Êphêsô 6:18 - Sơ̆p Hlabơar Nơ̆r 'Bok Kei-Dei

¹⁸ Păng bơ̆n 'nĕ hiơt krao khan kơ 'Bok Kei-Dei, wă kơ bơ̆n hưch hanh kơ tơdrong krao khan ling-lang, gô mơ̆ng kơ Yang Bơhngol 'Lơ̆ng wă kơ bơ̆n krao khan tơdrong kiơ, krao khan tơgŭm băl tơduă lu kon 'Bok Kei-Dei dah krao khan kơ tơdrong kiơ nai.

Êphêsô 6:18 Iomraidhean Croise

I Pot 8:52

“Apinh Ih mơ̆ng nơ̆r lu đĭch đam Ih yua kơ lu sư jing pơlei pơla Isơrael Ih, apinh Ih mơ̆ng nơ̆r lu sư krao khan hơdrĭ 'bơ̆t Ih.

I Pot 8:54

Lăp pơtao Sôlômôn krao khan kơ Kră Yang đang bơih; sư iung dơ̆ng tơ anăp chơnang soi Kră Yang, 'bơ̆t anih sư pơtăm kŭl-tăng sư iung yơ̆r ti tơ kơpal plĕnh.

I Pot 8:59

Hơpơi rŏ kơ nơ̆r inh krao khan bơih, 'bơ̆t anăp Kră Yang, oei lăm Kră Yang 'Bok Kei-Dei bơ̆n măng năr păng tơgŭm dôm tơdrong đĭch đam Sư jang păng kư̆m tơgŭm tơdrong kon pơlei pơla Isơrael Sư jang sa rim năr kiơ̆ thoi tơdrong lu sư kăl yua.

I Pot 9:3

Kră Yang khan kơ sư: “Inh kơtơ̆ng bơih dôm nơ̆r ih krao khan apinh 'bơ̆t anăp Inh. Inh 'măn lê̆ pha bơih Hnam 'nâu mă ih pơm wă kơ rơgoh, wă kơ anăn Inh oei lăm noh ling-lang; măt păng jơhngơ̆m Inh gô oei tơ noh ling-lang.

Esther 4:8

Morđêkai kư̆m ăn minh hlak hla bơar chih rok nơ̆r tơtă roi tơlĕch boih tơ lăm pơlei tih Susa tơdrong wă pơlôch adrĕch Juđa, wă kơ sư roi tơbăt ăn kơ Esther dôm nơ̆r đơ̆ng Morđêkai tơlang ăn kơ Esther păng roi ăn wă ăn Esther athei năm apinh pơtao mơnat pơklaih adrĕch Juđa sư kơdih.

Jop 27:10

Lu sư hăm đei chơchă tơdrong hiôk chơt lăm Kră Yang Tih Hloh, Hăm đei krao apinh Kră Yang 'Bok Kei-Dei ling-lang ưh?

Horiso 4:1

Ơ Kră Yang 'Bok Kei-Dei inh, mă 'lơ̆ng tơpăt, Tơl tơwih nơ̆r inh, dah inh krao khan. Ih pơklaih inh boih, lăm năr inh oei pơmat, Apinh Ih mơnat kơ inh, păng tơl nơ̆r inh krao khan.

Horiso 6:9

Kră Yang mơ̆ng boih nơ̆r inh krao apinh; Ih iŏk boih tơdrong inh krao khan.

Êsai 26:16

Ơ Kră Yang, lu sư chă Ih kơplah lu sư đei tơdrong pơmat-tat, lu sư krao khan apinh Ih mơmơnh kơplah Ih đei phak bơtho lu sư.

Da 6:10

Kơplah Đaniel kơtơ̆ng tơdrong pơkăm noh pơtao kĭ anăn sư boih, na sư brŏk tơ hnam sư, lu 'măng-'mŏk iĕ gah Jêrusalem sư pơih đĭ. 'Bơ̆t noh, kư̆ rim năr pêng wơ̆t, sư hơtơ̆p kŭl-tăng krao khan, kơkuh bơnê kơ Kră Yang 'Bok Kei-Dei sư. Sư kư̆m pơm thoi sư juăt kơ pơm ki hmă.

Da 9:20

Inh oei pơma păng krao apinh, tơbral tơdrong yoch inh păng tơdrong yoch kon pơlei Isơrael inh păng inh pơyơ̆r nơ̆r krao apinh inh 'bơ̆t anăp Kră Yang 'Bok Kei-Dei inh, yua kơ kông rơgoh Kră Yang 'Bok Kei-Dei inh;

Hôsia 12:4

Sư đei tơglơ̆m hăm linh jang 'lơ̆ng, păng jei sư; sư nhơ̆m păng krao hơdrĭ apinh Kră Yang mơnat ăn. Sư tơ'bơ̆p boih Kră Yang tơ pơlei Bethel păng tơ noh Kră Yang đei bơtho sư.

Sa 12:10

“Inh gô tuh Yang Bơhngol tơdrong pŭn hiôk păng tơdrong krao apinh kơ hnam Đawit păng kơ lu kon pơlei Jêrusalem; lu sư gô lăng tơ Inh jơ̆ Kră Yang mă đêl lu sư 'bet boih; păng lu sư gô nhơ̆m hmoi, nhơ̆m hmoi thoi 'mêm kơ kon dăm lôch, lu sư gô oei lăm tơdrong chhŭr nuih, thoi lu bơngai mă đei tơdrong chhŭr nuih ơh sơ'ngon yua kơ kon kơdră lu sư hiong.

Mathiơ 17:21

Na gah tơdrong yang kơnê̆ thoi âu, dah bơ̆n ưh kơ krao khan kơ Kră Yang 'Bok Kei-Dei hơdrol păng ưh kơ ơ̆t kơ por, mă bơ̆n pơpuh lap đĕch, sư ưh kơ chu kơdâu ôh.

Mathiơ 26:41

Inh wă kơ iĕm kral ngôi hơpong kơ Inh păng wă kơ iĕm krao khan kơdih wă kơ iĕm huay kơ lui kơ yang Satan pơhlŭ. Inh băt kơ jơhngơ̆m đon iĕm wă ră, mă-lei akâu iĕm ưh kơ kĕ.”

Markôs 13:33

Iĕm athei kơchăng tơdrong lui mă tơpă păng krao khan mă nŏng yua kơ iĕm ưh kơ băt tơdrong ei wă truh layơ.

Markôs 14:38

Inh wă kơ iĕm kral ngôi hơpong kơ Inh păng wă kơ iĕm krao khan kơdih wă kơ iĕm huay kơ lui kơ yang Satan pơhlŭ. Inh băt kơ jơhngơ̆m đon iĕm wă ră, mă-lei akâu iĕm ưh kơ kĕ.”

Luka 21:36

Thoi noh na iĕm athei kơchăng păng krao khan ling-lang wă kơ iĕm kĕ ĕnh dôm tơdrong noh na dơ̆ng 'bơ̆t anăp Inh Kon Bơngai ning-mônh.”

Luka 22:46

Na Yêsu khan kơ lu sư: “Yua kơ kiơ iĕm tep? Iung adrin krao khan 'biơ̆ bĕ, wă kơ iĕm huay kơ lui kơ yang Satan pơhlŭ.”

Luka 3:26

Nagê kon Maat. Maat kon Matathia. Matathia kon Sêmêin. Sêmêin kon Jôsêch. Jôsêch kon Jôđa.

Luka 3:37

Lamek kon Matusêla. Matusêla kon Ênŏk. Ênŏk kon Jarêt. Jarêt kon Mêlêên. Mêlêên kon Kainan.

Jang 1:14

Lu đe âu krao khan ling-lang kơ Kră Yang 'Bok Kei-Dei. Kư̆m đei Mari mĕ Yêsu păng lu oh Yêsu drŏ-nglo păng lu drŏ-kăn nai dơ̆ng akŭm pôm đon krao khan păng lu sư mơ̆n.

Jang 10:2

Sư ưh kơ sĭ bơngai Juđê mơ̆n mă-lei sư păng đĭ hnam dơnŏ sư lui kơkuh kơ 'Bok Kei-Dei. Sư kư̆m hơlăng kơ đe Juđê tơmam păng krao khan ling-lang kơ 'Bok Kei-Dei.

Jang 12:5

Hơtai Pêtrôs oei lăm hnam phak, na lu bơngai lui kơ Yêsu krao khan ling-lang kơ 'Bok Kei-Dei hăm đĭ jơhngơ̆m apinh Sư tơgŭm Pêtrôs wă kơ gơh lĕch.

Jang 6:4

Na nhôn krao khan păng bơtho tơdrong 'Bok Kei-Dei đĕch.”

Rom 12:12

Bơ̆n băt kơ ning-mônh 'Bok Kei-Dei wă ăn kơ bơ̆n oei hiôk jơnap tơpă, na dang ei bơ̆n kư̆m pơm hiôk thoi ning-mônh. Mă bơ̆n đei tơdrong gleh pơmat, mă đe hil areh kơ bơ̆n, bơ̆n kư̆ adrin jang khŏm khŏm đĕch, mă-lei 'nĕ hiơt tơdrong krao khan kơ 'Bok Kei-Dei.

Rom 8:15

Ưh kơ sĭ 'Bok Kei-Dei ăn Yang Bơhngol 'Lơ̆ng wă kơ bơ̆n jing bơngai đĭch, dah wă kơ bơ̆n oei hli ôh. Sư ăn kơ bơ̆n Yang Bơhngol 'Lơ̆ng wă kơ bơ̆n jing kon Sư. Thoi noh na bơ̆n gơh krao kơ 'Bok Kei-Dei Aba, 'Bă bơ̆n.

Galati 4:6

Bơ̆n băt boih bơ̆n jing kon Sư tơpă, yua kơ Sư wơh Yang Bơhngol 'Lơ̆ng đơ̆ng Kon Sư jur oei păng bơ̆n, Sư bơtho bơ̆n krao kơ 'Bok Kei-Dei Aba, 'Bă.

Êphêsô 2:22

Lu iĕm kư̆m dang 'long hnam pơ̆ng pơlăp tơ jrăng mum noh mơ̆n. Đĭ-đăng kơ iĕm hăm lu 'nhŏng oh lu bơngai lui nai dang pơm keh minh pôm hnam 'Bok Kei-Dei ăn kơ Yang Bơhngol 'Lơ̆ng oei.

Êphêsô 3:18

păng ăn kơ iĕm hlôh băt tơdrong Yêsu Krist 'mêm kơeng kơ bơ̆n tih-tin sư dang yơ, jrŭ să sư dang yơ, kư̆m thoi Sư tơbăt ăn kơ đĭ-đăng lu kon 'Bok Kei-Dei nai.

Êphêsô 3:8

Inh âu bơngai iĕ hloh kơ đĭ-đăng lu kon 'Bok Kei-Dei nai. Mă-lei Sư pơjao kơ inh tơdrong bơtho, wă kơ inh năm bơtho lu bơngai khŭl nai mă ưh kơ trŏ kơ bơngai khŭl Juđê, wă kơ lu sư băt kơnăl kơ tơdrong hiôk jơnap Yêsu Krist ăn kơ bơ̆n thoi yơ. Tơdrong hiôk jơnap noh hiôk tơpă ưh pă băt dang yơ.

Êphêsô 6:19

Păng inh wă kơ iĕm krao khan tơgŭm inh hai mơ̆n, wă kơ inh hlôh băt dôm tơdrong Sư wă kơ inh bơtho păng wă kơ inh nuih kơ bơtho tơdrong 'nao 'lơ̆ng Sư.

Philip 1:4

Rim inh krao khan kơ 'Bok Kei-Dei, inh apinh Sư tơgŭm iĕm, na lăm jơhngơ̆m inh hiôk,

Philip 4:6

Iĕm 'nĕ kơ hli, ưh kơ hli kơ minh tơdrong kiơ ôh. Mă-lei iĕm athei krao khan apinh 'Bok Kei-Dei wei-lăng păng tơgŭm iĕm lăm tôm tơdrong păng athei băt bơnê kơ Sư ling-lang.

Kôlôsê 1:3

Rim kơ nhôn krao khan kơ 'Bok Kei-Dei 'Bă Yêsu Krist Yŏng bơ̆n, nhôn bơnê kơ Sư ling-lang,

Kôlôsê 1:4

yua kơ nhôn kơtơ̆ng tơdrong iĕm lui kơ Yêsu Krist kơjăp, hăm băt 'mêm mơnat kơ đĭ-đăng lu kon 'Bok Kei-Dei.

Kôlôsê 4:2

Iĕm athei adrin gah tơdrong krao khan. Kơplah iĕm oei krao khan, iĕm athei tơchĕng kơ tơdrong krao khan đĕch, 'nĕ kơ tơchĕng tơdrong nai. Păng ling-lang athei bơnê kơ 'Bok Kei-Dei.

I Tim 2:1

Dôm tơdrong inh wă pơkă kơ ih dang ei tơdrong âu kăl tơpă: Inh athei iĕm krao khan bơnê kơ 'Bok Kei-Dei ling-lang apinh Sư dŏng mơnat đĭ-đăng bơngai păng đĭ-đăng 'bok pơtao păng đĭ-đăng kră pơgơ̆r wă kơ bơ̆n oei hiôk-hian păng đei đon tơpăt kiơ̆ tơdrong 'Bok Kei-Dei.

II Tim 1:3

Inh lui kơ 'Bok Kei-Dei trŏ thoi Sư wă, na inh ưh kơ hli. Lu 'bok kơdră inh lui sơ̆ thoi noh mơ̆n. Na inh krao khan kơ 'Bok Kei-Dei ling-lang wă kơ Sư tơgŭm ih păng inh kư̆m bơnê kơ Sư yua kơ ih lui kơjăp.

Hêbrơ 5:7

Kơplah Yêsu oei tơ teh âu sơ̆, Sư krao pơret 'Bă Sư păng hmoi apơi kơ 'Bă Sư, yua kơ Sư băt kơ 'Bă Sư gơh tơdŏng Sư đơ̆ng tơdrong lôch. Na 'Bok Kei-Dei mơ̆ng Sư, yua kơ Sư chu yom kơ 'Bok Kei-Dei.

I Pet 4:7

Khei 'năr wă jê̆ tôch boih na iĕm athei tơchĕng đon mă hơgei wă kơ kơchăng kơ tơdrong krao khan pơnam.

Ju 1:20

Ơ lu 'nhŏng oh mă inh 'mêm kơeng, inh wă kơ iĕm rai đunh rai lui kơjăp dôm tơdrong 'Bok Kei-Dei, tơdrong mă 'lơ̆ng tơpăt. Iĕm athei gơnang kơ Yang Bơhngol 'Lơ̆ng tơgŭm iĕm krao khan.

I Sam 1:12

Kơplah sư oei krao khan 'bơ̆t anăp Kră Yang, Hêli lăng 'bơ̆r sư.