Êphêsô 6:23 - Sơ̆p Hlabơar Nơ̆r 'Bok Kei-Dei

²³ Inh krao khan kơ 'Bă tơm bơ̆n 'Bok Kei-Dei hăm Kră Yang bơ̆n Yêsu Krist, apinh Sư tơgŭm đĭ-đăng kơ iĕm hiôk-hian, hăm ăn kơ iĕm băt 'mêm mơnat kơ đe, hăm lui rai kơjăp.

Êphêsô 6:23 Iomraidhean Croise

Bl 43:23

Bơngai wei hnam khan; hiôk-hian bĕ iĕm 'nĕ kơ hli minh tơdrong kiơ! Noh đơ̆ng Kră Yang 'Bok Kei-Dei lu iĕm, mă Kră Yang 'Bok Kei-Dei 'bă lu iĕm, đei ăn tơmam gĭt tơ lăm 'bi lu iĕm. Lu jên iĕm inh iŏk boih. Đơ̆ng noh sư ba Simêôn năm tơ 'nhŏng oh lu sư;

Yo 14:27

“Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm 'nĕ sơ'ngon păng 'nĕ kơ hli.

Rom 1:7

Na dang ei inh chih kơthơ ăn kơ iĕm bơngai Rôm mă 'Bok Kei-Dei 'mêm kơeng. Iĕm boih 'Bok Kei-Dei krao wă kơ iĕm jing kon Sư. Inh krao khan apinh Sư 'Bă tơm bơ̆n hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

Rom 15:33

'Bok Kei-Dei đĕch gơh ăn kơ bơ̆n hiôk-hian, na inh apinh Sư oei hơdai đĭ-đăng kơ iĕm. A-men.

I Kor 1:3

Nhôn apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

II Kor 13:11

Ơ lu 'nhŏng oh, dôm tơdrong inh chă chih kơ iĕm dôm noh boih. Oei kơ iĕm mă 'lơ̆ng. Adrin pơm 'lơ̆ng, mơ̆ng dôm tơdrong inh pơma, băt chu dih băl, oei sa hiôk chơt; thoi noh na 'Bok Kei-Dei mă 'mêm mơnat kơ kon bơngai hăm ăn kon bơngai hiôk-hian, Sư gô oei hơdai iĕm.

Galati 5:6

Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng 'mêm mơnat kơ đe, noh kăl.

Galati 6:16

Inh apinh 'Bok Kei-Dei mơnat ăn kơ dôm lu bơngai lui kiơ̆ tơdrong noh, lu sư boih kon 'Bok Kei-Dei tơpă, lu sư boih đe anăn bơngai Isơrael. Inh apinh 'Bok Kei-Dei ăn kơ lu sư hiôk-hian.

Êphêsô 6:24

Inh apinh sư wei-lăng lu bơngai mă băt 'mêm kơ Kră Yang bơ̆n Yêsu Krist ling-lang.

I Tes 5:8

Na dang ei bơ̆n oei lăm hơdah măt 'năr boih bơ̆n athei kơchăng thoi bơngai hơdrăl. Lu linh tơblah sư hrŭk ao mam wă kơ hơđơ̆ng kơ akâu sư kơdih. Bơ̆n kư̆m thoi lu đe noh mơ̆n athei lui mă kơjăp, băt 'mêm kơ 'Bok Kei-Dei păng bôl buăl bơ̆n, thoi noh na bơ̆n hơđơ̆ng akâu bơ̆n kơdih. Kư̆m thoi lu linh yơ̆l môk kơlăm wă kơ pĕng lăm kơ̆l sư na sư huay kơ hli, âu wă khan 'Bok Kei-Dei pơklaih bơ̆n đơ̆ng tơdrong yoch na wă atŏk bơ̆n oei păng Sư, thoi âu boih bơ̆n huay kơ hli dang ei, thoi âu boih tơdrong hơđơ̆ng bơ̆n.

II Tes 1:3

Ơ 'nhŏng oh, nhôn bơnê kơ 'Bok Kei-Dei ling-lang yua kơ iĕm rai đunh rai lui rai pran kơjăp hăm rim năr iĕm rai gơh 'mêm mơnat dih băl lăm tơduă lu iĕm. Kơlih kơ thoi noh na 'Bok Kei-Dei wă kơ nhôn krao khan bơnê kơ Sư.

II Tes 3:16

Kră Yang Yêsu Krist boih ăn kơ bơ̆n hiôk-hian. Nhôn krao khan apinh Sư ăn kơ iĕm hiôk-hian ling-lang lăm tôm tơdrong păng nhôn apinh Sư oei hơdai rim 'nu kơ lu iĕm.

I Tim 1:14

Kră Yang bơ̆n Yêsu Krist 'mêm mơnat kơ inh tơpă ăn kơ inh lui kơ Sư păng ăn kơ inh 'mêm kơ Sư hăm đĭ-đăng bơngai. Sư kư̆m ăn kơ đĭ-đăng bơngai lui lei-lăi mơ̆n.

I Tim 1:3

Inh wă kơ ih kư̆ oei tơ Pơlei Êphêsô, kư̆m thoi inh athei ih ki lăp inh wă năm đơ̆ng Pơlei Êphêsô tơ dêh char Masêđôn. Na inh athei ih oei tơ pơlei âu khŏm khŏm yua kơ đei lu bơngai tơ noh bơtho tơdrong ưh kơ trŏ tơdrong 'Bok Kei-Dei tơpă. Na ih athei khă lu sư 'nĕ pă bơtho thoi noh dơ̆ng.

I Pet 5:14

Inh apinh 'Bok Kei-Dei ăn kơ iĕm mă lui kơ Yêsu Krist hiôk-hian. Na kơnh pơgê apinh iĕm sơng iŏk rôp băl ti mă 'lơ̆ng wă kơ băt tơdrong 'mêm băl.

III Yo 1:14

Kơlih kơ ưh pă đunh boih inh wă tơ'bơ̆p ih, na ba pơma dơnuh dih băl.

Tơdrông Tơ'bôh 1:4

Inh Yôhan chih kơthơ tơ'bôh kơ tơpơh tŏ hnam akŭm 'Bok Kei-Dei tơ dêh char Asi. Inh apinh Sư âu: 'Bok Kei-Dei mă bơ̆n ư-ang, Sư đei đơ̆ng sơ̆ khơ̆ dang ei mă gô jur ning-mônh; Yang Bơhngol 'Lơ̆ng, Sư minh 'nu đĕch, mă-lei Sư dang tơpơh 'nu, Sư dơ̆ng 'bơ̆t anăp 'Bok Kei-Dei;

I Sam 25:6

Lu iĕm khan: Hơpơi kơ ih đei arih sot chơt hiôk, hơpơi kơ hnam dơnŏ ih kư̆m chơt hiôk; tơm!