Zozie 18:16 - NYANMIƐN NDƐ'N 1998

¹⁶ Kɛ ɔ fɛ i lɛ'n, ɔ jra oka nga i kongo yɛlɛ Inɔm kongo'n i bo ngua, ɔ sin Rɛfafuɛ'm be kongo'n i ti su nglo. Ɔ sin Inɔm kongo'n i nuan su Zɛbis kpɔlɛ'n i ngua lɔ kongo'n i afiɛn, kpɛkuun ɔ jra lele ju An-Rɔgɛl.

Zozie 18:16 Iomraidhean Croise

2 Samiɛl 17:17

Zonatan nin Asimaaz be sasa An-Rɔgɛl lɔ. Be kwla wlu-man klɔ'n nun lɔ. Afanniɛn bla kun yɛ ɔ ko kannin ndɛ'n kleli be-ɔ. Yɛ be kusu ɔ fata kɛ be ko kan be kle famiɛn David.

2 Samiɛl 5:18

Filistifuɛ'm be bali, be wa guali Rɛfafuɛ'm be kongo'n nun lɛ.

1 Famiɛn Mun 1:9

Le kun Adɔniza fali bua wie mun, nin nannin tola wie mun, ɔ nin nannin bɔ b'a kpɛ cro'n bɔ b'a lo kpa'n, ɔ ko kunnin be fa yili tɛ yɛbuɛ nga be flɛ i Yɛbuɛ Ng'ɔ Seli'n i wun lɔ, Ninnge Kpufuɛ'm be nzue'n i wun lɔ. Ɔ flɛli i niaan bɔ be ti i si i mma'm be ngba, ɔ nin Zida lɔ sran nga be ti i si i mantanfuɛ'm be ngba kɛ be wa di cɛn,

2 Famiɛn Mun 23:10

Zozias sacili Tɔfɛt b'ɔ o Inɔm i wa'n i lika b'ɔ o kongo'n nun lɔ'n, kɛ ɔ ´yo nan sran fi ɔ'a fa-man i wa bla annzɛ yasua ɔ'a yrɛ-mɛn i ɔ'a yi-man sraka ɔ'a man-man Mɔlɔk'n ti .

1 Be Nyoliɛ 14:9

Filistifuɛ'm be bali be wa guali Rɛfafuɛ'm be kongo'n nun lɛ.

2 Be Nyoliɛ 28:3

Ɔ yrali ansans fa yili sraka Inɔm i mma'm be kongo'n nun lɔ. Ɔ yoli nvle nga Anannganman fuannin be Izraɛlfuɛ'm be nyrun'n be tete ninnge'm be wie. Ɔ fɛli i mma mun yili tɛ. Be yrali be.

2 Be Nyoliɛ 33:6

Ɔ fɛli i mma mun yili tɛ Inɔm i wa'n i kongo'n nun lɔ. Be yrali be mlɔnmlɔnmlɔn. Ɔ yili wunnzue fanunfanun mun. Ɔ sieli sran mun yɛ be nin wunmiɛn mun be ijɔ-ɔ. Ɔ yoli sa sunman bɔ Anannganman klo-man be'n, ɔ fa be fɔkɔli i anwlɛn.

Ezai 30:33

Be trɔli sin kun ɔ'a cɛ. Famiɛn'n i bɔbɔ liɛ o nun. Sin sɔ'n i trɔwlɛ'n ti klukluklu, ɔ ti tɛtrɛ, yɛ ɔ ti kploun, be ´fa yie kpanngban kpa yɛ be ´trɔ-ɔ. Anannganman i bue nun kpukpuwa'n yɛ ɔ ´sɔ i nuan-an. Ɔ wa yo kɛ sufru kpanngban yɛ ɔ su jue sa.

Zeremi 19:11

«Anannganman b'ɔ sie mɛn wunmuan'n wan yoo: ‹M ´bo nvle nga nin klɔ nga kɛ be fa bo nzue sɛ'n sa. Be siesie be ekun-ɔn ɔ su yo-man ye. Tɔfɛt lɔ yɛ be wa sie fuɛn mun siɛn nin-ɔn, afin be su nyan-man lika uflɛ be sie-man be nun.

Zeremi 19:2

Nan `fin klɔ nun fite. A ´kɔ'n, sin Sɛ Bue Anuan'n nun. Kɔ Inɔm kongo'n i wun lɔ. A ju lɔ'n, n ´fa ndɛ n ´wla ɔ́ nuan yɛ a ´kan-an.

Zeremi 19:6

I sɔ'n ti Anannganman'n wan yoo: «Cɛn wie'n, be su flɛ-man lika nga Tɔfɛt annzɛ Inɔm kongo kun. Be wa flɛ i sran'm be nunnunlɛ kongo.

Zeremi 32:35

Be kplannin amuɛn Baal i sua Bɛn-Inɔm kongo'n nun yɛ be fa be mma bla nin be mma yasua mun be yi tɛ be man Mɔlɔk-ɔ. Kusu wuun m bɔbɔ min m'an se-man kɛ be yo i sɔ man min. I sɔ akunndan bɔbɔ nian ba-man mín ti nun le. Be yoli tete sa sɔ mun man Zidafuɛ'm be yoli sa tɛ.

Zozie 15:63

Zidafuɛ'm b'a kwla fuan-man Zɛbisfuɛ nga be tran Zerizalɛm lɛ'n. Ɔ man kɛ e ´se yɛ'n, be nin be yɛ be o klɔ'n su lɛ-ɔ.

Zozie 18:28

Sela, Elɛf, Zɛbisfuɛ mun be klɔ'n bɔ i dunman'n kun yɛlɛ Zerizalɛm'n, Gibea, ɔ nin Kirzat. Be ti klɔ dandan blu-nin-nnan. Klɔ kanngan nga be mantan be lɛ'n be uka su. I kwlaa ng'ɔ o lɛ'n yɛ ɔ ti Bɛnzamɛn i awlobo-awlobo'm be lika liɛ nin-ɔn.

Jɔlɛ Difuɛ Mun 1:21

Bɛnzamɛn i osu nun sran'm b'a fuan-man Zɛbisfuɛ nga be tran Zerizalɛm lɛ'n. Ɔ man lele ndɛ Zɛbisfuɛ'm be nin be yɛ be o Zerizalɛm lɛ-ɔ.

Jɔlɛ Difuɛ Mun 1:8

Kɛ Zida akpasua'n su sran'm be fɛli i lɛ'n, be ko tɔli Zerizalɛmfuɛ'm be su nan b'a fa klɔ'n. Be kunnin i nun sran'm be kwlaa nan b'a wɔ klɔ'n nun.

Jɔlɛ Difuɛ Mun 19:10

Bian'n waan: «Ndɛ liɛ'n n la-man kun.» Yɛ ɔ jaso ɔli-ɔ. Ɔ ko juli Zɛbis, Zerizalɛm yɛ be flɛ i sɔ-ɔ, ɔ nin i aflunmun nnyɔn be nin bé su trɔ'n, nin i soman'n yɛ be kɔ-ɔ.