Am 4:8 - Sơ̆p Hlabơar Nơ̆r 'Bok Kei-Dei

⁸ Thoi noh, bơngai lăm 'bar pêng tŏ pơlei tih năm tơ minh pôm pơlei chă đak wă nhă, mă-lei nhă ưh kơ hrăp ôh. Mă-lei lu iĕm kư̆m ưh kơ wă wih brŏk tơ inh 'mơ̆i, Kră Yang khan thoi noh.

Am 4:8 Iomraidhean Croise

I Pot 18:5

Ahap khan kơ Ôbadia: “Ih athei chă năm tơ jơ̆p-jang dêh char păng tơ rim kơ tu thong đak, rŏ lăng bơ̆n chă oei 'bôh đei 'nhĕt wă kơ hiĕm aseh oei arih, wă kơ lu sem dơrong huay kơ lôch hiong.”

Êsai 9:12

Mă-lei kon pơlei ưh kơ wih brŏk ôh tơ tơ'ngla mă teh pơjĭ lu sư, kư̆m ưh kơ chơchă Kră Yang Tih Hloh.

Je 23:14

Inh 'bôh lăm lu bơngai khan lê̆ adrol lăm pơlei Jêrusalem pơm tơdrong kơnê̆ dêh; Lu sư pơm pơyô kư̆ kă păng yak kiơ̆ trong hơlĕnh pơdăr; lu sư pơdrŭt bơngai pơm kơnê̆ rai dêh, na lu sư ưh pă đei bu 'maih lê̆ tơdrong kơnê̆. Inh lăng rim kơ lu sư thoi pơlei Sôđôm, păng kon pơlei Jêrusalem nhen thoi pơlei Gômôrơ.”

Je 3:3

Thoi noh na Inh pơgăn lê̆ đak 'mi, đak 'mi kư̆m pă đei lăm bơyan rei pơtăm. Lei ră ih ưh kơ đei mơlâu pơm 'mơng thoi drŏ-kăn ngôi kư̆ kă.

Je 3:7

Inh ngeh khan đơ̆ng rŏng kơ sư pơm đĭ dôm tơdrong noh sư gô wih tơ Inh. Mă-lei sư ưh kơ wih. Oh drŏ-kăn 'blal sư noh Juđa, 'bôh boih.

Je 5:3

Ơ Kră Yang! Hăm trŏ kơ măt Ih chă lăng jơhngơ̆m tơpăt sĭt? Ih teh boih lu sư, lu sư ưh kơ băt jĭ, ih pơrăm lu sư boih, mă-lei lu sư oei kơchu kơ tơdrong Ih teh bơtho noh. Lu sư pơrơ̆ng pơm kơ muh măt lu sư arăng hơrăk thoi tơmo. Lu sư ưh kơ wă tơbral tơdrong yoch.

Hôsia 11:5

Lu sư ưh pă wih hơlơ̆k tơ dêh char Êyiptơ dơ̆ng, mă-lei bơngai Asiri gô pơm pơtao lu sư, yua kơ lu sư arăng kơ̆l ưh kơ wă wih brŏk tơ Inh.

Hôsia 7:10

Tơdrong pơang lu bơngai Isơrael pơdah tơbăt boih 'bơ̆t anăp lu sư kơdih, lu sư đei tơ'bơ̆p dôm tơdrong noh ră, mă-lei lu sư ưh kơ wă wih brŏk tơ Kră Yang 'Bok Kei-Dei lu sư kơdih, păng kư̆m ưh kơ chơchă Kră Yang.

Am 4:6

Bê̆ gah inh, inh ăn boih pơngot rơwĕt tơ lăm rim pơlei lu iĕm păng pơm ăn tơpŭng sa ưh kơmah, tơ lăm rim anih lu iĕm oei. Mă-lei ră lu iĕm kư̆m ưh kơ wă wih brŏk tơ inh! Kră Yang khan thoi noh.

Mi 6:14

Lu iĕm gô sa, mă-lei ưh kơ phĭ ôh; klak lu iĕm kư̆m oei pơngot. Dôm tơmam mă lu iĕm 'măn mong răk đunh kư̆m ưh kơ gơh dŏng ôh. Tơmam kiơ mă lu iĕm đei 'măn mong Inh gô pơjao kơ đao gưm.

Hagai 1:6

Lu iĕm rei lơ mă-lei kĕch iŏk tŏ sĕt; sŏng sa ră mă-lei ưh kơ phĭ; nhă ră mă-lei ưh kơ hrăp; hrŭk mă ưh kơ tơtŏ. Păng lu mơ'nah jang chă jên; mong jên sư kơdih noh lăm kơdŭng hlôh.’

Hagai 2:17

Inh ăn boih phang-ang, tơngiĕt 'mi prĕl wă pơrăm lu iĕm, lu tơmam đơ̆ng ti iĕm jang mă-lei iĕm ưh kơ wă wih tơ Inh. Kră Yang khan thoi noh.