Ezekiyel 47:1 - Bible azumeina

¹ Sa máma mi hulongônï avun agre’â hi gong nga kud’ora hAlonid’ina. An gol wani, mbina nga mi djangî kä ad’u vun gonga abo ma yorogona kayam gong nga kud’ora hAlonid’a irat nabo ma yorogona. Mbina nga mi djangî kä kur gong ndata abo ma sutna, mi kal abo ma sutna hi yima ngal ahle suma ngat buzunina mi.

Ezekiyel 47:1 Iomraidhean Croise

Sawal la giled’a 46:5

Aluma nga, ni ma mbiyom nga mi le suma avo hurazina hAlonina tazi djivid’ina. Azì máma ni yima kal tegles ma aduk yi ma kak ma tetengâ hi ma sä akulo ma kal teglesîna.

Sawal la giled’a 87:7

Suma hle sawala ki suma lü ndjongâ a nga dala: Djivi manda pet ti tcholï ni kuruk ndak Siyon!

Isai 2:3

Andjaf suma ablaud’a a mba i kua, a mba dala: Agi mbeyegïya! Ei i djagei akulo yam ahinad’a hi Ma didinid’a, kur gong nga kud’ora hAlona hi Jakob-mid’a kayam mi had’ei gat mamba. Ar ei tid’i kur lovot mam mba mi tageizid’a. Kayam gata mba d’i tcholï ni Siyon, zlad’a hi Ma didinid’a mba d’i tcholï ni Jerusalem mi.

Isai 30:25

Kur bur ma ngol ma a mba tchim suma ma gongîyo suma fuyogei suma ndjola a dris kä na, toliyonda mba d’i djangî kä yam ahuniyô suma fuyogeina, kä yam yam ndindingâ mi.

Isai 55:1

Ma didina mi dala: Êhê, agi suma vunagi sona, agi pet mbeyegi ata mbina. Le sa nga ki va abom mbuo pî, agi mbeyegiya, agi guzugiya, agi tagiya. Agi mbeyegi ata süm guguzlud’a kambira bei beged’a bei gusa ba.

Jeremi 2:13

Kayam sum mana a le tchod’a yazi mbà. Nala, a aran an mala ni mbiyo ma lau ma arina na woyo, a ka golongeî suma ndak nga á ve mbina d’uo na kam kua kam kua ki tazi vazi mi.

Ezekiyel 40:6

Mi i avun agrek ma abo ma yorogonina. Mi djak akulo yam yima a djak kakulona, mi nga yima avun agre’îna. Fiyagam mba krovod’a ni metred’a hindi.

Ezekiyel 41:2

Yima a kal kuana bubuwamî metred’a vahl, gulumun mama ni metred’a mbà ki nusa abo hî abo hî mi. Hur gong nga ngola tata, fiyagat ni metred’a dok mbà, bubuwat ni metred’a dogo mi.

Ezekiyel 46:24

Sa máma mi dan ala: Wana natuguyo suma suma a mba le sunda kur gong nga kud’ora hAlonid’ina a mba yi hliwa ahle suma suma a mba hazi he d’a hawad’a kuana.

Ezekiyel 47:12

Andjaf agu ma vuta teteng mba mi wul avun toliyonda abo hî abo hî. Humam mba d’i so d’i, mba mi ba bei vuta d’i, mba mi vut ni tilâ ki tilâ, kayam mbiyo ma nga mi djangî woi kur gong nga kud’ora hAlonid’ina, nga mi i kä ad’umu. Vud’um mba d’i mbut ni tena hi sumina, humam mba d’i mbut ni kuma ma sut suma mi.

Ezekiyel 47:2

Sa máma mi ndan ndei abu avun agrek ma abo ma norîna, mi nguyun gulumuna gak avun agrek ma abo ma yorogona. An gol wani, mbina nga mi djang ngei abu abo ma sutna hi vun agrek mámina.

Joel 3:18

Kur bur máma süm guguzlud’a mba mi djangî kä yam ahuniyôna, ambira mba d’i djangî kä akulo yam yima ndingâ, toliyon nda Juda-d’a pet mba d’i lau mbina, mbina mba mi lawï kur gong nga kud’ora hi Ma didinid’a, mba mi rap yam hor ra Sitim-mba.

Zakari 13:1

Kur bur máma ir mbiyo ma laud’a mba mi mal lei á mbus tchod’a ki ndjendjed’a handjafâ hi David-na ki d’a hi suma Jerusalem-mid’a woyo.

Zakari 14:4

Kur bur máma mba mi tin asem yam ahina d’a Olif fa ngagad’a yam Jerusalem abo ma yorogonid’a. Ahina d’a Olif ndata mba d’i wak kä aduk mbà. Abot ma hina mba mi dadak kazigam abo ma norâ, ma hina mba mi dadak kazigam abo ma sutna mi. Hor ra ngola mba d’i ar adigaziya, mba d’i i irat abo ma yorogona kabo ma fladegena mi.

Zakari 14:8

Kur bur máma mbiyo ma he arid’ina mba mi djangî woi kur Jerusalem. Abom ma hina mba mi i iram kur apo d’a Matna abo ma yorogona, abom ma hina mba mi i iram kur alum ma ngol ma Mediterane-na abo ma fladegena mi, a mba le hina andol kawaliya.

Vama ndum mbeina 22:1

Malaikana mi tagan mbiyo alum ma ari ma nga mi wile d’igi kristala na na, nga mi djangî ata zlam mba amula hAlonid’a ki d’a hi Gor timinid’a,

Vama ndum mbeina 22:17

Muzu’â hAlonina katcha d’a telet awilid’a a dala: Ang mbeya! Sama huma, mi dala: Ang mbeya! Sama vunam sona, ar mi mbeya; sama min mbiyo ma arinina, a mba humzi ni hawa.