I Tim 6:13 - Sơ̆p Hlabơar Nơ̆r 'Bok Kei-Dei

^13-14 Đĭ-đăng khŭl arih tơ ala teh đơ̆ng 'Bok Kei-Dei ăn arih ngăl. Yêsu Krist pơma 'lơ̆ng tơpăt 'bơ̆t anăp 'bok pơtao Pilat. Na ih oei 'bơ̆t anăp 'Bok Kei-Dei păng Yŏng bơ̆n Yêsu Krist, ih athei kơchăng pơm kiơ̆ dôm tơdrong Sư pơkă kơ bơ̆n. 'Nĕ ăn đe tơplih tơdrong Sư pơkă kơ bơ̆n 'noh. Ih athei wei ling-lang tơ̆p truh năr Yŏng bơ̆n Yêsu Krist jur ning-mônh.

I Tim 6:13 Iomraidhean Croise

Mathiơ 27:11

Yêsu dơ̆ng 'bơ̆t anăp Pilat, na Pilat jet Sư khan: “Hăm trŏ kơ Ih pơm pơtao đe Juđê?” Yêsu khan: “Trŏ kơ Inh boih.”

Mathiơ 27:2

Lu sư chô̆ Yêsu năm jao ăn kơ Pilat, bơngai Rôm mă pơgơ̆r dêh Juđê.

Yo 14:6

Yêsu khan: “Inh boih trong iĕm năm tŏk tơ 'Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai 'noh ưh kơ truh tơ 'Bă Inh ôh.

Yo 19:11

Yêsu khan: “Dah 'Bok Kei-Dei ưh kơ ăn ih pơm thoi noh, ih ưh kơ gơh pơm kơ Inh ôh. Yua kơ 'noh bơngai mă pơjao lê̆ Inh kơ ih, sư yoch hloh kơ ih.”

Yo 5:21

Yua kơ 'Bă Inh gơh tơiung arih kon bơngai đơ̆ng lôch na Inh Kon Sư kư̆m thoi Sư mơ̆n, Inh gơh ăn tơdrong arih kơ kon bơngai gô mơ̆ng kơ Inh wă.

Yo 5:26

'Noh kư̆m thoi 'Bă Sư gơh pơm tôm tơdrong arih, na 'Bă Sư ăn kơ Kon Sư gơh pơm tôm tơdrong arih thoi Sư mơ̆n.

Jang 17:25

Kră Yang 'Bok Kei-Dei ưh kơ kăl kơ bơ̆n tơgŭm Sư ôh yua kơ Sư boih ăn kơ bơ̆n arih păng ăn kơ bơ̆n đĭ-đăng tơmam bơ̆n kăl yua.

II Kor 9:13

Lu sư gô 'bôh tơdrong iĕm tơgŭm lu sư, na lu sư gô bơnê kơ 'Bok Kei-Dei ăn kơ iĕm lui kơ Yêsu Krist kơjăp băt chu kơ Sư. Lu sư gô ư-ang 'Bok Kei-Dei tơdrong iĕm hơlăng kơ lu sư hăm đe nai tơmam.

Galati 3:26

Dang ei đĭ-đăng kơ bơ̆n jing kon 'Bok Kei-Dei boih yua kơ bơ̆n lui kơ Yêsu.

Both 32:39

Lăng bĕ, Inh âu boih Kră Yang 'Bok Kei-Dei. 'Nguaih kơ Inh ưh kơ đei yang nai dơ̆ng. Inh gơh ăn lôch păng ăn arih dơ̆ng, Inh teh rơka păng Inh ming pơklaih. Ưh kơ đei bu gơh tơgar iŏk klaih đơ̆ng tơpang ti Inh.

I Tim 1:12

Inh bơnê kơ Kră Yang bơ̆n Yêsu Krist yua kơ Sư ăn kơ jơhngơ̆m inh pran kơtang jang tơdrong Sư. Păng inh bơnê kơ Sư tơchĕng đon Sư khan inh trŏ bơngai gơh jang tơdrong Sư, na Sư rơih iŏk inh jang kơ Sư hloi.

I Tim 1:15

Tơdrong âu trŏ tơpă, bơ̆n gơh lui tơpă: Kră Yang Yêsu Krist jur oei tơ ala teh âu wă kơ pơklaih lu bơngai yoch. Inh boih bơngai mă pơm yoch lơ hloh kơ đĭ-đăng bơngai nai.

I Tim 2:5

Đei minh 'nu Kră Yang 'Bok Kei-Dei păng đei minh 'nu pơm 'long sơlam đĕch anhăk kon bơngai ala teh wă kơ bơngai ala teh hiôk hăm 'Bok Kei-Dei. Bơngai mă pơm 'long sơlam ei anăn Sư Yêsu Krist.

I Tim 5:21

Kră Yang bơ̆n 'Bok Kei-Dei, Yŏng bơ̆n Yêsu Krist păng linh jang 'lơ̆ng Sư 'bôh bơ̆n ling-lang na ih athei kơchăng pơm kiơ̆ dôm tơdrong inh pơkă kơ ih 'noh. Inh wă kơ ih lăng đĭ-đăng bơngai lei-lăi đĕch, ih 'nĕ kơ lăng minh 'nu bơngai hloh kơ đe nai.

I Tim 6:12

Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai 'noh sư gô đei apah. Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma 'bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih 'Bok Kei-Dei ăn kơ ih arih ling-lang.

Tơdrông Tơ'bôh 1:5

Yêsu Krist, Sư pơma tơpăt ling-lang, Sư iung arih đơ̆ng lôch adrol kơ đe, Sư pơgơ̆r đĭ-đăng lu 'bok pơtao oei tơ teh âu; na inh apinh Sư wei-lăng iĕm lăm tôm tơdrong wă kơ iĕm hiôk-hian ling-lang. Yêsu Krist 'mêm kơ bơ̆n tơpă na Sư pơklaih bơ̆n đơ̆ng tơdrong yoch hăm pham Sư.

Tơdrông Tơ'bôh 21:6

Na 'Bok Kei-Dei khan dơ̆ng kơ inh thoi âu: “Inh pơm tôm tơdrong keh boih. Inh thoi chư A, jĭ blŭng-a kơla chă adrol kơ đĭ-đăng lăm dôm tơdrong. Păng Inh kư̆m thoi chư Y, tuch-luch năr tôch kư̆m oei đei Inh. Thoi noh bu ol kơ đak, inh asong nhă đĕch đơ̆ng tu đak ăn kơ kon bơngai gơh arih ling-lang.

Tơdrông Tơ'bôh 22:1

Đơ̆ng noh linh jang 'lơ̆ng ei tơ'bôh dơ̆ng kơ inh đak krong mă ăn kơ kon bơngai arih. Đak krong ei hlăng chơchơr thoi getchai. Sư ro đơ̆ng tang-dŏ 'Bok Kei-Dei hăm Kon Triu.

Tơdrông Tơ'bôh 3:14

“Dang ei ih chih kơthơ pơtruh kơ kră wei-lăng hnam akŭm 'Bok Kei-Dei tơ Pơlei Laodisê thoi âu: “Âu boih 'Bok mă 'lơ̆ng tơpăt ling-lang, Sư pơma tơpăt ngăl tơpă. Sư boih mă 'Bok Kei-Dei yua đơ̆ng sơ̆ wă pơjing tôm tơdrong, Sư wă pơma kơ iĕm tơdrong âu:

I Sam 2:6

Kră Yang ăn lôch păng ăn arih; Sư tơhuŏng bơngai lăm pơlei bơngai lôch păng gô tơiung hơtŏk arih dơ̆ng.