Lúcas 2:11 - Dupade Uruode

¹¹ Yojña omone u uje disabi basosi que iji dejai tuqué iji Belén, jnani bajai David idai. Enga uté u jne ujetiga uacaquetangóri tu. Enga yoquijnati Crísto upúsu, Yocangarádejnai.

Lúcas 2:11 Iomraidhean Croise

Génesis 3:15

A yipésu jne enga chequé, uhua uacamajo ñane. Jé cho uaté ape disi ejórique, bape disi ejórique, a ore cho damajo ome ñane to jne. A chise dínique to jne ujetiga uaté ape disi ejórique chĩro batoi ome dajadia te jne. Jé basa ga a agu uaté ape disi ejoi guídogoróraque to jne.–

Génesis 49:10

A ãrai bogué tiji gaté jne, enga obiréjna báringai eduguéjna cuchape ome bogué uaté. Enga a ca toc ujetiga pijnimé bogué tuaté iji bajmainie, jé iji bape disi ejode ore jmainie to rĩ, jé aja ujetiga bogué uaté gajnengoripísi di jne enga jé jogate uté jmanai iji deréjna pitade. Enga erámi unirisórone iji erámi údode jnese a ore cho deduguéjna cuchábi iji bogué isasṍri uté jne iji erámi údode jnese enga a ca ore chimoque iroquérique jeta ore dopísi quigode.

Sálmos 2:2

Peduguéjna cuchábode, jé aja ore ujode eduguéjna uñane ore iji erámi ore tagu Dupade uruode aja. Ga jé ore chuságaja uje ore pésu dáyipiedie ome re ga ore áyipie noñánguenie udire gajnesṍri u Pangarádejnai, jé aja edójnari peduguéjna uté to.

Isaías 9:6

¡Israélgosode á, pininaquei jogadi tu ome yoque uje quene disatique basosi que iji diri tudé á! Ga Dupade guẽrate disabi suté ome yoque. Ga a uté u jne ujeta yoco yoqueduguéjna cuchábi iji uté to. Enga a ore pésu uté i ueradéjnaringo jne ga íode u udojo jne: Cucha Pitijabátedatépisi u íode uñai. Ga íode uñai tu Payuquetotigué Omone Gajnengóri. Ga íode uñai tupo Yocai Togójmai to rĩ. Ga íode uñai u Peduguéjna Cuchape uje Pajesereringai Osṍri tu uté.

Matéo 1:16

Jacob uñai ujnacari cusapo rĩ enga i tu José. Enga José acoté tu María. Enga Jesús daté jé u uaté. Enga uaté abi Jesús upúsu Dupade uruode atatasórone jnani bajácho ore atatai Crísto, uje a chiqueta darasade ore jne.

Matéo 1:21

Enga a uaté abi base jne enga ẽ́care Jesús aja jne. Uté a chiqueta darasade ore jne gu iji ore isijnaringuéone.– (Jesús i qui tu piquetangore ome israélgosode ore uruode.)

Matéo 16:16

Mu Simón Pédro chajnai enga chojningame: –Crísto u ua, Dupade utocaidípisi. Dupa Uecai uté ujnacari tupo ua rĩ.–

Matéo 16:20

Iji udojo quigade ga Jesús cho dacadigode ore quique, ga chósi tome ore: –Jé ca angoñoma yu aja erámi jne uje Dupade utocaidi Crísto jé u yu.–

Lúcas 1:43

¿Jé gotique gu a uje babágui yu uje que yugúsiji cuchárique múñi? Mu a yocangarádejnai daté u ua jne.

Lúcas 1:69

Chisi ome Yoquiquetangóri tome yoque uje ujopíerãque. Enga Yoquiquetangóri uté gãrapi tu jnani bajai David.

Lúcas 2:26

Dupade Ujopié Espíritu Sánto chojningame Simeón: –A ca atobi jne. Mu a jé aságaja jne ujetiga amo baquetangóri to ujetiga yirógaja ua jne.–

Lúcas 2:4

Jecute José jnoji ore gari iji ore idai Nazaret uje déji ore uniri Galiléa. Enga chicáji ore idai uje i tu Belén uje déji puniri Judéa. Chamáñaje jnani bajai David ore batigade u gu uje José gãrapíode u ore.

Juan 1:41

Enga Andrés que chajirape cuchárique mu jĩraque chucué dajõrai Simón enga chojninga: –¡Yico judíode yoquijnati Mesías!– Enga ore ĩcarai Mesías u Crísto ome gréciagosode ore uruode.

Juan 1:45

Felipe jno enga chucué Natanael enga chojninga: –Yimóngo Dupade utocaidi que uje Moisés, Dupade uruode atatasórone proféta uñane ore urusarane ojningai tu. Enga uté i u Jesús uje dayé u José, nazarétgosi.–

Juan 11:27

Márta chojninga: –Ejẽ́, yangureta baruode, Yangaráni á. Enga yanguretápo báringai yoquijnati Crísto rĩ, jé aja báringai Dupade ape. Ua u uje Dupade chichagája yoque iji erámi tudé.–

Juan 20:31

Mu Jesús ipesútedatéode udore uje déji darujna aoi udé, purusãracho gu ujetiga anguretáyo Jesús úringai Dupade utocaite Crísto. Enga ujetiga anguretáyopo úringai Dupade Ape rĩ. Yigaidi tu gu ujetiga pucuecaringué eyúgojmai déji uaque to ome uacanguretigai iji Jesucrísto.

Juan 4:25

Chequé chojningame Jesús: –Yiraja uje a Dupade utocaidi Crísto di jne. Ujetiga e di enga a chuchẽre cuchade iji guesode ome yoque.–

Juan 4:42

Enga ore chojningame chequé: –Que gusu batatagode uté acho ome yoque ujetiga yanguretágo uté. Mu e yudúco uté acajnaquéode quigode to. Jecute yanguretágo úringai yoquijnati Crísto. Enga yirajágo uje jé ũrepise uje erámi unirisórone yoquiquetangóri u.–

Juan 6:69

Bacadigode uyoque e yanguretágo baruode enga yirajágo uje yoquijnati Crísto u ua. Enga Dupa uecai abi upo ua rĩ.–

Juan 7:41

Uñane ore chojninga: –Yoquijnati Crísto jé u.– Mu uñane ore chojninga: –A ca yoquijnati Crísto u go. ¿Ja yoquijnati Crísto tõrarásiji Galiléa jne a?

Héchos 10:36

Jesucrísto u uje di Dupade uruode údi ome jnani bajai Israel ape disi ejode uyoque ujetiga pajesereringai chise yoque ome adode. Mu que gusu israélgosode uje yocangarádejnai u Jesucrísto mu uté gajneque erámi jnese, jecute jé tiógara ujetiga ore cho dangarádejnai iji to iji erámi údode.

Héchos 13:23

Dupade jé urúo ome ore nanique uje a chisi ome israélgosode iquetangónique ome ore jne. Jecute Dupade ojningai piquetangore di iji yoque enga Jesús u. Enga gãrapi u yocayode jnani bajácho ore eduguéjna cuchábi David.

Héchos 17:3

Enga acajnaquéode quigode u Dupade uruode quigode uje judíode ijnati Crísto a di jne. Enga chejnáreque re iji erámi udojo. Mu udojo quigade enga toi, mu e ecápo rĩ iji datoringai quigade. Enga Páblo chojninga: –Dupade ojningai Crísto uté jé u Jesús uje yingome adode ome uaque.–

Héchos 2:36

Pédro qué chacate ore enga chojninga: –Jecute yipota ujetiga israélgosode uaque jnese uacarajáyo uje Dupade ipesute uaquei Jesús úringai datocaite Crísto. Yojningai u Jesús uté uje uacajóyoja curesei ica. Enga e Dupade pésu uté to ujetiga ore cho dangarádejnai iji jnese.–

Héchos 5:31

Mu Dupade e chosi iji gaté enga e chicháji dãrachua iji gaté. Pésu úringai yoqueduguéjna to. Que gusu udore mu pésapo úringai yoquiquetangore rĩ. Gaidi u gu ujetiga israélgosode chécãre dáyipie quigode ome Dupade ujetiga pĩroque ore isijnaringuéone.

1 Coríntios 15:47

Yirajágo uje jnani bajai pipesudíji jnumi enga uniri tu jnumi. Jé basa ga yirajágo uje gateminore jnani ejoi tuté. Enga Yocangarádejnai u uté.

Filipénses 2:11

Enga a ore chojninga jnese jne: "Yocangarádejna Jesucrísto." Enga Jesús gajnéone picotaquéo udore a gajnengóri u dayé Dupade to jne.

Filipénses 3:8

Cho ujetiga cuchade udore e que oréraque cusipise go ome yu. Mu cucha orerãi upúsu uje yiraja Yangarádejnai Jesucrísto. Jecute e yṍra cuchade udore. Chamáñaje yate bajade udore jnese chopise pasique ducaranone ome yu gu. Uje e yangureta Crísto uje cucha gose uté ome yu gu.

Colosénses 2:6

Yiraja uje uacasayo Yocangarádejnai Jesucrísto ome uacáyipiedie nanique. Jecute beyoi enga adotáyo uáguiji Crísto uté ejode to jne.

1 Juan 4:14

Enga jé uyoque u uje yimongopise Dupade Abi to nanique. Enga e yingongome ore jnese uje Yocai Dupade iroque uté aja erámone unojo gu ujetiga chiqueta yoque ome adode.

1 Juan 5:1

Ore jnese uje que ore chotigase Jesús úringai Crísto, uje Dupade utocaidi u uté, enga Dupade abode u udore ore. Jecucha ate to uje gosi chijnóra jnanírique, enga chijnorapo jnani tuté abode to rĩ.