Mmla'n 10:2 - NYANMIƐN NDƐ'N 1998

² Mmla nga n klɛli i yɛbuɛ paplaapla klikli nga a bubuli be nun'n be su'n, n wa klɛ i kunngba sɔ'n yɛbuɛ nga a wa sɛ be lɛ'n bé su, kpɛkuun fa be sie alaka'n nun.»

Mmla'n 10:2 Iomraidhean Croise

1 Famiɛn Mun 8:9

Like ng'ɔ wo alaka nun'n, yɛlɛ yɛbuɛ paplaapla nnyɔn nga Moiz fali be sieli nun'n Orɛb lɔ'n. Be ngunmin cɛ yɛ be o nun-ɔn. Kɛ be fin Ezipt mɛn'n nun bali'n yɛ Anannganman fali yɛbuɛ paplaapla sɔ mun mannin be-ɔ. I blɛ sɔ'n nun yɛ Anannganman nin be trali aenguɛ nin-ɔn .

2 Be Nyoliɛ 5:10

Like ng'ɔ o alaka nun'n yɛlɛ yɛbuɛ paplaapla nnyɔn nga Moiz fali be sieli nun Orɛb lɔ'n. Be ngunmin cɛ yɛ be o nun-ɔn. Kɛ be fin Ezipt mɛn'n nun fiteli'n yɛ Anannganman fali yɛbuɛ paplaapla sɔ mun mannin be-ɔ. I blɛ sɔ'n nun yɛ Anannganman nin be trali aenguɛ nin-ɔn.

Ezipt Lɔ Tulɛ'n 32:19

Kɛ Moiz nin Zozie be mantannin ngblaliɛ'n, Moiz wunnin nannin ba'n nin nvlefuɛ mun bɔ be su si able'n. Ɔ fali ya dan kpa, nan ɔ'a tɛ yɛbuɛ paplaapla'm be ase ɔ'a bubu be nun oka'n i bo lɛ.

Ezipt Lɔ Tulɛ'n 34:1

Anannganman seli Moiz kɛ: «Sɛ yɛbuɛ paplaapla nnyɔn kɛ klikli liɛ'm be sa, yɛ n wa klɛ bé su ndɛ kunngba nga n fa klɛli klikli liɛ nga a bubuli be nun'n bé su'n.

Ezipt Lɔ Tulɛ'n 40:20

I sin Moiz fali yɛbuɛ paplaapla nga mmla blu'm be klɛ su'n wlɛli i Nyanmiɛn i alaka'n nun. Be fali waka floloflolo mun wlali alaka'n i sa'm be nun, yɛ be fɛli i su tre'n be katali su.

Mmla'n 10:5

Yɛ n fin oka'n su lɔ n jrali nan m'an fa yɛbuɛ paplaapla nnyɔn mun m'an sie be alaka'n nun. Be kali alaka'n nun lɛ kɛ Anannganman kan kleli min'n sa.

Mmla'n 4:13

Ɔ kannin aenguɛ nga ɔ nin amun trali'n i ndɛ kleli amun. I waan amun `nian su, nan amun `niɛn i mmla blu b'ɔ klɛli be yɛbuɛ paplaapla nnyɔn su'n be su `nanti.

Hébreu 9:4

Nyanmiɛn sɔwlɛ b'ɔ ti sika ɔkwlɛ'n, bɔ be yra ayre fannin su'n, ɔ nin Nyanmiɛn i alaka, bɔ be klo sika ɔkwlɛ guɛli i wun'n be o lɔ. Sika ɔkwlɛ sɛma'n bɔ mani'n wo nun'n, nin Aarɔn kpɔnman b'ɔ fɛfɛli'n, ɔ nin yɛbuɛ paplaapla bɔ be klɛ aenguɛ nga Nyanmiɛn waan ɔ nin sran'm be ´tra bé su'n, be wo alaka sɔ'n nun .