Êphêsô 2:8 - Sơ̆p Hlabơar Nơ̆r 'Bok Kei-Dei

⁸ Bơ̆n klaih đơ̆ng tơdrong yoch oei hiôk hăm 'Bok Kei-Dei, yua kơ 'Bok Kei-Dei 'mêm mơnat kơ bơ̆n na Sư pơklaih, yua kơ bơ̆n lui păng gơnang kơ Yêsu tơpă na Sư mơnat. Ưh kơ sĭ bơ̆n gơh klaih kơdih ôh, mă-lei tơdrong noh Sư ăn đĕch.

Êphêsô 2:8 Iomraidhean Croise

Mathiơ 16:17

Yêsu khan: “Ơ Simôn, kon Yôhan, ih hiôk tơpă. Kon bơngai ưh kơ đei tơbăt kơ ih tơdrong noh ôh. 'Bă Inh mă oei tơ plĕnh ti đĕch tơbăt kơ ih tơdrong noh.

Mathiơ 20:9

Bơngai kai apah lu bơngai jang đơ̆ng pơđăm jơ, rim 'nu kơ lu sư minh hlak jên.

Markôs 16:16

Bơngai bu lui păng iŏk 'batem, bơngai 'noh sư gơh klaih đơ̆ng tơdrong yoch. Bơngai bu ưh kơ chu lui sư gô pŭ tơdrong phak.

Luka 7:50

Na Yêsu khan kơ bơngai drŏ-kăn ei dơ̆ng: “Yua kơ ih lui na ih klaih. Yak kơ ih mă 'lơ̆ng bĕ.”

Yo 3:36

Bơngai bu lui kơ Kon Sư, bơngai 'noh sư gô oei hơdai hăm 'Bok Kei-Dei arih ling-lang. Bơngai bu ưh kơ lui yom kơ Kon Sư, bơngai 'noh sư ưh kơ đei arih ling-lang ôh. 'Bok Kei-Dei hil kơ sư tơpă păng sĭt gô phak sư ning-mônh.”

Yo 4:10

Yêsu khan kơ sư: “Dah ih băt kơ tơdrong 'Bok Kei-Dei wă ăn kơ ih păng dah ih băt kơ Inh bơngai thoi yơ mă apinh đak ih nhă na dah ih apinh Inh, Inh ăn hloi kơ ih đak mă ih gơh arih ling-lang.”

Yo 5:24

Inh khan kơ iĕm tơpă, bơngai bu mơ̆ng Inh bơtho păng lui hloi kơ 'Bok Kei-Dei mă wơh Inh, bơngai 'noh ning-mônh sư gô oei hơdai hăm 'Bok Kei-Dei arih ling-lang păng Inh huay pă sek tơlang tơdrong sư boih. Sơ̆ sư kiơ̆ tơdrong lôch mă-lei dang ei sư kiơ̆ tơdrong arih.

Yo 6:35

Yêsu khan kơ lu sư: “Inh boih jing tơmam sa mă ăn kon bơngai arih ei. Na bơngai bu năm tơ Inh, bơngai 'noh ưh kơ layơ pơngot; bơngai bu lui kơ Inh, bơngai 'noh ưh kơ layơ rơhing.

Yo 6:37

Đĭ-đăng dôm lu bơngai mă 'Bă Inh ăn kơ Inh, lu sư gô lui kơ Inh. Păng bơngai bu lui kơ Inh, Inh ưh kơ tŭk sư ôh.

Yo 6:40

'Bă Inh wă thoi âu: Ăn dôm lu bơngai mă 'bôh Inh Kon Sư na lui hloi kơ Inh, lu sư gô đei arih ling-lang. Inh tơiung arih lu sư năr tôch ning-mônh.”

Yo 6:44

'Bă Inh athei Inh truh tơ âu, na ưh kơ đei bu truh tơ Inh ôh, dah 'Bă Inh ưh kơ ăn lu sư truh. Bơngai bu mă 'Bă Inh ăn truh tơ Inh, lu bơngai 'noh đĕch truh tơ Inh, na Inh gô tơiung arih lu sư năr tôch ning-mônh.

Yo 6:65

Yêsu wih khan kơ lu sư dơ̆ng: “Iĕm ưh kơ lui kơ Inh, noh kư̆m thoi Inh khan kơ lu iĕm hei: Ưh kơ đei bu gơh truh tơ Inh, dah 'Bă Inh ưh kơ ăn.”

Jang 13:39

Bơ̆n kiơ̆ tơdrong juăt Môis đĕch, bơ̆n ưh kơ gơh klaih đơ̆ng tơdrong yoch. Mă-lei dah bơ̆n lui kơ Yêsu, bơ̆n gơh klaih đĭ đơ̆ng tơdrong yoch bơ̆n.

Jang 14:27

Lăp truh tơ pơlei ei boih, bre sư krao akŭm bơngai lui. Bre sư roi đĭ tơdrong 'Bok Kei-Dei tơgŭm bre sư păng tơdrong 'Bok Kei-Dei ăn kơ lu bơngai tơmoi mă ưh kơ khŭl Juđê lui kiơ̆ kơ 'Bok Kei-Dei.

Jang 15:11

Bơ̆n băt bơ̆n klaih đơ̆ng tơdrong yoch yua kơ Kră Yang Yêsu 'mêm mơnat đĕch păng lu bơngai tơmoi kư̆m lei-lăi mơ̆n.”

Jang 16:14

Lăm lu drŏ-kăn oei mơ̆ng nhôn ei đei minh 'nu anăn sư Liđa. Sư bơngai đơ̆ng Pơlei Thiatir. Sư bơngai juăt kơ mơdro tĕch che jơk păng sư lui kơkuh kơ 'Bok Kei-Dei đơ̆ng sơ̆. Na Kră Yang 'Bok Kei-Dei tơgŭm sư lui kơ nơ̆r Pôl bơtho.

Jang 16:31

Na bre Pôl khan kơ sư: “Ih lui kơ Kră Yang Yêsu Krist na ih gơh klaih, ih păng hnam dơnŏ ih kư̆m klaih lei-lăi mơ̆n.”

Rom 10:14

Mă-lei dah ưh kơ đei bơngai năm bơtho, thoi yơ đe gơh krao khan adrol? Ưh kơ đei bơngai năm bơtho, thoi yơ đe gơh lui adrol? Ưh kơ đei bơngai năm bơtho thoi yơ đe gơh kơtơ̆ng adrol?

Rom 10:17

Gah lu bơ̆n, bơ̆n lui boih, noh đơ̆ng đe năm bơtho tơdrong 'nao 'lơ̆ng Yêsu Krist na bơ̆n lui.

Rom 4:16

'Bok Kei-Dei pơkă khan wă ăn kơ lu kon sâu Abraham pơgơ̆r jơ̆p kơ teh đak. Tơdrong Sư pơkă noh, Sư wă ăn kơ bơngai bu mă lui kơ Sư; yua kơ Sư mơnat, na Sư ăn. Lu bơngai Juđê mă adrin kiơ̆ tơdrong juăt Sư pơkă, wă khan lu bơngai mă gơnang kơ Sư hăm đĭ jơhngơ̆m, lu bơngai noh Sư ăn. Mă-lei ưh kơ sĭ Sư ăn pôm lu đe noh đĕch ôh. Sư ăn kơ đĭ-đăng hăm lu bơngai tơmoi hai, wă khan lu bơngai mă lui 'blep trŏ thoi 'bok bơ̆n Abraham sơ̆. Thoi noh na Abraham boih pơm 'bok kơdră 'bă tơm đĭ-đăng kơ lu bơ̆n sơ̆.

Rom 4:5

Bơ̆n bơngai yoch mă-lei dah bơ̆n lui păng gơnang kơ Sư tơpă, Sư kư̆m jô̆ bơ̆n bơngai 'lơ̆ng tơpăt. Mă-lei noh ưh kơ sĭ Sư apah yua kơ bơ̆n kiơ̆ dôm tơdrong juăt Sư pơkă ôh, Sư mơnat yua kơ bơ̆n lui păng gơnang kơ Sư.

Rom 9:16

Thoi noh na dang ei bơ̆n băt nhên boih gah tơdrong noh, ưh kơ sĭ đơ̆ng bơ̆n wă kơ Sư 'mêm, dah bơ̆n pơlung Sư wă kơ Sư 'mêm kơ bơ̆n ôh. Sư 'mêm kơ bơ̆n yua kơ Sư wă 'mêm kơdih đĕch.

Galati 3:14

Yêsu huai iŏk bơ̆n boih, na mă 'Bok Kei-Dei tơgŭm kơ đĭ-đăng kơ bơ̆n, mă bơngai Juđê, mă bơngai ưh kơ sĭ khŭl Juđê, noh kư̆m thoi Sư pơkă kơ Abraham bơ̆n sơ̆ khan wă tơgŭm bơ̆n, wă khan ăn kơ bơ̆n Yang Bơhngol 'Lơ̆ng dah bu lui păng gơnang kơ Sư.

Galati 3:22

Sơ̆p hla bơar 'Bok Kei-Dei jô̆ đĭ-đăng kon bơngai bơ̆n pơm yoch, ưh kơ chu kiơ̆ tơdrong juăt Sư, trŏ kơ Sư wă phak tơpă ning-mônh. 'Bok Kei-Dei pơma jô̆ bơ̆n thoi noh, Sư kuă ăn bơ̆n tơchĕng kiơ̆ tơdrong akâu bơ̆n kơdih. Sư wă kơ bơ̆n tơchĕng gơnang kơ Kon Sư đĕch. Dôm lu bơngai lui kơ Kon Sư Yêsu Krist, 'Bok Kei-Dei wă ăn kơ lu sư arih ling-lang hăm Sư, kư̆m thoi Sư pơkă kơ Abraham sơ̆.

Êphêsô 1:19

Păng wă kơ iĕm băt kơ Sư Kră Yang mơsêh tăp pang mơyang tăp dăr gơh tơgŭm lu bơ̆n bơngai lui kơ Sư,

Êphêsô 2:10

Tơdrong 'Bok Kei-Dei ăn kơ bơ̆n jing bơngai 'nao, yua kơ bơ̆n pôm đon hăm Yêsu Krist. Tơdrong bơ̆n jing bơngai 'nao noh Sư wă kơ bơ̆n pơm tôm tơdrong 'lơ̆ng tơpăt ngăl, na blŭng-a sơ̆ 'Bok Kei-Dei wă kơ bơ̆n pơm 'lơ̆ng ling-lang thoi noh.

Êphêsô 2:5

mă khan bơ̆n bơngai dang lôch yua kơ tơdrong yoch, mă-lei dang ei bơ̆n kư̆m dang Sư tơiung lu bơ̆n thoi Yêsu Krist boih. Bơ̆n gơh klaih đơ̆ng tơdrong yoch yua kơ Sư mơnat ăn.

Philip 1:29

'Bok Kei-Dei 'mêm kơ iĕm na Sư ăn kơ iĕm lui kơ Yêsu, mă ưh kơ sĭ Sư ăn kơ iĕm lui kơ Yêsu lui hiôk, kơkuh kơ Sư kơkuh hiôk đĕch ôh. Sư wă kơ iĕm pơư pơang kơ đe anăn Yêsu Krist mă tơpă, na mă Sư kư̆m ăn kơ iĕm pŭ pơmat tơdrong Yêsu mơ̆n.

Kôlôsê 2:12

'Noh thoi đe pơm kơ bơ̆n 'batem tơmôch lăm đak, dang 'bŭ akâu bơ̆n hơdai Yêsu minh pôm bong. Bơ̆n iung đơ̆ng đak, kư̆m dang bơ̆n iung arih thoi Sư mơ̆n. Dang ei bơ̆n jing bơngai 'nao boih yua kơ bơ̆n lui păng gơnang kơ tơdrong mơsêh mơyang 'Bok Kei-Dei mă tơiung arih Sư đơ̆ng lôch noh.

II Tes 1:9

Đơ̆ng rŏng kơ sek tơlang, 'Bok Kei-Dei wă phak lu sư ling-lang. Lu sư ưh kơ layơ gơh oei hơdai hăm Kră Yang Yêsu Krist ôh păng lu sư ưh kơ layơ gơh 'bôh Kră Yang Yêsu Krist mă 'lơ̆ng rŏ mơsêh mơyang tơpă.

Hêbrơ 6:4

Mă-lei gah lu bơngai mă băt nhên boih tơdrong Yêsu, 'Bok Kei-Dei ăn kơ sư arih 'nao, ăn kơ sư Yang Bơhngol 'Lơ̆ng oei hơdai hăm sư,

I Pet 1:5

Yua kơ bơ̆n lui păng gơnang kơ Sư tơpă, na 'Bok Kei-Dei tơ'ngla mă mơsêh mơyang, Sư wei-lăng lu bơ̆n ling-lang truh tơ năr Sư wă ăn kơ bơ̆n tôm tơdrong mă Sư đei hơmet lê̆ boih tơ năr tôch noh kơnh.