Both 30:20 - Sơ̆p Hlabơar Nơ̆r 'Bok Kei-Dei

²⁰ 'Mêm kơ Kră Yang 'Bok Kei-Dei, chu kiơ̆ nơ̆r Sư păng kiơ̆ Sư mă tơpă yua kơ lăp Sư đĕch gơh ăn tơdrong arih na Kră Yang gô ăn kơ iĕm gơh arih sot, tơ lăm teh đak mă Kră Yang hlôi pơkă wă ăn kơ lu 'bok iĕm, 'bok Abraham, Isăk păng Jakôp.

Both 30:20 Iomraidhean Croise

Bl 12:7

Kră Yang pơdah kơ Abram păng pơkă khan: Inh gô ăn adrĕch adrung ih teh đak âu! Đơ̆ng noh, Abram pơm minh pôm chơnang soi kơ Kră Yang, Tơ'ngla mă đei pơdah akâu sư kơ Abram.

Bl 17:1

Kơplah Abram tơsĭn-jĭt tơsĭn sơnăm, na Kră Yang tơ'bôh kơ Abram păng khan thoi âu: “Inh boih Kră Yang 'Bok Kei-Dei mơsêh mơyang, ih athei oei 'bơ̆t anăp Inh na ih jing minh 'nu bơngai 'lơ̆ng tơpăt.

Horiso 27:1

Kră Yang boih tơdrong hơdah păng tơdrong dŏng pơklaih inh: Inh wă hli kơ bu dơ̆ng? Kră Yang anih kơjăp kơ tơdrong arih inh: Inh wă hli kơ bu dơ̆ng?

Horiso 30:5

Yua kơ tơdrong sư hil lăp tŏ sĕt, Gah tơdrong Sư mơnat đei đĭ chăl arih hloi: Tơdrong nhơ̆m hmoi lăp kiơ̆ kơmăng đĕch, Mă-lei truh pơgê hrôih đei chơt hiôk.

Horiso 36:9

Yua kơ tơm tơdrong arih oei tơ Ih, Lăm tơdrong hơdah Ih nhôn 'bôh hơdah,

Horiso 37:3

Gơnang bĕ kơ Kră Yang păng pơm 'lơ̆ng. Oei bĕ lăm dêh char păng oei arih lăm tơdrong 'lơ̆ng tơpăt Sư.

Horiso 66:9

Sư boih bơwei tơdrong arih lu bơ̆n. Ưh kơ ăn jơ̆ng lu bơ̆n tơpling.

Lêwi 18:5

Thoi noh lu iĕm athei wei răk tơdrong juăt Inh păng nơ̆r Inh tơtă, bu mă pơm kiơ̆ tơdrong noh, sư gô arih, Inh boih Kră Yang.

Yo 14:6

Yêsu khan: “Inh boih trong iĕm năm tŏk tơ 'Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai 'noh ưh kơ truh tơ 'Bă Inh ôh.

Yo 17:3

Lu sư đei tơdrong arih ling-lang yua kơ lu sư lui kơ Ih Kră Yang 'Bă Tơm kơpal plĕnh păng băt kơ Inh Yêsu Krist mă Ih wơh jur tơ ala teh âu.

Jang 11:23

Lăp 'Barna'ba truh boih tơ Pơlei Antiôs, sư 'bôh 'Bok Kei-Dei tơgŭm lu sư tơpă. Na jơhngơ̆m 'Barna'ba chơt hiôk. Na 'Barna'ba pơlung lu sư khŏm khŏm wă kơ lu sư lui kơ Kră Yang Yêsu hăm đĭ jơhngơ̆m klơm klak lu sư kơdih.

Jang 17:25

Kră Yang 'Bok Kei-Dei ưh kơ kăl kơ bơ̆n tơgŭm Sư ôh yua kơ Sư boih ăn kơ bơ̆n arih păng ăn kơ bơ̆n đĭ-đăng tơmam bơ̆n kăl yua.

Jang 17:28

Tơdrong noh 'bok thây iĕm kư̆m chih mơ̆n sơ̆ khan: ‘'Bok Kei-Dei ăn kơ bơ̆n gơh arih gơh bơ̆jang.’ 'Bok thây iĕm kư̆m chih thoi âu: ‘Bơ̆n kư̆m kon 'Bok Kei-Dei mơ̆n.’

Rom 12:9

Bơ̆n 'mêm kơ bôl athei 'mêm mă tơpă, areh kơ tơdrong kơnê̆, athei adrin chă tơdrong 'lơ̆ng.

Galati 2:20

Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

Both 1:8

Inh jao ăn kơ iĕm dêh âu; mơ̆t păng iŏk oei bĕ, dêh mă Kră Yang đei pơkă ăn kơ lu 'bok lu iĕm Abraham, Isăk, Jakôp, hăm lu kon sâu sư.

Both 10:12

Ơ bơngai Isơrael, dang ei Kră Yang 'Bok Kei-Dei iĕm tơtă athei pơm kiơ? Athei băt hli yom kơ Kră Yang 'Bok Kei-Dei iĕm, yak kiơ̆ đĭ trong Sư, 'mêm kơ Sư păng bơ̆jang kơ Kră Yang 'Bok Kei-Dei iĕm hăm đĭ jơhngơ̆m, đĭ bơhngol iĕm,

Both 10:20

Iĕm athei băt hli yom kơ Kră Yang 'Bok Kei-Dei iĕm, bơ̆jang kơ Sư, oei kơjăp lăm Sư păng yua anăn Sư pơkă pơkăm.

Both 11:22

Tơdah lu iĕm kơchăng wei răk păng pơm kiơ̆ đĭ dôm nơ̆r tơtă, mă inh bơtho boih kơ lu iĕm athei, 'mêm kơ Kră Yang 'Bok Kei-Dei lu iĕm, yak kiơ̆ trong Sư păng oei pơgơ̆p kơjăp hăm Sư.

Both 11:9

Wă kơ lu iĕm arih sot tơ teh đak mă Kră Yang pơkă boih wă ăn kơ lu 'bok iĕm păng ăn kơ adrĕch adrung lu sư, teh đak toh păng đak sut.

Both 12:10

Mă-lei lu iĕm gô tŏk tơ pah to kơ Krong Jôrđăn, oei lăm dêh mă Kră Yang 'Bok Kei-Dei lu iĕm wă ăn bơ̆jang sa. Sư gô ăn hiôk hơđơ̆ng pơdơh, ưh pă đei lu ayăt wang dăr.

Both 30:16

Năr 'nâu inh athei iĕm 'mêm kơ Kră Yang 'Bok Kei-Dei, yak kiơ̆ trong Sư păng wei răk dôm lu nơ̆r tơtă, khôi juăt Sư păng nơ̆r Sư athei, wă kơ iĕm arih sot hrôh ngôh, Kră Yang 'Bok Kei-Dei ăn pŭn hiôk kơ lăm dêh char mă iĕm gô mơ̆t iŏk.

Both 30:6

Kră Yang 'Bok Kei-Dei gô ăn kơ bơ̆n păng kon sâu lu bơ̆n đei jơhngơ̆m rơmuăn băt chu yom, wă kơ iĕm đĭ jơhngơ̆m klơm klak 'mêm yom kơ Kră Yang 'Bok Kei-Dei, wă kơ gơh arih.

Both 31:1

Đơ̆ng noh Môis lĕch pơma nơ̆r 'nâu hăm đĭ-đăng lu bơngai Isơrael dôm lu nơ̆r tơ ala âu,

Both 32:47

'Nâu ưh kơ sĭ nơ̆r pơma ngôi đĕch, mă-lei noh jơ̆ tơdrong arih lu iĕm; kơplah gơnang kơ nơ̆r 'nâu, na lu iĕm gô oei arih sot tơ kơpal teh đak mă lu iĕm gô iŏk mưh iĕm tŏk hlôi kơ đak Krong Jôrđăn.

Both 4:1

Ơ Isơrael! Mơ̆ng bĕ khôi juăt păng nơ̆r tơtă mă inh gô pơhrăm lu iĕm, wă kơ lu iĕm gơh đei arih păng gơh mơ̆t tơ dêh mă Kră Yang 'Bok Kei-Dei 'bok lu iĕm wă ăn kơ lu iĕm iŏk.

Both 4:4

Bơngai bu oei kiơ̆ Kră Yang 'Bok Kei-Dei lu iĕm kơjăp, oei arih ngăl truh năr âu.

Both 4:40

Wei răk bĕ dôm lu khôi juăt păng nơ̆r tơtă đơ̆ng Sư, tơdrong mă inh bơtho boih kơ iĕm năr 'nâu, wă kơ iĕm păng kon sâu iĕm gơh đei hiôk-hian wă kơ lu iĕm oei arih sot lăm dêh Kră Yang 'Bok Kei-Dei iĕm ăn kơ iĕm ling-lang truh ning-mônh.

Both 4:6

Lu iĕm athei wei răk pơm kiơ̆ bĕ dôm lu nơ̆r tơtă păng khôi juăt âu; yua kơ noh jơ̆ tơdrong hơgei păng tơdrong hlôh wao lu iĕm 'bơ̆t anăp lu adrĕch adrung đe nai. Lu sư kơtơ̆ng gah khôi juăt âu, na lu sư khan: Lu kon pơlei âu jơ̆ minh adrĕch hơgei păng hlôh wao!

Both 5:16

Athei lui yom kơ mĕ 'bă ih, kiơ̆ thoi Kră Yang tơtă boih kơ ih wă kơ ih gơh arih sot păng đei tơdrong pŭn hiôk tơ kơpal teh âu mă Kră Yang 'Bok Kei-Dei ih ăn kơ ih.

Both 6:2

Wă kơ lu iĕm păng kon sâu iĕm băt kơ hli yom kơ Kră Yang 'Bok Kei-Dei iĕm, đĭ chăl arih tơ kơpal teh wei răk dôm lu tơdrong juăt păng nơ̆r Sư tơtă; wă kơ lu iĕm oei arih sot.

Both 6:5

Na lu iĕm athei đĭ jơhngơ̆m klơm klak, đĭ đon tơchĕng đĭ jơhngơ̆m pran 'mêm kơ Kră Yang 'Bok Kei-Dei iĕm.

Jôsuê 23:11

Mă-lei athei kơchăng hơđơ̆ng iŏk đon băt 'mêm kơ Kră Yang 'Bok Kei-Dei lu iĕm.

Jôsuê 23:8

Mă-lei iĕm athei tơ'bưh 'mêm kơ Kră Yang 'Bok Kei-Dei lu iĕm, trŏ thoi lu iĕm đei pơm boih đơ̆ng sơ̆ khơ̆ năr 'nâu.

Tơdrông Tơ'bôh 21:6

Na 'Bok Kei-Dei khan dơ̆ng kơ inh thoi âu: “Inh pơm tôm tơdrong keh boih. Inh thoi chư A, jĭ blŭng-a kơla chă adrol kơ đĭ-đăng lăm dôm tơdrong. Păng Inh kư̆m thoi chư Y, tuch-luch năr tôch kư̆m oei đei Inh. Thoi noh bu ol kơ đak, inh asong nhă đĕch đơ̆ng tu đak ăn kơ kon bơngai gơh arih ling-lang.

Tơdrông Tơ'bôh 22:1

Đơ̆ng noh linh jang 'lơ̆ng ei tơ'bôh dơ̆ng kơ inh đak krong mă ăn kơ kon bơngai arih. Đak krong ei hlăng chơchơr thoi getchai. Sư ro đơ̆ng tang-dŏ 'Bok Kei-Dei hăm Kon Triu.

Tơdrông Tơ'bôh 22:17

Yang Bơhngol 'Lơ̆ng hăm akăn Kon Triu bơtho khan kơ lu bơngai tam mă lui thoi âu: “Bu ol kơ đak nhă bĕ.” Na lu bơngai lui mă mơ̆ng đe đŏk hla bơar tơdrong âu, bĕ lu iĕm kư̆m wang chă bơtho đe thoi noh mơ̆n, khan: “Bu ol kơ đak nhă bĕ.” Năm bĕ bu ol kơ đak, nhă đak noh; đak noh gơh arih kon bơngai ling-lang, nhă đĕch ưh kơ răt ôh.