Óo ti-Dindaan, inimbɔti kansikinee, ŋma di bí kii sii? Ŋma di bí kii sii ki bí circir ki jìl̀ yéè? A sá un tūǹ atuŋkpaanee ki máaǹ inyɔŋki, a ŋáań maamaacib!
Bi pūtì kpáàa dū nsan ŋun m dàkā-bee ki fá. Bi dūntì tikúti ki mɔ́ɔ́ dinabil, ki gbāaǹ di-nimbiin, ki ŋá-dì saraabi ki lī yii: <Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!»
«Nimbi m-nibul di sá man seeradambi. Ni sá m-tɔntɔnliibi bin ní m lēēyee ní. M là yii ní fōō-mi kí kíí, kí béé kí gbìl̄ yii man di sá Unimbɔti. Kí wàatī ḿ nīn bée, unimbɔti ubɔ nìn kpá, ní m-boonee ubɔ mun kaa làá ti nín̄ bí. Ti-Dindaan di lī míǹ.
«Dinyoondi ń taa kɔ́-ni, ní taa pée fàŋkìmaan! Maa pée sòon̄-tì ki lēē-tì ki dàkā-ni dooooyeeee? Nimbi di sá m-seeradambaa! Unimbɔti ubɔ gíti bí ki kútì man puɔɔɔ? Aayee, ni-taŋkpal din pɔ̄ɔ̄yee, maa ti nyí diba ki kútì man pu!
Ní taa nín̄ jòó ki pá awaa boon kí nīn jáaḿ-ŋi, kí taa gbàan̄ ŋi-nimbiin kí tòotī-ŋi. Ní taa mā àá kí kpítí awaa kí gbítí m-ŋuul. Mimmee maa làá ŋá-ni tikpitil tiba.
M túnní m-tɔntɔnliibi bibɔnaatiliibi ni-cee ŋfunyɔm kupaau kaa gbēeǹ bí tùkù-ni yii: <Báà ŋma ń dū u-saŋkiŋkpitil kí fá, kí ŋá min kítèe. Taa nín̄ jòó ki pámaan awaa boon ki tòotī-ŋi. Niinee ni làá ŋmā kí kàl̄ kitiŋ kin m tīī ni nì ni-naanjabee poon.> Ama naa kpōoǹ ni-tafal ní kaa nín pílifì.
Baaa! Ni yù, ki kù binib, ki ŋáań tilaakpaal, ki pùtī fám, ki tùutī talaalu ki tìì diwaal Baal, ki sáń ki pá awaa ŋin ni nì ŋi kaa cáá mpèé ŋubɔee boon.
Báà u yaa kaa làá fīī-ti, ubɔti, á béé yii timbi kaa làá tòotī a-waaŋaaa, kaa làá gbàan̄ kí jāam̀ sindaariya kumpool din a yāntì bi máń ki síiǹ nee mun.»
Niinee Yeesu bí-u yii: «Sitaan, sútí niin kí wàatī-mi! Kun puee an ŋmàn̄ Unimbɔti gbɔŋku poon yii: <Ti-Dindaan a-Nimbɔtiu baba ní an sá á jāam̀, kí nīn bí úǹ baba tundin.>»
Ni nín bālifì yii ni ŋūǹ kí ŋmɔ́ tiwaatootinanaaayee, ti nyí yii diwaal kaa sá tiba duulinya poon, míǹ ní báà unimbɔti ubɔ gíti kpá see Unimbɔtibaantee.
Timbee, ti cáá Unimbɔtibambaanti ní, úǹ di sá Ubaati un náań tikɔkɔee. Úǹ pu ní ti bí. Ní ti-Dindaan sá ubaanti, úǹ di sá Yeesu Kriisitoo. Úǹ pu ní tiwan kɔkɔ bí, u-pu ní ti mun bí.
Ní nīn nyí yii bin ŋáań tilaakpaal nì tin pée sá dijɔkɔntundee, nì bin cáá nnimbitaataamee: kun puee nnimbitaataam sá kii iwaatootee ní. An nibee kɔkɔ kaa làá dāá kɔ́ Kriisitoo nì Unimbɔti Beelin.
Tin dɔ̄ ki cí-bee di sá ditafadaaldi, kun puee bi nóó tin bi-pooŋŋi lèe, kaa nóó Unimbɔti. Tin kɔ̄ntí-bi icooyee di mɔ̄ǹ-bi, ní taapu doo wanti pu ní bi dàkafī.
Ubɔ ń taa ŋmàtiǹ-ni yii ni yīntì ni nín kaa là kí sìntī ni-ba taapu kí nīn jáaḿ Unimbɔti tuuŋyee. Di sá bi là kí lì yii bíǹ wāĺ ní. Ama baa máaǹ kí dàkà bi-ba kii bi nín yòontí bi-ba yilpu min nee, kun puee bi-landɔkɔi nyēeń bi-bimbikpitimin ní ki sá nniyaamin.
U lī mimmee ní m gbāaǹ kí jāam̀-u, ní u bí-mi yii: «Taa ŋée! Ma mun pée sá utɔntɔnli kii si nì a-nabiyaamu mun bí ki sòoǹ Yeesu bɔti tin u nyántì ki dàkā-nee ní. Unimbɔti ní a máaǹ kí jāam̀.» Kun puee Unimbɔti Fam nín yāntì Unimbɔti bɔnaatiliibi sòon̄ tiŋyee sòoǹ Yeesu pu ní.
Ní ŋu bí-mi yii: «Taa ŋée, kun puee ma mun sá utɔntɔnli kii sisee ní, kii a-nabiyaamu mun nàatī Unimbɔti bɔtee, nì bin kɔkɔ tɔ́ tibɔti tin bi ŋmàn̄ kugbɔŋu nee poonee ní. Unimbɔti ní an sá á jāam̀.»
