Hêbrơ 11:1 - Sơ̆p Hlabơar Nơ̆r 'Bok Kei-Dei

¹ Bơngai đon lui, sư băt tơpă kơ sư gô đei. Tơdrong sư ưh kơ gơh 'bôh sư kư̆m băt kơ đei mơ̆n.

Hêbrơ 11:1 Iomraidhean Croise

Horiso 27:13

Ngeh tơpă Inh gô 'bôh tơdrong pŭn hiôk đơ̆ng Kră Yang tơ lăm teh đak lu bơngai arih.

Horiso 42:11

Ơ bơhngol inh, yua kơ kiơ ih rơdu klai păng liơ ih rŭng răng lăm akâu inh? Chang hơmĕng bĕ kơ Kră Yang 'Bok Kei-Dei; Inh oei bơnê ư-ang kơ sư, Kră Yang Kră Yang 'Bok Kei-Dei Tơ'ngla dŏng pơklaih inh.

Jang 20:21

Inh bơtho bơngai Juđê hăm bơngai nai lei-lăi đĕch mơ̆n, khan kơ sư athei tơbral kơdih tơdrong yoch sư, na brŏk tơ 'Bok Kei-Dei păng lui kơ Kră Yang bơ̆n Yêsu Krist.

I Kor 13:13

Đei pêng tơdrong bơ̆n athei wei ling-lang, ưh kơ đei layơ tôch: Bơ̆n athei lui kơjăp, chang hơmĕng dôm tơdrong 'Bok Kei-Dei wă ăn kơ bơ̆n, athei băt 'mêm kơ 'Bok Kei-Dei hăm bôl buăl bơ̆n; mă-lei athei băt 'mêm kơ 'Bok Kei-Dei hăm bôl buăl bơ̆n kăl hloh.

II Kor 11:17

Tơdrong inh wă pơma pơang akâu inh dang ei, ưh kơ sĭ pơma rok thoi Kră Yang Yêsu ôh, inh pơma thoi bơngai kơhlôh na inh pơ̆n pơma pơang akâu kơdih.

II Kor 4:18

Tơdrong kiơ mă bơ̆n gơh 'bôh, nhôn ưh kơ tơchĕng ôh; nhôn tơchĕng kơ tơdrong mă bơ̆n ưh kơ gơh 'bôh, yua kơ dôm tơdrong măt bơ̆n gơh 'bôh sư hiong tôch, ưh kơ gơh oei ling-lang ôh. Pôm tơdrong măt bơ̆n ưh kơ gơh 'bôh đĕch, gơh oei ling-lang ưh kơ layơ tôch.

II Kor 5:17

Thoi noh na bu kiơ̆ Yêsu Krist, bơngai noh bơ̆n băt kơ 'Bok Kei-Dei pơjing sư jing bơngai 'nao, dôm tơdrong so ưh pă đei boih, sư đei tơdrong 'nao ngăl, yua kơ sư jing bơngai 'nao boih.

II Kor 5:7

Nhôn kiơ̆ Sư kơplah oei tơ ala teh âu, nhôn kiơ̆ hăm tơdrong lui đĕch, wă kơ juăt hăm Sư, ưh kơ sĭ nhôn kiơ̆ yua kơ măt nhôn 'bôh Sư boih ôh.

II Kor 9:4

Hli kơ đei lu bơngai đơ̆ng dêh Masêđôn kiơ̆ inh năm tơ iĕm, na 'bôh iĕm tơra ưh tam mă tôm, inh mơlâu, yua kơ đêl inh roi tơbăt kơ lu sư boih; mă iĕm kư̆m mơlâu kơ lu sư hloh loi kơ inh mơ̆n.

Galati 5:6

Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng 'mêm mơnat kơ đe, noh kăl.

Tit 1:1

Pôl chih hơpong kơ Tĭt. Hmach kơ ih, dăm. Ih kon inh tơpă kơlih kơ ih lui kơ Kră Yang Yêsu đơ̆ng inh bơtho ih sơ̆. Inh boih đĭch đam 'Bok Kei-Dei păng jơ̆ng 'bang Yêsu Krist. 'Bok Kei-Dei wơh inh bơtho kon bơngai đêl Sư rơih iŏk wă kơ lu sư lui kơ Sư păng wă tơbăt ăn kơ lu sư tơdrong Sư, na lu sư gơh pơm tơdrong 'lơ̆ng tơpăt. Thoi noh na lu sư gô arih ling-lang. 'Bok Kei-Dei ưh kơ hơlĕnh ôh. Đơ̆ng blŭng-a sơ̆, đơ̆ng Sư tam mă pơjing plĕnh teh, đơ̆ng noh boih Sư pơkă khan gô ăn kơ bơ̆n arih ling-lang. Na truh sơnăm Sư boih, na Sư pơtruh ăn kơ bơ̆n tơdrong 'nao 'lơ̆ng Sư wă ăn kơ bơ̆n arih ling-lang. Thoi noh boih 'Bok Kei-Dei dŏng pơklaih bơ̆n. Kư̆m Sư boih athei inh bơtho tơdrong 'nao 'lơ̆ng Sư. Ơ dăm, inh krao khan apinh 'Bă tơm bơ̆n 'Bok Kei-Dei hăm 'Bok Dŏng Pơklaih bơ̆n Yêsu Krist wei-lăng ih tôm tơdrong wă kơ Sư ăn kơ ih hiôk-hian ling-lang.

Hêbrơ 10:22

Thoi noh bĕ bơ̆n năm jê̆ 'Bok Kei-Dei. Bơ̆n athei iŏk đon tơpăt, lui kơ Sư sơng iŏk bơ̆n mă tơpă, na jơhngơ̆m bơ̆n huay kơ tơchĕng kơnê̆, yua kơ bơ̆n đei pham Yêsu soi kơ bơ̆n boih. Sư dang tơtreh pham Sư tơ lăm jơhngơ̆m bơ̆n, bơ̆n jing bơngai rơgoh 'lơ̆ng boih; păng pơthim kơ năr bơ̆n iŏk 'batem dang bơ̆n hum đak hlăng 'lơ̆ng tăm.

Hêbrơ 10:39

Mă-lei bơ̆n ưh kơ sĭ kơ bơngai mă lêl kơdŭn tơ rŏng wă kơ hiong tơdrong arih ôh, bơ̆n bơngai nuih, bơngai lui kơjăp wă dŏng akâu kơdih gơh arih ling-lang.

Hêbrơ 11:13

Đĭ kơ hnam dơnŏ sư oei chang gô truh kơ lôch. Lu sư ưh tam đei tôm tơdrong 'Bok Kei-Dei pơkă, mă-lei dang lu sư 'bôh lê̆ boih, lu sư hiôk tơpă, mă khan sư oei tơ noh dang kơ bơngai tơmoi. Lu sư roi kơ đe kư̆m thoi noh, lu sư oei tơ noh dang kơ bơngai tơmoi.

Hêbrơ 11:27

Yua kơ sư đei đon lui, na sư jăk achăng lê̆ dêh Êyiptơ. Sư ưh kơ hli kơ 'bok pơtao hil kơ sư ôh, sư kư̆ kơ năm hloi, yua kơ sư dang lĕ 'bôh akâu 'Bok Kei-Dei mă bơ̆n ưh kơ 'bôh.

Hêbrơ 11:7

'Bok Nôê sơ̆ kư̆m yua kơ sư lui, na lăp sư kơtơ̆ng 'Bok Kei-Dei khan kơ sư ning-mônh gô đei tơdrong truh na sư lui hloi. Sư pơm minh pôm duk tih wă dŏng pơklaih hnam dơnŏ sư. Sư chu 'Bok Kei-Dei, thoi noh na sư tơbăt kơ bơ̆n 'Bok Kei-Dei jô̆ đĭ-đăng kon bơngai nai yoch ngăl. Pôm 'bok Nôê đĕch 'Bok Kei-Dei jô̆ bơngai 'lơ̆ng, yua kơ sư đei đon lui kơ 'Bok Kei-Dei kơjăp.

Hêbrơ 2:3

Mă tơdrong Yêsu Kon 'Bok Kei-Dei kăl hloh kơ noh dơ̆ng. Thoi noh, tơ̆ng bu ưh kơ gơnang kơ Yêsu pơklaih sư, bơngai noh gô đei tơdrong phak tơpă. Tơdrong Kră Yang Yêsu Krist pơklaih bơ̆n, Sư kơdih tơbăt ăn kơ đe sơ̆ na đe tơbăt ăn kơ bơ̆n.

Hêbrơ 3:14

Tơdah bơ̆n lui kơjăp khŏm khŏm truh năr tôch, bơ̆n gô oei hơdai hăm Yêsu Krist ling-lang. Tơdah bơ̆n ưh kơ kiơ̆ Sư khŏm khŏm, bơ̆n ưh kơ gơh oei hơdai hăm Sư ôh.

Hêbrơ 3:6

Mă Yêsu Krist Sư kư̆m jang trŏ thoi 'Bok Kei-Dei pơkă mơ̆n, mă Sư jang wei-lăng đĭ-đăng kơ hnam dơnŏ 'Bok Kei-Dei hloi, yua kơ Sư Kon 'Bok Kei-Dei. Lu bơ̆n, tơ̆ng bơ̆n oei lui kơjăp, bơ̆n kư̆m hnam dơnŏ Sư mơ̆n, dah bơ̆n oei gơnang kơ Sư tơgŭm bơ̆n khŏm khŏm.

Hêbrơ 6:12

Nhôn ưh kơ wă kơ iĕm alah ôh; nhôn wă kơ iĕm adrin lui kiơ̆ mă trŏ thoi lu đe kră sơ̆, lu sư lui khŏm khŏm tơpă, na 'Bok Kei-Dei ăn tơpă tôm tơdrong mă Sư đêl pơkă.

II Pet 1:1

Inh Simôn Pêtrôs, bơngai đĭch đam Yêsu Krist, kư̆m pơm jơ̆ng 'bang Sư mơ̆n. Inh chih hơpong kơ lu bơngai mă 'Bok Kei-Dei hăm 'Bok Dŏng Pơklaih bơ̆n Yêsu Krist krao lui kơ Sư thoi nhôn, yua kơ Sư pơm tơpăt kơ đĭ-đăng.