.

Êphêsô 1:23

na lu bơngai lui kơ Sư thoi akâu Sư. Lu bơngai lui boih gô tơbăt ăn kơ lu bơngai tam mă lui tôm tơdrong Yêsu Krist, yua kơ Yêsu Krist Yŏng pơgơ̆r păng pơjing tôm tĕch tơdrong jơ̆p-jang kơ plĕnh teh.

Êphêsô 2:14

Sơ̆ lu bơngai Juđê hăm lu bơngai nai areh dih băl tơpă. Mă-lei Yêsu Krist pơm 'long sơlam kơ bơ̆n, ăn kơ bơ̆n jing hiôk dih băl, ưh pă đei kiơ pĕng tŏk-bŏk bơ̆n dơ̆ng.

Êphêsô 2:15

Yua kơ akâu Sư kơdih lôch tang đĭ-đăng kơ bơ̆n, mă bơngai Juđê, mă bơngai nai, na tơdrong juăt sơ̆ mă pơm kơ bơ̆n tơklah băl, dang ei ưh pă kăl kơ tơdrong juăt 'noh dơ̆ng boih; yua kơ tơdrong juăt 'noh sơ̆ pơm kơ bơ̆n tơklah băl jing 'bar khŭl. 'Bar khŭl 'noh sơ̆ dang ei pơm jing minh ưh pă areh băl boih,

Êphêsô 3:17

Păng inh kư̆m apinh Yêsu Krist mơ̆t oei lăm jơhngơ̆m iĕm yua kơ iĕm lui kơ Sư. Păng inh apinh Sư ăn kơ iĕm đei đon 'mêm mơnat kơ bôl buăl lăm tôm tơdrong,

Êphêsô 3:6

Tơdrong 'noh lĕch đơ̆ng tơdrong 'nao 'lơ̆ng Yêsu Krist, na lu iĕm bơngai khŭl nai dang ei kư̆m hơdai đei tơdrong hiôk jơnap noh. Tơdrong hiôk jơnap noh sơ̆ Sư khan wă ăn kơ lu bơngai Juđê nhôn mă dang ei đei truh tơ iĕm boih; bơ̆n dang 'nhŏng oh minh sĕch minh akar. Iĕm klaih đơ̆ng tơdrong yoch oei hiôk jơnap hăm 'Bok Kei-Dei kư̆m thoi 'Bok Kei-Dei ăn kơ lu nhôn mơ̆n.

Êphêsô 6:8

Yua kơ Yŏng bơ̆n Yêsu Krist wă apah bơngai bu mă jang 'lơ̆ng jang tơpăt, mă khan sư bơngai đĭch đe, mă bơngai rơngei.

Kôlôsê 2:10

Na iĕm pôm đon hăm Yêsu Krist, Kră Yang 'Bok Kei-Dei kư̆m ăn kơ iĕm jing lei-lăi thoi Yêsu mơ̆n. Yêsu Krist Sư pơm Kră, Sư pơgơ̆r tôm kơ yŏng pơgơ̆r lu yang, tôm kơ yŏng pơgơ̆r lu linh jang.

I Yo 5:20

Bơ̆n băt Kon pôm 'Bok Kei-Dei jur tơ bơ̆n boih. Sư roi tơbăt ăn kơ bơ̆n tôm tơdrong 'Bok Kei-Dei Kră Yang tơm tơpă. Bơ̆n pôm đon păng Kră Yang 'Bok Kei-Dei păng pôm đon păng Kon Sư Yêsu Krist mơ̆n. Yêsu Krist Sư kư̆m Kră Yang tơpă mơ̆n na Sư ăn kơ bơ̆n arih ling-lang.

II Yo 1:9

Bơngai bu khan sư băt hloh kơ bơ̆n mă sư ưh kơ wă kiơ̆ thoi Yêsu Krist bơtho, bơngai 'noh 'Bok Kei-Dei ưh kơ oei hơdai păng sư ôh. Dah bơngai bu oei kiơ̆ dôm tơdrong Yêsu Krist bơtho, bơngai 'noh 'Bă tơm bơ̆n 'Bok Kei-Dei păng Kon Sư Yêsu Krist oei hơdai păng sư.