Zozie 4:11 - NYANMIƐN NDƐ'N 1998

¹¹ Kɛ be kwlaa be fuli cenje'n su'n, Nyanmiɛn nyrun jranfuɛ nga be sua Nyanmiɛn i alaka'n, be sin ko fali mmua'n ekun.

Zozie 4:11 Iomraidhean Croise

Ezai 52:12

Nán amun kpli fite, nán man ɔ yo kɛ amun su wanndi sa. Afin Anannganman ´dun mmua amun nyrun! Izraɛl Nyanmiɛn'n ɔ ´ka amún sin lɔ ɔ ´sasa amun.

Zozie 24:11

Amun kpɛli Zurdɛn'n be bali Zeriko. Zerikofuɛ'm be nin amun kunnin. Amɔrfuɛ nin Ferezfuɛ, nin Kanaanfuɛ, nin Ɛtfuɛ, nin Girgazfuɛ, nin Evfuɛ, ɔ nin Zɛbisfuɛ mun be kusu be nin amun kunnin. N fali be kwlaa m mannin amun.

Zozie 3:17

Kɛ nzrafuɛ'm be ´sin'n, wuun Nyanmiɛn nyrun jranfuɛ nga be sua Nyanmiɛn i alaka'n be jin Zurdɛn'n i afiɛn aunnyan siɛ'n su, b'a keje-man be wun lele san sran'm be kwlaa be sinnin.

Zozie 3:8

Se Nyanmiɛn nyrun jranfuɛ nga be sua min alaka'n be kɛ, kɛ be ko jra Zurdɛn nun cɛ'n, be `jran nun lɛ.»

Zozie 4:10

Nyanmiɛn nyrun jranfuɛ nga be sua Nyanmiɛn i alaka'n, be jrannin Zurdɛn ba'n i afiɛn lele san ndɛ nga Anannganman fa wlali Zozie nuan kɛ ɔ `kan kle nzrafuɛ mun'n, be niannin i kwlaa su yoli. Ɔ man Zozie fali ndɛ nga Moiz kan kleli i'n su. Izraɛlfuɛ'm be kannin bé wun be kpɛli Zurdɛn'n.

Zozie 4:12

Ribɛn i akpasua'n, nin Gad i akpasua'n, nin Manase i akpasua bue'm be sonja'm be nin be alɛ ninnge mun be dun mmua Izraɛlfuɛ'm be nyrun be kpɛli Zurdɛn'n kɛ Moiz kan kleli be'n sa.

Zozie 4:18

Kɛ Nyanmiɛn nyrun jranfuɛ'm be fuli cenje'n cɛ'n, kpɛkuun yɛ Zurdɛn'n yi sinnin i osu-ɔ, ɔ su sonji kɛ laa'n sa.