Mmla'n 12:2 - NYANMIƐN NDƐ'N 1998

² Sran nga amun su ko fa be mɛn'n lɛ'n, be lika nga be sɔ be amuɛn nun'n, amun `bubu be kwlaa. Lika nga be o oka'm bé su o, nin kpɔlɛ'm bé su o, ɔ nin nga be o waka mɔnnɛn'm bé bo o, amun `bubu be.

Mmla'n 12:2 Iomraidhean Croise

1 Famiɛn Mun 14:23

Be kusu be kplannin sraka yiwlɛ lika nga be o kpɔlɛ'm be su mun. Be takali waka sran, ɔ nin Astarte waka nga be sɔ be kpɔlɛkpɔlɛ'm be kwlaa su, ɔ nin waka bɔ nnya o be su'n bé bo .

1 Famiɛn Mun 3:2

I blɛ sɔ nun'n, wuun be nian kplan-man sua be nian man-man Anannganman. Izraɛlfuɛ'm be yi be tɛ mun sraka yiwlɛ lika bɔ be o kpɔlɛ'm be su'n be su.

2 Famiɛn Mun 11:18

Nzrafuɛ'm be wluli Baal i sua'n nun lɔ, be bubuli sua'n, be buli i sraka yiwlɛ mun nin i nzɔliɛ nga be takali be'n, kpɛkuun be kunnin Matan b'ɔ ti Baal i nyrun jranfuɛ'n. Be kunnin i sraka yiwlɛ'm be nyrun lɛ. I sin Zɛozada b'ɔ ti Nyanmiɛn nyrun jranfuɛ'n sieli sran wie'm be kɛ be nian Anannganman i sua'n su.

2 Famiɛn Mun 16:4

Ɔ yili sraka sraka yiwlɛ lika bɔ be o kpɔlɛ'm be su'n be nun. Yɛ ɔ fali ansans ɔ yrɛli i lika sɔ'm be nun ekun. Ɔ yili sraka kunngba sɔ mun kpɔlɛ'm be su, ɔ nin waka bɔ nnya o be su'n be bo.

2 Famiɛn Mun 23:13

Sraka yiwlɛ lika'n bɔ be o Zerizalɛm ndɛnman'n, bɔ Salomɔn b'ɔ ti Izraɛl famiɛn'n kplannin be Olivie Oka'n su'n, Zozias sacili be. Salomɔn kplannin amuɛn sua sɔ mun mannin Astarte b'ɔ ti Sidɔnfuɛ'm be amuɛn'n, ɔ nin Kɛmɔs b'ɔ ti Moabfuɛ'm be amuɛn'n, ɔ nin Milkɔm b'ɔ ti Amɔnfuɛ'm be amuɛn'n. Amuɛn sɔ'm be kwlaa be ti tete like ngunmin.

Jue Mun 78:58

Be klɔklɔli Nyanmiɛn, yɛlɛ kɛ be fali be bɔ be si-man Nyanmiɛn'n be amuɛn sɔwlɛ mun yɛ be yili be sraka'm be nun-ɔn. Be sɔli waka sran mun be fa fɔkɔli i anwlɛn.

Ezipt Lɔ Tulɛ'n 23:24

Nán amun koto nvle sɔ'm be amuɛn'm be bo, nán an sɔ be. Nán amun nian be aeliɛ'm bé su yo wie. Amun `bubu be waka sran'm be nun, yɛ amun `saci yɛbuɛ nga be takali be'n mun.

Ezai 36:7

Wie nun-ɔn, amun wa se min kɛ: Anannganman e Nyanmiɛn'n i su yɛ e fa é wla'n gua-a. ?Nɛ́n i yɛ Ezekias bubuli i lika mun nin i sɔwlɛ mun nin-ɔn? ?Ezekias ɔ'a se-man Zidafuɛ mun nin Zerizalɛmfuɛ'm be kɛ san Nyanmiɛn sɔwlɛ ng'ɔ o yɛ'n i kunngba i wun lɔ yɛ be su Anannganman-an ?›

Zeremi 17:2

Ɔ man be mma'm be wla su fi-man sraka yiwlɛ nin waka nga be taka be bɔ be sɔ be'n, nin waka nga be lɛ fɔnvɔ'n, ɔ nin kpɔlɛ kendenglein mun.

Zeremi 2:20

«Izraɛl nvle, a jasoli min wun nán ndɛ-ɔ. A kpɛli nyanman nga n fa wlali ɔ kɔmin'n nun ɔ'a cɛ. Ɔ fiteli ɔ́ nuan kɛ yoo: ‹N su-man wɔ kun.› Siɛn'n, kpɔlɛ kanngan'm be kwlaa'm be su waka nga be lɛ nnya'm be kwlaa be bo yɛ a la a bo tekle nin-ɔn.

Zeremi 3:13

Ɔ man i ti'n, di ɔ́ sa tɛ'n i nanwlɛ: Nyin kekle nga a yoli i min Anannganman ɔ Nyanmiɛn'n min su'n, kan. A wanndi ɔli nvle uflɛ'm be amuɛn'm bé sin, a ɔli waka nga be lɛ nnya'n be kwlaa be bo. W'a tie-man min aniɛn'n.› » Anannganman'n yɛ ɔ kan sɔ-ɔ.

Zeremi 3:2

Man ɔ́ nyin'n su, nian oka mun nian. ?Ninfan cɛ yɛ w'a fa-man ɔ́ wun a man-man-an? A trannin atin'n nuan yɛ a minndɛli ɔ sran mun kɛ kakajefuɛ mun sa. A fa ɔ tekle bolɛ'n nin wɔ aeliɛ tɛtɛ'n saci mɛn'n.

Zeremi 3:6

Famiɛn Zozias i blɛ su'n, Anannganman'n seli min kɛ: «?A wun sa nga Izraɛl b'ɔ ti kɛ bian safuɛ'n sa'n, ɔ yo'n? Ɔ lɛ-man oka kun ng'ɔ fu-man su-ɔ, ɔ lɛ-man waka b'ɔ lɛ nnya b'ɔ kɔ-mɛn i bo ko bo-man tekle-ɔ .

Ndɛ Nga Nyanmiɛn I Nuan Ijɔfuɛ Oze Kannin'n 4:13

Oka'm be su yɛ be yi tɛ mun-ɔn. Kpɔlɛ'm be su yɛ be yra ansans mun-ɔn. Waka kɛ sɛni, nin peplie, ɔ nin terebɛnt bɔ be lɛ fɔnvɔ klanman'n, be bo yɛ be gua-a. I sɔ nga lɛ'n ngba kwlaa ti yɛ man amun mma mmla'm be si tekle nin-ɔn, i ti yɛ amun sewi'm be kunndɛ be wiengu mun bé wun mun nin-ɔn.

Kalɛ 22:41

Kɛ aliɛ cɛnnin nglɛmun'n, Balak nin Balaam be fu ɔli Bamɔt Baal lɔ. Kan be o lɔ'n, bé nyin ta Izraɛlfuɛ'm be bue.

Mmla'n 7:5

Ng'ɔ fata kɛ amun yo'n yɛ: amun `bubu be amuɛn sɔwlɛ mun, amun `bubu be yɛbuɛ nga be takali mun'n, ɔ nin be ninnge nga be sɔ be mun'n, yɛ amun `yra be amuɛn mun.

Jɔlɛ Difuɛ Mun 2:2

Amun kusu n seli amun kɛ nán amun nin nvle nga i nun sran mun be tra aenguɛ. Amun `bubu be amuɛn sɔwlɛ mun. N seli amun sɔ, sanngɛ amu'an ti-man min aniɛn'n. ?Ɔ yoli sɛ ti yɛ amun yoli sɔ-ɔ ?