I Kor 3:3 - Sơ̆p Hlabơar Nơ̆r 'Bok Kei-Dei

³ yua kơ iĕm oei kiơ̆ kơ sĕch akar thoi bơngai ala teh, iĕm oei tơklai băl, iĕm oei pơjah pơjăng tơhil băl. Iĕm pơm thoi noh dang lĕ oei lei-lăi kơ bơngai kiơ̆ kơ sĕch akar ala teh đĕch.

I Kor 3:3 Iomraidhean Croise

Hôsia 6:7

Mă-lei thoi Ađam,a lu sư pơm glăi boih kơ đêl nơ̆r pơkă pơgơ̆p, thoi noh lu sư pă tơpăt boih kơ Inh.

Rom 13:13

Bơ̆n athei pơm mă 'lơ̆ng thoi bơngai jang kơ'năr, 'nĕ pă et sik suai hli kơ pơm kư̆ kă; drŏ-nglo drŏ-kăn kư̆m 'nĕ kơ ngôi kư̆ kă; 'nĕ pơjah pơjăng păng đe, 'nĕ kơ 'nhĕng đe.

I Kor 1:10

Ơ 'nhŏng oh, inh wă bơtho iĕm thoi âu: Đĭ-đăng kơ bơ̆n minh khŭl lui kơ Kră Yang Yêsu Krist, bơ̆n athei tơguăt băl minh jơhngơ̆m, pơm pôm 'bơ̆r đon mă hơnơ̆ng wă kơ bơ̆n huay kơ tơklah băl.

I Kor 1:11

Ơ 'nhŏng oh, inh bơtho khan kơ iĕm thoi noh yua kơ inh kơtơ̆ng đơ̆ng hnam dơnŏ yă Klôwê roi kơ inh tơdrong iĕm đei pơjah băl.

I Kor 11:18

Tơdrong mă mônh thoi âu: Inh kơtơ̆ng ang đơ̆ng đe khan lăm lu iĕm akŭm đei tơklah băl đon đei 'bar pêng khŭl. Đe khan kơ inh thoi noh inh kư̆m lui kơ sư 'biơ̆ mơ̆n.

I Kor 3:4

Lu iĕm mơ'nah oei khan: “Inh kiơ̆ Apôlê.” Mơ'nah dơ̆ng khan: “Inh kiơ̆ Pôl.” Iĕm pơma thoi noh iĕm thoi lĕ oei kiơ̆ kơ bơngai ala teh.

II Kor 12:20

Inh hli kơ mưh năr inh truh tơ iĕm, iĕm ưh kơ lui kơjăp kiơ̆ thoi đon inh wă. Mă iĕm 'bôh inh iĕm kư̆m ưh kơ hiôk yua kơ iĕm hli kơ inh hil kơ iĕm. Păng inh hli kơ iĕm pơjah pơjăng dih băl, tơgar sa băl, tơhil băl, kret kuă kơ asong băl, pơjăm bôl buăl, bâu roi bôl buăl, pơang akâu kơdih păng hli kơ iĕm akŭm ưh kơ trŏ.

Galati 5:15

Thoi noh iĕm 'nĕ kơ pơrăm dih băl hli kơ hiong đĭ tơdrong lui iĕm. Dah iĕm pơm thoi noh dang lĕ kơ sem bri tơkăp dih băl jing lôch răm akâu kơdih.

Tit 3:3

Sơ̆ bơ̆n ưh kơ băt tơpă tơdrong 'Bok Kei-Dei, na bơ̆n ưh kơ chu Sư. Bơ̆n tơchĕng akâu kơdih khan pơm trŏ, mă bơ̆n pơm ưh kơ trŏ ôh. Bơ̆n hưch hanh lơ tơdrong kư̆ kă ưh kơ băt pơm tơdrong 'lơ̆ng thoi yơ. Bơ̆n 'maih chă tơdrong tơhil păng đe. Bơ̆n 'nhĕng đe, areh kơ đe păng đe areh kơ bơ̆n mơ̆n.

Ya 3:16

Anih ayơ đe 'nhĕng băl păng tơgar băl, anih noh đe pơjah pơjăng băl dêh păng pơm tôm tơdrong kơnê̆.

I Pet 4:2

Kơplah bơ̆n oei arih tơ ala teh âu, bơ̆n 'nĕ pă kiơ̆ kơ jơhngơ̆m đon wă, bơ̆n athei kiơ̆ kơ 'Bok Kei-Dei wă đĕch.