Êphêsô 4:2 - Sơ̆p Hlabơar Nơ̆r 'Bok Kei-Dei

² Inh wă kơ iĕm gơh găt thoi lu bơngai dim, băt 'mêm kơ bôl buăl, pơma dơnuh dih băl mă hiôk, pơlung dih băl mă 'lơ̆ng.

Êphêsô 4:2 Iomraidhean Croise

Horiso 138:6

Mă khan, Kră Yang tih-tin. Kŭm oei lăng ba lu bơngai răm-'băm. Gah lu bơngai pơang, Sư băt lê̆ đơ̆ng adrol boih.

Horiso 45:4

Hăm tơdrong tơpăt, tơdrong dim iơ̆m păng tơdrong 'lơ̆ng tơpăt, Iŏk bĕ tơdrong tih rŏ Ih năm tŏk kĕ jei, Ti 'ma Ih tơ'bôh dôm tơdrong krưp.

Tơdrông Pơđơk 16:19

Kơtrơ̆m iŏk đon ala na oei hăm bơngai dơnuh hin, 'Lơ̆ng hloh kơ klah song tơmam tơtông tơgar hăm bơngai pơang.

Tơdrông Pơđơk 3:34

Hăm lu bơngai blei hiap Sư blei hiap lu bơngai juăt kơ blei hiap đe, Mă-lei sư ăn pŭn hiôk kơ bơngai bu băt pơyom.

Bôk Bơthô 7:8

Pơkeh ming tơdrong jang 'lơ̆ng hloh kơ 'nao pơtơm pơm plơ̆ng, chơ̆n jơhngơ̆m 'lơ̆ng hloh 'bônh kơ pơang.

Êsai 57:15

Yua kơ Tơ'ngla Tih Hloh kơ đĭ-đăng, Tơ'ngla oei đei ling-lang. Anăn Sư Kră Yang 'Lơ̆ng Rơgoh, đei khan thoi âu: “Inh oei tơ anih kơpal hloh păng 'Lơ̆ng Rơgoh. Mă-lei kư̆m oei hơdai hăm bơngai đei jơhngơ̆m sơ'ngon tơbral tơdrong yoch, wă tơiung ming jơhngơ̆m lu bơngai băt tơjur akâu, wă pơlung jơhngơ̆m lu bơngai băt sơ'ngon kơdih yoch.

Jêphania 2:3

Chơchă bĕ Kră Yang ơ lu bơngai chu yom lăm teh đak, pơm kiơ̆ bĕ nơ̆r Kră Yang tơtă, chơchă tơdrong tơpăt Sư, chơchă bĕ tơdrong gơh găt, dah rŏ lăng đe gô ôn iĕm hlơp lăm năr Kră Yang hil.

Sa 9:9

Ơ kon drŏ-kăn Siôn chơt hiôk bĕ đĭ-đăng! Ơ kon drŏ-kăn Jêrusalem, jreo tơkĕch chơt hiôk bĕ! 'Nâu, pơtao lu iĕm truh tơ lu iĕm boih, Sư jơ̆ tơpăt ăn tơdrong dŏng pơklaih, iŏk đon ala hao aseh iĕ, wă khan kon aseh yŏng.

Jo 12:3

Môis boih mă iŏk đon ala iơ̆m dim hloh kơ đĭ-đăng bơngai kơpal teh âu.

Mathiơ 11:29

Yua kơ Inh bơngai dim, băt 'mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk.

Markôs 9:19

Na Yêsu khan kơ lu sư: “Ơ lu iĕm mă oei lui rơdu hơnơ̆ng, iĕm wă kơ Inh oei hơdai iĕm đunh dang yơ 'mơ̆i, na iĕm lui kơjăp? Iĕm wă kơ Inh gleh dang yơ 'mơ̆i na iĕm gơh pơklaih đe?” Na Yêsu khan kơ bơngai ei: “Năm ba kon ih tơ âu năm.”

Jang 20:19

Iĕm băt thoi yơ inh pơm đĭch đam 'Bok Kei-Dei bơ̆jang tơdrong sư. Inh ưh kơ pơ̆n pơang akâu kơdih ôh. Inh 'bôh đe ưh kơ lui kơ Kră Yang Yêsu inh kư̆m nhơ̆m hmoi ơh kơdih akâu inh mơ̆n. Na lu bơngai Juđê kư̆m wă rôp pơrăm lê̆ inh.

Rom 15:1

Lu bơ̆n bơngai mă lui kơjăp boih athei băt tơgŭm lu bơngai lui rơdu, 'nĕ pơjah pơjăng tơdrong sư lui rơdu ưh tam mă kơjăp noh, bơ̆n 'nĕ pơma kơ sư kiơ̆ kơ tơdrong lui bơ̆n.

I Kor 13:7

Bơngai bu băt 'mêm kơ 'Bok Kei-Dei hăm bôl buăl sư, mă đe pơm kơnê̆ kơ sư, sư oei 'mêm kơ đe; đe areh kơ buăl sư mă-lei sư oei lui kơ nơ̆r buăl sư; păng sư lui kơ 'Bok Kei-Dei wei-lăng sư lăm tôm tơdrong khŏm khŏm; mă đei tơdrong gleh pơmat-tat, sư oei khŏm adrin lui 'mơ̆i.

Galati 6:2

Iĕm gơh tơgŭm dih băl thoi noh trŏ tơpă, thoi Kră Yang Yêsu Krist pơkă.

Êphêsô 1:4

Adrol kơ 'Bok Kei-Dei tam mă pơjing plĕnh teh sơ̆, Sư rơih iŏk bơ̆n boih, yua kơ Yêsu Krist wă lôch tang bơ̆n. Sư rơih iŏk bơ̆n wă kơ bơ̆n jing 'lơ̆ng tơpăt huay kơ đei tơdrong yoch 'bơ̆t anăp Sư.

Kôlôsê 1:11

Na nhôn apinh tơdrong mơsêh mơyang 'Bok Kei-Dei ăn kơ iĕm jơhngơ̆m pran adrin kiơ̆ tôm tơdrong Sư, wă kơ iĕm huay kơ achăng lê̆ Sư, mă đe pơm pơmat kơ iĕm dang yơ, ăn kơ iĕm oei hiôk oei kơjăp lăm tơdrong lui khŏm khŏm.

I Tim 6:11

Ơ Timôthê, ih bơngai kiơ̆ 'Bok Kei-Dei, ih athei weh ataih đơ̆ng tơdrong kơnê̆ 'noh, ih adrin pơm đon 'lơ̆ng tơpăt, lui mă kơjăp, 'mêm kơ 'Bok Kei-Dei păng pơm jơhngơ̆m dim 'mêm kơ bôl buăl mơ̆n. Đei tơdrong gleh truh tơ ih ră, mă-lei ih athei adrin pơm kiơ̆ 'Bok Kei-Dei khŏm khŏm.

II Tim 2:25

Sư bơtho lu bơngai pơjah pơjăng păng sư, sư athei bơtho mă 'lơ̆ng wă kơ bơngai mă pơjah pơjăng păng sư jah hơi jơhngơ̆m. 'Bok Kei-Dei phŏ Sư ăn kơ bơngai pơjah pơjăng 'noh tơbral hloi tơdrong yoch sư kơdih na hlôh hloi kơdih tơdrong Kră Yang.

Ya 1:21

Thoi noh na bơ̆n athei lê̆ đĭ dôm tơdrong kơnê̆ 'mê̆-'mach păng chu yom kơ 'Bok Kei-Dei. Bơ̆n athei lui kơ nơ̆r Sư na bơ̆n gơh klaih đơ̆ng tơdrong yoch.

I Pet 3:15

Mă-lei gah Yêsu Krist bơ̆n athei chu yom kơ Sư yua kơ Sư Kră Yang bơ̆n. Păng bơ̆n athei kơchăng ling-lang wă kơ gơh tơl tơwih kơ đe dôm tơdrong đe wă jet bơ̆n yua kơ kiơ bơ̆n lui. Mă-lei bơ̆n athei tơl tơwih kơ sư mă 'lơ̆ng mă hiôk.

I Pet 3:8

Đơ̆ng âu tơ anăp đĭ-đăng kơ bơ̆n athei pơgơ̆p băl minh jơhngơ̆m minh đon, băt 'mêm mơnat dih băl, iŏk jơhngơ̆m đon dim hơlăng băl, 'nĕ pơang băl.