Mmla'n 6:2 - NYANMIƐN NDƐ'N 1998

² I waan amun nin amun osu nunfuɛ mun amun `fa be kwlakwla be su titi lele fa ju amun wie cɛn, nan amun nguan nyanman'n ɔ'a yo tɛnndɛn.

Mmla'n 6:2 Iomraidhean Croise

Bo Bolɛ 18:19

M'an kpɛ i kɛ ɔ kan kle i mma mun nin be anunman nga be ´wu be'n be kɛ be `fa min atin'n su be nanti sɛsɛ, nan m'an yo like nga n kan kleli i kɛ n ´yo'n.»

Bo Bolɛ 22:12

Yɛ anz'n seli kɛ: «Nán ɔ́ sa'n kan ba'n, nán yo i sa fi, afin m'an wun kɛ ɔ́ nyin yi min sakpa. Kɛ n seli wɔ kɛ a fa ɔ́ wa ba kunngba cenje'n man min'n, w'a kaci-man ɔ́ nuan.»

1 Famiɛn Mun 8:40

Kɛ a ko yo sɔ'n, blɛ nga be wa di i lika nga a fa mannin e nannan mun'n i nun'n, bé nyin wa yi wɔ.

Zɔb I Nyrɛnnɛn Wunlɛ 28:28

Kpɛkuun ɔ seli klɔ sran'n kɛ: Be nyin bɔ yi Anannganman'n, yɛ be flɛ i ngwlɛlɛ nin-ɔn. Sa tɛ'n i atin'n su jasolɛ'n yɛ ɔ ti ngwlɛlɛ nin-ɔn.

Jue Mun 111:10

Be nyin b'ɔ yi Anannganman yɛ ɔ ti ngwlɛlɛ silɛ'n i bo bolɛ nin-ɔn. Be kwlaa nga be yo i sɔ'n, be lɛ akunndan ti-ɔ. I manmanlɛ wie-man mlɔnmlɔn le .

Jue Mun 128:1

Zerizalɛm kɔlɛ'n i su jue. Sran nga i nyin yi Anannganman'n, b'ɔ nanti i atin'n su'n, i liɛ su ti ye!

Jue Mun 91:16

M ´mɛn i nguan tɛnndɛn man i klun'n ´jɔ, ɔ ´wun i kɛ n ti i defuɛ.»

Ezipt Lɔ Tulɛ'n 20:12

Bu ɔ́ si nin ɔ nin be sran, kɛ ɔ ´yo nan ɔ nguan nyanman'n ɔ'a yo tɛnndɛn mɛn nga min Anannganman Nyanmiɛn n fa man wɔ'n i nun'n ti .

Ezipt Lɔ Tulɛ'n 20:20

Moiz tɛli bé su kɛ: «Nán srɛ kun amun. Nyanmiɛn waan ɔ ´sa amun nian, i ti yɛ ɔ mantannin amun-ɔn. Ɔ kunndɛ kɛ amún nyin yi i kɛ ɔ ´yo nan amu'an yo-man sa tɛ'n ti.»

Nyanndra Mun 16:6

Sɛ a ti sran kpa bɔ a di nanwlɛ'n, be yaci ɔ́ wun sa be cɛ wɔ. Sran nga i nyin yi Nyanmiɛn'n, ɔ klo-man sa tɛ yolɛ.

Nyanndra Mun 3:16

Ɔ man sran sɔ'n i nguan tɛnndɛn, yɛ ɔ mɛn i anyanbeun nin anyrunnyan.

Nyanndra Mun 9:11

Sɛ a ´cɛ asiɛ su-ɔ, ɔ fin min. Sɛ ɔ nguan nyanman'n ´yo tɛnndɛn-ɔn, ɔ fin min.

Akunndanfuɛ'n 12:13

E `sie é su e tie ndɛ'n kwlaa ng'ɔ o lɛ'm be atabo'n: man ɔ́ nyin yi Nyanmiɛn, yɛ nanti i mmla'm be su. Like ng'ɔ fata kɛ klɔ sran kwlakwla yo'n yɛ ɔ o lɛ-ɔ.

Zeremi 32:39

N ´yo man be akunndan'n ´yo kun. Be nantiwlɛ'n ´yo kun. Be ´sro min titi, ɔ man be nin be osu'n be ´nyan muae.

Ezekiɛl 20:19

N ti Anannganman amun Nyanmiɛn, amun `fa mín nuan su ndɛ'n su. Amún nian min mmla be su. Amun `nanti be su.

JÉSUS-CHRIST I DYASIN FE'N BO LUC KLELI'N 12:5

M ma kle amun sran nga bɔ yɛ an `sro i'n. An `sro Nyanmiɛn bɔ kɛ ɔ kun sran'n, ɔ kwla fɛ i yi nyrɛnnɛn lika nun'n, i yɛ an `sro i-ɔ.

Mmla'n 10:20

Amun `nyin yi Anannganman amun Nyanmiɛn'n, amun `su i, amun `fa amún wun `mɛntɛn i. Amun `fɛ i dunman yɛ amun fa ta nda-a.

Mmla'n 11:9

Amun `fa ndɛ sɔ'n be sie, nan amu'an cɛ mɛn nga Anannganman tali nda kɛ ɔ ´fa man amun nannan'm be nin be osu nunfuɛ mun'n nun. Mɛn sɔ'n i asiɛ'n ɔ yo like ye kpa. I kunngba'n ɔ ti nnɛn tawlɛ klanman.

Mmla'n 13:4

nán amun tie sran nga i waan ɔ ti Nyanmiɛn nuan ijɔfuɛ sɔ'n, annzɛ i ti'n wuun ase'n i ndɛ mun. Amun si kɛ Anannganman amun Nyanmiɛn'n yɛ ɔ su sa amun nian-an, sɛ amun klo i kpa kɛ ɔ fata'n sa o, sɛ amun fa amun wla'n kwlaa guɛ i su o, yɛ sɛ amun akunndan kwlaa o i su o.

Mmla'n 15:5

Sanngɛ ɔ fata kɛ amun ti Anannganman amun Nyanmiɛn'n i aniɛn, nan amun `fa mmla nga m ´man amun ndɛ yɛ'n be su.

Mmla'n 22:7

Sɛ ɔ waan a fɛ i mma mun'n, a ko fa be sanngɛ yaci be nin'n i nun man ɔ wɔ. Sɛ a yo sɔ'n, ɔ wun ɔ ´jɔ wɔ fɔuun yɛ ɔ nguan nyanman'n ɔ ´yo tɛnndɛn.

Mmla'n 30:19

Ndɛ nga n wa kan kle amun ndɛkɛn yɛ'n, nguan'n nin wie'n yɛ m'an ´fa sie amun nyrun lɛ-ɔ. Muae nin sa yalɛ'n yɛ m'an ´fa sie amun nyrun lɛ-ɔ. N bua-man ato. N kan nyanmiɛn nin asiɛ'n. Amun nin amun osu nunfuɛ mun, amun `fa nguan'n nan amun tran nguan nun.

Mmla'n 30:20

Amun `klo Anannganman amun Nyanmiɛn'n, amun `fɛ i nuan ndɛ'n su, amun `fa amún wun mɛntɛn i. I liɛ'n, amun ´kwla tran mɛn ng'ɔ tali amun nannan Abraam, nin Izaak, nin Zakɔb be nda kɛ ɔ ´fa man be'n i nun, yɛ amun ´cɛ.

Mmla'n 4:10

Nán amún wla fi cɛn nga amun jrannin Anannganman amun Nyanmiɛn'n i nyrun Orɛb lɔ'n i su. Ɔ seli min kɛ: «Flɛflɛ sran mun man be bla min wun wa. N ´kan ndɛ kle be nan be nyin ɔ'a yi min titi kɛ be o Kanaan asiɛ'n su wa'n. Be kusu ndɛ nga n kan'n, ɔ fata kɛ be fa kle be osu nunfuɛ mun.»

Mmla'n 4:40

Ɔ man i mmla nin i ndɛ bɔ n ´fa man amun yɛ'n, amun `fa bé su. I liɛ'n, amun nin amun osu nunfuɛ nga be wa jaso su'n, amun ´nyan ye, yɛ amun nguan nyanman'n ɔ ´yo tɛnndɛn mɛn nga Anannganman amun Nyanmiɛn'n ɔ'a fa man amun mlɔnmlɔn'n i nun.

Mmla'n 4:9

Sanngɛ amun `nian amún wun kpa cɛn kwlakwla kɛ ɔ ´yo nan amún wla ɔ'a fi-man sa nga amun bɔbɔ amun wunnin be'n ti. Nán man be fin amun akunndan nun fite le. Amun `fa kle amun mma mun nin amun anunman mun.

Mmla'n 5:16

Bu ɔ́ si nin ɔ́ nin be sran kɛ min Anannganman ɔ Nyanmiɛn'n n kan kleli wɔ'n sa, nan ɔ nguan nyanman'n ɔ'a yo tɛnndɛn nan ɔ wun ɔ'a jɔ wɔ fɔuun mɛn nga min Anannganman ɔ Nyanmiɛn'n fa man wɔ'n i nun'n ti.

Mmla'n 5:33

Amun `fa atin nga Anannganman amun Nyanmiɛn'n kleli amun'n su seiin nan amu'an wu-man, nan amun wun ɔ'a jɔ amun fɔuun, nan amun nguan nyanman'n ɔ'a yo tɛnndɛn mɛn nga amun wa fa'n nun.»

Mmla'n 6:1

«Mmla fanunfanun ng'ɔ o yɛ'n kwlaa Anannganman amun Nyanmiɛn'n waan n `kle amun nan sɛ amun ju mɛn nga amun su kɔ nun yɛ'n nun lɔ'n, amun `fa be su.

Mmla'n 6:24

I ti yɛ Anannganman waan e nian mmla sɔ'm bé su e nanti nin-ɔn. I waan e nyin `yi i Anannganman e Nyanmiɛn'n, nan e wun a jɔ e fɔuun cɛn'n kwlakwla, nan y'a tran nguan nun kɛ e fa o yɛ'n sa.

Mmla'n 6:7

Amun `fa kle amun mma mun, sɛ amun ti amun awlo lɔ, amun `kan, sɛ amun wo atin su amun su kɔ lika o, amun `kan, sɛ amun wa la o, sɛ amun tinnge o, amun `kan.

Zozie 4:24

Anannganman e Nyanmiɛn'n kunndɛ kɛ asiɛ'n su nvle'm be nunfuɛ mun be kwlaa be si kɛ i dan'n lɛ-man wunsu. Yɛ ɔ kunndɛ kɛ e nyin yi i tititi, i ti yɛ ɔ yoli sa sɔ nin-ɔn.»

1 Piɛr 1:17

An flɛ Nyanmiɛn b'ɔ nian-man sran nyrun yɛ ɔ di jɔlɛ'n, sanngɛ ndɛ sin yɛ ɔ jran di jɔlɛ'n, amun Si. I sɔ'n ti, kɛ an tɛ wo asiɛ'n su wa'n, an `yo sa ng'ɔ kle kɛ amún nyin yi i'n.