Hêbrơ 12:3 - Sơ̆p Hlabơar Nơ̆r 'Bok Kei-Dei

³ Iĕm athei pơwao kơ Yêsu, Sư iŏk dôm tơdrong lu bơngai yoch pơm kơnê̆ pơ'brơh kơ Sư; thoi noh na iĕm kư̆m lei-lăi 'nĕ kơ klai, 'nĕ kơ lao đon; athei adrin hăt hăi thoi Sư ling-lang.

Hêbrơ 12:3 Iomraidhean Croise

Tơdrông Pơđơk 24:10

Tơdah ih rơdu klai lăm năr đei tơdrong gleh, Noh tơdrong pran kơtang ih iĕ dêh.

Êsai 50:4

Kră Yang ăn kơ inh hơpiĕt lu bơngai gơh bơtho tơ'bôh wă kơ inh băt yua nơ̆r pơma tơiung lu bơngai rơdu tơrăn. Kră Yang râu inh rim pơgê đơ̆ng hrôih tơ'blŏk ăn kơ đon inh wă mơ̆ng nơ̆r Sư bơtho nhen thoi bơngai đei hŏk pơhrăm.

Mathiơ 11:19

Na gah Inh Kon Bơngai jur tơ teh âu, sŏng sa mơh 'nhot hơdai kon bơngai, na đe jô̆ kơ Inh khan bơngai sa bơlŭk, et dư, tơbôl hăm bơngai iŏk jên thuê̆, lu bơngai yoch mơ̆n. Mă-lei dah bơ̆n 'bôh đe jang 'lơ̆ng, bơ̆n băt kơ đe jang trŏ jang hơgei.”

Mathiơ 12:24

Lu bơngai Pharisi kơtơ̆ng thoi noh, lu sư khan: “'Noh đơ̆ng yang Belsêbul yŏng yang kơnê̆ tơgŭm Sư na Sư gơh pơpuh lu yang kơnê̆ noh.”

Mathiơ 15:2

“Yua kơ kiơ lu bơngai pơhrăm păng Ih ưh kơ kiơ̆ tơdrong juăt yă 'bok bơ̆n pơkă sơ̆, lu sư sŏng sa ưh kơ ôp ti?”

Mathiơ 21:23

Yêsu năm dơ̆ng tơ hnam akŭm 'Bok Kei-Dei tơm wă bơtho đe tơ noh. Kơplah Sư oei bơtho đei lu 'bok soi tih păng lu đe kră sek tơlang năm jet Yêsu thoi âu: “Bu ăn kơ Ih pơpuh đe mơdro đơ̆ng hnam akŭm âu păng chă bơtho đe lăm hnam akŭm âu mơ̆n?”

Mathiơ 22:15

Yêsu pơma tơdrong 'noh hei đang boih, na lu bơngai Pharisi pơđâu băl, lu sư wă jet pơlong Yêsu pơma hăm trŏ kơ tơdrong juăt dah ưh. Dah ưh kơ trŏ, lu sư wă kêng.

Luka 14:1

Năr pơdơh Sa'bat ei Yêsu năm sŏng sa tơ hnam minh 'nu bơngai pơm kră kơ lu bơngai khŭl Pharisi. Na đe lăng Yêsu hnhong.

Luka 15:2

Na lu bơngai Pharisi păng lu 'bok thây bơtho tơdrong juăt đe Juđê chă mơmơnh khan: “Bơngai âu pơm ăn kơ lu bơngai yoch mơ̆ng sư bơtho, kư̆m sŏng sa hơdai hăm sư mơ̆n.”

Luka 16:14

Lu bơngai Pharisi kư̆m kơtơ̆ng dôm tơdrong Yêsu bơtho noh mơ̆n, na lu sư pơm hiĕk kơ Yêsu yua kơ lu sư 'mêm kơ mŭk tơmam tơ ala teh âu.

Luka 2:34

Đơ̆ng noh Simiôn apinh 'Bok Kei-Dei tơgŭm bre sư. Sư kư̆m khan kơ Mari thoi âu: “'Bok Kei-Dei ăn kơ bơ̆n kon nge âu wă tơgŭm lu bơngai Isơrael jing hiôk, mă-lei lu bơngai kuă kơ lui kơ Sư jing răm. Sư bơngai 'Bok Kei-Dei ăn wă tơgŭm bơ̆n ră mă-lei đei lơ bơngai gô pơjĭp pơjăm Sư. Yua kơ thoi noh na bơ̆n gô băt jơhngơ̆m lu đe ei kơnê̆ tơpă.

Luka 5:21

Lu thây bơtho tơdrong juăt đe Juđê păng lu bơngai kiơ̆ tơdrong Pharisi kơtơ̆ng Sư pơma thoi noh na lu sư mơmơnh lăm to khan: “Bơngai bu âu pơm pơma blông kơ 'Bok Kei-Dei dêh? Bu mă gơh pơklaih yoch bơ̆n? Pôm 'Bok Kei-Dei đĕch gơh pơklaih yoch bơ̆n.”

Yo 10:20

Đei lơ bơngai mơ'nah khan: “Iĕm 'maih mơ̆ng kiơ kơ Sư, noh Sư bơngai yang mơ̆t pơm kơ Sư wơnh?”

Yo 18:22

Lăp Yêsu pơma thoi noh, đei minh 'nu linh Juđê tap tơ'bŏk Sư păng khan: “Ih ưh kơ trŏ pơma kơ 'bok soi tơm thoi noh ôh.”

Yo 5:16

Kơlih kơ tơdrong noh na lu bơngai Juđê wă pơm kơnê̆ kơ Yêsu, kơlih kơ Sư pơklaih đe jĭ lăm năr pơdơh Sa'bat.

Yo 7:12

Lu kon pơlei pơla pơma 'bơm gah tơdrong Yêsu. Lu mơ'nah khan Sư bơngai 'lơ̆ng tơpăt; lu mơ'nah khan Sư ưh kơ 'lơ̆ng ôh, khan Sư chă hơlĕnh kơ kon pơlei pơla đĕch.

Yo 8:13

Thoi noh lu bơngai Pharisi khan kơ Sư: “'Noh Ih pơang tơdrong Ih kơdih ưh kơ đei bu nai pơma bơ̆ng Ih, nhôn ưh kơ wă lui kơ Ih ôh.”

Yo 8:52

Lu bơngai Juđê khan kơ Sư: “Dang ei nhôn băt kơ Ih bơngai yang mơ̆t tơpă boih. Abraham lôch boih, lu bơngai pơtruh nơ̆r 'Bok Kei-Dei sơ̆ kư̆m hơdai lôch đĭ, mă Ih khan bơngai bu răk nơ̆r Ih bơtho, bơngai 'noh huay kơ lôch.

Yo 8:59

'Bơ̆t ei lu sư iŏk hloi tơmo wă klơ̆m Sư ră; mă-lei Sư ôn akâu Sư kơdih hloi lĕch đơ̆ng hnam akŭm 'Bok Kei-Dei tơm ei.

Yo 9:40

Na lu bơngai Pharisi mơ'nah oei dơ̆ng jê̆ 'bơ̆t Yêsu, lu sư kơtơ̆ng thoi noh na khan: “Lu nhôn măt tol mơ̆n hă?”

I Kor 15:58

Ơ 'nhŏng oh inh mă 'mêm kơeng, kơlih kơ thoi noh boih na iĕm athei adrin lui mă kơjăp 'nĕ pơm đon ngĭl ngŭl păng iĕm athei jang tơdrong Kră Yang mă tơpă hŏ; iĕm băt boih dah iĕm gơnang kơ Sư, tơdrong jang iĕm yua tơpă.

II Kor 4:1

Nhôn jang tơdrong tih rŏ âu yua kơ 'Bok Kei-Dei mơnat đĕch. Thoi noh na nhôn wă jang ling-lang ưh kơ lê̆ ôh.

II Kor 4:16

Thoi noh nhôn wă jang ling-lang ưh kơ lê̆ ôh, mă khan sĕch akar nhôn rai hŏnh, mă-lei jơhngơ̆m nhôn lăm to dang lĕ kơ ming 'nao rim năr.

Galati 6:9

Mă-lei bơ̆n athei chu kơ Sư khŏm khŏm wă kơ bơ̆n gơh pơm đon 'lơ̆ng. Thoi noh dah bơ̆n huay kơ achăng lê̆ Sư na mưh trŏ kơ năr 'Bok Kei-Dei pơkă ning-mônh Sư gô ăn kơ bơ̆n tơdrong apah na bơ̆n oei hơdai hăm Sư ling-lang. Kư̆m thoi bơ̆n pơtăm găr, dah bơ̆n ưh kơ hŭt lê̆ tơdrong jang bơ̆n, lei trŏ bơyan plei, bơ̆n đei phĕ iŏk tơpă.

Both 20:3

Na sư khan: Ơ lu bơngai Isơrael mơ̆ng bĕ! Năr âu lu bơ̆n gô năm tơblah hăm lu bơngai ayăt lu iĕm 'nĕ rơdu lêl 'nĕ kơ hli, 'nĕ kơ tơrơ, 'nĕ kơ lăng krưp.

II Tes 3:13

Ơ lu 'nhŏng oh, mă iĕm jang gleh, tơdah tơdrong 'lơ̆ng trŏ, iĕm 'nĕ kơ achăng hŏ.

Hêbrơ 12:2

Bơ̆n athei lăng Yêsu ling-lang, yua kơ Sư pơih trong kơ bơ̆n lui kơ 'Bok Kei-Dei kơjăp truh tôch. Sơ̆ Sư băt tôm tơdrong 'Bok Kei-Dei wă ăn kơ Sư gô hiôk, na Sư chu iŏk đe pơ̆ng pơlôch Sư tơ 'long pơglang. Sư ưh kơ tơchĕng kơ đe pơm kơnê̆ pơ'brơh kơ Sư ôh. Na dang ei Sư oei gah 'ma kơ 'Bok Kei-Dei.

Hêbrơ 12:5

Iĕm hiơt boih hă tơdrong 'Bok Kei-Dei pơlung bơ̆n wă kơ bơ̆n huay kơ sơ'ngon? Lăm sơ̆p hla bơar Sư đei chih khan kơ bơ̆n thoi âu: “Ơ dăm, e 'nĕ kơ hli ôh 'Bok Kei-Dei bơtho pơjĭ 'biơ̆ e. E 'nĕ kơ rai pơhơi 'bơ̆t Sư bơtho tơbral e.

Hêbrơ 3:1

Ơ lu 'nhŏng oh, iĕm jing bơngai 'lơ̆ng tơpăt boih păng iĕm đei anăn 'Bok Kei-Dei wă krao tơmơ̆t tơ Pơlei 'Lơ̆ng Sư ning-mônh. Na inh wă kơ iĕm tơchĕng 'biơ̆ gah tơdrong Yêsu mă tơpă, yua kơ 'Bok Kei-Dei pôk Sư pơm jơ̆ng 'bang wă tơbăt ăn kơ bơ̆n tơdrong 'Bok Kei-Dei. Păng 'Bok Kei-Dei kư̆m pôk Sư pơm 'bok soi tơm jang tơdrong 'Bok Kei-Dei gah tơdrong lui bơ̆n.

I Pet 2:23

Đe pơma kơnê̆ kơ Sư, Sư ưh kơ pơma kơnê̆ kơ đe; đe pơm pơmat Sư, mă-lei Sư ưh kơ pơma tơwih kơ đe. Sư gô mơ̆ng kơ 'Bok Kei-Dei đĕch, yua kơ Sư băt kơ 'Bok Kei-Dei sek tơlang tơpăt.

Tơdrông Tơ'bôh 2:3

Inh băt mơ̆n iĕm đei tơdrong gleh truh yua kơ jang tơdrong Inh, iĕm oei adrin khŏm khŏm ưh kơ lê̆.

I Sam 12:24

Athei băt hli yom kơ Kră Yang đĕch, đĭ jơhngơ̆m bơ̆jang kơ Sư; lu iĕm athei 'blŏk dôm tơdrong Sư pơm tih dêh kơ lu iĕm ưh kơ băt dang yơ!