I Tim 4:16 - Sơ̆p Hlabơar Nơ̆r 'Bok Kei-Dei

¹⁶ Ih athei kơchăng gah akâu ih kơdih păng gah tơdrong ih bơtho mơ̆n. Ih kư̆ kơ adrin pơm khŏm khŏm kiơ̆ thoi inh pơkă na ih gô klaih đơ̆ng tơdrong yoch păng lu bơngai mơ̆ng ih kư̆m klaih mơ̆n.

I Tim 4:16 Iomraidhean Croise

I Ho 28:10

Dang ei, lăng bĕ yua kơ Kră Yang rơih iŏk ih boih wă pơm tơiung minh pôm hnam 'măn anih 'lơ̆ng rơgoh. Nuih pran kơtang bĕ na pơm.”

II Ho 19:6

Sư khan kơ lu 'bok sek tơlang: “Iĕm athei bơ̆jang mă pơ'lơ̆ng, yua kơ iĕm sek tơlang ưh kơ sĭ kơ sek kơ kon bơngai ôh, mă-lei kơ Kră Yang; Sư gô oei hơdai lu iĕm tơ rim wơ̆t wă sek tơlang.

Le 23:13

Ih athei wei răk đĭ dôm nơ̆r inh pơkă kơ ih, 'nĕ kơ chă pơư anăn lu yang nai; 'nĕ kơ tơ'blŏk tơdrong noh đơ̆ng 'bơ̆r ih.

Êsai 55:11

Na kư̆m lei-lăi thoi noh, nơ̆r Inh pơma, lĕch đơ̆ng 'bơ̆r inh bơih, ưh kơ đei tôch đĕch ôh; sĭt gô pơm tơdrong Inh wă. Păng pơkeh tơdrong jang Inh wơh sư.

Je 23:22

Mă-lei tơdah lu sư đơ̆ng lăm khŭl Inh, lei lu sư kư̆m roi boih nơ̆r Inh kơ lu kon pơlei pơla Inh, pơm ăn kơ kon pơlei Inh weh đơ̆ng trong kơnê̆, đơ̆ng tơdrong pơm kư̆ kă.”

Markôs 13:9

“Păng iĕm athei kơchăng kơdih yua kơ đe gô rôp iĕm jao kơ lu kră sek tơlang. Đe gô tôn teh iĕm tơ lăm hnam akŭm đe Juđê. Đe kư̆m gô anhăk iĕm dơ̆ng 'bơ̆t anăp lu 'bok tih hăm lu 'bok pơtao yua kơ iĕm lui kơ Inh, na iĕm kư̆m gơh ră roi kơ lu sư băt kơ inh.

Luka 21:34

“Na kơplah iĕm oei arih dang ei, iĕm athei kơchăng kơdih 'nĕ kơ nŏng kơ et sik, hli kơ suai. Păng 'nĕ pă hăt kơ tơdrong ala teh, hli kơ năr noh truh kơplah iĕm ưh kơ kơchăng, tabơla haih pă tam thoi bơngai 'leh 'năk. Na tơdrong noh wă truh tơ jơ̆p-jang teh đak ning-mônh kư̆m thoi noh mơ̆n.

Jang 26:22

Mă-lei đơ̆ng sơ̆ khơ̆ dang ei 'Bok Kei-Dei wei-lăng hăm tơgŭm inh, na dang ei inh dơ̆ng 'bơ̆t âu bơtho tơdrong Yêsu. Inh bơtho kơ đĭ-đăng, mă lu bơngai pơm tih, mă lu bơngai iĕ, lei-lăi đĕch. Tơdrong inh bơtho kư̆m lei-lăi thoi Môis hăm thoi lu bơngai pơtruh nơ̆r 'Bok Kei-Dei khan lê̆ hơdrol sơ̆.

Jang 6:4

Na nhôn krao khan păng bơtho tơdrong 'Bok Kei-Dei đĕch.”

Rom 11:14

wă kơ lu bôl inh bơngai Isơrael 'nhĕng iĕm, na lui kiơ̆ iĕm, klaih kơ tơdrong yoch thoi iĕm.

Rom 16:17

Ơ 'nhŏng oh, iĕm athei kơchăng hli kơ iĕm lui jrok kiơ̆ lu bơngai lui ưh kơ tat, hli kơ iĕm achăng lê̆ tơdrong lui tơpăt mă đe juăt kơ bơtho; na iĕm athei weh 'biơ̆ đơ̆ng lu sư. Lu sư wă pơrăm lu bơngai lui bơ̆n, chă pơjah pơjăng păng bơ̆n.

Rom 2:7

Bơngai bu adrin pơm 'lơ̆ng hăm 'Bok Kei-Dei wă kơ 'Bok Kei-Dei lăp đon ăn kơ sư arih hiôk chơt păng wă kơ akâu sư huay kơ lôch hiong, bơngai noh 'Bok Kei-Dei gô ăn kơ sư đei tơdrong arih ling-lang tơpă.

I Kor 1:21

'Bok Kei-Dei hơgei tơpă, na Sư ưh kơ wă kơ kon bơngai bơ̆n chă Sư kiơ̆ kơ đon kon bơngai bơ̆n tơchĕng ôh. 'Bok Kei-Dei Sư lăp đon gah tơdrong dŏng pơklaih dôm lu bơngai mă lui kơ Yêsu lôch tang bơ̆n tơ 'long pơglang. Mă-lei lu bơngai mă ưh kơ lui, lu sư tơchĕng tơdrong bơ̆n bơtho 'noh nhen lĕ tơdrong kơtul đĕch.

I Kor 9:22

Kơplah inh chă bơtho kơ lu bơngai ưh kơ gan hlôh tôm tơdrong 'Bok Kei-Dei, inh kư̆m pơm thoi sư mơ̆n wă kơ pơlung sư lui kơjăp. Inh druh kiơ̆ rim đon kon bơngai wă kơ gơh pơlung lu sư lui kơ Yêsu Krist na klaih đơ̆ng dôm tơdrong yoch.

I Kor 9:27

Inh adrin pơm jơhngơ̆m chơ̆n kuă ăn akâu inh pơm yoch, hli kơ inh bơtho đe, đe lui mơ̆n, mă akâu inh kơdih hiong tơdrong apah.

Êphêsô 4:14

Thoi noh na bơ̆n ưh pă gơh kiơ̆ thoi lu bơngai hơ'lơ̆p lui kơ đe bơtho tơdrong kư̆ kă boih, pơtih gia đe hơlĕnh kơ bơ̆n, dah pơhlŭ bơ̆n, wă kơ bơ̆n hơwơ̆l jing jrok kư̆ kă.

Kôlôsê 4:17

Păng iĕm khan kơ Achĭp athei sư jang mă keh tôm tơdrong jang sư, yua kơ Kră Yang Yêsu Krist pơjao kơ sư jang tơdrong 'noh boih.

I Tes 2:16

Lu bơngai Juđê găn nhôn bơtho tơdrong 'Bok Kei-Dei kơ bơngai ưh kơ khŭl lu sư. Mă-lei nhôn oei bơtho mơ̆n. Lu sư ưh kơ wă bơngai khŭl nai thoi iĕm klaih đơ̆ng tơdrong yoch. Lu sư pơm thoi noh lu sư yoch tơpă hloi. Lu sư ling-lang pơm yoch thoi noh. Ning-mônh 'Bok Kei-Dei gô phak lu sư tơpă.

I Tim 1:3

Inh wă kơ ih kư̆ oei tơ Pơlei Êphêsô, kư̆m thoi inh athei ih ki lăp inh wă năm đơ̆ng Pơlei Êphêsô tơ dêh char Masêđôn. Na inh athei ih oei tơ pơlei âu khŏm khŏm yua kơ đei lu bơngai tơ noh bơtho tơdrong ưh kơ trŏ tơdrong 'Bok Kei-Dei tơpă. Na ih athei khă lu sư 'nĕ pă bơtho thoi noh dơ̆ng.

I Tim 4:15

Ih athei pơm kiơ̆ kơ dôm tơdrong inh pơkă kơ ih âu. Ih athei adrin tơpă thoi noh na wă kơ đĭ-đăng bôl lăng ih rai đunh rai kơjăp gah tơdrong 'Bok Kei-Dei.

I Tim 4:6

Dah ih bơtho lu bơngai lui tơdrong Yêsu Krist kiơ̆ thoi inh pơkă, lei đe băt kơ tơdrong jang ih âu 'lơ̆ng dêh păng đe băt kơ ih lui kơjăp tơdrong 'Bok Kei-Dei khŏm khŏm kư̆m thoi ih lui đơ̆ng blŭng sơ̆ khơ̆ dang ei.

II Tim 2:10

Inh đei tơdrong pơmat ling-lang, mă-lei inh oei adrin khŏm khŏm. Inh bơtho lu bơngai 'Bok Kei-Dei rơih wă kơ lu sư lui kơ Kră Yang Yêsu Krist, na 'Bok Kei-Dei gô pơklaih sư đơ̆ng tơdrong yoch păng atŏk sư oei hơdai păng Sư ling-lang ning-mônh.

II Tim 3:14

Mă-lei gah ih, ih pơhrăm tơdrong 'Bok Kei-Dei boih păng ih kư̆m lui kơjăp kơ tơdrong 'Bok Kei-Dei đơ̆ng sơ̆ khơ̆ dang ei. Na dôm lu tơdrong 'Bok Kei-Dei noh ih athei rok mă tơpă khŏm khŏm. Păng ih kư̆m băt lu nhôn bơngai bơtho ih, nhôn bơngai thoi yơ.

Tit 1:9

sư bơtho tơdrong 'Bok Kei-Dei 'blep trŏ nơ̆r 'Bok Kei-Dei tơpă. Thoi noh đe anăn sư gơh bơtho trŏ tơdrong 'Bok Kei-Dei păng sư gơh pơjah pơjăng păng lu bơngai mă ưh kơ lui ayăt tơdrong sư bơtho.

Tit 2:15

Dôm tơdrong inh bơtho ih âu ih bơtho ăn kơ đe dơ̆ng hŏ. Păng ih pơlung lu sư lui mă kơjăp. Ih khă lu sư 'nĕ pă pơm yoch. Ih tơbăt ăn kơ lu sư dôm tơdrong ih bơtho đơ̆ng nơ̆r 'Bok Kei-Dei, na ih athei đĭ-đăng kơ lu sư pơm kiơ̆ tơdrong ih bơtho noh.

Tit 2:7

Păng ih kơdih athei pơm 'lơ̆ng tơpăt lăm tôm tơdrong wă kơ lu bơngai lui pơm kiơ̆ thoi ih. Ih bơtho đe mă trŏ pơm mă khuơ̆ khuơ̆ wă kơ đe lăng bơ̆n bơtho tơpă.

Phil 1:19

Âu hŏ, tơ̆ng ih wă kơ sư duh kơ ih, dang ei inh chih hla bơar kơ ih păng ti inh kơdih, inh wă kơ ih băt kơ inh wă duh dŏng sư tơpă. Mă-lei ih kư̆m dang bơngai hre kơ inh mơ̆n kơlih kơ ih lui kơ Yêsu Krist đơ̆ng inh bơtho.

Hêbrơ 12:15

Đĭ-đăng kơ iĕm athei kơchăng, wă kơ lơ̆m lu iĕm huay kơ đei bu achăng lê̆ tơdrong 'Bok Kei-Dei đêl pơm kơ iĕm lui kơjăp boih; wă kơ lơ̆m lu iĕm huay kơ đei bu pơhlŭ bôl iĕm kiơ̆ sư pơm yoch.

Hêbrơ 13:9

Iĕm 'nĕ kơ lui kơ tơdrong đe bơtho phara pha, hli kơ iĕm lui chroih tơ nai. Pơtih gia dah đe bơtho khă bơ̆n gah tơdrong sa et tơmam giĕng; tơdrong giĕng noh ưh kơ gơh pơm kơ bơ̆n lui kơjăp ôh. Tơdrong lui kơjăp noh đơ̆ng Yang Bơhngol 'Lơ̆ng gơh pơm kơ bơ̆n.

Ya 5:20

bơngai noh 'lơ̆ng tơpă băt 'mêm kơ bôl sư jrok trong pơlung bôl sư wih lui dơ̆ng kơ 'Bok Kei-Dei. Na 'Bok Kei-Dei gô pơklaih bôl sư mă jrok trong noh đơ̆ng tơdrong lôch pơmat huay kơ jô̆ yo dôm tơdrong sư pơm yoch.