Both 17:16 - Sơ̆p Hlabơar Nơ̆r 'Bok Kei-Dei

¹⁶ Mă-lei pơtao ei 'nĕ kơ mah hiơ̆k dêh wă kơ đei aseh lơ, wă chông ba kon pơlei brŏk hơlơ̆k dơ̆ng tơ dêh Êyiptơ chă aseh; đơ̆ng Kră Yang khan: Lu iĕm 'nĕ pă wih brŏk dơ̆ng trong noh.

Both 17:16 Iomraidhean Croise

II Sam 8:4

Pơtao Đawit rôp linh pơtao Sôba pơm bơnă minh-rơbâu tơpơh-hrĕng linh hao aseh, păng 'bar-jĭt rơbâu linh năm jơ̆ng, linh pơtao Sôba. Pơtao Đawit kư̆m koh lê̆ huan jon aseh păng aseh dui gre lê̆ kơ lu sư oei pă lăp kơ dui minh-hrĕng tŏ gre đĕch.

I Pot 1:5

Adonija kon yă Hagit, pôk atŏk sư kơdih khan: “Inh gô pơm pơtao” Sư chă hơmet kơ sư gre aseh lơlap păng chă bơngai hao gre aseh đei pơđăm-jĭt 'nu kơdâu adrol kơ sư.

I Pot 4:26

Sôlômôn đei puăn-jĭt rơbâu tŏ hơdrong aseh dui gre păng đei mơjĭt-'bar rơbâu lu linh chĕp gre aseh.

I Pot 5:6

Thoi noh na ih athei lu đĭch đam ih kăl tơgŭm inh 'long hơngo đơ̆ng char Liban, na inh kư̆m gô athei lu đĭch đam inh hai dai wang jang tơgŭm đĭch đam ih, inh gô apah lu đĭch đam ih gô mơ̆ng kơ đơ̆ng ih hơgăt, yua kơ ih kư̆m băt mơ̆n lu nhôn ưh kơ juăt kơ kăl 'long thoi lu kon pơlei Siđôn ôh.”

II Ho 1:16

Sôlômôn răt lơ aseh đơ̆ng dêh char Êyiptơ păng char Kue đơ̆ng lu bơngai mơdro kơ pơtao răt, 'long sư hơnơ̆ng kơ đe.

II Ho 9:25

Pơtao Sôlômôn đei puăn-rơbâu tŏ hơdrong aseh păng hnam tah gre aseh, kư̆m đei mơjĭt-'bar rơbâu aseh, tơ lăm lu pơlei tah gre aseh păng tah hơdai hăm sư tơ lăm pơlei tih Jêrusalem.

Horiso 20:7

Lu đe âu gơnang kơ gre, lu đe nai gơnang kơ aseh Mă-lei lu nhôn gơnang kơ anăn Kră Yang jơ̆ Kră Yang 'Bok Kei-Dei lu nhôn.

Le 13:17

Kơplah Pharaôn achăng kon pơlei Isơrael năm, Kră Yang 'Bok Kei-Dei ưh kơ đei chông ba kon pơlei noh năm rok trong gah dêh Philistin, noh trong jăl jê̆ hloh; yua kơ Kră Yang khan: Hli kơ kon pơlei tơ'bơ̆p tơdrong tơblah wang, lu sư wih brŏk hơlơ̆k đơ̆ng tơ dêh Êyiptơ.

Le 13:18

Lei na Kră Yang 'Bok Kei-Dei chông ba lu kon pơlei năm dăr rok kiơ̆ trong lăm char glă, gah Đak Dơsĭ 'Brê. Kon pơlei Isơrael chĕp khêl đao lĕch đơ̆ng dêh Êyiptơ.

Le 14:13

Môis drơ̆ng kon pơlei khan: 'Nĕ kơ hli ôh, oei mă kơjăp bĕ, na lăng lu iĕm gô 'bôh tơdrong dŏng pơklaih đơ̆ng Kră Yang năr âu, lu bơngai Êyiptơ mă lu iĕm 'bôh lu sư năr 'nâu, lu iĕm ưh pă đei layơ wă 'bôh lu sư dơ̆ng.

Êsai 2:7

Dêh char lu sư đei hu maih, păng mŭk tơmam gĭt ưh pă băt dôm yơ, dêh noh đei aseh lơ păng đei gre aseh lơ pă gơh jô̆.

Je 42:19

Kră Yang bơtho khan boih kơ lu iĕm, lu bơngai mă oei oei lăm dêh char Juđa: ‘'Nĕ kơ năm ôh tơ char Êyiptơ,’ lu iĕm băt boih năr 'nâu Inh đei roi tơbăt kơ lu iĕm,

Êsêkiên 17:15

Mă-lei pơtao dêh âu blah plơ̆ pơtao, wơh athei bơngai năm tơ char Êyiptơ wă apinh aseh, linh tơblah tơgŭm. Lu bơngai pơm thoi noh hăm kĕ jei ưh? Hăm gơh klaih hlôi ưh? Pơm thoi noh, lu bơngai mă pơrăm nơ̆r pơgơ̆p hăm gơh klaih ưh?

Hôsia 11:5

Lu sư ưh pă wih hơlơ̆k tơ dêh char Êyiptơ dơ̆ng, mă-lei bơngai Asiri gô pơm pơtao lu sư, yua kơ lu sư arăng kơ̆l ưh kơ wă wih brŏk tơ Inh.

Hôsia 14:3

Lu bơngai Asiri ưh kơ gơh pơklaih lu nhôn ôh; lu nhôn ưh pă hao aseh tơblah dơ̆ng, ưh pă khan dơ̆ng yang lu nhôn! Mă man hăm ti lu nhôn noh, yua kơ Ih đĕch mơnat kơ lu kon mơti.

Mi 5:10

Inh gô pơrăm đĭ lu pơlei tih lăm char lu iĕm păng Inh gô tơlơ̆ tŭk lê̆ lu kơđông kơjăp lu iĕm.

Both 28:68

Kră Yang gô chông ba iĕm hăm duk hơlơ̆k brŏk tơ dêh Êyiptơ dơ̆ng; mă khan Sư đei pơkă hăm lu iĕm ưh pă đei layơ wă wih brŏk tơ noh dơ̆ng; lu iĕm gô tĕch akâu iĕm kơ lu bơngai ayăt pơm đĭch, đĭ drŏ-nglo dah drŏ-kăn, mă-lei ưh kơ đei bu wă răt.

I Sam 8:11

na khan: 'Nâu tơdrong mă pơtao iĕm gô pơgơ̆r lu iĕm. Sư gô rôp kon drŏ-nglo iĕm pơm linh wă huơ̆r gre aseh sư, dah ăn hao aseh, mơ'nah yak jơ̆ng wă kơ năm tơblah adrol kơ gre sư.