Kôlôsê 1:9 - Sơ̆p Hlabơar Nơ̆r 'Bok Kei-Dei

⁹ Thoi noh boih na đơ̆ng năr nhôn kơtơ̆ng tơdrong iĕm lui kơjăp, na nhôn krao khan kơ 'Bok Kei-Dei ăn kơ iĕm gơnang kơ Yang Bơhngol 'Lơ̆ng wă kơ iĕm hlôh băt tôm tơdrong 'Bok Kei-Dei, kiơ̆ thoi Sư lăp đon.

Kôlôsê 1:9 Iomraidhean Croise

Horiso 119:99

Inh đei đon hơgei hloh kơ lu bơngai bơtho inh. Yua kơ inh tơchĕng lu tơdrong đêl Ih bơtho khan.

Horiso 143:10

Apinh Ih bơtho inh pơm kiơ̆ Ih wă. Yua kơ Ih boih Kră Yang 'Bok Kei-Dei inh, ăn Yang Bơhngol 'Lơ̆ng Ih ba inh mơ̆t tơ teh đak dơhnă.

Yo 7:17

Bơngai bu 'maih pơm kiơ̆ thoi 'Bok Kei-Dei wă, bơngai 'noh sư gô băt tơdrong Inh bơtho âu lĕch đơ̆ng 'Bok Kei-Dei tơpă, dah lĕch đơ̆ng Inh kơdih.

Jang 12:5

Hơtai Pêtrôs oei lăm hnam phak, na lu bơngai lui kơ Yêsu krao khan ling-lang kơ 'Bok Kei-Dei hăm đĭ jơhngơ̆m apinh Sư tơgŭm Pêtrôs wă kơ gơh lĕch.

Rom 12:2

Bơ̆n 'nĕ pă pơm yoch tôm tơdrong kơnê̆ thoi lu bơngai tơ teh âu juăt kơ pơm. Bơ̆n athei pơjao akâu bơ̆n kơ 'Bok Kei-Dei tơplih jơhngơ̆m đon bơ̆n jing 'nao wă kơ bơ̆n băt tôm tơdrong Sư, tơdrong trŏ tơdrong 'lơ̆ng tơpăt ngăl.

I Kor 1:5

Yua kơ đơ̆ng tơdrong iĕm lui na iĕm jing băt tôm tơdrong, iĕm hơgei kơ bơtho, iĕm kư̆m hlôh tơdrong Sư mơ̆n.

Êphêsô 1:8

Sư kư̆m ăn kơ bơ̆n hơgei gơh hlôh wao nhên

Êphêsô 5:10

Iĕm athei chă dôm tơdrong 'Bok Kei-Dei lăp đon noh.

Êphêsô 5:17

Thoi noh na bơ̆n athei kơchăng oei mă hơđơ̆ng 'nĕ kơ pơm thoi bơngai kơhlôh, adrol kơ wă pơm athei tơchĕng lăng 'mơ̆i wă kơ băt Kră Yang lăp đon kơ bơ̆n pơm dah ưh.

Êphêsô 6:6

Iĕm athei jang mă tơpă ngê̆ kiơ kơ yŏng iĕm gŏk gô na jang, iĕm kư̆ kơ jang mă 'lơ'lŏ jang mă tơpăt đĕch na 'Bok Kei-Dei bơnê. Mă khan iĕm jang kơ sư kư̆m dang jang kơ Yŏng bơ̆n Yêsu mơ̆n.

Philip 1:4

Rim inh krao khan kơ 'Bok Kei-Dei, inh apinh Sư tơgŭm iĕm, na lăm jơhngơ̆m inh hiôk,

Kôlôsê 1:6

Lăp iĕm kơtơ̆ng đe bơtho tơdrong 'Bok Kei-Dei 'mêm mơnat kơ bơ̆n sơ̆ na iĕm hlôh hloi; đơ̆ng năr noh boih iĕm jing bơngai 'nao, na bơngai lui iĕm rai đunh rai lơ, kư̆m thoi đe bơtho jing kơtơ̆ng jơ̆p-jang kơ teh đak đei lơ bơngai lui.

Kôlôsê 3:16

Bơ̆n athei pơm kiơ̆ dôm nơ̆r Yêsu Krist ling-lang wă kơ bơ̆n bơtho dih băl hơgei 'blep trŏ thoi Sư wă. Mă tơdrong hơri kư̆m lei-lăi wă kơ bơtho dih băl tơdrong Sư, wă kơ bơ̆n hơri bơnê kơ 'Bok Kei-Dei, mă hơri tơdrong kră sơ̆, mă hơri tơdrong lu bơngai dang ei, mă hơri kiơ̆ kơ đon bơ̆n tơchĕng, mă tôm kơ tơdrong hơri nai wă kơ bơ̆n hơri bơnê kơ 'Bok Kei-Dei ngăl.

Kôlôsê 4:12

Êpapra sư bơngai pôm pơlei hăm iĕm, sư kư̆m jang tơdrong Yêsu Krist na sư wă jet gia iĕm tơ âu. Sư krao khan apinh 'Bok Kei-Dei tơgŭm iĕm ling-lang, wă kơ iĕm lui kơjăp păng hlôh băt tôm tơdrong 'Bok Kei-Dei na pơm kiơ̆ hloi.

Kôlôsê 4:5

Bơ̆n athei adrin pơm mă 'lơ̆ng pơma mă trŏ kơ lu bơngai tam mă lui, wă kơ lu sư mơ̆ng trŏ na lui kơ 'Bok Kei-Dei.

I Tes 1:3

Nhôn oei 'blŏk hơdơ̆r ling-lang kơ iĕm lui kơjăp kơ Kră Yang Yêsu Krist, iĕm gơh 'mêm kơ Sư păng 'mêm mơnat kơ bôl buăl păng jang gleh tơpă tơdrong Sư. Nhôn oei 'blŏk hơdơ̆r kơ iĕm mơ̆n, iĕm đei tơdrong gleh pơmat-tat, iĕm oei khŏm adrin 'mơ̆i, yua kơ iĕm chang gô Kră Yang Yêsu Krist jur tơ ala teh âu dơ̆ng. 'Bă tơm bơ̆n 'Bok Kei-Dei kư̆m 'bôh mơ̆n dôm lu tơdrong iĕm jang kơ Sư 'noh.

II Tes 1:11

Kơlih kơ thoi noh nhôn krao khan kơ Kră Yang 'Bok Kei-Dei apinh Sư ăn kơ iĕm lui kơjăp khŏm khŏm trŏ thoi Sư wă. Sư boih krao iŏk lu iĕm wă kơ iĕm jing kon Sư. Nhôn apinh Sư ăn kơ iĕm jơhngơ̆m pran wă kơ iĕm gơh răk đon 'lơ̆ng tơpăt, kư̆m thoi iĕm tơchĕng wă mơ̆n. Nhôn apinh Sư ăn kơ iĕm lui kơjăp wă kơ iĕm jang tơdrong Sư pran kơtang.

Phil 1:4

Inh krao khan bơnê kơ 'Bă tơm bơ̆n 'Bok Kei-Dei ling-lang kơlih kơ inh kơtơ̆ng ang ih lui kơjăp kơ Kră Yang Yêsu Krist păng ih 'mêm kơ Sư hăm đĭ-đăng buăl lui mơ̆n.

Phil 1:6

Inh kư̆m ling-lang krao khan kơ 'Bok Kei-Dei ăn kơ ih đei đon gơh mơnat kơ đe tơdŏng đe wă kơ đe 'bôh dôm tơdrong Yêsu Krist ăn kơ ih băt mơnat kơ đe. Thoi noh na đe băt kơ ih lui kơjăp tơpă.

Hêbrơ 10:36

Iĕm athei adrin ling-lang mă tơpă, na iĕm pơm trŏ thoi 'Bok Kei-Dei lăp đon, gơh iŏk dôm tơdrong Sư pơkă khan wă asong kơ bơ̆n noh.

Hêbrơ 13:21

Na inh apinh 'Bok Kei-Dei oei păng iĕm, ăn kơ iĕm tôm tơdrong hiôk chơt, wă kơ iĕm gơh jang trŏ thoi Sư wă, Sư ăn kơ Yêsu Krist jang lăm jơhngơ̆m đon lu bơ̆n tôm tơdrong thoi Sư lăp đon, trŏ kơ bơ̆n ư-ang Sư ling-lang ưh kơ layơ tôch. A-men.

Ya 1:5

Tơ̆ng đei lăm lu iĕm bơngai bu ưh tam gan hlôh tơdrong 'Bok Kei-Dei, bơngai noh athei apinh 'Bok Kei-Dei ăn kơ sư hlôh. Na 'Bok Kei-Dei gô ăn kơ sư hlôh tơpă, yua kơ 'Bok Kei-Dei hơlăng dêh, Sư ưh kơ kret ôh kơ lu bơngai mă apinh Sư păng Sư huay kơ hil kơ lu bơngai mă apinh Sư noh.

Ya 3:17

Na gah tơdrong hơgei, bơngai bu hơgei đơ̆ng 'Bok Kei-Dei ăn, bơngai noh bơ̆n 'bôh sư pơm tôm tơdrong 'lơ̆ng, sư bơngai dim gơh găt hăm đe, băt chu yom kơ lu bơngai tih kơ sư, băt mơnat kơ đe, băt asong băl tơmam; sư bơngai tơpăt tơpă, ưh kơ sĭ sư chă pơm đĕch ôh.

I Pet 2:15

'Bok Kei-Dei wă kơ bơ̆n pơm 'lơ̆ng ling-lang, thoi noh na lu bơngai ưh kơ hlôh pơŏm 'bơ̆r huay pă pơma kơ bơ̆n dơ̆ng.

I Pet 4:2

Kơplah bơ̆n oei arih tơ ala teh âu, bơ̆n 'nĕ pă kiơ̆ kơ jơhngơ̆m đon wă, bơ̆n athei kiơ̆ kơ 'Bok Kei-Dei wă đĕch.

I Yo 2:17

Ala teh âu dôm tơdrong kon bơngai 'maih iŏk gô răm, mă-lei dah bơngai bu pơm trŏ thoi 'Bok Kei-Dei wă, bơngai 'noh gô arih ling-lang.

I Yo 5:20

Bơ̆n băt Kon pôm 'Bok Kei-Dei jur tơ bơ̆n boih. Sư roi tơbăt ăn kơ bơ̆n tôm tơdrong 'Bok Kei-Dei Kră Yang tơm tơpă. Bơ̆n pôm đon păng Kră Yang 'Bok Kei-Dei păng pôm đon păng Kon Sư Yêsu Krist mơ̆n. Yêsu Krist Sư kư̆m Kră Yang tơpă mơ̆n na Sư ăn kơ bơ̆n arih ling-lang.

I Sam 12:23

Gah inh, inh ưh kơ pơdơh kơ krao khan kơ iĕm. Wă kơ inh huay kơ pơm yoch hăm Kră Yang. Inh gô bơtho tơ'bôh lu iĕm băt kơ trong 'lơ̆ng păng tơpăt.