फिलिप्पियन 2:8 - Bagheli Bible

⁸ अउर मनई के रूप माहीं पइदा होइके अपने-आप काहीं दीन किहिन, अउर इहाँ तक परमातिमा के हुकुमन काहीं मानिन, कि मउत काहीं अरथात क्रूस के मउत काहीं घलाय सहि लिहिन।

फिलिप्पियन 2:8 Iomraidhean Croise

मत्ती 17:2

अउर उहाँ उनखे अँगुअय यीसु के रूप बदलिगा, अउर उनखर मुँह सुरिज कि नाईं चमकँइ लाग, अउर उनखर ओन्हा उँजिआर कि नाईं उजर होइगा।

मत्ती 26:39

अउर पुनि यीसु थोरी क अउर आँगे जाइके अउर भुँइ माहीं मुँह झुकाइके, इआ प्राथना किहिन, कि “हे हमार पिता, अगर होइ सकय त इआ बड़ा भारी कस्ट हमसे दूर होइ जाय, तऊ जइसन हम चाहित हएन, उआमेर न होय, पय जइसन अपना चाहित हएन, उहयमेर होय।”

मत्ती 26:42

अउर यीसु पुनि दुसराय जाइके इआ प्राथना किहिन, कि “हे हमार पिता, अगर इआ बड़ा भारी दुख के प्याला हमरे सहे बिना नहीं हटि सकय, त अपना के इच्छा पूर होय।”

लूका 9:29

जब ऊँ प्राथना करत रहे हँय, तबहिनय यीसु के रूप बदलिगा, अउर उनखर ओन्हा उजर होइके चमकँइ लाग,

यूहन्ना 10:18

कोऊ ओही हमसे छड़ाबय नहीं, बलकिन हम ओही अपने मरजी से देइत हएन: काहेकि हमहीं ओही देंइ के अधिकार हय, अउर ओही लेऊँ के अधिकार हय: इआ हुकुम हमहीं हमरे पिता से मिला हय।”

यूहन्ना 14:31

पय इआ एसे होइ रहा हय, कि संसार के सगले मनई जान लेंय, कि हम पिता से प्रेम करित हएन, अउर जउनमेर पिता हमहीं हुकुम दिहिन हीं, हम उहयमेर करित हएन: उठा, इहाँ से हम पंचे चली।”

यूहन्ना 15:10

अगर तूँ पंचे हमरे हुकुमन काहीं पालन करिहा, त हमरे प्रेम माहीं बने रइहा: जइसा कि हम अपने पिता परमातिमा के हुकुमन काहीं पालन किहेन हय, अउर उनखे प्रेम माहीं बने रहित हएन।

यूहन्ना 4:34

यीसु उनसे कहिन, “हमार खाना इआ आय, कि हम अपने पठमँइ बाले के मरजी के मुताबिक चली, अउर उनखर काम पूर करी।

खास चेलन 8:33

उनखे दीनता के दसा माहीं उनखर न्याय नहीं होंइ पाबा, अउर उनखे समय के मनइन के बखान को करी? काहेकि धरती से उनखर प्रान उठाबा जात हय।”

रोमियन 5:19

जइसन एकठे मनई के हुकुम न मानँइ के कारन खुब मनई पापी ठहरें, उहयमेर एकठे मनई के हुकुम मानँइ के कारन खुब मनई परमातिमा के नजर माहीं निरदोस ठहरिहँय।

2 कुरिन्थियन 8:9

अउर तूँ पंचे हमरे पंचन के प्रभू यीसु मसीह के किरपा काहीं जनतेन हया, कि ऊँ केतना धनी रहे हँय, तऊ ऊँ तोंहरे पंचन के खातिर एसे कंगाल बनिगें, कि जउने तूँ पंचे उनखे कंगाल होंइ से धनी बन जा।

गलातियन 3:13

पय मसीह जउन हमरे पंचन के खातिर स्रापित बने हें, हमहीं मोल लइके मूसा के बिधान के सराप से छोड़ाइन हीं। जब मसीह क्रूस माहीं लटकाए गें, ऊँ हमरे पाप के सराप काहीं अपने ऊपर लइ लिहिन, काहेकि पबित्र सास्त्र माहीं इआ लिखा हय, कि “जे कोऊ कठबा माहीं लटकाबा जात हय, उआ स्रापित हय।”

तीतुस 2:14

यीसु मसीह अपने इच्छा से हमरे पँचन खातिर मउत काहीं अपनाइन हीं, कि जउने हमहीं पँचन काहीं हरेकमेर के अधरम से छोड़ाय लेंय, अउर सुद्ध कइके अपने खातिर अइसन प्रजा बनाय लेंय, जउन निकहे-निकहे कामन काहीं करँइ के खातिर हरेक समय तइआर रहँय।

इब्रानियन 12:2

अउर बिसुआस के सुरुआत करँइ बाले, अउर ओही परिपूर्न करँइ बाले, यीसु के ऊपर हम पंचे ध्यान लगाए रही; जे उआ खुसी के खातिर जउन उनखे आँगे धरी रही हय, सरम के कउनव परबाह नहीं किहिन, अउर क्रूस के सजा काहीं सहि लिहिन, अउर जाइके परमातिमा के दहिने कइती सिंहासन माहीं बइठिगें हँय।

इब्रानियन 12:4

अउर तूँ पंचे पाप के बिरोध माहीं अइसन लड़ाई नहीं लड़े आह्या, कि तोंहईं पंचन काहीं आपन खून बहामँइ परा होय।

1 पतरस 2:24

ऊँ खुदय हमरे पंचन के पापन काहीं अपने देंह के ऊपर लए क्रूस माहीं चढ़िगें, जउने हम पंचे पाप के सम्बन्ध से पूरी तरह से मुक्त होइके, परमातिमा के नजर माहीं जउन निकहा हय, उहय करी; अउर उनहिन के मार खाँइ से तूँ पंचे चंगे भया हय।

1 पतरस 3:18

काहेकि मसीह घलाय हमरे पंचन के पापन के बदले माहीं, दुख उठाइन हीं, अरथात ऊँ निरदोस रहे हँय, तऊ हम पंचे जउन पापी रहेन हँय, हमरे खातिर एक बेरकी मरिगें, कि जउने हमहीं पंचन काहीं परमातिमा के लघे लइ आमँय। मसीह सारीरिक रूप से त मारे गें, पय आत्मिक रूप से जिआय दीनगें।