Mmla'n 2:7 - NYANMIƐN NDƐ'N 1998

⁷ Afin like nga amun yoli bɔ Anannganman amun Nyanmiɛn'n man ɔ'a yo-man ye'n ɔ nun-man lɛ. Ɔ niannin amun su aawlɛ flɛnnɛn dan nga i kpɛlɛ'n nun. Afuɛ ablanan nga amun dili'n nun'n, Anannganman amun Nyanmiɛn ɔ'a kpɔci-man amun le. Like fi ɔ'a mian-man amún sa.

Mmla'n 2:7 Iomraidhean Croise

Bo Bolɛ 12:2

N ´yo man ɔ osu'n wa yo nvle dan kun, n ´yo wɔ ye, n ´yo man ɔ dunman'n ´fu. Ɔ dunman nun ti n ´yo sran'm be ye.

Bo Bolɛ 24:35

Anannganman yoli man min min sɔ'n ɔ'a yo anyanbeunfuɛ. Ɔ mɛnnin i bua nin boli nin nannin, nin sika nin sika ɔkwlɛ, nin sran mun, yasua mun o, bla mun o, nin nyɔnngɔnmɛn mun, ɔ nin aflunmun mun.

Bo Bolɛ 26:12

Afuɛ sɔ'n nun'n, Izaak guali ble nin ɔrz kpɛkuun ɔ nyannin mma ng'ɔ luali'n i wunsu sɔ fa ya, afin Anannganman mɛnnin i muae.

Bo Bolɛ 30:27

Laban waan: «Mín sin ninnge'm be waan wɔ ti yɛ Anannganman yo man min ninnge'm be yo ye-ɔ. Ɔ man srɛlɛ yɛ n ´srɛ wɔ-ɔ,

Bo Bolɛ 39:3

Potifar wunnin kɛ Anannganman nin Zozɛf be o nun. Ɔ wunnin kɛ Zozɛf ti i sa nun ninnge'm be kwlaa be yo kpa kpan.

Bo Bolɛ 39:5

Kɛ Ezipt bian'n yoli sɔ'n, Anannganman kali lɛ yoli i awlo'n kpa Zozɛf ti. Anannganman yoli bian sɔ'n i ye i ninnge'm be kwlaa be nun, i awlo'n nun o, i fie'm be su o.

Neemi 9:21

A niannin be lika aawlɛ flɛnnɛn'n nun afuɛ ablanan. B'a mian-man like fi wun. Be tralɛ'm b'a titi-man, bé ja'm b'a wunwun-man.

Zɔb I Nyrɛnnɛn Wunlɛ 23:10

Sanngɛ ɔ si min ajalɛ nga n tu'n. Sa nianlɛ ng'ɔ su sa min nian yɛ, n ´fin nun n ´fite sa cɛ kɛ b'a wla sika ɔkwlɛ sin nun b'a yi sa .

Jue Mun 1:6

Anannganman nian sran ng'ɔ bu be sran kpa'n be atin nga be fa'n su. Klunwifuɛ'm be atin liɛ'n, ɔ fa be kɔ mlinlɛ nun.

Jue Mun 107:4

Be wlan daan aawlɛ flɛnnɛn'n nun, ɔ liɛ lika kee sɔ'n nun. Be wun-man atin nga be ko fa nan be ko ju kan sran tran lɛ nin-ɔn.

Jue Mun 31:7

Mín nyin ci be bɔ be fa bé wun man ninnge finfin kɛ amuɛn sa'n mun. Anannganman su yɛ mín wla'n ɔ wo-ɔ.

Jue Mun 90:17

Anannganman e Nyanmiɛn, yo man e wun kɛ a klo ye. Man e junman'm bé nuan ninnge'm be cɛ. Man e junman'm bé nuan ninnge'm be cɛ sakpa.

Ezipt Lɔ Tulɛ'n 16:35

Izraɛlfuɛ'm be dili mani'n lele afuɛ ablanan, nan b'a ju mɛn bɔ sran'm be tran nun'n i kun nun. Mani'n yɛ be dili lele nan b'a fa ju Kanaan mɛn'n i anyialiɛ'n su lɔ-ɔ.

Zeremi 2:2

«Ko se Zerizalɛmfuɛ'm be kɛ: ‹Anannganman'n waan: Mantanlɛ nga kɛ amun tɛ yo kɛ talua sa'n amun nin min mantannin'n, klolɛ nga amun fa kloli min kɛ be fa klo bla bɔ b'a jɛ i uflɛ sa'n b'ɔ man an suli min su aawlɛ flɛnnɛn, bɔ be kwla di-man nun fie'n i nun'n, mín wla o su.

Ndɛ Nga Nyanmiɛn I Nuan Ijɔfuɛ Oze Kannin'n 13:5

Blɛ bɔ amun o aawlɛ flɛnnɛn'n nun lɔ'n, bɔ amun o mɛn bɔ be nyan-man nzue nun'n nun lɔ'n, min yɛ n trali amun sa-a.

Amɔs 2:10

N fali amun Ezipt lɔ m bali. N ko sunmannin amun afuɛ ablanan aawlɛ flɛnnɛn'n nun lɔ lele nan m'an fa Amɔrfuɛ'm be mɛn'n m'an man amun.

Kalɛ 1:1

Kɛ Izraɛlfuɛ'm be tuli Ezipt lɔ'n, i afuɛ nnyɔn'n su i anglo nnyɔn su, i cɛn ba klikli'n su'n, Anannganman kannin ndɛ kleli Moiz Sinai aawlɛ flɛnnɛn'n nun lɔ tannin sua bɔ Nyanmiɛn yi i wun nglo nun'n i nun. Ɔ seli i kɛ:

Kalɛ 14:33

Yɛ amun mma'm be wa wlan-wlan aawlɛ flɛnnɛn'n nun sa daan lele afuɛ ablanan. Amún nyin kekle nga amun yoli'n, be yɛ be wa fɛ i su afɛ nin-ɔn. Ɔ ´yo sɔ lele san amun fuɛn'm be kwlaa be ´ka aawlɛ flɛnnɛn'n nun wa.

Kalɛ 14:34

Amun fali cɛn ba ablanan yɛ amun fa nian-niannin mɛn nin-ɔn. N kusu n ´fa afuɛ ablanan n ´fa tu amun fɔ, afuɛ kun afɛ'n ɔ ti cɛn kun nun nyin kekle'n i akatua. Kpɛkuun amun ´si kɛ sɛ bé nyin yi-man min'n ɔ ti like tɛ.

Kalɛ 22:12

Nyanmiɛn seli Balaam kɛ: «Nán a nin be wɔ. Nán bo nvle sɔ'n i sannzan afin m'an dun mmua m'an yo i nunfuɛ'm be ye.»

Kalɛ 32:13

Moiz kɛnnin i ekun kɛ: «Ya bɔ Anannganman fɛli i Izraɛlfuɛ'm bé wun'n ti ɔ miannin be man be dili aawlɛ flɛnnɛn'n nun lɔ afuɛ ablanan, lele san be nga be yoli nyin kekle i su'n be blɛ sufuɛ'm be kwlaa be wieli wu.

JÉSUS-CHRIST I DYASIN FE'N BO LUC KLELI'N 22:35

Yɛ ɔ seli be ekun kɛ: «?Kɛ n sunmannin amun bɔ n seli amun kɛ kɛ amun ´kɔ'n nán an fa pata, nin trɔ, ɔ nin ngbabua'n, amún sa miannin like wie wun?» Yɛ be waan: «E sa ɔ'a mian-man like fi wun.»

Jean 10:27

M bua'm be ti min nɛn, n si be, yɛ be su n su.

Mmla'n 1:19

«I sin e jasoli Orɛb lɔ, e nantili aawlɛ flɛnnɛn dan sroesroe nga amun wunnin i lɛ'n nun, e fali Amɔrfuɛ'm be oka'n i wun lɔ atin'n kɛ Anannganman e Nyanmiɛn'n kan kleli ye'n sa. Yɛ e juli Kadɛs-Barnea lɔ-ɔ.

Mmla'n 1:46

Amun trannin Kadɛs lɛ cɛli lɛ lɔuun kpa.

Mmla'n 2:14

Kɛ e fɛli i Kadɛs-Barnea lɔ bɔ e ´fa kpɛ Zerɛd nzue ba'n, e dili afuɛ ablasan-nin-mɔcuɛ. Kɛ ɔ ´ju sɔ'n, wuun alɛ kunfuɛ nga be o lɛ i sɔ blɛ'n nun'n be akpasua liɛ'n ɔ'a wie kɛ Anannganman kan kleli be'n sa .

Mmla'n 2:6

Aliɛ nga amun ko di'n, amun ´yi sika be ´to nan amu'an di. Nzue nga amun ko nɔn'n bɔbɔ, amun ´yi sika be ´to i bé sa nun nan amu'an nɔn.› »

Mmla'n 29:4

Ɔ dunnin amun nyrun mmua aawlɛ flɛnnɛn'n nun, amun tralɛ'm b'a titi-man amún wun, amun ngbabua'm b'a kpɛkpɛ-man amun ja bo.

Mmla'n 29:5

Amu'an di-man kpaun, amu'an nɔn-man nzan nin nzan kekle. Anannganman bɔbɔ niannin amun lika kɛ ɔ ´yo nan amu'an si kɛ i yɛ ɔ ti amun Nyanmiɛn'n ti.

Zozie 5:6

Izraɛlfuɛ'm be nantili aawlɛ flɛnnɛn'n nun afuɛ ablanan. Be kwlaa nga kɛ be fin Ezipt be ´ba'n, wuun b'a jran alɛ kunlɛ sɔ'n, kɛ afuɛ ablanan'n ´wie'n, wuun b'a wie wu nyin kekle bɔ be yoli i Anannganman su'n ti. I sɔ'n ti kusu ɔ tali be nda kɛ ɔ su ko man-man be atin kɛ be wun mɛn fɛfɛ ng'ɔ fua kleli be nannan mun kɛ ɔ ´fa man be'n .