Galati 5:1 - Sơ̆p Hlabơar Nơ̆r 'Bok Kei-Dei

¹ Kră Yang Yêsu Krist ăn kơ bơ̆n rơngei đơ̆ng dôm tơdrong juăt kon bơngai boih. Thoi noh bơ̆n gơh rơngei tơpă. Na iĕm 'nĕ ăn kơ đe pơhlŭ pơlung iĕm gơnang kơ akâu iĕm kơdih wă kiơ̆ tôm tơdrong juăt Môis dơ̆ng. Dah iĕm pơm thoi noh iĕm wih jing đĭch dơ̆ng.

Galati 5:1 Iomraidhean Croise

Horiso 51:12

Apinh Ih ăn kơ inh tơdrong chơt hiôk kơ tơdrong dŏng pơklaih đơ̆ng Ih. Ăn kơ inh đei jơhngơ̆m 'maih kiơ̆ păng tơgŭm hloi inh đei kơjăp inh oei kơjăp.

Tơdrông Pơđơk 23:23

Răt bĕ tơdrong sĭt tơpă, 'nĕ kơ tĕch lê̆. Iŏk tơdrong hơgei wei nơ̆r bơtho pơhrăm păng hlôh wao,

Êsai 61:1

Yang Bơhngol 'lơ̆ng Kră Yang oei hơdai Inh. Kră Yang rơih inh. Wă năm bơtho ăn tơdrong 'nao 'lơ̆ng kơ lu bơngai dơnuh hin, păng pơlung lu bơngai ơh sơ'ngon Sư wơh inh roi tơdrong Sư wă tơlĕch lu bơngai đe phak, kơ roi tơbăt ăn kơ lu bơngai bơnă gơh hơgei, tơbăt tơlĕch lu bơngai đe chĭt phak đơ̆ng hnam bơnă.

Mathiơ 23:4

Lu sư pơkă kơ iĕm lơ tơdrong juăt kiơ̆ kơ lu sư tơchĕng kơdih, kư̆m dang lĕ lu sư tơpŭ kơ iĕm tơmam trăp hloh kơ ai tơ̆p pă kĕ gơrŭn, dah wă kiơ̆ pơđĭ tơdrong juăt noh, iĕm ưh kơ kĕ ôh păng lu sư ưh kơ tơgŭm iĕm hơya tŏ sĕt.

Luka 5:38

Tơ̆ng bu wă tring sư athei tring mong sik 'nao tơ kơdŭng akar 'nao, yua kơ kơdŭng akar 'nao 'noh kơjăp.

Jang 15:10

Kơlih kơ kiơ iĕm wă pơlong 'Bok Kei-Dei? Iĕm wă kơ lu bơngai tơmoi mă lui ei pŭ tơdrong anat kơ răk dôm lu tơdrong Môis pơkă. Mă-lei tơdrong 'noh lu 'bok kơdră bơ̆n pŭ ưh kơ kĕ ôh păng bơ̆n kư̆m ưh kơ kĕ mơ̆n.

Rom 6:14

Bơngai bu oei gơnang kơ akâu sư kơdih kiơ̆ tơdrong juăt 'Bok Kei-Dei pơkă ưh kơ kĕ ôh, lei bơngai 'noh sư oei pơm yoch hơnơ̆ng; bơ̆n athei gơnang kơ tơdrong Yêsu lôch tang bơ̆n păng tơgŭm bơ̆n, na bơ̆n huay pă pơm yoch.

Rom 6:18

Dang ei iĕm klaih rơngei đơ̆ng tơdrong yoch boih, iĕm jing đĭch 'Bok Kei-Dei dơ̆ng wă pơm 'lơ̆ng tơpăt.

Rom 7:3

Na dah klo sư oei arih, akăn sư iŏk klo nai, sư noh kơđang kơ̆l ako 'brơh kơ klo sư. Mă-lei dah klo sư lôch boih, sư ưh pă hli kơ tơdrong juăt dơ̆ng boih păng mă sư iŏk klo nai đe kư̆m huay pă jô̆ kơ sư pơm yoch boih.

Rom 7:6

Mă-lei dang ei bơ̆n dang lôch kiơ̆ Yêsu Krist na bơ̆n ưh pă kăl gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă sơ̆. Yua kơ thoi noh na bơ̆n athei lui yom kơ 'Bok Kei-Dei, ưh pă gơnang akâu kơdih wă kiơ̆ tơdrong so mă Môis chih pơkă sơ̆, bơ̆n kiơ̆ kơ tơdrong arih 'nao đơ̆ng Yang Bơhngol 'Lơ̆ng ăn.

Rom 8:15

Ưh kơ sĭ 'Bok Kei-Dei ăn Yang Bơhngol 'Lơ̆ng wă kơ bơ̆n jing bơngai đĭch, dah wă kơ bơ̆n oei hli ôh. Sư ăn kơ bơ̆n Yang Bơhngol 'Lơ̆ng wă kơ bơ̆n jing kon Sư. Thoi noh na bơ̆n gơh krao kơ 'Bok Kei-Dei Aba, 'Bă bơ̆n.

Rom 8:2

Yua kơ bơ̆n lui kơ Yêsu Krist, na Yang Bơhngol 'Lơ̆ng ăn kơ bơ̆n tơdrong arih 'nao, bơ̆n jing klaih đơ̆ng tơdrong yoch, ưh pă hli kơ lôch dơ̆ng.

I Kor 15:58

Ơ 'nhŏng oh inh mă 'mêm kơeng, kơlih kơ thoi noh boih na iĕm athei adrin lui mă kơjăp 'nĕ pơm đon ngĭl ngŭl păng iĕm athei jang tơdrong Kră Yang mă tơpă hŏ; iĕm băt boih dah iĕm gơnang kơ Sư, tơdrong jang iĕm yua tơpă.

I Kor 16:13

Inh athei iĕm kơchăng ling-lang pơkrơ̆ng mă kơjăp tơdrong lui 'nĕ kơdŭn.

I Kor 7:22

Bơngai bu đĭch đe mă-lei Kră Yang krao sư lui, bơngai 'noh kư̆m dang rơngei mơ̆n, yua kơ sư lui kơ Kră Yang Yêsu Krist. Mă bơngai bu ưh kơ đĭch đe, Yêsu Krist krao sư lui, bơngai 'noh kư̆m dang đĭch Yêsu Krist mơ̆n.

II Kor 11:20

Iĕm chu kơ lu bơngai noh, iĕm jing bơngai đĭch; sư sa yua kơpah tơmam iĕm, sư pơgŏ iĕm, iĕm chu sư pơjuă kơtĭt iĕm, sư tap 'bŏ iĕm.

II Kor 3:17

Kră Yang Yêsu kư̆m thoi Yang Bơhngol 'Lơ̆ng. Yang Bơhngol 'Lơ̆ng oei tơ yơ, tơ anih noh rơngei hiôk-hian.

Galati 2:4

Đei mơ̆n lu bơngai nai đĕch athei nhôn kăt tơdra akar Tĭt. Mă-lei lu bơngai noh ưh kơ trŏ bơngai lui tơpă ôh. Lu sư mơ̆t akŭm hơdai hăm nhôn, lăng sư thoi bơngai lui mơ̆n, mă tơpă lăm to sư ưh ôh. Bơ̆n bơngai rơngei yua kơ bơ̆n lui kơ Yêsu Krist. Bơ̆n ưh kơ kăl kiơ̆ dôm tơdrong juăt lu bơngai Juđê mă đơ̆ng Môis pơkă kơ sư. Lu sư mơ̆t akŭm hơdai nhôn wă chă lăng tơdrong bơ̆n lui thoi yơ, lu sư wă kơ bơ̆n kiơ̆ dôm tơdrong juăt lu bơngai Juđê. Tơdrong juăt bơngai Juđê anat tơpă, dah bu wă kiơ̆, bơngai 'noh sư dang jing đĭch.

Galati 3:25

Na dang ei Yêsu Krist jur tơ bơ̆n boih, bơ̆n lui kơ Sư boih, na 'Bok Kei-Dei jô̆ bơ̆n bơngai 'lơ̆ng tơpăt hăm Sư, bơ̆n huay pă kăl gơnang kơ tơdrong juăt 'Bok Kei-Dei anhăk bơ̆n tơ Yêsu.

Galati 4:26

Mă-lei kư̆m đei minh pôm Pơlei Jêrusalem nai tơ kơpal plĕnh ti đĕch gơh rơngei. Lu bơngai mă gô oei tơ noh gơh rơngei, yua kơ lu sư lui kơ Yêsu Krist. Pơlei noh wă pơtih gia kơ yă Sara mĕ bơ̆n.

Galati 4:31

Na gah bơ̆n dang ei, bơ̆n ưh kơ sĭ thoi kon mă akăn đĭch sư noh ôh, bơ̆n thoi kon mă akăn rơngei sư noh.

Galati 4:9

Dang ei iĕm chă Kră Yang 'Bok Kei-Dei 'bôh boih; mă tơpă ưh kơ sĭ bơ̆n chă Sư ôh, Sư krao bơ̆n. Thoi noh boih na yua kơ kiơ iĕm wă kiơ̆ dơ̆ng tơdrong juăt kon bơngai? Kiơ̆ kơ tơdrong juăt noh ưh kơ yua kiơ ôh, ưh kơ đei tơgŭm minh tơdrong kiơ wă kơ bơ̆n yua ôh. Na lơliơ iĕm wă jing đĭch tơdrong juăt kon bơngai bơ̆n dơ̆ng?

Galati 5:13

Ơ lu 'nhŏng oh, gah lu iĕm Kră Yang 'Bok Kei-Dei krao iĕm kiơ̆ Sư boih, wă kơ iĕm rơngei đơ̆ng tơdrong juăt kon bơngai, mă-lei Sư ưh kơ wă kơ bơ̆n pơma khan bơ̆n rơngei đơ̆ng tơdrong juăt kon bơngai boih, mơ̆ng kơ bơ̆n wă pơm kiơ, mă 'lơ̆ng kơnê̆ kư̆m bưh. Ưh ôh, Sư kuă ăn bơ̆n pơm thoi noh ôh. Sư wă kơ bơ̆n 'mêm dih băl đei đon tơchĕng 'mêm mơnat tơgŭm dih băl tơduă bơ̆n.

Êphêsô 6:14

Kơplah bơ̆n oei tơblah, bơ̆n athei dơ̆ng kơtă anih hloi, gơhret tơlei tơ̆n bơ̆n mă kơjăp; noh wă pơtih gia kơ bơ̆n đei đon tơpăt boih. Bơ̆n athei hrŭk ao mam wă pĕng akâu bơ̆n; noh wă khan bơ̆n athei pơm 'lơ̆ng kơ đe.

Philip 1:27

Mă-lei iĕm athei lui mă kơjăp, pơm kiơ̆ mă 'blep trŏ thoi tơdrong Yêsu Krist. Thoi noh na mă inh gơh năm tơ iĕm, mă ưh, inh gô kơtơ̆ng tơdrong iĕm lui kơjăp pơgơ̆p băl minh jơhngơ̆m minh đon jang tơdrong Yêsu Krist na jơhngơ̆m inh hiôk.

I Tes 3:8

Dang ei nhôn oei hiôk tơpă yua kơ iĕm lui kơ Kră Yang Yêsu Krist kơjăp, na nhôn bơtho đe rai pran dêh.

II Tes 2:15

Kơlih kơ thoi noh na iĕm athei adrin lui kơjăp khŏm khŏm 'nĕ kơ achăng dôm tơdrong 'Bok Kei-Dei mă nhôn bơtho iĕm, mă nhôn bơtho păng 'bơ̆r, mă nhôn bơtho lăm kơthơ.

Hêbrơ 10:23

Bơ̆n athei wei mă kơjăp tơdrong mă bơ̆n chang sơmĕng ei, 'nĕ kơ lui pơngiĕl Sư. Yua kơ dôm nơ̆r Sư pơkă ưh kơ lah tŭk minh nơ̆r.

Hêbrơ 3:14

Tơdah bơ̆n lui kơjăp khŏm khŏm truh năr tôch, bơ̆n gô oei hơdai hăm Yêsu Krist ling-lang. Tơdah bơ̆n ưh kơ kiơ̆ Sư khŏm khŏm, bơ̆n ưh kơ gơh oei hơdai hăm Sư ôh.

Hêbrơ 3:6

Mă Yêsu Krist Sư kư̆m jang trŏ thoi 'Bok Kei-Dei pơkă mơ̆n, mă Sư jang wei-lăng đĭ-đăng kơ hnam dơnŏ 'Bok Kei-Dei hloi, yua kơ Sư Kon 'Bok Kei-Dei. Lu bơ̆n, tơ̆ng bơ̆n oei lui kơjăp, bơ̆n kư̆m hnam dơnŏ Sư mơ̆n, dah bơ̆n oei gơnang kơ Sư tơgŭm bơ̆n khŏm khŏm.

Hêbrơ 4:14

Bơ̆n đei minh 'nu 'bok soi tih wei-lăng bơ̆n, Sư tŏk ưh kơ băt hơdôm tăl plĕnh, anăn Sư Yêsu Kon 'Bok Kei-Dei; noh na bơ̆n athei lui kơ Sư khŏm khŏm.

I Pet 2:16

Tơpă mơ̆n bơ̆n bơngai rơngei boih, mă-lei iĕm 'nĕ kơ tơchĕng khan, rơngei boih pơm tơdrong kiơ kư̆m bưh. Ưh ôh, bơ̆n athei pơm thoi bơngai đĭch đam 'Bok Kei-Dei.

II Pet 2:19

'Bok bơtho hơlĕnh pơdăr noh, lu sư khan wă ăn kơ lu bơngai noh rơngei, mă-lei tă kơ lu sư dơ̆ng jing đĭch, yua kơ lu sư ưh kơ kĕ gơ̆t kơ tơdrong pơm yoch, jing wă pơrăm akâu kơdih. Tơdrong kiơ bơ̆n ưh kơ kĕ pơgơ̆t, tơdrong noh bơ̆n oei đĭch.

Ju 1:3

Ơ 'nhŏng oh mă inh 'mêm kơeng, ki inh wă chih kơ iĕm kơthơ ră, chih hơpong gah tơdrong 'Bok Kei-Dei pơklaih bơ̆n jing hiôk chơt. Mă-lei dang ei inh kơtơ̆ng đei tơdrong khan đe wă pơhlŭ iĕm, na dang ei inh jing chih pơlung iĕm, wă kơ iĕm adrin 'biơ̆ păng lui mă kơjăp, kiơ̆ dôm tơdrong 'Bok Kei-Dei tơbăt ăn kơ lu bơ̆n kon Sư. Dôm tơdrong Sư tơbăt tôm boih, ưh kơ layơ tơplih dơ̆ng. Thoi noh na iĕm athei pơjah pơjăng păng lu bơngai mă pơhlŭ pơlung iĕm noh 'biơ̆.

Tơdrông Tơ'bôh 2:25

Inh wă kơ iĕm kư̆ kơ lui kơjăp khŏm khŏm truh tơ năr Inh jur ning-mônh.

Tơdrông Tơ'bôh 3:3

Thoi noh na iĕm athei 'blŏk hơdơ̆r kơ dôm tơdrong iĕm kơtơ̆ng đe bơtho iĕm sơ̆ thoi yơ, iĕm athei pơm kiơ̆ thoi noh păng tơbral kơdih dôm tơdrong yoch mă iĕm juăt kơ pơm. Dah iĕm ưh kơ adrin pơjăng 'biơ̆, lei Inh gô năm tơ iĕm thoi bơngai tơtông kơmăng, pơm kơ iĕm đei tơdrong gleh truh kơplah iĕm ưh kơ lêng ê.