Exode 8:4 - UNIMBƆTI NYƆƆBUNDI GBƆŊKU

⁴ Faaroo yíiń Mooyiisi nì Aarɔn ní ki bí-bi yii: «Mèèmaan ni-Dindaan ú kúntí man nì m-nibul tiŋkin kpaabi. Boonee m làá yàntī Isirayeel yab ń nyā kí cùú ŋá saraabi kí tīī-u.»

Exode 8:4 Iomraidhean Croise

1 Rois 13:6

Niinee ní ubɔti bí Unimbɔti bɔnaatiliuee yii: «M gbàam̄-si, mèè ti-Dindaan a-Nimbɔtiu ú dū m-kpitii kí pɔ̄-mi kí cáaǹ m-ŋal kí tīī-mi.» Unimbɔti bɔnaatiliuee nìn mēē ti-Dindaan ní ubɔti ŋal fātìi ŋáŋkì ki gítì kii ŋu nín nìn bí puee.

Psaumes 107:40

Ti-Dindaan yāntì bi kíǹ ki kpèé abɔtibil fám. U yāntì ŋi tú ki yìiǹ kuteeu kun pu nsan kpée.

Exode 10:17

Ní gíti dū m-kpitii kí pɔ̄-mi min bí nee mun, kí mèè ni-Dindaan ni-Nimbɔtiu ú tí kàkatī ŋkúm tafadaaldi nee kí wàatī-mi.»

Exode 8:24

Ní Faaroo bí-bi yii: «M kíí kí yàntī ní cù kuteeu pu kí ŋá saraabi kí tīī ni-Dindaan ni-Nimbɔtiu, ama ní taa nyā kí cù ndan. Ní mèèmaan ni-Nimbɔtiu kí tīī-mi.»

Exode 8:3

Ní Eejipiti yab kpaŋkpantiibi mun ŋá bi-kpaŋkpantiiku ki nyántì kpaabi kí gbéeǹ Eejipiti tiŋki poon kii Aarɔn nín ŋá puee.

Exode 8:5

Ní Mooyiisi kíí-u yii: «Yóoń-mi ŋyunti ŋun a là ḿ dāá mèè kí tīī si nì a-kpambaliŋ nì a-nibulee, án nín làá ŋá pu ti-Dindaan ń kúntí kpaabi a-cee nì a-diiŋŋinee. Án làá pée kíń kpaabi bin kā Niil mɔɔlinee ŋmaniŋma ní.»

Exode 9:28

Mèèmaan ni-Dindaan, utaaja nì ataanyiŋkumbikpaan nì itaatantati ń gbèen̄. M làá yàntī ní nyā, maa làá ti tàan̄-ni.»

Esaïe 19:11

Soowan bɔtibiliŋ sá bigbaambi ŋma ní. Biciŋfitiibi bin sáŋkí Faarooyee kaa nyí tiba. Mana ní ni ŋūǹ kí tùkù Faaroo yii: «Ti sá biciŋfitiibi naantiibi, ti sá dooooyee bɔtiibi naantiibi ní?»

Esaïe 19:22

Ti-Dindaan làá dāá dáaĺ Eejipiti yab tafal. U làá dāá fáá-bi, ama ní kí cáaǹ-bi. Bi làá dāá fàtīí gítí ti-Dindaan cee, ní ú fōō bi-wimmeem kí cáaǹ-bi.

Esaïe 23:9

Ti-Dindaan Mpɔŋkɔdaan di sòon̄ ki yóoǹ míǹ, kí bīil̀ bin bi tìì jilmee lambil, kí sìntī kitiŋ nee pu nikpaambi taapu.

Nombres 21:7

Ní samaa un kíǹee sáǹ ki cūtìi ká Mooyiisi ki bí-u yii: «Ti nín sòon̄ ki bíil̀ ti-Dindaan nì siiyee, ti ŋá ikpiti. Míǹ puee gbàam̀ ti-Dindaan ú kàkatī ikoobu nee kí wàatī-ti.» Ní Mooyiisi mēē samaa pu.