Kôlôsê 2:2 - Sơ̆p Hlabơar Nơ̆r 'Bok Kei-Dei

² Inh wă kơ iĕm lui kơjăp jing pôm đon băt 'mêm mơnat dih băl na gơh hlôh tơdrong 'Bok Kei-Dei, hăm hlôh tơdrong hlơp 'Bok Kei-Dei tam mă tơbăt kơ đe đơ̆ng sơ̆ noh. Mă-lei dang ei iĕm băt boih tơdrong noh, wă khan tơdrong Yêsu Krist.

Kôlôsê 2:2 Iomraidhean Croise

I Pot 3:28

Đĭ-đăng bơngai Isơrael kơtơ̆ng tơdrong pơtao sek tơlang noh lu sư hli yom ư-ang kơ pơtao, yua kơ lu sư 'bôh pơtao đei tơdrong gơh hơgei đơ̆ng Kră Yang 'Bok Kei-Dei, wă kơ sek tơlang tơpăt.

Horiso 133:1

Ơ lăng deh 'lơ̆ng hơiă tơpă 'nhŏng oh oei sa hiôk pơgơ̆p băl.

Êsai 32:17

Tơdrong jang 'lơ̆ng tơpăt gô jing tơdrong hiôk-hian, plei tơdrong 'lơ̆ng tơpăt gô đei hiôk hơđơ̆ng ling-lang.

Êsai 40:1

Kră Yang 'Bok Kei-Dei lu iĕm khan: Pơlung bĕ, pơlung bĕ kon pơlei Inh.

Êsai 53:11

Đơ̆ng rŏng kơ bơhngol sư đei tơdrong pơmat-tat. Sư anih 'bôh hơdah. Đơ̆ng tơdrong sư hlôh băt sư gô hiôk. Đĭch đam Inh 'lơ̆ng tơpăt noh, Sư ăn đei lơ bơngai 'lơ̆ng tơpăt đơ̆ng sư pŭ iŏk tơdrong yoch lu sư.

Je 9:24

Mă-lei bơngai bu wă pơang, pơang bĕ kơ kơdih tơdrong 'nâu, pơang kơ tơdrong sư đei đon hơgei băt kơ Inh. Băt Inh boih Kră Yang, Tơ'ngla 'mêm mơnat ưh kơ tơplih, Tơ'ngla mă pơm tơdrong tơpăt, tơdrong trŏ lăm teh đak âu; na Inh hiôk lăm tơdrong noh,” noh Kră Yang khan.

Mathiơ 11:25

Kơplah noh Yêsu krao khan kơ 'Bă Sư khan: “Ơ 'Bă, Ih boih Kră Yang plĕnh teh. Inh bơnê kơ Ih, yua kơ dôm tơdrong Inh bơtho, Ih tơbăt kơ lu bơngai mă băt gơnang kơ Ih thoi lu hơ'lơ̆p băt gơnang kơ mĕ 'bă; păng Ih ưh kơ wă tơhlôh kơ lu bơngai mă gơnang kơ akâu sư kơdih hŏk hơgei.

Mathiơ 11:27

“'Bă Inh jao ăn kơ Inh tôm tĕch tơdrong. Minh 'nu 'Bă Inh đĕch băt kơ Inh păng minh 'nu Inh đĕch băt kơ Sư. Na tơdrong tơbăt ăn kơ iĕm 'Bă Inh, Sư gô mơ̆ng kơ Inh wă.

Mathiơ 13:11

Yêsu khan: “'Bok Kei-Dei ăn kơ iĕm băt gah tơdrong Sư wă pơgơ̆r kon bơngai thoi yơ, mă-lei Sư ưh kơ ăn kơ lu bơngai tơpôl noh băt ôh.

Luka 1:1

Ơ Theophil, đơ̆ng sơ̆ khơ̆ dang ei đei lơ bơngai chă chih roi gah dôm tơdrong Yêsu oei hơdai păng bơ̆n tơ ala teh âu sơ̆.

Yo 10:30

Nhi 'Bă Inh dang minh 'nu akâu đĕch.”

Yo 10:38

Iĕm kuă kơ lui kơ nơ̆r Inh bơtho, mă-lei iĕm athei lui kơ dôm tơdrong mơsêh mơyang Inh pơm krô hmă noh hŏ, yua kơ đơ̆ng 'Bă Inh tơpă. Dah iĕm lui iĕm gô băt tơpă 'Bă Inh oei lăm Inh, nhi 'Bă Inh minh jơhngơ̆m minh đon.”

Yo 16:15

Dôm tơdrong 'Bă Inh kư̆m thoi tơdrong Inh mơ̆n, kơlih kơ thoi noh na Inh khan Yang Bơhngol 'Lơ̆ng gô bơtho iĕm dôm tơdrong Inh.

Yo 17:3

Lu sư đei tơdrong arih ling-lang yua kơ lu sư lui kơ Ih Kră Yang 'Bă Tơm kơpal plĕnh păng băt kơ Inh Yêsu Krist mă Ih wơh jur tơ ala teh âu.

Yo 5:17

Yêsu khan kơ lu bơngai Juđê ei thoi âu: “'Bă Inh oei jang ling-lang truh dang ei ưh kơ đei pơdơh na Inh athei jang lei-lăi thoi Sư mơ̆n.”

Yo 5:23

wă kơ đĭ-đăng bơngai lui yom kơ Kon Sư kư̆m thoi lu sư lui yom kơ 'Bă Sư. Bơngai bu ưh kơ lui yom kơ Kon Sư, bơngai 'noh kư̆m dang sư ưh kơ lui yom kơ 'Bă Sư, yua kơ Kon Sư đơ̆ng 'Bă Sư wơh.

Yo 6:69

Nhôn lui boih kơ Ih. Nhôn băt kơ Ih Kon 'Bok Kei-Dei mă 'lơ̆ng tơpăt.”

Jang 4:32

Dôm lu bơngai lui pôm đon pôm jơhngơ̆m. Rim 'nu lu sư đei tơmam kơdih kơdih, mă-lei lu sư jô̆ tơmam sư hơdai ngăl.

Rom 15:13

Yua kơ bơ̆n gơnang kơ 'Bok Kei-Dei tơpă, na bơ̆n băt chang gô tôm tơdrong 'Bok Kei-Dei wă ăn kơ bơ̆n. Na inh apinh Sư ăn kơ chăl arih iĕm hiôk hơiă, hiôk-hian yua kơ iĕm lui kơ Sư, na Yang Bơhngol 'Lơ̆ng tơgŭm iĕm băt kơ tơdrong chang gô noh.

Rom 16:25

Bơnê kơ 'Bok Kei-Dei, Sư boih gơh tơgŭm iĕm lui kơjăp, inh bơtho iĕm tơdrong 'nao 'lơ̆ng Yêsu Krist wă kơ iĕm băt Sư gơh ăn kơ iĕm lui kơjăp. Tơdrong Yêsu Krist âu lu kră sơ̆ ưh tam kơtơ̆ng ôh.

Rom 2:4

'Bok Kei-Dei ưh kơ ăn kơ iĕm tơdrong gleh yua kơ iĕm ưh kơ đei tơdrong yoch hă? Ưh ôh. Sư ưh kơ ăn kơ iĕm tơdrong gleh yua kơ Sư wă kơ iĕm jah tơbral kơdih tơdrong yoch ră. Sư mơnat kơ iĕm tơpă na Sư ăn kơ iĕm oei hiôk khŏm khŏm. Mă-lei iĕm oei pơm yoch hơnơ̆ng đĕch ưh kơ đei tơbral ôh.

I Kor 14:31

Lu iĕm bơngai mă 'Bok Kei-Dei rơih wă pơtruh nơ̆r Sư kơ bôl buăl, đĭ-đăng kơ iĕm gơh bơtho mơ̆n, mă-lei iĕm athei iung pơma bơlơh băl mơ-minh 'nu, thoi noh na đĭ-đăng kơ bôl gơh băt nhên tơdrong 'Bok Kei-Dei na jing hiôk chơt.

I Kor 2:12

Mă-lei bơ̆n bơngai lui ưh kơ wă iŏk ôh tơdrong tơchĕng ala teh âu. Bơ̆n đei Yang Bơhngol 'Lơ̆ng jur tơ bơ̆n, wă kơ bơ̆n băt tôm tơdrong 'Bok Kei-Dei pơkă khan wă ăn kơ bơ̆n.

Galati 3:28

Kră Yang Yêsu Krist đih sơng glơng iŏk đĭ-đăng bơngai lui kơ Sư, ưh kơ đei achăng lê̆ bu bu ôh, mă khan bơngai Juđê, bơngai tơmoi nai, mă bơngai đĭch đe, mă bơngai rơngei, bơngai drŏ-nglo dah drŏ-kăn, đĭ-đăng kơ bơ̆n pôm đon dih băl păng pôm đon hăm Yêsu Krist.

Êphêsô 1:7

Kon pôm Sư lôch tuh pham wă huai iŏk bơ̆n, wă kơ bơ̆n klaih đơ̆ng tơdrong 'Bok Kei-Dei jô̆ yo. Tơdrong noh yua kơ Sư 'mêm na Sư ăn đĕch thoi noh.

Êphêsô 3:16

Sư đei tôm tĕch tơdrong na inh apinh Sư ăn kơ iĕm Yang Bơhngol 'Lơ̆ng Sư oei hơdai hăm iĕm wă kơ iĕm đei jơhngơ̆m pran.

Êphêsô 3:3

Sư tơbăt ăn kơ inh tơdrong mă đe ưh tam mă băt đơ̆ng sơ̆, tơdrong mă inh chih roi tơ kơpal 'noh hei.

Êphêsô 6:22

Thoi noh na inh wơh sư năm tơ iĕm wă kơ iĕm băt kơ nhôn oei 'lơ̆ng akâu păng wă kơ sư pơlung iĕm hiôk kơ jơhngơ̆m kơtơ̆ng tơdrong nhôn thoi yơ.

Philip 2:1

Yua kơ bơ̆n pôm đon hăm Yêsu Krist na bơ̆n băt kơ pơlung dih băl, băt kơ 'mêm mơnat dih băl; 'noh yua kơ Yang Bơhngol 'Lơ̆ng oei hăm bơ̆n.

Philip 3:8

Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist,

Kôlôsê 1:26

Tơdrong noh sơ̆ 'Bok Kei-Dei ưh tam mă tơbăt ăn kơ đe ôh, dôm chăl boih mă 'nao tơbăt ăn kơ lu kon Sư dang ei.

Kôlôsê 1:27

Wă khan lu bơ̆n boih kon Sư, na Sư wă tơgŭm bơ̆n tôm tơdrong, tôm kơ khŭl kon bơngai jơ̆p kơ teh đak. Tơdrong Sư tơgŭm bơ̆n noh thoi yơ, wă khan thoi âu: Sư ăn Yêsu Krist oei lăm bơ̆n, na bơ̆n gơh băt kơ ning-mônh bơ̆n gô oei arih hiôk jơnap hăm Sư.

Kôlôsê 1:9

Thoi noh boih na đơ̆ng năr nhôn kơtơ̆ng tơdrong iĕm lui kơjăp, na nhôn krao khan kơ 'Bok Kei-Dei ăn kơ iĕm gơnang kơ Yang Bơhngol 'Lơ̆ng wă kơ iĕm hlôh băt tôm tơdrong 'Bok Kei-Dei, kiơ̆ thoi Sư lăp đon.

Kôlôsê 2:19

Lu bơngai noh ưh kơ pơm pôm đon hăm Yêsu Krist ôh. Yêsu Krist boih pơm tơm kơ bơ̆n; Sư thoi kơ̆l, lu bơ̆n mă lui kơ Sư tơpă, thoi kơ akâu Sư hăm jơ̆ng ti Sư. Yua kơ Sư na đĭ lăm trôm akâu bơ̆n băt kơ pơgơ̆p băl. Sư bơ̆jang lăm trôm akâu Sư noh wă khan lu bơ̆n bơngai lui, thoi lĕ kơ 'me tơmam sa, na bơ̆n rai đunh rai wơ̆, rai gơh tơchĕng trŏ thoi 'Bok Kei-Dei wă.

Kôlôsê 3:14

Kăl tơpă tơdrong 'mêm mơnat dih băl; dah bơ̆n đei tơdrong 'mêm mơnat dih băl boih, bơ̆n gô 'bôh tôm tơdrong bơ̆n pơm 'lơ̆ng.

Kôlôsê 4:3

Apinh iĕm krao khan kơ 'Bok Kei-Dei tơgŭm nhôn 'biơ̆ hŏ wă kơ Sư ăn kơ nhôn gơh bơtho nơ̆r Sư kơ lơ bơngai, tơdrong Kon Sư Yêsu Krist mă tam mă tơbăt kơ đe đơ̆ng sơ̆. Yua kơ inh bơtho tơdrong 'noh na đe oei phak inh dang ei.

Kôlôsê 4:8

Inh wơh sư năm tơ iĕm wă kơ iĕm băt kơ nhôn oei 'lơ̆ng akâu, hăm wă kơ sư pơma pơlung iĕm, wă kơ iĕm hiôk kơ jơhngơ̆m 'biơ̆.

I Tes 1:5

Nhôn bơtho kơ iĕm tơdrong 'nao 'lơ̆ng ưh kơ sĭ păng 'bơ̆r nhôn pơma đĕch ôh, yua kơ mơsêh mơyang đơ̆ng Yang Bơhngol 'Lơ̆ng tơgŭm nhôn păng tơgŭm iĕm na iĕm băt nhôn bơtho tơdrong 'Bok Kei-Dei tơpă. Iĕm kư̆m băt nhôn bơngai thoi yơ pơm tơdrong kiơ hơtai nhôn oei hăm iĕm ki. Hăm trŏ nhôn adrin tơgŭm iĕm ling-lang tơpă dah ưh?

I Tes 5:14

Ơ 'nhŏng oh, nhôn pơkă kơ iĕm thoi âu: Iĕm athei bơtho bơngai alah wă kơ sư pơnam. Iĕm athei pơma dơnuh kơ bơngai sơ'ngon wă kơ sư hiơt kơ tơdrong sơ'ngon huay pă ơh klai dơ̆ng. Bơtho lu bơngai lui rơdu wă kơ sư lui kơjăp. Đe hơwĕng hil areh kơ iĕm, iĕm athei lê̆ đĕch.

I Tim 3:16

Tơdrong lui bơ̆n tih hloh tơpă: Kră Yang jur jing bơngai, Yang Bơhngol 'Lơ̆ng tơbăt kơ đe Sư bơngai 'lơ̆ng tơpăt. Lu linh jang 'lơ̆ng kư̆m 'bôh Sư mơ̆n. Na lu bơngai lui kơ Sư bơtho tơdrong Sư tơ teh đak đe. Đei lơ bơngai lui kơ Sư tơ ala teh âu, klaih kơ noh 'Bok Kei-Dei atŏk Sư tơ Pơlei 'Lơ̆ng Sư.

Hêbrơ 10:22

Thoi noh bĕ bơ̆n năm jê̆ 'Bok Kei-Dei. Bơ̆n athei iŏk đon tơpăt, lui kơ Sư sơng iŏk bơ̆n mă tơpă, na jơhngơ̆m bơ̆n huay kơ tơchĕng kơnê̆, yua kơ bơ̆n đei pham Yêsu soi kơ bơ̆n boih. Sư dang tơtreh pham Sư tơ lăm jơhngơ̆m bơ̆n, bơ̆n jing bơngai rơgoh 'lơ̆ng boih; păng pơthim kơ năr bơ̆n iŏk 'batem dang bơ̆n hum đak hlăng 'lơ̆ng tăm.

Hêbrơ 6:11

Nhôn wă đĭ-đăng kơ iĕm adrin pơm kiơ̆ thoi noh ling-lang truh kơ tôch, na iĕm gô đei tơpă tơdrong mă iĕm oei chang sơmĕng dang ei noh.

II Pet 1:10

Ơ 'nhŏng oh, 'Bok Kei-Dei krao bơ̆n lui kơ Sư boih, na bơ̆n athei adrin lui mă kơjăp bĕ, na Sư gô iŏk bơ̆n tơpă. Dah bơ̆n adrin lui kiơ̆ thoi noh tơpă, bơ̆n huay kơ achăng lê̆ Sư ôh.

II Pet 1:3

Yua kơ Sư Yang, Sư mơsêh tơpă, na Sư ăn kơ bơ̆n tôm tơdrong gơh arih, gơh pơm 'lơ̆ng tơpăt thoi Sư. 'Noh yua kơ Sư krao, na bơ̆n băt kơ Sư. Bơ̆n 'bôh Sư mơsêh păng 'lơ̆ng tơpăt na bơ̆n băt kơ kiơ̆ Sư.

II Pet 3:18

Inh roi lê̆ kơ iĕm thoi noh wă kơ iĕm gơnang kơ Kră Yang bơ̆n Yêsu Krist mă dŏng pơklaih bơ̆n. Thoi noh na tơdrong lui iĕm rai đunh rai wơ̆ kơjăp. Păng inh wă kơ iĕm rai đunh rai hlôh wao tôm tơdrong Sư. Bĕ bôl jơ̆p teh ư-ang Sư đơ̆ng dang ei truh ning-mônh ưh kơ layơ tôch. A-men.

I Yo 3:19

Dah bơ̆n 'mêm mơnat kơ 'nhŏng oh bơ̆n hăm đĭ jơhngơ̆m đon bơ̆n, noh bơ̆n băt bơ̆n kiơ̆ tơdrong 'Bok Kei-Dei tơpă boih. Thoi noh na jơhngơ̆m bơ̆n huay pă hli kơ 'Bok Kei-Dei boih.

I Yo 5:7

Yang Bơhngol 'Lơ̆ng kư̆m roi kơ bơ̆n thoi noh wă kơ bơ̆n băt Yêsu Kon 'Bok Kei-Dei tơpă. Yang Bơhngol 'Lơ̆ng Sư pơma ling-lang tơpăt ngăl.