Hêbrơ 9:12 - Sơ̆p Hlabơar Nơ̆r 'Bok Kei-Dei

¹² Yêsu mơ̆t boih hnam ei, truh tơ anih giĕng tih hloi. Sư mơ̆t soi minh 'măng đĕch tôm hloi kơ tơdrong soi boih yua kơ Sư soi hăm pham Sư kơdih. Ưh kơ sĭ Sư soi hăm pham bơbe pham rơmo ôh. Sư soi thoi noh đĕch, na bu wă gơnang kơ tơdrong Sư soi noh, bơngai noh gô klaih hloi kơ tơdrong yoch.

Hêbrơ 9:12 Iomraidhean Croise

Da 9:24

Đei tơpơh-jĭt 'măng giĕng hơgăt kơ kon pơlei Ih hăm pơlei rơgoh tih Ih, wă găn tơdrong pơm glăi, hŭt lê̆ tơdrong yoch chhut rơgoh tơdrong kơnê̆ păng ba tơdrong tơpăt ling-lang hloi, wă pơsĭt anih tơdrong tơ'bôh păng nơ̆r khan lê̆ adrol păng tuh đak rơmă kơ Yang rơgoh hloh.

Lêwi 16:15

Đơ̆ng noh sư gô pơlôch bơbe tơno pơm tơmam soi yua huai đơ̆ng yoch kon pơlei pơla; sư chĕp ba pham bơbe noh tơ lăm che pĕng, kư̆m thoi yua pham rơmo dăm mơ̆n, tơtraih tơ kơpal tơnglơ̆p tơdrong mơnat ăn păng tơ anăp tơ'bơ̆p mơnat ăn.

Lêwi 4:3

Tơdah 'bok soi mă đei tuh đak rơmă boih na pơm yoch, noh pơm ăn kơ kon pơlei yoch kiơ̆, 'bok soi noh sư athei pơyơ̆r kơ Kră Yang minh pôm rơmo dăm ưh kơ đei jĭ kiơ, yua kơ yoch sư pơm noh.

Lêwi 8:2

Chông ba bĕ Arôn păng lu kon drŏ-nglo sư, chĕp ba ao tai, đak rơmă pơgang 'bâu phu, rơmo dăm mơlôh, pơm tơmam soi pơyơ̆r huai đơ̆ng yoch, 'bar tŏ bơbe tơno păng 'bar tŏ 'bĕng ưh kơ đei 'buih.

Lêwi 9:15

Păng sư pơyơ̆r tơmam soi kon pơlei pơla. Sư rôp bơbe tơno pơm tơmam soi huai đơ̆ng yoch kon pơlei păng pơlôch kon bơbe noh, pơyơ̆r wă huai đơ̆ng yoch, nhen thoi tơmam soi huai đơ̆ng yoch mă adrol ki.

Sa 3:9

'Nâu, tơmo mă inh đei dan 'bơ̆t anăp Jôsua noh minh kơtuăl tơmo mă-lei tơpơh tŏ măt. 'Nâu, Inh gô chrek chư tơ noh păng inh gô iŏk hŭt lê̆ tơdrong yoch đơ̆ng teh âu lăm minh năr.’ ” Kră Yang Tih Hloh khan thoi noh:

Markôs 3:29

Mă-lei dah bu pơjăm Yang Bơhngol 'Lơ̆ng Sư, 'Bok Kei-Dei Sư ưh kơ layơ wă pơklaih bơngai mă pơjăm Yang Bơhngol 'Lơ̆ng Sư 'noh, mă-lei bơngai noh tơdrong yoch oei oei khŏm khŏm ưh kơ đei layơ tôch.”

Luka 1:68

“Bĕ bơ̆n ư-ang kơ 'Bok Kei-Dei, Kră Yang wei-lăng bơngai Isơrael bơ̆n, yua kơ Sư tơgŭm bơ̆n tơpă na Sư huai iŏk bơ̆n.

Jang 20:28

Na iĕm athei kơchăng akâu kơdih hăm wei-lăng đĭ-đăng lu bơngai lui. Yang Bơhngol 'Lơ̆ng ăn kơ iĕm wei-lăng bơngai lui kư̆m thoi lĕ bơngai wei-lăng triu sư. Lu bơngai lui, sư kon 'Bok Kei-Dei, yua Kon pôm Sư Yêsu lôch tuh pham tang kon bơngai yoch.

Êphêsô 1:7

Kon pôm Sư lôch tuh pham wă huai iŏk bơ̆n, wă kơ bơ̆n klaih đơ̆ng tơdrong 'Bok Kei-Dei jô̆ yo. Tơdrong noh yua kơ Sư 'mêm na Sư ăn đĕch thoi noh.

Kôlôsê 1:14

Kon Sư noh boih huai iŏk bơ̆n, pơklaih bơ̆n đơ̆ng tơdrong yoch.

I Tes 1:10

Păng iĕm chang gô Kon Sư jur đơ̆ng plĕnh pă minh 'măng dơ̆ng. Yêsu boih Kon Sư; 'Bok Kei-Dei tơiung arih Sư đơ̆ng lôch. Yêsu boih dŏng pơklaih bơ̆n đơ̆ng tơdrong phak ning-mônh.

Tit 2:14

Kră Yang Yêsu Krist ăn akâu Sư kơdih chu lôch tang kon bơngai bơ̆n. Sư huai iŏk bơ̆n wă kơ bơ̆n huay pă pơm yoch dơ̆ng. Sư ăn kơ bơ̆n jing kon 'lơ̆ng Sư păng Sư ăn kơ jơhngơ̆m bơ̆n wă pơm 'lơ̆ng hăm đe ling-lang.

Hêbrơ 1:3

'Bă Sư thoi lĕ kơ măt 'năr, Kon Sư thoi lĕ kơ hơdah. Tơdrong hơbŏ Sư kư̆m thoi lĕ kơ 'Bă Sư, Sư pơgơ̆r đĭ-đăng kơ plĕnh păng teh, yua kơ Sư Yang, Sư mơsêh tơpă. Păng Sư đei jur tơ teh âu ăn akâu Sư kơdih dŏng pơklaih kon bơngai đơ̆ng tơdrong yoch. Đang tơdrong 'noh boih na Sư tŏk oei gah 'ma kơ 'Bă Sư pơgơ̆r tơ kơpal plĕnh ti.

Hêbrơ 10:19

Ơ 'nhŏng oh, bơ̆n gơnang kơ pham Yêsu, bơ̆n huay kơ hli ôh mơ̆t tơ anih giĕng tih, yua kơ Yêsu soi kơ bơ̆n boih.

Hêbrơ 10:4

yua kơ lu sư gơnang kơ soi hăm pham rơmo pham bơbe khan klaih kơ tơdrong yoch. Thoi yơ pham rơmo pham bơbe gơh pơklaih tơdrong yoch? Pham noh ưh kơ gơh pơklaih minh tơdrong kiơ.

Hêbrơ 13:12

Na Yêsu lôch tang kon bơngai sơ̆ kư̆m thoi noh. Sư lôch tơ jih pơlei wă pơklaih dôm tơdrong yoch kon bơngai, soi kơ 'Bok Kei-Dei hăm pham Sư kơdih.

Hêbrơ 5:9

Sư pơm dôm tơdrong tơnen 'blep thoi 'Bok Kei-Dei, na 'Bok Kei-Dei ăn kơ Sư pơm tơm gah tơdrong dŏng pơklaih dôm lu bơngai mă băt chu kơ Kon Sư, đơ̆ng tơdrong phak ăn arih ling-lang,

Hêbrơ 7:27

Lu 'bok soi nai, rim năr lu sư soi kơ 'Bok Kei-Dei. Lu sư soi pơ'lơ̆ng gah tơdrong yoch lu sư kơdih 'mơ̆i, na soi kơ lu kon pơlei pơla. Mă-lei gah Yêsu ưh ôh, Sư soi akâu Sư kơ 'Bok Kei-Dei minh 'măng tơ 'long pơglang tôm boih.

Hêbrơ 9:13

Tơdrong yoch pel 'bơm ưh kơ lăp, kiơ̆ kơ tơdrong juăt so sơ̆, athei pơ'lơ̆ng hăm pham bơbe pham rơmo tơno păng iŏk hơyok kon rơmo adruh đêl đe 'buh pơkhoy tuh bơlŭ hăm đak, na sraih lu bơngai mă đei tơdrong yoch noh na klaih, jô̆ jing bơngai rơgoh boih.

Hêbrơ 9:14

Tơ̆ng thoi ei, lei pham Yêsu Krist kăl hloh kơ dôm lu pham sem noh, yua kơ Sư rơgoh ling-lang ưh kơ đei yoch kiơ ôh. Pơthim kơ Sư Yang arih ling-lang tăm. Sư soi kơ 'Bok Kei-Dei hăm pham Sư kơdih, na pham Sư sut lê̆ đĭ dôm tơdrong yoch bơ̆n, pơm kơ jơhngơ̆m đon bơ̆n jing 'lơ̆ng tơpăt hăm 'Bok Kei-Dei wă kơ bơ̆n gơh jang kơ 'Bok Kei-Dei mă arih ling-lang.

Hêbrơ 9:15

Thoi noh bơ̆n băt lăp pôm Yêsu đĕch boih gơh pơm 'long sơlam kơ bơ̆n kiơ̆ tơdrong pơgơ̆p 'nao, wă kơ đĭ-đăng lu bơ̆n bơngai mă 'Bok Kei-Dei krao iŏk, gô đei tơdrong Sư pơkă wă ăn kơ bơ̆n ning-mônh ei. Dôm lu bơngai noh gơh klaih đơ̆ng tơdrong yoch đêl kiơ̆ tơdrong pơgơ̆p so, yua kơ Yêsu lôch huai iŏk sư.

Hêbrơ 9:19

Kơplah Môis pơkă ăn kơ lu bơngai Isơrael tôm kơ tơdrong juăt boih, na sư phĕ iŏk tơ'mơ̆ng pơkao păng iŏk achô̆ sŏk bơbe, tong tơ lăm pham bơbe pham rơmo bơlŭ păng đak 'blăng na chruih kơ tơmo lat chih tơdrong juăt 'Bok Kei-Dei, klaih kơ noh sư tơtreh kơ lu bơngai Isơrael.

Hêbrơ 9:28

Kư̆m thoi noh Yêsu jur lôch minh 'măng noh sơ̆ wă pơrăm tôm tơdrong yoch hloi. Mă pă 'măng Sư jur Sư ưh pă pơrăm tơdrong yoch boih, Sư jur wă iŏk dôm lu bơngai mă oei chang gô Sư dang ei.

Hêbrơ 9:7

Gah lăm mă 'bar lăp minh 'nu 'bok soi tih đĕch gơh mơ̆t kơkuh kơ 'Bok Kei-Dei lơ̆m noh. Mă-lei minh sơnăm minh 'măng đĕch, mă mơ̆t athei yua hăm pham sem dơrong 'mơ̆i na gơh mơ̆t, iŏk pham sem noh soi kơ 'Bok Kei-Dei, wă kơ 'Bok Kei-Dei huay kơ jô̆ yo kơ tơdrong yoch sư kơdih hăm tơdrong yoch lu bôl buăl sư bơngai Isơrael.

Tơdrông Tơ'bôh 1:5

Yêsu Krist, Sư pơma tơpăt ling-lang, Sư iung arih đơ̆ng lôch adrol kơ đe, Sư pơgơ̆r đĭ-đăng lu 'bok pơtao oei tơ teh âu; na inh apinh Sư wei-lăng iĕm lăm tôm tơdrong wă kơ iĕm hiôk-hian ling-lang. Yêsu Krist 'mêm kơ bơ̆n tơpă na Sư pơklaih bơ̆n đơ̆ng tơdrong yoch hăm pham Sư.

Tơdrông Tơ'bôh 5:9

Na lu đe ei hơri minh tơdrong 'nao thoi âu: “Pôm Ih đĕch trŏ kơ hek lăng hla bơar đe pơklep noh yua kơ Ih lôch tang kon bơngai, păng pham Ih lĕch sĕch Ih huŏng huai iŏk kon bơngai brŏk tơ 'Bok Kei-Dei đơ̆ng rim dêh char, rim adrĕch adrung, rim khŭl bơngai, rim kơ nơ̆r pơma.