I Tim 6:19 - Sơ̆p Hlabơar Nơ̆r 'Bok Kei-Dei

¹⁹ Dah sư hơlăng kơ đe thoi noh, mŭk măk sư huach 'biơ̆ mơ̆n, mă-lei sư mơdrŏng tôm tơdrong nơ̆r pơma đơ̆ng 'Bok Kei-Dei tơgŭm sư ling-lang păng sư gô iŏk tơdrong arih ning-mônh.

I Tim 6:19 Iomraidhean Croise

Horiso 17:14

Ơ Kră Yang, yua ti Ih dŏng pơklaih inh đơ̆ng lu kon bơngai. Lu bơngai arih lăm teh đak đĕch. Lu bơngai mă Ih pơm ăn kơ klak lu sư 'bĕnh hăm mŭk gĭt Ih;d Lu sư hiôk yua kơ kon lu sư, kư̆m đei 'măn lê̆ tơmam rơkah kơ kon sâu se sư.

Tơdrông Pơđơk 10:25

Tơdah hơbŭt truh, lu bơngai pơm kơnê̆ ưh pă đei dơ̆ng; Mă-lei lu bơngai pơm 'lơ̆ng hơnă jrăng oei đei ling-lang.

Tơdrông Pơđơk 31:25

Sư đei jơhngơ̆m pran kơtang, păng đe ang pơyom. Sư huay kơ hiơ̆k ôh 'bôh tơdrong truh dơning dơmônh oei hiĕk chơt hiôk đĕch.

Bôk Bơthô 11:2

Ih athei chă asong kơ tơpơh 'nu, tơhngam 'nu, truh tơ lơ bơngai, yua ưh kơ băt năr ayơ gô đei tơdrong truh kơ ih.

Mathiơ 19:21

Yêsu khan kơ sư: “Dah ih wă kiơ̆ tôm tơdrong 'Bok Kei-Dei pơkă lei ih athei tĕch đĭ mŭk tơmam ih chă asong kơ lu bơngai dơnuh hin, na kiơ̆ hloi Inh. Thoi noh na ih gô đei mŭk tơmam tơ kơpal plĕnh ti ning-mônh.”

Luka 12:33

Tĕch tơmam iĕm na tơgŭm lu bơngai dơnuh hin, na iĕm gô đei jên mă huay kơ hiong hiach oei 'măn lê̆ kơ iĕm tơ plĕnh ti. Tơ ei ưh kơ đei bơngai bu mă gơh tơtông iŏk dơ̆ng ôh. Tơ ei mua kư̆m ưh kơ gơh reh ngơ̆r tơmam iĕm mơ̆n.

Luka 16:25

“Mă-lei Abraham khan kơ sư: ‘Ơ dăm, ih athei 'blŏk mơ̆n kơplah ih oei arih tơ ala teh sơ̆ ih jơnap tơpă, đei tơmam lơ tơpă. Mă-lei Lasarơ ưh kơ đei kiơ păng jĭ ling-lang tăm. Dang ei sư oei tơ âu hiôk dêh, mă-lei ih oei lăm dơnâu ŭnh tŏ hang ling-lang.

Luka 16:9

“Na Inh khan kơ iĕm thoi âu: Jên boih tơmam ala teh âu đĕch mă-lei iĕm gơh yua jên mơ̆n wă tơgŭm bơngai dơnuh hin, na lăp jên iĕm ưh pă yua boih ning-mônh, iĕm gô đei bôl buăl lơ sơng iŏk iĕm tơ plĕnh ti.

Luka 18:2

“Tơ minh pôm pơlei ei đei minh 'nu 'bok sek tơlang, sư ưh kơ chu yom kơ 'Bok Kei-Dei păng ưh kơ hli kơ đe.

Luka 18:22

Yêsu kơtơ̆ng thoi noh na Sư khan: “Ih răk ưh kơ tôm oei pă minh tơdrong. Ih athei tĕch đĭ mŭk tơmam ih chă asong kơ lu bơngai dơnuh hin, na kiơ̆ Inh hloi. Thoi noh na ih gô đei mŭk tơmam tơ kơpal plĕnh ti ning-mônh.”

Galati 5:6

Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng 'mêm mơnat kơ đe, noh kăl.

Êphêsô 3:17

Păng inh kư̆m apinh Yêsu Krist mơ̆t oei lăm jơhngơ̆m iĕm yua kơ iĕm lui kơ Sư. Păng inh apinh Sư ăn kơ iĕm đei đon 'mêm mơnat kơ bôl buăl lăm tôm tơdrong,

Philip 3:12

Mă-lei tôm tơdrong inh ưh tam mă pơm 'blep thoi 'Bok Kei-Dei ôh. Mă-lei lăm jơhngơ̆m klơm klak inh adrin tôch bơneh thoi bơngai kơdâu pơjei ră. Inh adrin khŏm khŏm wă kơ pơm tôm tơdrong đêl Yêsu pơkă kơ inh kơplah Sư iŏk inh sơ̆.

Philip 3:14

Ning-mônh 'Bok Kei-Dei gô krao inh iŏk dôm tơdrong Sư apah inh tơ plĕnh ti yua kơ Yêsu Krist lôch tang inh. Thoi noh na inh adrin kơdâu truh tơ anih đêl Sư pơkă, wă kơ inh gơh iŏk dôm tơdrong Sư apah ei.

I Tim 6:12

Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai 'noh sư gô đei apah. Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma 'bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih 'Bok Kei-Dei ăn kơ ih arih ling-lang.

II Tim 1:1

Inh Pôl jơ̆ng 'bang Yêsu Krist chih hơpong kơ Timôthê. Hmach kơ ih, dăm. Ih kon inh mă 'mêm kơeng tơpă. Sơ̆ 'Bok Kei-Dei athei inh pơm jơ̆ng 'bang Yêsu Krist wă pơtruh nơ̆r pơkă khan: Yua kơ Yêsu Krist lôch tang kon bơngai na Sư gô ăn kon bơngai arih ling-lang. Inh krao khan apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng ih tôm tơdrong. Apinh Sư mơnat kơ ih, hăm ăn kơ ih hiôk-hian ling-lang.

II Tim 2:19

Dôm tơdrong 'Bok Kei-Dei trŏ kơjăp tơpă. Sư pơkă thoi âu: “Inh Kră Yang 'Bok Kei-Dei băt kơnăl kơ đĭ-đăng bơngai lui kơ Inh păng đĭ-đăng bơngai lui kơ Inh sư athei tŭk lê̆ tơdrong yoch.”

I Pet 1:4

Tôm tơdrong noh Sư hơmet ăn kơ bơ̆n tơ plĕnh boih, na tôm tơdrong noh ưh kơ đei layơ hiong răm bŭk ôm ôh.