Both 18:22 - Sơ̆p Hlabơar Nơ̆r 'Bok Kei-Dei

²² Tơdah bơngai khan lê̆ adrol yua anăn Kră Yang na pơma, nơ̆r pơma bơngai noh ưh kơ đei truh păng ưh kơ đei pơsĭt 'blep trŏ, noh ưh kơ nơ̆r Kră Yang mă bơtho khan, bơngai khan lê̆ adrol pơma lĕch đơ̆ng tơdrong sư pơang. 'Nĕ hli kơ sư ôh.

Both 18:22 Iomraidhean Croise

I Pot 22:28

Mikai tơl: “Tơdah ih brŏk hiôk-hian lei Kră Yang ưh kơ yua nơ̆r inh pơma ôh.” Sư khan dơ̆ng: “Ơ rim 'nu kon pơlei pơla, iĕm athei 'blŏk nơ̆r inh pơma.”

II Pot 20:1

Lăm kơplah chăl noh, Hesekia jĭ dêh wă jê̆ lôch. Êsai bơngai khan lê̆ adrol kon drŏ-nglo Amôt năm ngôi lăng Hesekia păng khan: “Kră Yang khan thoi âu: Ih hơmet bĕ tơdrong jang hnam ih, yua kơ ih gô lôch, ih ưh kơ klaih đơ̆ng tơdrong jĭ 'nâu ôh.”

Tơdrông Pơđơk 26:2

Thoi sem rĕch păr tơ âu tơ to, Thoi sem pleng păr juang suang plơ̆ plĕch. Nơ̆r đe hiap tơdrong kơ đei huay kơ truh ôh.

Êsai 41:22

Lê̆ lu rup Yang roi dơ̆ng bĕ! Roi bĕ kơ lu nhôn tơdrong kiơ gô truh! Ră roi bĕ tơdrong blŭng-a sơ̆ sư đei lơliơ wă kơ nhôn lăng lăng păng hlôh kơ tơdrong tuch-luch sư thoi yơ, Athei roi kơ lu nhôn băt dôm tơdrong, kiơ gô truh ning-mônh.

Jôna 3:4

Năr mă mônh Jôna pơtơm mơ̆t lăm pơlei, na bơtho khan: Oei pă puăn-jĭt năr dơ̆ng, Niniwe gô pơchah!

Jôna 4:2

Sư krao khan kơ Kră Yang thoi âu: Ơ Kră Yang, noh hăm trŏ inh đei băt boih kơplah inh oei lăm dêh char nhôn sơ̆? Yua kơ noh na inh hăt hot kơdâu klĕnh tơ pơlei Tarisi. Yua kơ inh băt boih Ih jơ̆ Kră Yang 'Bok Kei-Dei iơ̆m dim, băt mơnat, hiơ̆ kơ hil, 'bĕnh hăm tơdrong 'mêm mơnat, ưh kơ wă pơrăm.

Sa 2:13

Dôm lu kon bơngai sĕch akar ngăn bĕ 'bơ̆t anăp Kră Yang; yua kơ Sư iung hơđơ̆r boih đơ̆ng anih 'lơ̆ng rơgoh Sư.”

Both 18:20

Tơdah đei bơngai khan lê̆ adrol đei jơhngơ̆m pơang yua anăn Inh pơma dôm tơdrong kiơ mă Inh ưh kơ athei sư pơma, dah yua anăn lu yang nai, na lu bơngai thoi noh trŏ kơ pơlôch.

Both 18:21

Lu iĕm pơma lăm jơhngơ̆m khan: Liơ lu nhôn gơh băt kơnăl nơ̆r ayơ mă đơ̆ng Kră Yang bơtho khan?

I Sam 3:19

Samuel wơ̆ 'lŏ gơh hơgei, Kră Yang oei hơdai sư: Kră Yang ưh kơ đei lê̆ minh nơ̆r hơyơ đơ̆ng Sư mă đei pơma boih. Sư gô pơm keh.