Kôlôsê 2:11 - Sơ̆p Hlabơar Nơ̆r 'Bok Kei-Dei

¹¹ Yua kơ iĕm pôm đon hăm Sư na iĕm kư̆m dang bơngai kăt tơdra akar mơ̆n. Mă-lei lu iĕm ưh kơ trŏ kăt păng ti tơpă ôh, Yêsu Krist Sư dang kăt ăn kơ iĕm. Sư tŭk lê̆ akâu so bơ̆n mă juăt kơ pơm yoch.

Kôlôsê 2:11 Iomraidhean Croise

Je 4:4

Kăt tơdra akar iĕm bĕ 'bơ̆t anăp Kră Yang, ơ kon drŏ-nglo Juđa păng kon pơlei Jêrusalem, Kăt bĕ akar jơhngơ̆m iĕm. Kơnh hli kơ tơdrong Inh hil iung thoi ŭnh sa, ưh kơ đei bu kĕ pĭt, yua kơ tơdrong yoch lu iĕm pơm boih.”

Markôs 14:58

“Nhôn kơtơ̆ng Sư khan wă yuih hnam akŭm 'Bok Kei-Dei tơm đêl đe pơm păng ti, na Sư gô pơm ming plơ̆ng dơ̆ng kơtĕch pêng năr keh hloi, mă-lei ưh kơ pơm păng ti.”

Luka 2:21

Lăp nge Yêsu truh tơhngam năr boih na đe kăt tơdra akar Sư păng anăn hloi Sư Yêsu kiơ̆ kơ linh jang 'lơ̆ng pơkă ăn kơ sư hơdrol kơ nge sư tam đei lăm klak mĕ Sư sơ̆.

Jang 17:24

'Bok Kei-Dei pơjing plĕnh teh păng đĭ-đăng sem tơmam oei lăm teh đak. Sư pơgơ̆r plĕnh teh, na Sư ưh kơ oei lăm hnam bơngai pơm ôh.

Jang 7:48

“Kră Yang 'Bok Kei-Dei ưh kơ wă oei ôh hnam kon bơngai pơm. 'Noh thoi bơngai pơtruh nơ̆r 'Bok Kei-Dei khan sơ̆:

Rom 2:29

Bơngai bu wă kiơ̆ tơdrong 'Bok Kei-Dei, sư kiơ̆ hăm đĭ jơhngơ̆m đon sư, bơngai noh 'Bok Kei-Dei jô̆ sư bơngai Juđê. Dah bơ̆n adrin kiơ̆ Sư hăm đĭ jơhngơ̆m klơm klak, 'nĕ kiơ̆ pôm 'bơ̆r, bơngai noh 'Bok Kei-Dei jô̆ dang sư kăt tơdra akar mơ̆n. Dah bơ̆n pơm thoi noh, bơ̆n ưh kơ kăl kơ kon bơngai lăp đon kơ bơ̆n ôh, yua kơ bơ̆n đei 'Bok Kei-Dei lăp đon kơ bơ̆n boih.

Rom 6:6

Sơ̆ bơ̆n akâu so, mă-lei dang ei dang đe pơ̆ng pơlôch bơ̆n hơdai hăm Yêsu tơ 'long pơglang boih, wă tơhiong đĭ dôm tơdrong so na mă bơ̆n gơh rơngei đơ̆ng tơdrong yoch.

Rom 7:24

Na inh âu boih bơngai ưh kơ yua tơpă, tơdrong kơnê̆ 'bĕnh kơ akâu ling-lang, na inh wă lôch đĕch boih. Dang ei bu gơh dŏng inh âu?

II Kor 5:1

Akâu bơ̆n tơ ala teh âu thoi lĕ kơ hnam oei. Tơ̆ng bơ̆n băt kơ hnam bơ̆n oei noh răm boih, bơ̆n gô đei hnam 'nao tơ plĕnh ti kơjăp hloh, ưh kơ layơ răm dơ̆ng. Hnam noh đơ̆ng tơ'ngla 'Bok Kei-Dei pơm kơ bơ̆n, ưh kơ sĭ đơ̆ng ti kon bơngai pơm ôh.

II Kor 5:17

Thoi noh na bu kiơ̆ Yêsu Krist, bơngai noh bơ̆n băt kơ 'Bok Kei-Dei pơjing sư jing bơngai 'nao, dôm tơdrong so ưh pă đei boih, sư đei tơdrong 'nao ngăl, yua kơ sư jing bơngai 'nao boih.

Galati 2:20

Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

Galati 5:24

Lu bơ̆n bơngai lui kơ Kră Yang Yêsu Krist đĭ hŭt lê̆ boih dôm lu tơdrong mă đon bơ̆n juăt kơ tơchĕng pơm tơdrong kơnê̆, dang lĕ kơ bơ̆n pơ̆ng dôm tơdrong noh tơ 'long pơglang.

Êphêsô 4:22

Iĕm athei lê̆ tơdrong so, tơdrong mă iĕm juăt kơ pơm sơ̆. Pơm thoi noh sơ̆ rai đunh rai răm yua kơ 'maih pơm lơ tơdrong kơnê̆.

Both 10:16

Na lu iĕm, athei băt hli yom kơ Kră Yanga 'nĕ pă arăng kơ̆l dơ̆ng.

Both 30:6

Kră Yang 'Bok Kei-Dei gô ăn kơ bơ̆n păng kon sâu lu bơ̆n đei jơhngơ̆m rơmuăn băt chu yom, wă kơ iĕm đĭ jơhngơ̆m klơm klak 'mêm yom kơ Kră Yang 'Bok Kei-Dei, wă kơ gơh arih.

Philip 3:3

Lu bơ̆n âu boih kiơ̆ kơ tơdrong 'Bok Kei-Dei pơkă tơpă. Mă-lei bơ̆n ưh kơ kăl kơ tơdrong kăt tơdra akar chă pơpơm kơdih păng ti thoi noh ôh. Bơ̆n kăl kơ Yang Bơhngol 'Lơ̆ng đĕch; bơ̆n athei gơnang kơ Sư wă kơ bơ̆n gơh kiơ̆ 'Bok Kei-Dei trŏ thoi Sư wă. Tơdrong kăt tơdra akar chă pơm kơdih păng ti đĕch na bơ̆n 'nĕ kơ kiơ̆ ôh hli kơ bơ̆n gơnang kơ tơdrong bơ̆n pơm kơdih, bơ̆n athei gơnang kơ Yêsu Krist đĕch.

Kôlôsê 3:5

Kơlih kơ thoi noh bơ̆n athei lê̆ đĭ dôm tơdrong yoch thoi kơ pơm pơyô kư̆ kă, pơm tơdrong kơnê̆ 'mê̆-'mach, hưch hanh kơ tơmam âu tơmam to, hưch hanh lơ tơdrong. Lu bơngai thoi noh mă sư khan sư lui kơ 'Bok Kei-Dei, dang sư kơkuh kơ yang nai đĕch, lu sư tơchĕng tơdrong noh hloh loi kơ tơdrong 'Bok Kei-Dei.

Hêbrơ 9:11

Na dang ei Yêsu Krist truh boih, Sư pơm 'bok soi ăn dôm tơdrong hiôk 'lơ̆ng kơ bơ̆n. Sư jang awih awăn tơ lăm hnam 'Bok Kei-Dei rŏ hloh kơ hnam akŭm lu bơngai noh sơ̆. Hnam Sư ei ưh kơ pơm păng ti kon bơngai ôh păng hnam ei ưh kơ trŏ kơ tơ teh âu ôh, hnam ei tơ plĕnh ti.

Hêbrơ 9:24

Thoi noh na dang ei Yêsu Krist tŏk tơ plĕnh ti mơ̆t tơ hnam 'Bok Kei-Dei tơ plĕnh ti boih. Sư ưh kơ mơ̆t tơ hnam 'Bok Kei-Dei mă kon bơngai pơm tơ teh âu ôh, hnam 'Bok Kei-Dei mă kon bơngai pơm tơ teh âu noh, wă pơtih gia kơ hnam 'Bok Kei-Dei tơ plĕnh ti. Dang ei Yêsu Krist tŏk oei tơ noh tơpă boih, Sư oei 'bơ̆t anăp 'Bok Kei-Dei tang đĭ-đăng rim 'nu bơngai.