Zozie 23:16 - NYANMIƐN NDƐ'N 1998

¹⁶ Sɛ amun yaci aenguɛ nga Anannganman nin amun trali'n i mmla'n, nan sɛ amun koto ninnge'm be bo nan amun sɔ be'n, Anannganman wa fa ya dan kpa amún wun. Ɔ su sisi-mɛn i bo, ɔ ´nunnun amun mɛn klanman ng'ɔ fa mannin amun yɛ'n nun.»

Zozie 23:16 Iomraidhean Croise

1 Famiɛn Mun 14:15

Anannganman ´bo Izraɛlfuɛ mun, kpɛkuun be ´usu kɛ ndɛma b'ɔ jin nzue nuan'n ɔ keje'n sa. Anannganman ´tu Izraɛlfuɛ'm bé bo asiɛ klanman b'ɔ fa mannin bé si mun'n su. Ɔ ´fa be ko gua nzue'n i bue kun lɔ, afin be takali waka nga be sɔ be'n be fa klɔklɔli i.

1 Famiɛn Mun 9:6

sanngɛ sɛ amun nin amun osu'n nunfuɛ mun amun kaci amún sin si min'n, sɛ amu'an fa-man min mmla fanunfanun nga n fa mannin amun'n be su'n, sɛ amun ko tu amuɛn'n nan amun kotokoto bé bo'n,

1 Famiɛn Mun 9:7

i liɛ'n, n ´kan amun bo mɛn nga n fa mannin amun'n i nun, yɛ sua nga n fali min dunman sieli su'n, n su bu-mɛn i like fi kun, kpɛkuun nvle'm be nunfuɛ'm be kwlaa be ´yo amun finfin, be ´srisri amun.

2 Famiɛn Mun 17:7

Sa ti bɔ nyrɛnnɛn tɔli Izraɛlfuɛ'm be su'n, yɛlɛ kɛ be fɔnnin Anannganman be Nyanmiɛn'n i wun. Yɛ be sɔli amuɛn wie mun, sanngɛ wuun i fanngan nun yɛ man be fin Ezipt famiɛn'n i sa nun fiteli-ɔ. I yɛ ɔ ko fali be Ezipt mɛn'n nun lɔ bali-ɔ.

2 Famiɛn Mun 24:20

Sa ti bɔ sa kekle'm be tɔli Zerizalɛmfuɛ mun nin Zidafuɛ'm be su'n yɛlɛ kɛ Anannganman fali ya dan kpa. Ɔ man ɔ fuannin be, ɔ klo-man kɛ ɔ wun be kun. Sedesias jasoli Babilɔni famiɛn'n wun.

Ezai 24:5

Sran nga be o asiɛ'n su'n be sacili i yɛlɛ kɛ be tɔnnin mmla'n, be kpɛli ndɛ nga be kan kleli be'n i wun, aenguɛ nga Anannganman nin be trali'n, b'ɔ ti blɛ'n kwlaa nun liɛ'n, b'a fɛ-mɛn i mmla'n su .

Zeremi 32:23

Be wa fali mɛn sɔ'n, sanngɛ kpɛkuun b'a tie-man wɔ aniɛn'n. B'a nian-man ɔ mmla'n su b'a nanti-man, like nga ɔ waan be yo'n, b'a yo-man. I sɔ'n ti yɛ man a fali nyrɛnnɛn nga kwlakwla yili be su nin-ɔn.

Zeremi 32:24

Be nga be bali klɔ'n i falɛ'n, be yɛ be ´kplɛn i wun kpata'n be ´ba lɛ. Be su wa fa klɔ'n. Be ´fa alɛ, nin awe, ɔ nin tukpacɛ b'ɔ sa ndɛndɛ'n be ´fa fa klɔ'n, ndɛ nga a kannin'n yɛ ɔ'a ju yɛ ɔ bɔbɔ ɔ́ nyin ta nun yɛ.›

Kalɛ 33:56

Kpɛkuun nyrɛnnɛn nga n waan n ´fa kle be'n, amun yɛ n wa fa kle amun-ɔn.»

Mmla'n 17:3

Atrɛkpa-a, ɔ ko sɔ amuɛn wie mun, ɔ ´koto bé bo, annzɛ ɔ ´koto wia, annzɛ anglo, annzɛ nzraama'm bé bo. Nán nga Anannganman kan kleli amun kɛ amun yo'n yɛ ɔ o lɛ-ɔ.

Mmla'n 28:15

Sɛ kusu amu'an ti-man Anannganman amun Nyanmiɛn'n i aniɛn'n, sɛ amu'an fɛ-mɛn i mmla nga n ´fa man amun ndɛ yɛ'n bé su'n, sɛ amu'an nian-man be su b'a nanti-man'n, nyrɛnnɛn sa ng'ɔ wa ´ju amún su'n yɛ:

Mmla'n 6:15

Afin Anannganman amun Nyanmiɛn b'ɔ nin amun wo nun'n, ɔ ti Nyanmiɛn kun b'ɔ si kwla. Sɛ amun yo nan Anannganman amun Nyanmiɛn'n fa ya'n, ɔ ´nunnun amun asiɛ'n su.

Jɔlɛ Difuɛ Mun 2:14

Yɛ Anannganman ɔ wa fali ya dan kpa Izraɛlfuɛ'm bé wun nan ɔ'a man ninnge fɛnfuɛ'm be atin kɛ be `fɛn bé bo ninnge mun. Ɔ yoli man b'a kwla jran-man be kpɔfuɛ nga be mantan be lɛ'n be nyrun kun.

Jɔlɛ Difuɛ Mun 2:20

Anannganman wa fali ya Izraɛlfuɛ'm bé wun nan ɔ'a se kɛ: «Kɛ bɔ sran nga'm be saci min aenguɛ nga e nin bé nannan mun e trali'n, bɔ b'a tie-man min aniɛn'n,

1 Samiɛl 12:25

Sɛ amun yo sa tɛ-ɔ, o ´nunnun amun nin amun famiɛn'n.»