Mmla'n 26:6 - NYANMIƐN NDƐ'N 1998

⁶ Eziptfuɛ'm be kleli e yalɛ, be mianmiannin e. Be fali e yoli be kanga, be man e dili junman kekleekle mun.

Mmla'n 26:6 Iomraidhean Croise

Ezipt Lɔ Tulɛ'n 1:11

Eziptfuɛ'm be sieli Izraɛlfuɛ'm be su junman kpɛnngbɛn mun. Be waan be `man Izraɛlfuɛ'm be junman kekle man be di. Kɛ be yoli sɔ yɛ be fa kplannin Pitɔm nin Ramsɛs b'ɔ be ti Ezipt famiɛn'n i ninnge siewlɛ klɔ mun-ɔn.

Ezipt Lɔ Tulɛ'n 1:14

Junman'n i kekle b'ɔ yoli'n ti'n, Izraɛlfuɛ'm b'a wun-man be wun fɛ, afin be si fa, be kpɛ bliki, be di blo junman'n kwlakwla kpan. E `kpɛ kpo e `se kɛ be dili junman tɛtɛ'n kwlaa. B'a si-man be aunnvuɛ mlɔnmlɔn.

Ezipt Lɔ Tulɛ'n 1:16

Ezipt famiɛn'n wlali bé su nun kpa kɛ: «Blɛ bɔ amun ´uka Ebre bla mun be ´wu ba'n, amun `nian ba nga be wu i'n kpa. Sɛ ɔ ti yasua'n, amun `kun i, sɛ kusu ɔ ti bla'n, amun `yaci i lɛ.»

Ezipt Lɔ Tulɛ'n 1:22

Siɛn liɛ'n, Ezipt famiɛn wlali i nvlefuɛ'm be kwlaa be su nun kɛ: «Ebre'm be wa yasua nɔnman kwlaa nga be wu be'n, amun `to be gua Nil nzue'n nun lɔ, sanngɛ amun `yaci ba bla'm be lɛ.»

Ezipt Lɔ Tulɛ'n 1:8

Yɛ famiɛn uflɛ kun bɔ i liɛ'n ɔ'a si-man Zozɛf mlɔnmlɔn'n, ɔ wa jasoli su nan ɔ'a sie Ezipt mɛn'n.

Ezipt Lɔ Tulɛ'n 5:19

Izraɛlfuɛ nga be ti junman'n su kpɛnngbɛn kanngan'm be wunnin kɛ be su kle be nyrɛnnɛn, afin be seli be kɛ: «Be ti-man bliki'n su, bliki nuan kunngba nga amun kpɛ laa'n i su yɛ amun `kpɛ-ɔ.»

Ezipt Lɔ Tulɛ'n 5:23

Kɛ ɔ fin cɛn bɔ n ko kannin ndɛ nga ɔ waan n kan kle famiɛn'n, yɛ ɔ sɔli Izraɛlfuɛ'm be nyrɛnnɛn klelɛ-ɔ. Ɔ kusu a o lɛ, a de-man ɔ nvle'n.»

Ezipt Lɔ Tulɛ'n 5:9

Amun `man be junman kekleekle mun. Kɛ junman'n ti be'n, be su nyan-man blɛ bu-man ato ndɛ nga'm be akunndan kun.»

Kalɛ 20:15

Laa, e nannan'm be ko trannin Ezipt mɛn'n nun lɔ, e nvle'n cɛli lɔ kpa. Eziptfuɛ'm be yoli é nannan mun nin e bɔbɔ e tɛtɛ.

Mmla'n 26:7

Yɛ e kpan flɛli Anannganman e nannan'm be Nyanmiɛn'n. Anannganman kusu tili e aniɛn'n, ɔ wunnin afɛ nga e o nun'n, ɔ wunnin yalɛ nin nyrɛnnɛn bɔ be ´kle ye'n.

Mmla'n 4:20

Amun liɛ'n, Anannganman bɔbɔ ko fali amun nyrɛnnɛn dan nun Ezipt lɔ bali. I waan ɔ ´fa amun ´fa yo i nvle b'ɔ ti i liɛ klonglo kɛ amun fa ti ndɛ yɛ'n sa.