Both 17:7 - Sơ̆p Hlabơar Nơ̆r 'Bok Kei-Dei

⁷ Lu bơngai drơ̆ng athei yơ̆r ti adrol hloh pơlôch bơngai noh, pơtrơp đơ̆ng rŏng kơ noh ti lu kon pơlei. Thoi noh, gô pơlôch pơgoh lê̆ lu tơdrong kơnê̆ đơ̆ng lăm kon pơlei iĕm.

Both 17:7 Iomraidhean Croise

Lêwi 24:14

Chông ba bĕ bơngai mă hiap pơtê̆ lĕch tơ 'nguaih kơ gơđông, đĭ-đăng đe bu mă kơtơ̆ng sư athei dan ti lu sư 'bơ̆t kơ̆l bơngai noh păng ăn đĭ-đăng kon pơlei pơla klơ̆m pơlôch sư păng tơmo.

Yo 8:7

Lu đe ei nŏng jet Sư 'bơ'bel. Na Sư ngơk khan kơ lu đe ei thoi âu: “Lăm lu iĕm bơngai bu tam lah pơm yoch, iĕm ăn kơ sư klơ̆m duch 'noh păng tơmo hơdrol kơ lu bơngai mă pơm yoch.”

Both 13:10

Iĕm athei iŏk tơmo klơ̆m pơlôch sư, yua kơ sư chă đon pơhlŭ ih iĕm achăng lê̆ Kră Yang 'Bok Kei-Dei iĕm, Tơ'ngla chông iĕm lĕch đơ̆ng dêh Êyiptơ lĕch hlôi đơ̆ng pơm đĭch.

Both 13:5

Athei pơlôch bơngai khan lê̆ adrol dah bơngai juăt apo noh, yua kơ sư pơhlŭ pơtơm iĕm iung blah Kră Yang 'Bok Kei-Dei lu iĕm, Tơ'ngla mă chông ba lu iĕm lĕch đơ̆ng dêh Êyiptơ, dŏng pơklaih lu iĕm đơ̆ng pơm đĭch, bơngai noh kư̆m chă đon wă pơm kơ iĕm achăng lê̆ trong Kră Yang 'Bok Kei-Dei iĕm tơhlâu tơ'bôh ăn kơ iĕm trong wă rok kiơ̆, athei pơlôch lu bơngai pơm kơnê̆ wă tơhiong lê̆ tơdrong yoch đơ̆ng lăm lu iĕm.

Both 13:6

Tơdah đei 'nhŏng oh pôm mĕ 'bă, kon drŏ-nglo dah kon drŏ-kăn iĕm, akăn iĕm mă 'mêm kơeng, dah buăl juăt iĕm năm pơtơm pơhlŭ iĕm, khan: Bĕ bơ̆n năm kơkuh kơ yang nai, mă iĕm hăm lu 'bok iĕm kư̆m ưh tam băt,

Both 13:9

Mă-lei iĕm athei pơlôch sư hloi. Tơpang ti iĕm kơdih gô pơlôch sư adrol hloh kơ đĭ-đăng, đơ̆ng noh tơpang ti đĭ-đăng lu kon pơlei.

Both 17:12

Bơngai bu, ưh kơ chu kiơ̆ kơ 'bok soi dah 'bok sek tơlang oei bơ̆jang kơ Kră Yang 'Bok Kei-Dei iĕm, bơngai noh athei pơlôch. Iĕm athei sŭt pơgoh pă đei tơdrong kơnê̆ lăm Isơrael dơ̆ng.

Both 19:19

Lei ih athei pơm kơ sư thoi sư đei pơm kơ 'nhŏng oh sư; lu iĕm athei pơm rơgoh tơdrong yoch đơ̆ng lăm kon pơlei iĕm thoi noh.

Both 21:21

Đơ̆ng noh đĭ-đăng, lu drŏ-nglo lăm pơlei klơ̆m pơlôch sư păng tơmo; iĕm pơm rơgoh tơdrong kơnê̆ đơ̆ng lăm kon pơlei păng đĭ-đăng kon pơlei Isơrael gô kơtơ̆ng tơdrong noh na hli tơrơ.

Both 22:21

Lei lu kră pơlei athei chông ba drŏ-kăn noh truh 'bơ̆t 'măng hnam 'bă sư, kon pơlei gô klơ̆m pơlôch drŏ-kăn noh hăm tơmo, yua kơ bơngai drŏ-kăn noh đei pơm tơdrong yoch kơnê̆ lăm Isơrael. Pơm pơyô ngôi kư̆ kă adrol kơ chă klo, kơplah sư oei lăm hnam 'bă sư. Thoi noh. Lu iĕm gô pơm rơgoh hŭt lê̆ tơdrong yoch kơnê̆ đơ̆ng lăm lu iĕm.

Both 22:22

Tơdah đe rôp minh 'nu bơngai drŏ-nglo 'bĭch hơdai hăm akăn bơngai nai, đĭ măr sư noh đe gô pơlôch; thoi noh lu iĕm gô pơm rơgoh hŭt lê̆ tơdrong yoch kơnê̆ đơ̆ng lăm Isơrael.

Both 22:24

Lu iĕm athei chông ba đĭ 'bar 'nu bơngai noh lĕch năm 'bơ̆t 'măng jang pơlei, na iŏk tơmo klơ̆m pơlôch măr sư; bơngai drŏ-kăn glăi yua kơ ưh kơ đei ôr krao lăm pơlei dŏng sư, bơngai drŏ-nglo glăi yua kơ pơm yoch hăm akăn bơngai nai; iĕm gô pơm rơgoh hŭt lê̆ tơdrong yoch kơnê̆ đơ̆ng lăm lu kon pơlei iĕm.

Both 24:7

Tơdah đei bơngai bu rôp tơtông iŏk lu 'nhŏng oh iĕm bơngai Isơrael păng rôp pơm đĭch, dah rôp tĕch, lei bơngai tơtông noh athei pơlôch. Lu iĕm athei hơpuih pơgoh lê̆ tơdrong kơnê̆ đơ̆ng lăm lu iĕm.

Lu 20:13

Jao bĕ kơ lu nhôn lu bơngai kơnê̆ pơm kư̆ kă krưp dêh noh đơ̆ng lăm pơlei Gibêah, lê̆ lu nhôn pơlôch lu sư wă sŭt pơgoh đĭ tơdrong kơnê̆ noh đơ̆ng lăm bơngai Isơrael. Mă-lei lu bơngai Bênjamin ưh kơ đei wă mơ̆ng nơ̆r lu 'nhŏng lu sư, bơngai Isơrael athei.