Jôsuê 14:12 - Sơ̆p Hlabơar Nơ̆r 'Bok Kei-Dei

¹² Hrei âu ăn bĕ kơ inh teh kông groi âu, mă Kră Yang pơkă boih wă ăn kơ inh lăm năr noh sơ̆, ih kư̆m kơtơ̆ng băt boih năr noh sơ̆ đei kon pơlei Anakim oei tơ noh păng đei pơlei tih să kơjăp, mă-lei đei Kră Yang tơgŭm inh, na inh gô pơpuh lu sư, kiơ̆ thoi Kră Yang khan boih.

Jôsuê 14:12 Iomraidhean Croise

II Pot 19:4

Rŏ lăng Kră Yang 'Bok Kei-Dei ih kơtơ̆ng bơih dôm nơ̆r Rapsaka bơngai mă pơtao đe Asiri yŏng sư wơh wă năm pơjăm Kră Yang 'Bok Kei-Dei mă arih ling-lang păng Kră Yang ih gô hil phak dôm nơ̆r mă Sư hlôi kơtơ̆ng. Thoi noh, inh apinh ih krao khan tơgŭm lu bơngai mă oei arih.”

II Ho 14:11

Asa krao apinh Kră Yang 'Bok Kei-Dei sư khan: “Ơ Kră Yang, ưh kơ đei bu thoi Ih tơgŭm lu bơngai tơrăn kĕ jei đơ̆ng bơngai pran; Ơ Kră Yang 'Bok Kei-Dei nhôn, apinh Ih dŏng tơgŭm lu nhôn, lu nhôn gơnang kơ Ih; nhôn yua hăm anăn Ih na năm blah lu bơngai linh lơ âu. Ơ Kră Yang! Ih boih Kră Yang 'Bok Kei-Dei lu nhôn; 'nĕ ăn kơ kon bơngai jei hloh kơ Ih”

Horiso 44:3

Ưh kơ trŏ đơ̆ng yua khêl đao sư mă đei dêh char, kư̆m ưh kơ đei đơ̆ng tơpang ti kơdih mă đei jơnei.a Mă-lei đơ̆ng ti 'ma Ih, kơkŏng Ih păng tơdrong hơdah đơ̆ng muh măt Ih. Yua kơ Ih 'mêm kơ lu sư.

Horiso 60:12

Đơ̆ng Kră Yang 'Bok Kei-Dei lu bơ̆n gơh kĕ jei; Yua kơ sư gô juă bơhlơ̆r lu ayăt kơ nhôn.

Jo 13:28

Mă-lei kon pơlei oei lăm char noh bơngai pran kơtang, anih pơlei dur kơjăp păng tih; mă-lei lu nhôn 'bôh đei kon sâu Anak oei tơ noh.

Jo 13:33

Lu nhôn 'bôh lu sư tih kơjung, noh lu kon sâu Anak, adrĕch bơngai nuih pran kơtang; lu nhôn lăng bơ̆n kơdih rŏ thoi lep 'ba, lu sư lăng lu nhôn kư̆m thoi noh mơ̆n.

Jo 21:34

Mă-lei Kră Yang khan kơ Môis, 'nĕ hli kơ sư ôh, yua kơ Inh jao tơring sư hăm kon pơlei sư tơ lăm ti ih boih; pơm bĕ kơ lu sư thoi ih pơm kơ Sihôn pơtao Amôrit, bơngai mă lăm pơlei Hesbôn.

Rom 8:31

'Bok Kei-Dei Sư 'mêm, Sư tơgŭm bơ̆n dang noh boih, na bơ̆n ưh pă hli kơ tơdrong kiơ dơ̆ng.

Both 1:28

Lu bơ̆n wă năm tơ yơ? 'Nhŏng oh lu bơ̆n pơm kơ lu bơ̆n hli na khan: Adrĕch noh tih păng kơjung hloh kơ lu bơ̆n; pơlei lu sư ei tih păng man dur kơjăp kơjung truh tơ plĕnh; tơ noh lu nhôn kư̆m 'bôh lu kon sâu kon pơlei Anakim tih kơjung.

Both 9:1

Ơ kon pơlei Isơrael, mơ̆ng bĕ! Lu iĕm wă tŏk kơ Krong Jôrđăn, wă mơ̆t tơblah puh tơweh lu adrĕch tih păng pran hloh kơ iĕm pơlei tih đei dur kơjung kơjăp truh tơ plĕnh.

Both 9:3

Mă-lei iĕm athei băt tơpă: Kră Yang 'Bok Kei-Dei iĕm năm adrol kơ iĕm, nhen thoi pla ŭnh khơ̆ng dơhlông sa, Kră Yang boih Sư gô pơlôch pơrăm lu sư. Pơm kơ lu sư chu thuơ, lu iĕm gô pơlôch lu sư 'mônh đĕch, thoi Kră Yang đei pơkă hăm lu iĕm.

Philip 4:13

Inh kĕ iŏk dôm tơdrong 'noh yua kơ inh gơnang kơ Yêsu Krist na Sư ăn kơ inh kĕ iŏk dôm tơdrong 'noh. Tơ̆ng ưh, inh ưh kơ kĕ ôh.

Hêbrơ 11:33

Lu sư đei đon lui tơpă, na lu sư kĕ blah iŏk lơ teh đak noh nai. Lu sư bơngai pơgơ̆r tơpăt ling-lang, lu sư 'bôh tơpă boih tơdrong 'Bok Kei-Dei pơkă wă ăn kơ lu sư noh. Lăm lu sư kư̆m đei gơh pơŏm 'bơ̆r kiĕk.

Jôsuê 15:14

Đơ̆ng pơlei Hêbrôn Kalep puh tơweh pêng adrĕch Anak noh adrĕch Sêsai, Ahiman păng Thalmai noh adrĕch adrung Anak ngăl.

Lu 1:20

Kiơ̆ kơ Môis athei, lu sư jao pơlei Hêbrôn ăn kơ Kalep. Kalep pơpuh tơweh pêng 'nu kon drŏ-nglo Anak lĕch đơ̆ng pơlei ei.

I Sam 14:6

Jônathan khan hăm bơngai chĕp tơmam tơblah sư: Bĕ ba khŏm năm truh tơ kơđông lu bơngai ưh kơ kăt tơdra akar 'noh.c Băt Kră Yang gô tơgŭm kơ ba; ưh kơ đei tơdrong kiơ găn Kră Yang ăn kơ jei bơ̆n mă bơ̆n tŏ sĕt dah lơ.