I Tes 2:14 - Sơ̆p Hlabơar Nơ̆r 'Bok Kei-Dei

¹⁴ Ơ 'nhŏng oh, đe pơm kơnê̆ kơ iĕm kư̆m thoi đe pơm kơnê̆ kơ lu bơngai lui kơ 'Bok Kei-Dei hăm Kon Sư Yêsu Krist tơ dêh char Juđê sơ̆. Lu bơngai khŭl iĕm pơm kơnê̆ tơduă khŭl iĕm kư̆m thoi lu bơngai Juđê pơm kơnê̆ tơduă khŭl lu sư sơ̆ kơ lu bơngai lui kơ Yêsu mơ̆n.

I Tes 2:14 Iomraidhean Croise

Jang 11:19

Lăp đe pơlôch Êtien đe kư̆m pơm lơ tơdrong kơnê̆ kơ lu bơngai lui mơ̆n. Na lu bơngai lui kư̆m jăk truh tơ dêh Phênisi, dêh Chiprơ păng Pơlei Antiôs mơ̆n păng bơtho Tơdrong 'Nao 'Lơ̆ng kơ bơngai Juđê ngăl.

Jang 13:50

Lăm Pơlei Antiôs ei đei lu bơngai drŏ-kăn, sư kư̆m lui kơ 'Bok Kei-Dei, đe ư-ang tơdrong jang sư păng tơdrong sư mơdrŏng. Na lu bơngai Juđê pơhlŭ lu drŏ-kăn ei păng lu kră pơlei sư, yua kơ lu sư areh tơpă kơ bre Pôl păng 'Barna'ba. Na lu sư pơpuh bre sư đơ̆ng tơring ei.

Jang 14:19

Đơ̆ng rŏng kơ noh lu bơngai Juđê đơ̆ng Pơlei Antiôs păng Pơlei Ikôni năm tơ ei păng pơhlŭ lu kon pơlei pơla. Lu sư klơ̆m Pôl păng tơmo. Lu sư ngêh kơ Pôl lôch boih na lu sư dui hor Pôl tơ jih pơlei.

Jang 14:2

Lu bơngai Juđê mơ'nah ưh kơ wă lui kơ Yêsu. Sư pơhlŭ lu bơngai nai mă ưh kơ khŭl sư wă kơ sư areh kơ lu bơngai lui kơ Yêsu.

Jang 14:4

Lăm kon pơlei pơla lu mơ'nah oei kiơ̆ gah đe Juđê, mơ'nah oei kiơ̆ gah jơ̆ng 'bang Yêsu Krist.

Jang 14:5

Na bơngai Juđê păng bơngai nai, lu mơ'nah pôm đon păng lu yŏng sư, lu mơ'nah ưh mơ̆n. Lu bơngai pôm đon păng yŏng sư ei, sư wă klơ̆m bre Pôl păng 'Barna'ba păng tơmo.

Jang 17:13

Lu bơngai Juđê đơ̆ng Pơlei Têsalônik kơtơ̆ng ang tơdrong Pôl bơtho tơdrong 'Bok Kei-Dei tơ Pơlei Bêrê, na lu sư năm tơ ei pơhlŭ lu kon pơlei pơla wă pơm kơnê̆ kơ bre sư.

Jang 18:12

Lăp Galiôn tŏk pơm kră pơgơ̆r tơ dêh char Grĕk, lu bơngai Juđê pơđâu băl pôm đon na lu sư năm rôp Pôl anhăk sư tơ anih lu kră sek tơlang.

Jang 8:1

Đơ̆ng rŏng kơ đe pơlôch Êtien ei, lu bơngai ưh kơ lui pơm lơ tơdrong kơnê̆ kơ lu bơngai lui kiơ̆ kơ Yêsu tơ Pơlei Jêrusalem. Na đĭ-đăng lu bơngai lui ei jăk tơklah tơklang jơ̆p-jang kơ dêh Juđê păng dêh Samari. Pôm lu jơ̆ng 'bang Yêsu đĕch ưh kơ jăk.

Jang 8:3

Mă-lei Sôl pơm kơnê̆ kơ lu bơngai lui wă kơ lu sư hiong răm. Sư năm jơ̆p jơ̆p mơ̆t tơ hnam đe, rôp lu bơngai lui kơ Yêsu, bơngai drŏ-nglo drŏ-kăn, tah hloi lu sư lăm hnam phak.

Jang 9:1

Sôl sư oei kơnam wă pơlôch lu bơngai lui kơ Kră Yang Yêsu. Sư năm apinh tơ 'bok soi tơm pơm ăn kơ sư hla bơar wă kơ gơh rôp lu bơngai lui. Na 'bok soi pơm ăn kơ Sôl hla bơar gơh năm rôp đe tơ rim hnam akŭm đe Juđê tơ Pơlei Đamas, anhăk tơ Pơlei Jêrusalem dôm lu bơngai lui kiơ̆ Yêsu mă drŏ-nglo mă drŏ-kăn.

Jang 9:13

Anania tơl: “Ơ Kră Yang Yêsu, inh kơtơ̆ng lơ 'măng boih Sôl âu dah kiơ pơm kơnê̆ kơ lu bơngai lui kơ Ih tơ Pơlei Jêrusalem?

Jang 9:31

Yua kơ Sôl lui boih na lu bơngai lui kơ Yêsu oei jơ̆p-jang dêh Juđê păng dêh Galilê, dêh Samri hiôk-hian huay pă đei tơdrong truh tơ lu sư. Lu sư kư̆m rai đunh rai pran. Lu sư lui tơpă kơ Kră Yang păng Yang Bơhngol 'Lơ̆ng tơgŭm lu sư ling-lang, na lu sư rai đunh rai lơ.

I Kor 10:32

Mă tôm tơdrong bơ̆n jang pơm tơdrong kiơ bơ̆n athei kơchăng hŏ, hli kơ bơ̆n pơơh đe, mă sư bơngai Juđê, mă sư bơngai dêh nai, mă tơduă bơngai lui kơ 'Bok Kei-Dei.

I Kor 7:17

Rim 'nu kơ bơ̆n athei pơm kiơ̆ gô mơ̆ng kơ 'Bok Kei-Dei asong. Sơ̆ 'Bok Kei-Dei krao bơ̆n lui kơ Sư kơplah bơ̆n oei pơm đĭch đe dah bơngai rơngei dah bơngai thoi yơ, bơ̆n athei kiơ̆ tơdrong 'noh đĕch. Inh bơtho tơ rim hnam akŭm thoi noh ngăl.

Galati 1:22

Kơplah dôm sơnăm noh lu bơngai lui tơ dêh char Juđê tam mă tơ'bơ̆p inh ôh.

I Tes 1:1

Nhôn pêng 'nu, Pôl, Silas, Timôthê, chih hơpong kơ lu bơngai lui tơ pơlei Têsalônik. 'Bă tơm bơ̆n 'Bok Kei-Dei păng Kră Yang bơ̆n Yêsu Krist wei-lăng iĕm ling-lang. Nhôn krao khan apinh Sư tơgŭm iĕm lăm tôm tơdrong wă kơ Sư ăn kơ iĕm hiôk-hian.

I Tes 1:6

Iĕm pơm kiơ̆ rok thoi nhôn boih, noh thoi nhôn pơm kiơ̆ rok Kră Yang Yêsu Krist ki mơ̆n. Iĕm đei lơ tơdrong pơmat-tat mă-lei khŏm lui kơ tơdrong nhôn bơtho, Yang Bơhngol 'Lơ̆ng ăn kơ iĕm jơhngơ̆m hiôk hơiă tơpă.

I Tes 3:4

Hơtai nhôn oei păng iĕm ki, nhôn khan boih kơ iĕm hơdrol, nhôn khan: Bơ̆n gô đei tơdrong pơmat-tat đe areh kơ bơ̆n. Na 'blep tơpă hloi đe areh kơ iĕm dang ei.

II Tes 1:1

Nhôn pêng 'nu, Pôl, Silas, Timôthê, chih hơpong kơ lu bơngai lui tơ Pơlei Têsalônik. 'Bă tơm bơ̆n 'Bok Kei-Dei păng Kră Yang bơ̆n Yêsu Krist wei-lăng iĕm ling-lang.

II Tes 1:4

Kơlih kơ iĕm lui kơjăp thoi noh na nhôn roi kơ lu bơngai lui kơ 'Bok Kei-Dei tơ pơlei nai tơdrong iĕm đei tơdrong gleh, hăm đe areh kơ iĕm, mă-lei iĕm oei adrin tơpă hăm lui kơ Sư kơjăp.