Hôsia 2:7 - Sơ̆p Hlabơar Nơ̆r 'Bok Kei-Dei

⁷ Sư gô druh kiơ̆ pơyô so sư mă-lei ưh kơ tam, chă mă-lei ưh kơ tơ'bơ̆p. Đơ̆ng noh sư gô khan: ‘Inh gô wih tơ klo inh mă adrol; yua kơplah noh inh hiôk hloh kơ dang ei.’

Hôsia 2:7 Iomraidhean Croise

II Ho 28:23

Sư kơkuh pơyơ̆r tơmam soi ăn kơ lu yang pơlei Đamas, kon pơlei mă blah sư; sư tơchĕng khan: “Yua kơ lu yang pơtao Asiri dŏng tơgŭm lu sư boih, na inh gô soi sơmah kơ lu yang noh, wă kơ lu yang noh kư̆m dŏng tơgŭm inh.” Mă tơpă lu yang noh rai pơrăm sư păng lu bơngai Isơrael.

Horiso 116:7

Ơ bơhngol inh, brŏk dơ̆ng tơ anih pơdơh ih, Yua kơ Kră Yang pơm 'lơ̆ng kơ ih.

Êsai 30:16

Lu iĕm khan: ‘Ưh, lu nhôn gô hao aseh chă kơdâu klĕnh’ trŏ bơih na lu iĕm gô kơdâu klĕnh. ‘Lu iĕm khan lu nhôn hao aseh kơdâu hrĕnh,’ na lu bơngai druh iĕm kư̆m gô kơdâu hrĕnh mơ̆n!

Je 14:22

Hăm đei lu yang kiơ gơh pơm đak 'mi ăn kơ kon bơngai? Đơ̆ng plĕnh hăm gơh tơjur kơdih đak 'mi tơ teh? Ơ Kră Yang 'Bok Kei-Dei lu nhôn, Ih đĕch gơh pơm. Thoi noh lu nhôn oei chang gô Ih, Yua kơ Ih boih pơjing kơ dôm tơdrong noh.

Je 2:2

“Năm roi bĕ tơ lăm đon kon pơlei Jêrusalem: ‘Inh 'blŏk kơ iĕm kơplah iĕm oei 'lơ̆p sơ̆, iĕm oei hơyuh 'mêm kơ Inh kơjăp thoi mŏ mai iĕm kiơ̆ Inh lăm char 'blach, tơ teh mă ưh kơ đei rei pơtăm.

Je 2:28

Thoi noh na tơ yơ yang mă lu iĕm đei pơm kơdih noh? Lê̆ lu yang noh năm pơklaih iĕm bĕ, kơplah iĕm đei tơdrong gleh, yua kơ lu yang iĕm lơ kư̆m dang dôm pơlei iĕm, ơ Juđa.

Je 2:36

Liơ lu iĕm tơplih trong lu iĕm 'bônh dêh? Lu bơngai Êyiptơ pơm kơ iĕm mơlâu kư̆m thoi lu bơngai Asiri pơm kơ iĕm sơ̆.

Je 3:1

Kră Yang khan: “Tơdah đei drŏ-nglo achăng lê̆ akăn sư, akăn sư weh đơ̆ng sư chă klo plơ̆ng, klo so sư hăm pă gơh hơlơ̆k oei kơ akăn so sư dơ̆ng? Teh đak noh ưh kơ kơnê̆ 'mê̆ krưp dêh tơpă hă? Mă-lei iĕm ngôi pơyô kư̆ kă hăm lơ bơngai mă ih hưch, Khan oei wă wih brŏk tơ Inh dơ̆ng hă?” Kră Yang khan.

Je 31:18

Inh kơtơ̆ng boih bơngai Êphraim nhơ̆m hmoi: ‘Ih phak bơtho inh boih, thoi đe pơjuăt kon rơmo mă tam biơh tah 'long ăt, inh pŭ iŏk boih. Apinh Ih iŏk inh brŏk bĕ, na inh gơh brŏk đei hiôk-hian, yua kơ Ih boih Kră Yang 'Bok Kei-Dei inh,

Je 31:32

Nơ̆r pơgơ̆p 'nâu ưh kơ trŏ thoi nơ̆r pơgơ̆p Inh hăm lu 'bok yă lu sư lăm năr mă Inh rôp ti dui tơlĕch lu sư đơ̆ng char Êyiptơ sơ̆, yua kơ lu sư pơrăm lê̆ boih tơdrong pơgơ̆p Inh, mă Inh thoi klo lu sư ră.” Noh Kră Yang khan.

Je 44:17

Mă-lei lu nhôn gô pơm keh dôm nơ̆r lu nhôn pơkă boih, lu nhôn gô soh nhang 'bâu phu kơ Pơtao Drŏ-kăn kơpal Plĕnh păng tuh sik pơyơ̆r ăn kơ sư, thoi lu nhôn đei pơm boih, lu 'bok yă lu nhôn, lu pơtao nhôn, lu yŏng pơgơ̆r lu nhôn lăm lu pơlei lăm dêh char Juđa păng tơ rok trong lăm pơlei tih Jêrusalem; kơplah noh lu nhôn đei tơmam sa phĭ rơkah rơkai, jang sa hiôk-hian ưh kơ đei tơdrong kiơ truh.

Êsêkiên 16:18

Ih iŏk ao sĭt dônh tơsu kơ lu rup noh, iŏk đak rơmă ôliwơ, iŏk pơgang 'bâu phu Inh, na 'măn 'bơ̆t anăp lu sư.

Êsêkiên 16:8

Inh năm brih lăng 'bôh ih, sơnăm ih 'lŏ trŏ kơ sơnăm băt kơ hưch wă; Inh iŏk tơdrơi ao Inh tơsu kơ ih, klơ̆p tơdrong koh hoh ih. Inh pơkă păng pơgơ̆p hăm ih, ih jing gah Inh bơih, Kră Yang Tih Hloh khan thoi noh.

Êsêkiên 20:32

Lu iĕm khan: Lu nhôn wă gô kơkuh kơ 'long păng tơmo, kiơ̆ thoi adrĕch adrung lu dêh char âu. Tơdrong lu iĕm tơchĕng lăm đon tơdrong noh ưh kơ đei truh ôh,

Êsêkiên 23:12

Sư hưch kơ lu bơngai Asiri, lu yŏng pơgơ̆r, lu yŏng linh, lu linh hrŭk hơbĕn ao 'lơ̆ng, lu linh hao aseh, đĭ-đăng lu tơdăm 'lơ̆ng hơbŏ.

Êsêkiên 23:22

Thoi noh, ơ Ôhôliba, Kră Yang khan thoi âu: “Âu, Inh pơtrŭt lu bơngai mă ih hưch, lu bơngai ih weh achăng lê̆ gô blah ih, Inh gô chông ba lu sư đơ̆ng jơ̆p kơ tơring năm tơ ih;

Êsêkiên 23:4

Mŏ sư anăn Ôhôla păng oh sư anăn Ôhôliba. Lu sư gah Inh, đei pơjing kon drŏ-nglo kon drŏ-kăn. Ôhôla noh jơ̆ pơlei Samari, păng Ôhôliba noh jơ̆ pơlei Jêrusalem.

Da 4:17

Tơdrong hơgăt noh đơ̆ng lu yŏng mă wei-lăng pơkă păng nơ̆r lu bơngai 'lơ̆ng rơgoh đei roi tơbăt, wă kơ lu bơngai oei arih băt kơ Kră Yang 'Bok Kei-Dei Tih hloh pơgơ̆r lăm teh đak kon bơngai; Sư wă ăn kơ bu mơ̆ng kơ Sư wă păng gô tơiung lu bơngai răm-'băm tơ anih pơgơ̆r noh.

Da 4:25

Đe gô pơpuh lê̆ ih đơ̆ng lăm kon bơngai păng ih gô oei hơdai hăm kon sem brem tơ bri, ih gô sa 'nhĕt thoi rơmo păng akâu jăn ih tŭk gô gom hơiuh đĭ-đăng truh tơpơh sơnăm, dĭng mă truh tơ ih 'blŏk băt kơ Kră Yang 'Bok Kei-Dei Tih hloh pơgơ̆r lăm teh đak kon bơngai păng Sư ăn kơ bu mơ̆ng kơ Sư wă.

Da 4:32

Đe gô tơweh lê̆ ih đơ̆ng kon bơngai, ih gô oei hơdai lu sem brem; kư̆m sa 'nhĕt thoi rơmo, dĭng truh tơpơh sơnăm, dĭng mă ih 'blŏk băt thoi âu: Kră Yang 'Bok Kei-Dei Tih hloh pơgơ̆r teh đak kon bơngai păng Sư wă ăn kơ bu mơ̆ng kơ Sư wă.

Da 5:21

Tơweh lê̆ sư đơ̆ng anih kon bơngai, jơhngơ̆m đon sư thoi sem brem păng sư kư̆m oei thoi aseh bri. Sư arih sa 'nhĕt thoi rơmo păng akâu sư đak ngom kôp, tŭk đơ̆ng plĕnh jur gom sư, dĭng truh tơ sư băt 'blŏk kơ Kră Yang 'Bok Kei-Dei Tih hloh, pơgơ̆r dêh char kon bơngai păng Sư pôk bu pơm yŏng mơ̆ng kơ Sư.

Hôsia 1:2

Kơplah Kră Yang pơtơm khan kơ Hôsia, Kră Yang khan kơ sư: Năm bĕ, iŏk oei kơ akăn luĕl 'blal păng pơjing kon pơm kư̆ kă yua kơ lăm dêh char âu pơm pơyô kư̆ kă kơnê̆ dêh, đei achăng lê̆ Kră Yang.

Hôsia 13:6

Lăp lu sư sŏng sa phĭ boih, jơhngơ̆m lu sư jing pơang; yua kơ đơ̆ng noh na lu sư hiơt boih kơ inh.

Hôsia 14:1

Ơ lu bơngai Isơrael, wih brŏk bĕ tơ Kră Yang, 'Bok Kei-Dei iĕm; yua kơ đơ̆ng tơdrong kơnê̆ lu iĕm, na lu iĕm pơ̆k huŏng boih.

Hôsia 2:16

Kră Yang khan thoi âu: “Lăm năr noh ih gô krao Inh: Klo inh; păng ưh pă krao Inh khan: Yang Baal inh dơ̆ng.

Hôsia 5:13

Lăp lu bơngai Êphraim 'bôh tơdrong jĭ lu sư, păng Juđa kư̆m 'bôh boih rơka lu sư, kơplah noh Êphraim năm tơ char Asiri, păng năm apinh pơtao tơm Jarep tơgŭm. Mă-lei sư ưh kơ gơh pơklaih lu iĕm ôh, păng kư̆m ưh kơ gơh ming hơmet rơka lu iĕm mơ̆n.

Hôsia 5:15

Inh gô wih brŏk tơ anih Inh, dĭng truh tơ lu sư băt 'bôh lu sư đei yoch, na krao chă Inh, lăm năr pơmat-tat, lu sư gô adrin chă Inh. Tơdrong lu bơngai Isơrael tơbral. Hil chrih păng phak bơtho.