फिलिप्‍पि 3:19 - बान्‍तावा राई

¹⁹ आदेङ्‌माङ निनाम्‍हाङ्‌आ मोचि म़लुक्‍तुचि, अ़चुबुक मोचिओ अ़चुमाङ ओ, खोन्‍कि मोचि लेजो य़ङ्‌चि म़मुओदा तोक्‍पो म़लि, खोन्‍कि मोचिओ अ़चुमिन्‍मा हेन्‍खामादाओ य़ङ्‌चिदा याक्‌याङ।

फिलिप्‍पि 3:19 Iomraidhean Croise

मत्‍ति 16:23

मेन येसु म़हुसान्‍चिन्‌कि पत्रुस अ़लोवा, “सैताना! अ़ङ्‌बुदाङ्‌का खारालावा। खाना अ़ङ्‌लाम काछेक ओ। देकिनालो आम्‍मिन्‍मा निनाम्‍हाङ्‌दाङ्‌काओ माआङ, मेन म़नाएदाङ्‌काओ ओ।”

मत्‍ति 25:41

खोन्‍किना खोक्‍कोसाआ अ़चुओ बेङ्‌साङ्‌लिप्‍पाओ म़नाचि म़लोचि, ‘माङ्‌हिम्‍माय़ङ म़नाचि ओ! अ़ङ्‌काएदाङ्‌का माङ्‌सानिन। सैताना खोन्‍कि मोसोओ अ़काफाचिओ निम्‍पाङ चुम्‍सायुङ्‌साओ अ़लुक्‍निन्‌ओ मिदा खारानिन।

लुका 12:19

खोन्‍कि अ़ङ्‌का आप्‍पि लोङान्‍च़ङ, ब़द्‍धेकादोङ्‌तारि त़लात्‌ओ च़लोक चासुम, छेन्‍बि आम्‍को निकि भुङ्‌याङ। नुलोक युङा, चा, दुङा खोन्‍कि आम्‍ताकावा चुवा।’

लुका 16:19

येसुआ म़लोचि, “अ़क्‍छा कातोक म़ना युङाङा। मो अ़धुन अ़नुवाक तित हुम्‍साकि अ़लेन्‍खिन्‍तुम अ़ऩङानुनान्‍चिन्‍सा अ़ताकावा च़याङ्‌सा युङाङा।

लुका 18:4

मो छ़ङ्‌काछेन थोरेत्‌तारिना छुन्‍ता। मेन आदेङ मोसाआ अ़मिन्‍मादा आप्‍पि मित्‍तु, ‘अ़ङ्‌का निनाम्‍हाङ अ़कित्‍ऩङ, म़नाओ अ़छा साया अ़मेत्‍ऩङ।

रोमि 16:18

देकिनालो ओवाको म़नाचिआ आन्‍हाङ्‌पा ख्रिस्‍त ऩब़रुन, मेन खोचिओ अ़चुमित्‍मावा आप्‍पि म़ब़त्‍नान्‍चिन। मोचिओ चानुओ दोलेङ्‌वा य़ङ खोन्‍कि चानुओ य़ङ्‌चिआ सोत्‍सोत्‌वाओ म़नाचि म़धान्‍तुचि।

रोमि 6:21

मोन्‍ग़रि त़मुम्‌ओ य़ङ्‌चिदा आइमित आम्‍नुओ लेजो कात, मो य़ङ्‌चिदाङ्‌का खानानिन्‌आ दि त़तोक्‍तुम? मोसोओ अ़सिवा स़मा ओ।

१ कोरिन्‍थि 3:3

हान्‍छाङ खानानिन हेन्‍खामादाओवात्‍निङा त़मुन्‌येन, देकिनालो आम्‍नुओ रादा ऩङ्‌च़ खोन्‍कि खिमा युङ्‌याङ्‍ओसा दि खानानिन पोक्‌दाओ माआङ कि? दि खानानिन ओ हेन्‍खामादाओ म़नाओ अ़च़माथाङ्‌मावा काच़ मान्‍लित़दान कि?

१ कोरिन्‍थि 5:2

खानानिन ऱक्‍भाक त़मुन। खानानिन ना सोखा मुमा मान्‍दोत्‌याङ्‌ओ कि? ओवाको काचि कामु म़नाचि आम्‍नुओ यावायोक्‌दाङ्‌का लोइसाखाइसानुम्‍च़म।

१ कोरिन्‍थि 5:6

आम्‍नुओ ऱक्‍भाक अ़नुवाक माआङ। उन्‍नि खमिराआ झारा बुत्‍थ़ बोप होम्‍सुलोइसुनि दि खानानिन्‌आ त़सिन्‍तिमिन्‌येन?

२ कोरिन्‍थि 11:12

अ़ङ्‌का खाक्‍को काचि मुङ्‌योङ, मो मुङ्‌युङ्‌सुङ। खोन्‌ओसा तोक्‍पो लियाङ्‌सा अ़मुवाओ अ़चुकाचि आन्‍काओएनान अ़क्‍निवा मुयाङ्‌नि काय़ङ मो म़नाचिओ अ़चुय़ङ क़प्‍मा ऱङ्‌ने।

२ कोरिन्‍थि 11:15

खोन्‌ओसा ओ म़दोम्‍दाओ य़ङ माआङ, मोसोओ अ़हारुक्‌चिआछाङ साम्‌योक्‍मि म़नाचिओ अ़चुकात्‍मावात्‍नि म़फान्‍नान्‍चिन। मोचिओ अ़चुलुक्‍मा मोचिओ अ़चुकाचिवात्‍निङा लि।

गलाति 6:13

देकिनालो सिप्‍मायाम्‍बुन कामुचिछाङ य़ङ्‌हुप्‌वा ऩच़निन। मेन आम्‍नुओ पोक्‌ओ अ़तुक्‌वादा तोक्‍पो खोन्‍कि खानानिन अ़चुओ कात़ङ्‌चिनि य़ङ्‌माओ निम्‍पाङ खानानिन सिप्‍मायाम्‍बुन त़मुन्‍नेनि मोचि म़मिन।

फिलिप्‍पि 2:21

येसु ख्रिस्‍तओ अ़चुतुक्‌वादा मान्‍मिन्‍माङ, नि म़नाचि झारा आप्‍पि मित्‍मान्‍चिन म़लाम।

कलस्‍सि 3:2

निनाम्‍मादुओ य़ङ्‌चिओ अ़तुक्‌वादा मिन्‍मा पाक्‍तानुम, हेन्‍खामादाओ सामाचिदा माआङ।

२ थेसलोनिकि 1:9

मोचिआ अ़धुन अ़लुक्‍निन्‌ओ दन्‍दा अ़आङ, खोन्‍कि हाङ्‌पाओ अ़चुबुदाङ्‌का खोन्‍कि खोक्‍कोसोओ अ़चुसावाओ साम्‌दाङ्‌का म़लोइसुखाइसुचि।

२ थेसलोनिकि 2:12

खोन्‌ओसा अ़छ़ङ य़ङ्‌दा साकोङ्‌छ़ङ मान्‍मुमाङ मान्‍साम्‌योक्‍मिदा सेवाङ्‌नि कालि झाराकापाङ ह़त्‍मादा म़छुक।

२ थेसलोनिकि 2:8

खोन्‍किना य़ङ्‌हुप काभुङ्‌खान खाङ्‌मुनान्‍चिन, खोन्‍कि हाङ्‌पा येसु साम्‌एनान म़य़याङ्‌हिदा अ़चुदोदाओ अ़चुसाक्‍माआ मो अ़लुक।

१ तिमोथि 6:5

ओ म़नाचिआ अ़धुन खिखा अ़लोन। अ़चुओ मिन्‍मा अ़ओङ्‌सायुङ्‌सा, खोन्‍कि मोचिआ अ़छ़ङ देङ्‍अ़ह़त्‍तायुङ्‌सा। मोचिओ निम्‍पाङ साम्‌योक काचि ना दुप्‍खा लाम ओन्‍ङा ओनि म़मिन।

२ तिमोथि 3:4

काधान्‌चि, मान्‍मित्‍माङ कामु, तोक्‍पो कालि, निनाम्‍हाङ सोमातुक्‍माओ अ़फान्‌दा ऩङानुमा सोमाकातुक्‌चि,

याकुब 4:16

मेन खानानिन तोक्‍पो त़लिसिन्‌कि ऱक्‍भाक त़मुन, खोन्‍कि झारा ओवाको तोक्‍पो लिमा अ़अ़त्‍पा ओ।

२ पत्रुस 2:1

देत्‍नि म़नाचिओ अ़चुरादाछाङ सोज्‍जेओ निनाम्‍हाङ्‌य़ङ खाकालुचि म़युङाङा, मोवात्‍निङा आम्‍नुओ रादाछाङ सोज्‍जेओ काचिन्‍पाचि म़याक। मोचिआ मान्‍सिन्‍माङ सोज्‍जेओ लुक्‍खा ताया ऩचिन्‍तिन। ओदातारि हे तोक्‍पो अ़चुहाङ्‌पाछाङ मोचिआ ऩङाअ़छित, खोन्‍कि आप्‍पिएदा च़क्‍नि लुक्‍मा अ़तात।

२ पत्रुस 2:13

मोचिआ नि म़नाचि दुखा म़प़चिवात्‍नि मोचिआछाङ दुखा आङ्‌मादोत। मोचिओ अ़चुमिन्‍मादा अ़खोलेन्‌ङा कुक्‍भुक्‍नि चामा खोन्‍कि दुङ्‌मा अ़चुऩङानु। आम्‍नुओ रादा मोचि लेजो खोन्‍कि सायापेप्‍माय़ङ ओ। मोचि आम्‍नुओ यावायोक खाबाचादा चासि त़युङिन्‌हिदाछाङ धान्‍मा अ़चुऩङानु।

२ पत्रुस 2:3

च़क्‍ख़य़दा म़छुक्‌किना मो सोज्‍जेओ काचिन्‍पाचिआ सोज्‍जेओ य़ङ्‌चिलाम्‍पा आम्‍नुओ छेन्‍बि ऩच़न्‍तिन। मोचिओ अ़चुछ़ङ्‌छेन्‍मा निनाम्‍हाङ्‌आ अ़छ़ङ लिसायुङ्‌सा, खोन्‍कि मोचि अ़नुछ्‍याङा म़लुक।

यहुदा 1:10

मेन मोचिआ दि ऩतुप्‍तुन, मो य़ङ्‌चि म़सुङ्‌तुचि। मोचि अ़चुखारु मात्‍द़ङ्‌ओ सायाम्‍पोक्‌चिवात्‍नि म़मुयाङ, खोन्‍कि मोचि दि म़मिन, मोवात्‍निङा मोचि म़च़, खोन्‌ओसा मोचि म़लुक।

यहुदा 1:16

छुऩङ्‌वा कामु म़नाचि, काऱक्‌चि, अ़चुअ़त्‍लो मित्‍मादा काकोन्‌चि, ऱफोक्‌वा य़ङ काचेप्‌चि खोन्‍कि अ़चुओ तोक्‍माओ निम्‍पाङ नि म़नाचि वाकालेङ ओचिङा ओ।

यहुदा 1:4

मोचिआ तोक्‍मा दन्‍दाओ अ़तुक्‌वादा ना ब़द्‍धे बुयादाङ्‌काङा छाप्‍तायुङ्‌सा। खा-खाक्‍को म़नाचि मान्‍सिन्‍मान्‍तोक आम्‍नुओ रादा म़ताचिआयुङ्‌सा। मोचि निनाम्‍हाङ मान्‍ब़क्‍कादा म़नाचि ओ, मोचिआ आन्‍निनाम्‍हाङ्‌ओ अ़चुसोमातुक्‍मा ताङ्‌लान्‌दा अ़फान्‍तायुङ्‌सा। आन्‍को अ़क्‍छा ओन्‍ङा ओ आन्‍हाङ्‌काचि कामु खोन्‍कि हाङ्‌पा येसु ख्रिस्‍त ऩङाअ़छित। मोचिआ तोक्‍मा दन्‍दाओ अ़तुक्‌वादा ना ब़द्‍धे बुयादाङ्‌काङा छाप्‍तायुङ्‌सा।

खाङ्‌मुमा 18:7

मो देम साऩङ्‌वा आप्‍पि मेत्‍तान्‍चिन, देम ऩङ्‌नुखालोक्‍ताखा मो युङा खोन्‍ङा दुखा खोन्‍कि योक्‍मा पुवानुम। देकिनालो मोसाआ अ़मिन्‍मादा ऱक्‍भाक मु, ‘अ़ङ्‌का तोक्‍पो हाङ्‌मा लिसाङ्‌कि युङ्‌ङाङा, अ़ङ्‌का मेन्‍मित्‍मा माआङ, अ़ङ्‌का देम्‍खाछाङ सोखा मुमा अ़दोत्‍निन।’

खाङ्‌मुमा 19:20

खोन्‍कि मो साक्‍स़ङ खोन्‍कि मोसोओ अ़बुदा म़दोम्‍दाओ काचि कामु सोज्‍जेओ निनाम्‍हाङ्‌य़ङ खाकालु ह़वाङ्‌माङ लाप्‍खावा चाचि। ओ म़दोम्‍दाओ काचिचिलाम्‍पा मो सोज्‍जेओ निनाम्‍हाङ्‌य़ङ खालुवा मो साक्‍स़ङ्‌ओ अ़सेप्‍मा कापाक खोन्‍कि मोसोओ अ़सेम्‍पोक काब़क्‌चि म़प्‍तुचि। मोचि ह्‍वातात्‍माङ लेराङाओ गन्‍दक्‌ओ मिराक्‌दा अ़ह़ङ्‌ङा म़वेइसुदिसुचि।

खाङ्‌मुमा 21:8

मेन अ़चुक़मा काकात्‌चि, साकोङ्‌छ़ङ मान्‍मुकादाचि, चिप्‍माकात्‍तुओचि, म़ना कासेत्‌चि, पोप्‍कामुचि, म़क्‍फेङ कामुचि, सेम्‍पोक काब़क्‌चि खोन्‍कि म़ना काम़प्‌चि झारा मो म़नाचिओ अ़चुपाङ्‌यि लेत्‌याङ्‌ओ गन्‍दक्‌ओ मिराक्‌दा लि। ओ ह्‍वादुओदु स़मा ओ।”

खाङ्‌मुमा 22:15

मेन मो सहरा बुङ्‌खाया ना कुतिवाचि, म़क्‍फेङ कामुचि, पोप्‍कापोप कामुचि, म़ना कासेत्‌चि, सेम्‍पोक काब़क्‌चि खोन्‍कि सोज्‍जेओ ऩङाकानुचि खोन्‍कि मोवात्‍निङा काच़चि म़युङ।