फिलिप्पियन 3:15 - Bagheli Bible

¹⁵ एसे हमरे पंचन म से जेतने जने परमातिमा के ग्यान माहीं मजबूत बनिगे हँय, ऊँ पंचे इहइमेर के सोच-बिचार रक्खँय, पय अगर कउनव बात माहीं तोंहार दूसर मेर के सोच-बिचार हय, त ओहू काहीं परमातिमा तोंहईं स्पस्ट रूप से बताय देइहँय।

फिलिप्पियन 3:15 Iomraidhean Croise

मत्ती 5:48

एसे तूँ पंचे परिपूर्न बना, जइसन स्वरग माहीं रहँइ बाले तोंहार पिता परमातिमा परिपूर्न हें।”

लूका 11:13

एसे जब तूँ पंचे बुरे होइके, अपने लड़िकन काहीं नीक चीजँय देंइ जनते हया, त स्वरग माहीं रहँइ बाले तोंहार पिता परमातिमा, अपने मागँइ बालेन काहीं पबित्र आत्मा जरूर देइहँय।”

यूहन्ना 6:45

परमातिमा के सँदेस बतामँइ बालेन के किताबन माहीं लिखा हय, ‘ऊँ पंचे सगले जन परमातिमा के तरफ से सिखाए होइ हँय।’ जे कोऊ पिता परमातिमा से सुनिस अउर सिखिस ही, उआ हमरे लघे आबत हय।

यूहन्ना 7:17

अगर कोऊ परमातिमा के मरजी के मुताबिक चलँइ चाहय, त उआ इआ उपदेस के बारे माहीं जान जई, कि उआ परमातिमा के तरफ से आय, कि हम अपने कइती से देइत हएन।

रोमियन 15:1

एसे हमहीं पंचन काहीं, जउन बिसुआस माहीं मजबूत हएन, इआ चाही, कि जउन हमार पंचन के बिसुआसी भाई-बहिनी बिसुआस माहीं कमजोर हें, त उनखे कमजोरिन काहीं सही; इआ नहीं, कि अपने-आप काहीं खुसी करँइ भर माहीं लगे रही।

1 कुरिन्थियन 14:20

अउर हे भाई-बहिनिव, जइसन छोट बुदे लड़िकन के सोच-बिचार रहत हय, उआमेर तोंहार पंचन के सोच-बिचार न होंइ चाही; बुराई के खातिर छोट लड़िकन कि नाईं अनजान बना, पय तोंहार सोच-बिचार सयानन कि नाईं होय।

1 कुरिन्थियन 2:6

त जे कोऊ समझदार हें, उनहिन काहीं हम पंचे बुद्धी के बातँय सिखाइत हएन, अउर इआ बुद्धी इआ संसार के मनइन के बुद्धी न होय, अउर न त इआ संसार के नास होंइ बाले अधिकारिन के ग्यान आय।

गलातियन 5:10

अउर हम प्रभू के ऊपर तोंहरे पंचन के बारे माहीं भरोसा रक्खित हएन, कि तोंहार पंचन के उआ गलत सिच्छा काहीं मानँइ के बिचार न होई; पय जे कोऊ तोंहईं बहकामँइ के कोसिस करत हय, चाह उआ कोहू होई, परमातिमा से सजा पाई।

इफीसियन 1:17

हम प्राथना करा करित हएन, कि हमार पंचन के प्रभू यीसु मसीह के परमातिमा, तोंहईं समझँय के अउर दिब्य दरसन के अइसन आत्मा के सक्ती देंय, कि जउने तूँ पंचे ऊँ महिमावान परमपिता काहीं पहिचान सका।

कुलुस्सियन 1:28

जिनखर प्रचार कइके हम हरेक मनइन काहीं जताए देइत हएन, अउर अपने सगले ग्यान से हरेक मनइन काहीं सिखाइत हएन, कि जउने हम हरेक मनइन काहीं मसीह के सिच्छा माहीं, सिद्ध बनाइके परमातिमा के आँगे हाजिर करी।

कुलुस्सियन 4:12

अउर इपफ्रास जउन तोंहरे बीच म से मसीह यीसु के दास आहीं, तोंहईं पंचन काहीं नबस्कार कहत हें, अउर तोंहरे खातिर हमेसा इआ प्राथना करत हें, कि तूँ पंचे आत्मिक रूप से मजबूत होइजा, अउर पूरे बिसुआस के साथ परमातिमा के इच्छा काहीं जानिके ओमाहीं स्थिर रहा।

1 थिस्सलुनीकियन 4:9

पय आपस के भाईचारा के प्रेम के बारे माहीं, तोंहईं हमहीं अउर कुछू लिखँइ के जरूरत नहिं आय? काहेकि आपस माहीं प्रेम करब तूँ पंचे खुदय परमातिमा से सिखे हया।

2 तीमुथियुस 3:17

जउने परमातिमा के ऊपर बिसुआस करँइ बाले, बिसुआस माहीं मजबूत बनिके, हरेक भलाई के कामन के खातिर उपयोगी बन जाँय।

इब्रानियन 5:14

पय तूँ पंचे इआ जानिल्या, कि अनाज सयानन के खातिर आय, जिनहीं एतना अनुभव होत हय, कि नीक-नागा का आय, एखे बारे माहीं ऊँ पंचे निकहा से जानत हें।

1 यूहन्ना 2:5

पय जे कोऊ उनखे बचन के मुताबिक चलत हय, त ओखे जीबन माहीं सचमुच परमातिमा के प्रेम पूरी तरह से बना हय, एहिन से मालुम होत हय, कि हम पंचे उनखे बचन माहीं बने हएन।