Juan 4:21 - Dupade Uruode

²¹ Jesús chojningame chequé: –Yajéode u ujetiga anguretapise yuruode. Uje que qui u ujetiga acayoi cucarani uta jeoga acayóji Jerusalén ome uacajmapiedie ome Dupade. Uje a chise deréjnai jne ujetiga ore chicota Yocai Dupade iji dayaritígo jnese.

Juan 4:21 Iomraidhean Croise

Malaquías 1:11

Yanguresórone déji erámi údode jnese ga punirone unirisórone udore ore chijnorapise yu enga ore chĩ́care yi ueradéjnai uje ore catecã́ri yu. Enga ore gueranone inciénso ai uneréjnapise chise yu gatuaque uje ore chãru iji yiquei. Enga ore gueranone cucha uñane ome yu ueradéjnapise jnese.

Matéo 18:20

Adi jé upo rĩ uje a yanguresõre garósirigo ore cháta rágaja ñane ome yuruode. Garósi ore marínga, jé yugúsiji ore gari to.

Matéo 28:19

Boyo enga acayóji ayoréode iji punirone jnese. Enga apéso yunéningarique ome ore jnese, enga a ore changureta yu to jne. Jé u jne ujetiga óraño ore aja yodi jne ujetiga ore changureta yai Dupade, abi uyu, Ujopié Espíritu Sánto ore.

Lúcas 21:24

Uacuñéngo a déji jne ujetiga chuque uáguiji pocaningáringo. Mu a uacuñéngo dépoji jne rĩ ujetiga pisaque uáguiji ore jocaningane, ga ore chijna uágaja punirone uñéngo jnese. A purása quedéjnane ore sué jerusaléngosode gáyode jne ga a ducañerájma ore idai tuté iji ore jmainie jne jé aja ujeta Dupade chaquĩ́ra ore ome ore ájningáringo ome ore.

Juan 14:6

Jesús chajnai uruode enga chojninga: –Dajei jé u uyu. Enga cucha uréone, pucuecaringuei ore garani jé upo yu rĩ. Gusu panguretigai ome yu ujetiga gosi chise Yai.

Juan 16:2

Uje a ore eduguéjnane chijócãre uáguiji ore aquiningaméone. Enga cucha dacate gajnaréngone uñane a tṍraji dajñarenie ome uaque. Enga diga a ore pota chutígome uaque uje ore jos eti Dupade ajéo ome ore ujetiga ore chujé uaque.

Juan 16:32

A chise deréjnai jne, mu deréjnai uté e u ujetiga asícho uágaja uacajesúode erámio. Enga a ajíñoñome yu iji te jne. Mu que gusu yu iji te gotique, mu Yai u uje déji yari iji te.

Juan 4:23

A chise dínique, mu deréjnai e u ujetiga ũrepise Dupade adode gaisórone enga ore icotaquéode ome Dupade garanone u ore ajépisode. Chamáñaje Dupade ajegaidi u ujetiga yoquisocai u udé uje yicoi adode.

Juan 5:25

Jé ũrepise yu ome yuruode udojo: uje Dupade ojningai dire e di ujetiga pitoringai gajnesórone chudute Abi uyu yuruode. Ujetiga ore tangaripísi yuruode quigode enga a ore eca jne.

Juan 5:28

Ujetiga yuruode udojo chajuque uacagutedie mu cucha uñai qué déji uje a chise deréjnai jne ujetiga togode ore chudute yibijnane jnese.

Héchos 6:14

Yudúco to uté uruode uje chiese nazarétgosi Jesús ucácasicá a chajningarase Dupade iguíjna cuchábi jne. Mu que gusu udore go, mu chiese Jesús ajegaidi tu to ujetiga yecãco yoquisocade ome Dupade enga yiyágo Moisés urusarane quigode uje Moisés chacate yógome nanique.–

Efésios 2:18

Jecute ome Crísto adode ga e guesája Dupade yui ome uyoque jnese - ujetiga judíode u, jeoga purása quedéjnane u, mu yoquisocai jé chojmara ujetiga yico Yocai Dupade uté. Chamáñaje chojmara Dupade Ujopié uaté gu, enga uaté u uje déji uyoque jnese.

Efésios 3:14

Uje yáyipie doi cucha pitijabádode udojo jnese uje déji uyoque uje Jesucrísto, yitojmárangopísiji jnumi, enga jé u uje yichaga yigataidie aja jnumi iji Yocai Dupade uté iquei ujetiga yijócha ajei údi ome uaque.

1 Timotéo 2:8

Jecute yajéode u ujetiga Dupade anguresórone jnanío iji erámi jnese ore catecã́ri Dupade. Enga ore chejna daguesi ome dacatecãraitigade ujetiga ca cucha gajnarétique déji ore ajéode, enga ujetiga icha ore ajéode ome pibotaquéode, pajei dotáningane ore jnese.

1 Pédro 1:17

Ujetiga yojnicome Dupade: "Yapa Dupade á," ga yicoi enga yipéco uté ojningane cucha ome yoque. Uje Dupade a u jne ujetiga chajire ayoré chojmarai adode aja quigode, enga a ca chapuse yógaja. Jecute yicoi enga yangácoi Dupade jé aja deréjnane udojo uje yugúcoi erámi udé.

Apocalípsis 21:22

Yajire, mu que yimo Dupade iguíjnarique iji idáidatéi tuté ujetiga ore catecã́ri Dupade iji. Chamáñaje Yocangarádejnai, Dupa Pujnuéngaisṍre, Jesús, uje gajnua u áyasa pẽrapaide chuguéraque, ore charidi upúsu idáidatéi údode jnese gu ujetiga picatecãraite ore iji udore údode jnese.