१ तिमोथि 4:3 - बान्‍तावा राई

³ मोचिआ म़नाचि सायाकाम्‍मा ऩप़न्‍चिन, खोन्‍कि साकोङ्‌छ़ङ कामुचि खोन्‍कि अ़छ़ङ कासिन्‌चिआ आलाङ्‌एनान लोक्‍मादोत्‌ओ निनाम्‍हाङ्‌आ अ़मुयाओ चामायुदाङ्‌का अ़थाया युङ्‌म़मेत्‍तुचि।

१ तिमोथि 4:3 Iomraidhean Croise

मत्‍ति 14:19

खोन्‍किना येसुआ म़ना मुक्‍लाचि ल़क्‍ल़क्‍ल़क्‌वाओ नागिदा युङ्‌म़मेत्‍तुचि, खोन्‍कि मो पाच्‌कातात पेम्‍पाक्‌चि खोन्‍कि ह्‍वातात ङाचि अ़क़क्‍ताकि निनाम्‍मादुत्‍नि चोप्‌याङ्‌सा निनाम्‍हाङ आलाङ अ़पुवा, खोन्‍कि पेम्‍पाक्‌चि म़धाङ्‌सुचिकि अ़चुकाखेङ्‌पाचि म़प़चि, खोन्‍कि काखेङ्‌पाचिआ म़ना मुक्‍लाचि म़प़चि।

मत्‍ति 15:11

दि म़नाओ अ़दोदाङ्‌का वाङ, मो य़ङ्‌आ खो अ़पोप्‍तुन, मेन दि म़नाओ अ़दोदाङ्‌का बुङ्‌खादा लोन, मो य़ङ्‌आ खो पोप्‍तु।”

मत्‍ति 15:36

खोन्‍कि खोक्‍कोसाआ मो सात्‌कातात पेम्‍पाक खोन्‍कि ङा अ़क़क्‍ताकि निनाम्‍हाङ आलाङ अ़पुवा, खोन्‍कि मो पेम्‍पाक अ़धाङ्‌साकि अ़चुकाखेङ्‌पाचि म़प़चि। खोन्‍किना मोचिआ म़ना मुक्‍लाचि म़हात्‍तुचि।

लुका 24:30

खोन्‍किना येसु मोचिएनान चा-चासि म़युङाकि पेम्‍पाक अ़क़क्‍ताकि निनाम्‍हाङ आलाङ अ़पुवा, खोन्‍कि अ़धाङ्‌साकि मोचि म़प़चि।

छाम्‍माय़ङ 27:35

ओन य़ङाचिआकि खोसाआ पेम्‍पाक क़क्‍तु, खोन्‍कि झारासोओ अ़चुबुदा निनाम्‍हाङ आलाङ प़। खोन्‍कि धाङ्‌सुकिना चामा पुङ्‌सु।

रोमि 14:17

देकिनालो निनाम्‍हाङ्‌ओ अ़चुहाङ्‌होन चामा खोन्‍कि दुङ्‌माओ अ़तुक्‌वा माआङ, मेन सेङ्‌लावादा, साम्‌योक्‍मि तोक्‍मायु, सेवाङ्‌नि खोन्‍कि ऩङानुमान्‍चिन्‌ओ।

रोमि 14:3

काचाआ मान्‍चाकादा म़ना अ़सुङ्‌तुन्‍ने, खोन्‍कि मान्‍चाकादाआ काचा छ़ङ्‍अ़छेन्‍तुन्‍ने। देकिनालो निनाम्‍हाङ्‌आ झारा म़लोउयुङ्‌सुचि।

रोमि 14:6

साङ्‌आ खाउ लेन अ़च़वाङ लेन्‌नि मित्‍तु, मोसाआ हाङ्‌पा साया मेत्‍माओ निम्‍पाङ मु। साङ्‌आ झारा चामायु चा, मोसाआ हाङ्‌पा साया मेत्‍माओ निम्‍पाङ चा, देकिनालो खोसाआ निनाम्‍हाङ आलाङ प़। साङ्‌आ अ़चान, खोसाआ निनाम्‍हाङ साया मेत्‍माओ निम्‍पाङ अ़चान खोन्‍कि निनाम्‍हाङ आलाङ प़।

१ कोरिन्‍थि 6:13

“चामायु बुक्‌ओ निम्‍पाङ ओ, बुक चामायुओ निम्‍पाङ ओ।” मेन निनाम्‍हाङ्‌आ ह्‍वातात्‍माङ म़लुक्‍तुचि। पोक ताङ्‌लान्‌ओ निम्‍पाङ माआङ, मेन हाङ्‌पाओ निम्‍पाङ ओ, खोन्‍कि हाङ्‌पा पोक्‌ओ निम्‍पाङ ओ।

१ कोरिन्‍थि 7:28

मेन खाना साया त़काम्‍सानुछाङ हेवा मान्‍मुत़युक। मोवात्‍निङा वारिसा सायाकाम्‌नुछाङ, हेवा अ़मुनिन। मेन साया काकाम्‌चि, ओ हेन्‍खामादा दुखा म़तोक खोन्‍कि अ़ङ्‌का खानानिन मो दुखाचिदाङ्‌का रात्‍मानि मिन्‍ङाङा।

१ कोरिन्‍थि 8:8

मेन चामायुआ आन्‍कान निनाम्‍हाङ्‌ओ अ़चुच़क्‌दा म़तात्‍निन्‍लानिन। आन्‍कान अ़चान्‍मिनुछाङ अ़त्‍लो अ़लिसिमिन, आन्‍कान चाम्‌नुछाङ नुलोक अ़लिसिमिन।

कलस्‍सि 2:16

खोन्‌ओसा चामादुङ्‌मा, माङ्‌लो चानुचाओ लेन माङ्‌लो अउसि माङ्‌लो सावातोम्‍खा-लेन्‌ओ अ़तुक्‌वादा खाक्‍कोछाङ म़नाआ खानानिन लाहि पाक्‍मा ऩतोक्‍तिमिन्‍ने।

कलस्‍सि 3:17

दे-दे त़य़ङिन, दे-दे त़च़न, मो झारा हाङ्‌पा येसुओ अ़चुऩङ्‌दा खोक्‍कोलाम्‍पा निनाम्‍हाङ पापा आलाङ प़याङ्‌सा मुवानुम।

१ तिमोथि 2:4

झारा म़नाचि म़लेन्‍ने, खोन्‍कि मोचि अ़छ़ङ चिन्‍माय़ङ्‌दा म़तानेनि खोक्‍को म़मिन।

१ तिमोथि 4:4

निनाम्‍हाङ्‌आ अ़मुयाओ झारा सामाचि अ़नुवाक म़मुयाङ, खोन्‍कि निनाम्‍हाङ आलाङ प़याङ्‌सा ओ लोउम्‌नालो दित्‍छाङ ऩङाछित्‍मा अ़दोत्‍निन।

१ तिमोथि 5:14

खोन्‌ओसा साथिकादोङ्‌दाङ्‌का अ़खुक्‌दाओ मेन्‍मित्‍माचि साया म़लाकाम्‍ने, छा म़तोक्‍ने, खोन्‍कि अ़चुखिम्‌चि म़खाचिनेनि अ़ङ्‌का यायोक प़ङ्‌च़ङ। मोवात्‍नि आन्‍ङेङ्‌चिआ आन्‍कान सुङ्‌मा अ़वाखाम ऩतोक्‍तुन।

हिब्रु 13:4

झारासाआ सायाकाम्‍माय़ङ साया मेत्‍मादोत खोन्‍कि खिम्‍हाङ्‌मा खिम्‍हाङ्‌पा सोम्‍कुवा मुकामु लिमादोत, देकिनालो काचान्‍चाचि खोन्‍कि ताङ्‌लान कामुचि निनाम्‍हाङ्‌आ छ़ङ म़छेन्‍तुचि।

हिब्रु 13:9

अ़खाला-खालाओ मान्‍सिन्‍माय़ङ्‌ओ चिन्‍माय़ङ्‌चिआ खानानिन ऩतित्‍तिन्‍खातिमिन्‍ने। देकिनालो चामायु दुङ्‌मायुओ य़ङ्‌हुप्‌आ माआङ, मेन निनाम्‍हाङ्‌ओ अ़चुसोमातुक्‍माआ साकोङ्‌वा छोलो मुमादा अ़नुवाक मु। चामायु दुङ्‌मायुओ य़ङ्‌हुप्‌आ मो य़ङ्‌हुप कात़ङ्‌चि नुलोक मान्‍मुयुक्‍तुचि।